<<    <     Yoshuq     21     >    >> 
Lewiq Up Lé Gàm Byî É Wà Mó Pé
21
1-2 Lewiq up mâ é ushuq pé gi, Hkanan mau mâ é Shilo wà mó má nyi tô é, hkyangjong Ele-aza, Nun é yhang zo Yoshuq eq gótû Isira-elaq a-myû up pê é zaugun sûwún wui pê chyáng ê kômù, yhángmòq lé, “Ngá-mòq nyì râ wà pé eq ngá-mòq é shigu gaunyhaú rém râ no‑mhan yò pé lé gàm byi râ matú, haû Yhûmsîng Garai gi, Mosheq dông hkunmó hkyô to bê nghut lhê.” ga taî akô. 3 Haû mù, Isira-elaq byu pé gi, haû Yhûmsîng Garai mai hkunmó hkyô tô é eq rajung za, Lewiq byu pé lé, a‑ô mâ é wà pé eq yhángmòq é silî wunlî maumyî mâ é no‑mhan yò pé byi akô nghut ri.
4 Sânghi nghû râ hkyîn shosé gi, Kohat koq mâ é yhûmhtu ralhûm htâng ralhûm é matú âng ri. Hkyangjong Arun é awùt ashín pé nghut é Lewiq up mâ é Kohat koq bang lé, Yudaq up, Sime-on up eq Ben-yamin up bâng é wà mó raxe sum wâ gàm byi akô nghut ri. 5 Myìt tô é Kohat é awùt ashín pé gi, Ehprim up, Dan up eq Manase koq rahkyam bâng é wà mó raxê wà lé myang yu akô nghut ri.
6 Gerishon é awùt ashín pé gi, Yisahka up, Asheri up, Naphtali up eq Bashan mau mâ é Manase koq rahkyam bâng é wà mó raxe sum wâ lé myang yu akô nghut ri.
7 Merari é awùt ashín pé gi, yhûmhtu má chyáng luî, Rubin up, Gat up eq Zebulun up bâng é wà mó raxe í wâ lé myang yu akô nghut ri.
8 Haû mù, Isira-elaq byu pé gi, haû Yhûmsîng Garai mai Mosheq dông hkunmó hkyô tô é eq rajung za, Lewiq byu pé lé, hkyîn shosé shê mù, wà mó haú pé eq yhángmòq é no‑mhan yò gàm byi bekô nghut ri.
 
9 Yhángmòq gi, Yudaq up eq Sime-on up bâng chyáng mai, a‑ô má myìng lâng tô é wà mó pé lé myang yu akô nghut ri. 10 (Wà mó haú pé lé gi, Lewiq up, Kohat koq bang le nghut é, Arun é awùt ashín pê é matú masàt byî akô nghut ri; haî mù gâ le, sânghî é hkyîn shosé gi, yhángmòq chyáng âng é yánmai nghut ri.)
11 Haú bang gi, Yudaq bum mau mâ é Hebron le gâ é Kiri-at Araba eq hau é awui ayàm mâ é no‑mhan yò lé, yhángmòq lé byî akô. (Araba gi, Anak é îchyí îwa nghut ri.) 12 Nghut kôlhang, wà mó hau é nàm mâ é yò pé eq hau é awui ayàm mâ é wà pé lé gi, silî wunlî maumyî dông, Yehpuna é yhang zo Hkalep lé byî to gû nghut ri.
13 Haû mù, hkyangjong Arun é awùt ashîn pé lé gàm byî é wà mó gi, byù záng sat é sû hpang hkaû râ jang nghut é Hebron wà mó le, Lipna, 14 Yatira, Eshitemo-a, 15 Holon, Debira, 16 Ayin, Yuta, Bet Shemesha wà mó le, gau wâ eq yhángmòq é no‑mhan yò pé nghut ri. Hau pé gi, Yudaq eq Sime-on up bâng chyáng mâ é nghut ri. 17 Hau htâng, Ben-yamin up bâng chyáng mâ é lé gi, Gibe-on, Geba, 18 Anahtot, Alamon wà mó myi wâ eq yhángmòq é no‑mhan yò pé lé byî akô nghut ri.
19 Haû mù, Arun é awùt ashín hkyangjông pé wó yu é pé gi, wà mó bànshoq raxe sum wâ eq yhángmòq é no‑mhan yò pé nghut ri.
 
20 Myìt gyó tô é Lewiq up, Kohat koq mâ é bang lé masàt byî é, Ehprim up mâ é wà mó pé gi, 21 byù záng sat é sû hpang hkaû râ jang nghut é, Ehprim bum mau mâ é Shehkem wà mó le, Gezera, 22 Kibizim eq Bet Horon wà mó le, myi wâ eq yhángmòq é no‑mhan yò pé le bo ri. 23 Hau htoq agó, Dan up mâ é Elateke, Gibehton, 24 Aiyalon, Gahta Rimon wà mó myi wâ eq yhángmòq é no‑mhan yò pé lé le wó yu akô. 25 Hau htoq agó, Manase up rahkyam bâng chyáng mâ é Tanak, Gahta Rimon wà mó í wâ eq yhángmòq é no‑mhan yò pé lé le wó yu akô.
26 Haû mù, myìt gyó tô é Kohat koq bang gi, bànshoq raxê wà eq yhángmòq é no‑mhan yò pé wó yu akô nghut ri.
 
27 Gerishon pé le nghut é, Lewiq akoq pé lé gàm byî é wà mó pé gi, Manase koq rahkyam bang eq séng é, Bashan mau mâ é byù záng sat é sû hpang hkaû râ jang nghut é Golan le, Be Eshitera le, wà mó haû í wâ eq yhángmòq é no‑mhan yò pé nghut ri; 28 hau htoq agó, Yisahka up mâ é Kishi-on, Daberat, 29 Yarimut, En Gannim wà mó myi wâ eq, yhángmòq é no‑mhan yò pé le; 30 Asheri up mâ é Mishala, Apdon, 31 Helakat, Rehoba wà mó myi wâ eq, yhángmòq é no‑mhan yò pé le; 32 byù záng sat é sû hpang hkaû râ jang nghut é, Naphtali up má bo é, Galile mau mâ é Kedesha wà mó le, Hammot Dora eq Karitan wà mó le, sum wâ eq yhángmòq é no‑mhan yò pé le nghut ri. 33 Haû mù, Gerishon koq bang gi, bànshoq raxe sum wâ eq yhángmòq é no‑mhan yò pé lé wó yu akô nghut ri.
 
34 Myìt gyó tô é Lewiq up mâ é, Merari koq bang lé byî é wà mó pé gi, Zebulun up mâ é Yoknam, Karita, 35 Dimna, Nahala wà mó myi wâ eq yhángmòq é no‑mhan yò pé le, 36 Rubin up mâ é Bezera, Yahazi, 37 Kedemot, Mehpat wà mó myi wâ eq yhángmòq é no‑mhan yò pé le, 38 Gat up má bo é, byù záng sat é sû hpang hkaû râ jang nghut é Gile-at mau mâ é Ramot wà mó eq, Mahana-im, 39 Heshibon, Yazera wà mó myi wâ eq yhángmòq é no‑mhan yò pé le nghut ri. 40 Haû mù, myìt gyó tô é Lewiq up mâ é, Merari koq bang gi, raxe í wâ lé wó yu akô nghut ri.
41 Isira-elaq byu pé sing é maumyî hkaû má, Lewiq up bang wó yu é wà mó gi, bànshoq myí xe shit wâ nghut mù, yhángmòq é no‑mhan yò pé le bo ri. 42 Haû wà mó hkangmó mâ é awui ayàm má gi, no‑mhan yò pé jòq é chyat nghut ri.
 
43 Haû mù, Yhûmsîng Garai gi, Isira-elaq byu pé lé, yhángmòq é îchyí îwâ pé lé byi râ matú dangshikaq tô tô é maumyî bànshoq lé byi bê nghut mù, yhángmòq gi, maumyî haú lé sing yù luî, nyi nyì bekô nghut ri. 44 Haû Yhûmsîng Garai gi, yhángmòq é îchyí îwâ pé lé dangshikaq tô tô é eq rajung za, ra-mau gón má nguì ngón yùqyò nhâng bê nghut mù, yhángmòq é gyè pé rayùq lháng, yhángmòq é hí má a wó toq yàp lo kó nghut ri. Hkâsu mù gâ le, haû Yhûmsîng Garai gi, yhángmòq é gyè pé bànshoq lé, yhángmòq é lòq má àp byi bê nghut é yánmai nghut ri. 45 Haû Yhûmsîng Garai gi, Yhang danghtum htûm tô é jeju dang bànshoq lé, Isira-elaq byu pê chyáng a lhoqdìk é rahkun lháng a bò; hkun hkangmó lé lhoqdìk bê nghut ri.