<<    <     Yoshuq     22     >    >> 
Buìhtoq Hkyam Mâ É A-myû Up Pé Lé Yhûm Taû Ló Nhang É Hkyô
22
Hau htâng, Yoshuq gi, Rubin up, Gat up eq Manase koq rahkyam lé ji tsîng yù mù, 2 yhángmòq lé, “Núngmòq gi, haû Yhûmsîng Garaî é duìnhâng zoshâng Mosheq hkyô tô é hkunmó bànshoq lé châng kut bekô nghut é htoq agó, ngò hkyô tô é hkunmó hkangmó lé le cháng bekô nghut ri. 3 Núngmòq gi, ahkyíng myáng myáng, hkû-nyí jé shoq, núngmòq é gu-mang wuì lé a tô pyâm to kô é za, núngmòq é Garai Gasang nghut é, haû Yhûmsîng Garai mai núngmòq lé hkyô tô é hkunmó lé, rago cháng bekô nghut ri. 4 Ahkuî kúm gi, núngmòq é Garai Gasang nghut é, haû Yhûmsîng Garai danghtum htûm tô é eq rajung za, núngmòq é gu-mang wuì lé, Yhang nguì ngón yùqyò hkyô byi bê nghut mù, núngmòq gi, Yodan làng hé hpoq má, haû Yhûmsîng Garaî é duìnhâng zoshâng Mosheq byî tô é núngmòq é yhum mau shut dum taû ló keq hkoi. 5 Nghut kôlhang, haû Yhûmsîng Garaî é duìnhâng zoshâng Mosheq mai, núngmòq lé, núngmòq é Garai Gasang nghut é, haû Yhûmsîng Garai lé chyitdàp mù, Yhâng é hkyô hkangmó má châng luî, Yhâng é hkunmó pé lé châng kut mù, Yhang lé lhumzuî nyì luî, núngmòq é i-myìt nhiklhum bànshoq eq núngmòq é i-myìt sô lhum gón èq, Yhang lé dójaú nyî keq ga hkyô tô é hkunmó eq târâ lé, rago châng nyi keq.” gâ taî ri.
6 Hau htâng, Yoshuq gi, yhángmòq lé shimân byi mù, nhang kat bê nghut ri. Yhángmòq gi, ó le ô é yhûm shut taû ló bekô nghut ri. 7 (Manase koq rahkyâm é matú silî wunlî maumyî gi, Bashan mau má Mosheq èq byî to bê nghut ri; rahkyâm é matú gi, yhángmòq é gu-mang wuì eq rahá, Yodan làng buìwàng hkyam shut Yoshuq èq byî to bê nghut ri.) Yhángmòq lé, Yoshuq, yhûm shut taû ló nhang é hkûn, yhang shimân dang taî é gi, 8 “Núngmòq gi, sùtzè myo myo, shigu gaunyhaú myo myo, ngùn, hîng, gyi, jòqtoq eq mèbu myo myo eq yhûm shut taû ló mù, núngmòq é gye pê chyáng mai wó sing yu lo é zè pé lé, núngmòq é gu-mang wui eq ló gam chung keq.” gâ ri.
9 Haû mù, Rubin up, Gat up eq Manase koq rahkyam gi, Mosheq dông mai haû Yhûmsîng Garaî hkunmó hkyô tô é eq rajung za, yhángmòq wó sing yù bê maumyî nghut é Gile-at shut dum taû ló râ matú, Hkanan mau mâ é Shilo wà mó má Isira-elaq byu pê chyáng mai htoq ló bûm bekô nghut ri.
10 Rubin up, Gat up eq Manase koq rahkyam gi, Hkanan mau, Yodan làng yàm mâ é Gelilot má jé kôjáng, Yodan làng yàm má, kô hkìk é hkungga gyàp ralhum saî akô nghut ri. 11 Isira-elaq byu pé gi, yhángmòq é mau hkyam shut, Rubin up, Gat up eq Manase koq rahkyam bang mai, Hkanan maukyo, Yodan làng yàm mâ é Gelilot má hkungga gyàp saí kô é hkyô lé wó gyo kôjáng, 12 yhángmòq lhúnglhâng bang majan toq râ matú, Shilo wà mó má chôm zùp zing bekô nghut ri.
13 Haû mù, Isira-elaq byu pé gi, hkyangjong Ele-aza é yhang zo Hpinehasa lé, Rubin up, Gat up eq Manase koq rahkyam bang nyi é Gile-at mau shut nhang kat akô. 14 Hau htoq agó, yhángmòq gi, yhang eq rahá, Isira-elaq akoq pé mâ é yhûmhtu hkangmó mâ é ushuq pé nghut é, Isira-elaq up hkangmó mâ é zaugun wuì raxê yùq lé bo nhang kat akô nghut ri.
15 Haú bang gi, Rubin up, Gat up eq Manase koq rahkyam bang nyi é Gile-at mau má ê jé kômù, yhángmòq lé, 16 “Yhûmsîng Garaî é shiwa byù hpúng gón mai lé taí nhang é gi, ‘Núngmòq gi, haî mù luî, îsû é ashop é múzó kut mù, haû Isira-elaq byu pê é Yhûmsîng Garai lé mara shut akô lhú? Haî mù luî, núngmòq é matú hkungga gyàp saî é dông, haû Yhûmsîng Garai lé gumlau toq kô é lhú? 17 Pe-ora má shut é mara gi, a gé shi kó lhí? Haû Yhûmsîng Garaî é shiwa byu pê chyáng wúm gyó bê nghut kôle, ngá-nhúng gi, mara haú lé, hkû-nyí jé shoq, yhûmsing gùng yhûmsîng a wó lhoqsân pyám shî é nghut lhê mhaî! 18 Ahkuî, núngmòq gi, haû Yhûmsîng Garaî chyáng mai lhik ló bekô râ lhí? Hkû-nyí, núngmòq, haû Yhûmsîng Garai lé gumlau toq kô é nghut le gi, nàpmá, Isira-elaq shiwa byù bànshoq bang lé, Yhâng nhikmó-yo râ nghut lhê. 19 Núngmòq sing é maumyî a sansêng é nghut jáng, haû Yhûmsîng Garaî é sàksé zúm jòq jang nghut é Yhûmsîng Garaî é maumyî shut dàp lé lô mù, ngá-mòq eq rahá maumyî lé sîng keq. Nghut kôlhang, ngá-nhûng é Garai Gasang, haû Yhûmsîng Garaî é hkungga gyàp mai lai luî, núngmòq é matú gótû hkungga gyàp saî yu é dông, Yhûmsîng Garai lé le, ngá-mòq lé le, gumlau hkâtoq kó. 20 Zera é yhang zo Ahkan mai, lhoqhten pyám râ zè pé lé wó sing yu é eq séng luî, mara shut é hkûn, Isira-elaq a-myû gón má nhikmó-yo hkyô jé é a nghut kó lhí? Yhang kut shut é marâ é yánmai, yhang rayùq baú za shi byùq é a nghut.’ gâ akô.” ga taî akô nghut ri.
21 Haú hkûn, Rubin up, Gat up eq Manase koq rahkyam mâ é bang gi, Isira-elaq a-myû koq pé mâ é ushuq pé lé, 22 “Wum-o a-tsam mó bò Sû, Garai Gasang, haû Yhûmsîng Garai! Wum-o a-tsam mó bò Sû, Garai Gasang, haû Yhûmsîng Garai! Yhang sê nyi lhê! Isira-elaq byu pé sé sháng gàq ô! Ngá-mòq gi, haû Yhûmsîng Garaî é jì-no a gyo é za, gumlau toq é nghut jáng, hkû-nyí yhang, ngá-mòq lòm zo sháng gàq. 23 Ngá-mòq gi, haû Yhûmsîng Garaî chyáng mai lhik ló byùq râ matú le, myi nyhé hkungga, gùqzò hkungga eq zùmhkaû hkungga pé nhông byi râ matú le, hkungga gyàp lé saî é nghut jáng, haû Yhûmsîng Garai yhang, ngá-mòq lé dam byi sháng gàq.
24 Haú dông a nghut! Ngá-mòq îsu kut é gi, htângnùng má, núngmòq é awùt ashín pé mai, ngá-mòq é awùt ashín pé le, ‘Núngmòq gi, Isira-elaq byu pê é Garai Gasang, haû Yhûmsîng Garai eq haî sêng akô lhú? 25 Haû Yhûmsîng Garai gi, Rubin up eq Gat up nghut é núngmòq eq ngá-mòq é gyoro má, Yodan làng lé maukyo kut to bê nghut ri; núngmòq gi, Yhûmsîng Garai eq haî a séng kó.’ ga taî kôrâ lé gyùq é yánmai nghut lhê. Haû mù, núngmòq é awùt ashín pé mai, ngá-mòq é awùt ashîn pé lé, haû Yhûmsîng Garai lé a gyùq kyûm nhâng kó âbe nghu é ru nghut lhê.
26 Hau é yánmai, ngá-mòq gi, ‘Myi nyhé hkungga eq sôdun hkunggâ é matú a nghut é za, hkungga gyàp ralhum saí sháng.’ nghû hpyê lhûm é nghut lhê. 27 Haû gi, ngá-mòq mai, haû Yhûmsîng Garaî é chyoiyúng jowò má, ngá-mòq é myi nyhé hkungga eq le, nhông jau hkungga eq zùmhkaû hkungga eq le Yhang lé wó noqkuq ra matú, núngmòq, ngá-mòq eq htângnùng lhê é zodù wui é gyoro má masàt sàksé ru nghut lhê; haû mù, htângnùng lé, núngmòq é awùt ashín pé mai, ngá-mòq é awùt ashîn pé lé, ‘Núngmòq gi, haû Yhûmsîng Garai eq haî a séng kó.’ ga a wó taí lo kôrâ nghut lhê.
28 Haû mù, ngá-mòq gi, ‘Ngá-mòq lé nghut nghut, ngá-mòq é awùt ashîn pé lé nghut nghut, yhángmòq mai haû su ga taî lò kôjáng, ngá-mòq é îchyí îwâ pé saî tô é haû Yhûmsîng Garaî é hkungga gyàp zòng lé wú keq; haû gi, myi nyhé hkungga eq sôdûn é matú a nghut é za, núngmòq eq ngá-mòq é gyoro má sàksé nghut nyi lhê nghû tû taí râ.’ nghû tû taî râ nghut lhê.
29 Haû Yhûmsîng Garaî é sàksé zúm hí má jòq é, ngá-nhûng é Garai Gasang, haû Yhûmsîng Garaî é hkungga gyàp mai lai luî, myi nyhé hkungga, gùqzò hkungga eq sôdun hkungga pê é matú, gótû hkungga gyàp saî é dông, haû Yhûmsîng Garaî lé gumlau toq mù, Yhâng chyáng mai lhik ló byùq é hkyô gi, hkû-nyí, ngá-mòq eq wê gâng nyì sháng gàq.” ga taî akô nghut ri.
30 Hkyangjong Hpinehasa, shiwa byù hpúng mâ é zaugun sûwún wuî eq Isira-elaq akoq pé mâ é ushuq pé gi, Rubin up, Gat up eq Manase koq rahkyam pé taî é dang lé wó gyo kôjáng, gyai gyô gabú bekô nghut ri. 31 Hkyangjong Ele-aza é yhang zo Hpinehasa gi, Rubin up, Gat up eq Manase koq rahkyam pé lé, “Shi hkyô má, núngmòq, haû Yhûmsîng Garai lé a shut kó nghut é yánmai, haû Yhûmsîng Garai gi, ngá-nhúng eq rahá nghut nyi é hkyô lé, hkû-nyí ngá-mòq sé bê. Núngmòq gi, Isira-elaq byu pé lé, ahkuî, haû Yhûmsîng Garaî lòq mai hkyi yù bekô nghut ri.” ga taî ri.
32 Hau htâng, hkyangjong Ele-aza é yhang zo Hpinehasa eq zaugun sûwún wuî gi, Gile-at mâ é Rubin up, Gat up pé eq huî lhûm é jang mai, Hkanan mau shut dum taû jé ló kômù, Isira-elaq byu pé lé haú hkyô ló taî kyô akô nghut ri. 33 Isira-elaq byu pé gi, haû hkyô lé wó gyo kôjáng, gyô gabú kôluî, Garai Gasang lé hkya-ôn akô; haû mù, yhángmòq gi, Rubin up eq Gat up pê é mau lé, majan toq mù, ê hpyoq pyám râ hkyô lé, a taí lo kó nghut ri.
34 Haû mù, Rubin up eq Gat up pé gi, hkungga gyàp haú lé, “Haû Yhûmsîng Garai gi, Garai Gasang nghut é hkyô lé shit é, ngá-nhûng é gyoro má sàksé nghut ri.” ga myhîng tô akô nghut ri.