Lewiq Byu Pé Lé Gàm Byî É Wà Pé
35
Yerihko wà tû-tap, Yodan làng yàm mâ é Moba pá má, haû Yhûmsîng Garai gi, Mosheq lé, 2 “Isira-elaq byu pé mai, yhángmòq sing é silî wunlî maumyî má, Lewiq byu pé lé, nyì râ wà pé eq hau pê é awui ayàm má mhan yô pé byi râ matú, yhángmòq lé hkunmó hkyó aq. 3 Haú hkûn, Lewiq byu pé gi, yhángmòq nyì râ wà pé wó é htoq agó, yhángmòq é no sau bainám pé eq gótû shigu gaunyhaú pê é matú mhan yô wó kôrâ nghut lhê.4 Lewiq byu pé lé núngmòq byî é wà mó pê é awui ayàm mâ é mhan yô pé gi, wàhkûm mai hî luî rahkyîng dúng dúng làm ra dùt lhê. 5 Wà lé agùng to mù, wà shinggan shut má, buìhtoq hkyam shut í hkyîng dúng, maupyî hkyam shut í hkyîng dúng, buìwàng hkyam shut í hkyîng dúng, mautsûng hkyam shut í hkyîng dúng kê yù râ dùt lhê. Haú hkûn, yhángmòq gi, wà hkangmó é matú haú pé má mhan yô wó kôrâ nghut lhê.
Hpang Hkaû Râ Wà Mó Pé
6 Lewiq byu pé lé núngmòq byî é wà pé mâ é hkyuq wâ gi, byù sat záng sû hpang hkaû râ matú, hpang hkaû wà mó pé dùt râ nghut lhê. Hau htoq agó, yhángmòq lé 42 wâ jàt byi râ dùt lhê. 7 Haû mù, núngmòq gi, Lewiq byu pé lé, wà bànshoq 48 wâ eq haú pê é mhan yô pé lé byi ra râ nghut lhê. 8 Isira-elaq byu pé sing é maumyî mai, Lewiq byu pé lé núngmòq byî é wà pé lé gi, up hkangmó mai maumyî làm jáng lam é su gàm byi mù, maumyî chyap jáng chyap é su gàm byi ra râ nghut lhê. Wà myô é up mai gi, wà myo myo yu htoq mù, wà shaû é up mai gi, wà shau za yu htoq râ dùt lhê.” ga taî ri.
9 Hau htâng, Yhûmsîng Garai gi, Mosheq lé, 10 “Isira-elaq byu pé lé dang nyô mù, yhángmòq lé, ‘Núngmòq, Yodan làng hé hpoq mâ é Hkanan mau shut dàp ló kô é hkun, 11 byù záng sat sû wó hpang hkaû râ matú, núngmòq é hpang hkaû wà mó pé hkyin htoq to râ dùt lhê. 12 Wà haú pé gi, lató hpuq râ su chyáng mai hpang hkaû râ jowò dùt râ nghut mù, byù sat mara hûn hui sû, shiwa hpúng é hí má târâ a jéyáng shi-má, a shi byùq râ matú nghut lhê. 13 Núngmòq byî é wà hkyuq wâ gi, núngmòq é hpang hkaû wà mó dùt râ nghut lhê. 14 Núngmòq é hpang hkaû wà mó pé dông, Yodan làng shí hpoq shut sum wâ byi mù, Hkanan mau má sum wâ byi keq. 15 Wà mó shî hkyuq wâ gi, Isira-elaq byu pê é matú le, yhángmòq chyáng bo nyì bang eq byù bíng pê é matú le, hpang hkaû jowò dùt râ nghut lhê; byù záng sat é sû ó yùq le, haú má wó hpang hkaû râ nghut lhê.
16 Nghut kôlhang, jòqtoq ze èq byù rayùq lé shî shoq bàt é nghut jáng, haú yùq gi, byù sat sû nghut bê; byù sat sû gi, sat pyâm é hui ra râ nghut lhê. 17 Byù ge wó dú sat é lùqgòk chung to mù, byù rayùq lé bàt sat pyâm é nghut jáng, haú yùq gi, byù sat sû nghut bê; byù sat sû gi, sat pyâm é hui ra râ nghut lhê. 18 Byù ge wó nhuq sat é sik ze èq byu rayùq lé nhuq sat é nghut jáng, haú yùq gi, byù sat sû nghut bê; byù sat sû gi, sat pyâm é hui ra râ nghut lhê. 19 Lató hpuq é sû gi, byù sat sû lé sat pyám râ dùt lhê; yhang gi, byù sat sû lé hui eq yhang sat pyám ra râ nghut lhê. 20 Rayùq yùq lé, nhik nô mù, dûn hpyit hkyô sat pyâm é nghut jáng le, haq gyám luî, rajung jûng èq sat pyâm é nghut jáng le, 21 gyè myìt bò mù, yhâng é lòq tsup èq góyùq lé htuî sat é nghut jáng le, haú yùq gi, sat pyâm é hui ra râ nghut lhê; haú yùq gi, byù sat sû nghut ri. Lató hpuq râ sû gi, byù sat sû haú yùq lé hui eq yhang, sat pyám ra râ nghut lhê.
22 Nghut kôlhang, gyè myìt a bo é za záng dûn hpyit hkyô sat é nghut jáng le, gyám luî a nghut é za, rajung jûng èq záng dú sat é nghut jáng le, 23 byù lé a myang é za, byù ge wó nhê sat é lùqgòk lhoqhkyó luî, byù lhoqnhê sat pyâm é nghut jáng le, haû gi, gyè myìt dông kut é le a nghut, góyùq shî shoq shi-ngé ngé kut é le a nghut é yánmai, 24 shiwa hpúng gi, yhángmòq é cháng ra târâ shí pé má cháng luî, byù sat manglàt wó sû eq lató hpuq é su é gyoro má hpyit byi ra râ nghut lhê. 25 Shiwa hpúng haû gi, byù sat manglàt wó sû lé, lató hpuq é su chyáng mai mâgum yù mù, yhang hpang hkaû jang nghut é hpang hkaû wà mó má dum taû nhang kat ra râ nghut lhê. Haú yùq gi, chyoiyúng namngón xû but huî é hkyangjong mó shi byùq é hkûn jé shoq haú má nyi nyì ra râ nghut lhê.
26 Nghut kôlhang, byù sat manglàt wó sû gi, yhang hpang hkau nyi é wà mó mai htoq é nghut mù, 27 lató hpuq é sû gi, yhang lé wà mó hau é shinggan má myàng luî, haú hkûn yhang haû byù sat manglàt wó sû lé sat pyâm é nghut jáng, yhang gi, byù sat manglàt a wó é nghut lhê. 28 Haû byù sat manglàt wó sû gi, haû hkyangjong mó shi byùq é hkûn jé shoq hpang hkaû wà mó haú má nyi nyì ra râ nghut lhê; hkyangjong mó haû shi byùq jáng za shèq, byù sat manglàt wó sû haû, yháng nyi é jowò má ge taû ló râ nghut lhê.
29 Shî gi, núngmòq nyi é jowò hkangmó má, jé lô râ pyàt bán hkangmó châng nyì râ é htan é târâ nghut lhê.
30 Byù sat sû ó yùq lé nghut kôle, sat é sàksé hkám bang nyì jáng za shèq, sat pyâm é hui ra râ nghut lhê. Nghut kôlhang, sàksé rayùq za hkâm é nghut jáng gi, sat pyâm é hui ra râ a nghut.
31 Byù sat luî, shî gíng bê su chyáng mai manglàt hpau hkâhàp yù kó. Haú yùq gi, sat pyâm é hui ra râ nghut lhê.
32 Haû hpang hkaû wà mó má hpang jé bê su é matú, hkyangjong mó a shi byùq shi-má, yhâng é nyì jowò má wó dum taû ló râ manglàt hpau hkâhàp yù kó.
33 Núngmòq nyi é maumyî lé haû sû é hkyo èq agòt a-û hkâkut kó. Byù sat sui gi, maumyî haú lé agòt a-û dùt nhang lhê; suí shun é maumyî haú lé, byù sat sû haú yùq é suî èq za a nghut jáng ge wó lhoq sanséng râ a nghut. 34 Núngmòq nyi é eq Ngò nyi é maumyî haú lé agòt a-û hkâkut kó; hkâsu mù gâ le, Ngò, Yhûmsîng Garai gi, Isira-elaq byu pê chyáng nyi nyi é nghut lhê.’ nghû àq.” ga taî ri.