Nghêhkaû Râ Wà Mó Pé
20
Hau htâng, Yhûmsîng Garai gi, Yoshuq lé, 2 “Ngò, Mosheq dông mai nang lé pying tô é eq rajung za, Isira-elaq byu pé lé, hpang hkaû râ wà mó pé hkyin masàt to keq nghû taí aq. 3 Haú hkûn, ó yùq nghut kôle, shi-ngé ngé a nghut é za, byù záng sat é sû gi, lató hpuq râ su é lòq mai wó hpang lùt râ matú, hpang hkaû râ wà mó dùt râ nghut lhê. 4 Byù rayùq yùq, wà mó haú pé mâ é wà mó rawà wà má hpang jé jáng, yhang gi, wà mó wâng hkum má yàp to mù, yhâng é hkyô lé, wà mó haû mâ é sûwún wui chyáng taî kyo râ dùt lhê; haú hkûn, yhángmòq gi, yhang lé wà mó hkaû shut hâng yù mù, yhángmòq eq rahá nyì râ jowò byi kôrâ nghut lhê. 5 Lató hpuq râ sû châng hkat lo é nghut kôlhang, yhángmòq gi, haú yùq lé àp byî kat kôrâ a nghut. Hkâsu mù gâ le, yhang gi, yhâng é buìnùm lé a nau a wôm é myìt mai sat é a nghut é za, záng sat pyâm é shèq ru nghut lhê. 6 Haú yùq gi, shiwa byu pê é hí má manglàt yui hpyit é hkûn jé shoq le, haú u lhê é hkyangjong mó shi byùq é hkûn jé shoq le, wà mó haû má nyi to ra shirâ nghut lhê. Hau htâng má shèq, yhang hpang htoq lo é wà mó mâ é yhâng é yhûm má dum wó taû ló râ nghut lhê.” ga taî ri.7 Haû mù, yhángmòq gi, Galile mau, Naphtali bum mau mâ é Kedesha wà mó lé le, Ehprim bum mau mâ é Shehkem wà lé le, Yudaq bum mau mâ é Hebron le gâ é Kiri-at Araba wà lé le, hpang hkaû râ wà mó pé dông masàt to bekô nghut ri. 8 Yerihko wà mó, Yodan làng buìhtoq hkyam shut gi, Rubin up bâng é pá mau yòso mâ é Bezera wà lé le, Gat up bâng é mau Gile-at mâ é Ramot wà lé le, Manase up bâng é mau Bashan mâ é Golan wà lé le hkyin masàt to bekô nghut ri. 9 Isira-elaq byu pé ó yùq nghut nghut le, yhángmòq chyáng bo nyi é byù bíng ó yùq nghut nghut le, byù záng sat pyâm é nghut jáng, shiwa byu pê é hí má manglàt yui a hpyit shi lé, lató hpuq é bang mai sat pyâm é a hui zo shoq wó hpang hkau râ matú, wà mó haú pé lé hkyin masàt to bê nghut ri.