Zelohpehat É Byìzô Pê É Silî Wunlî Maumyî
36
Yosep up mâ é a-myû koq nghut é, Manase é yhang shu, Mahkira é yhang zo Gile-at mai nyi gyó lo é yhûmhtu ushuq pé gi, Mosheq eq Isira-elaq a-myû up mâ é a-myû koq yhûmhtu ushuq pê chyáng lé kômù, 2 “Isira-elaq byu pé lé, hkyîn shosé shê mù silî wunlî maumyî gàm byi râ matú, ngá é yhûmsîng nang lé haû Yhûmsîng Garai mai hkunmó hkyô é hkûn, Yhang gi, ngá-nhûng é gu-mang Zelohpehat é byìzô pé lé, yhâng é silî wunlî maumyî byi râ matú le, Yhang nang lé hkunmó hkyô tô é nghut lhê. 3 Ahkuî, yhángmòq, Isira-elaq a-myû gótû up mâ é yùqge chyáng ló é nghut jáng, yhángmòq é silî wunlî maumyî lé ngá-mòq é îchyí îwâ pê é silî wunlî maumyî mai yu htoq luî, yhángmòq ló é a-myû up mâ é silî wunlî maumyî má byî lhôm pyám râ dùt bê nghut ri. Haú jáng, ngá-mòq lé byî é silî wunlî maumyî gi, yom byùq râ za nghut bê. 4 Hau htoq agó, Isira-elaq byu pê é matú gabú tut htê mùt myhíng zànwut jé jáng, yhángmòq é silî wunlî maumyî gi, yhángmòq ló é a-myû up bâng é dùt byùq râ nghut mù, ngá-mòq é îchyí îwâ up bâng é silî wunlî maumyî mai yhángmòq é silî wunlî maumyî yom byùq râ za nghut lhê.” ga taî akô nghut ri.5 Haú hkûn, Mosheq gi, haû Yhûmsîng Garai hkunmó hkyô é eq rajung za, Isira-elaq byu pé lé, “Yosep é awùt ashín a-myû up bang taî é dang gi, jô ri. 6 Zelohpehat é byìzô pê é matú, haû Yhûmsîng Garai hkunmó hkyô é gi, shí dông nghut ri; yhángmòq gi, yhángmòq é yhâng wâ é a-myû koq má ló râ nghut jáng, yhángmòq myìt nguì sû ó yùq chyáng nghut kôle ge ló kôrâ nghut lhê. 7 Isira-elaq byu pê é silî wunlî maumyî lé gi, a-myû up ra-up mai ra-up shut ge htòt râ a nghut; hkâsu mù gâ le, Isira-elaq byù yùq hkangmó gi, yhángmòq é îchyí îwâ up bâng é silî wunlî maumyî lé wú zúng nyî ra râ nghut lhê. 8 Isira-elaq byù a-myû koq hká koq mâ é nghut kôle, silî wunlî maumyî sing é myiwe zo gi, Isira-elaq byù yùq hkangmó mai yhángmòq é îchyí îwâ up bâng é silî wunlî maumyî wó sîng râ matú, yhâng é îchyí îwâ pê é a-myû koq mâ é su chyáng za ló ra râ nghut lhê. 9 Haû mù, silî wunlî maumyî hkâ le, a-myû up ra-up mai gótû a-myû up shut ge htòt râ a nghut; hkâsu mù gâ le, Isira-elaq a-myû up hkangmó gi, yhángmòq sing é silî wunlî maumyî lé wú zúng nyî ra râ nghut lhê.” ga dangmó hkyô ri.
10 Haû mù, Zelohpehat é byìzô pé gi, haû Yhûmsîng Garai mai Mosheq lé hkunmó hkyô é eq rajung za kut bekô nghut ri. 11 Zelohpehat é byìzo Mala, Tiriza, Hogala, Milihka eq No-aq pé gi, yhángmòq é yhâng wâ hkyam shut mâ é yùqzô pé eq yu lhûm akô nghut ri. 12 Yháng nhiktâng wuì gi, Yosep é yhang zo Manase é awùt ashín a-myû koq bang eq yu lhum kô é nghut mù, yhángmòq é silî wunlî maumyî gi, yhángmòq é îwâ up eq a-myû koq má xoq jòq to bê nghut ri.
13 Shí pé gi, Yerihko wà tû-tap, Yodan làng yàm mâ é Moba pá má, haû Yhûmsîng Garai mai Mosheq dông Isira-elaq byu pé lé byî tô é cháng ra râ târâ pé eq hkunmó pé nghut ri.