Sime-on Up Lé Gàm Byî É Maumyî
19
Í dâm nghû râ hkyîn shosé gi, Sime-on up mâ é rakoq htâng rakoq é matú âng ri. Yhángmòq é silî wunlî maumyî gi, Yudaq byu pê é maumyî má bo tô ri. 2 Maumyî haú mâ é wà mó pé gi, Berasheba le gâ é Sheba, Molada, 3 Hazara Shu-ala, Bala, Ezem, 4 Elatolat, Behtula, Horama, 5 Ziklak, Bet Marahkabot, Hazara Susa, 6 Bet Leba-ot eq Sharuhen pé raxe sum wâ eq yhángmòq é wà pé nghut ri.7 Hau htoq agó, Ayin, Rimon, Ehtera eq Ashan pé myi wâ eq yhángmòq é wà pé nghut ri. 8 Wà mó haú pê é awui ayàm mâ é wà pé bànshoq eq Maupyî Mau gâ é jang mâ é Rama le gâ é Balat Beri jé shoq le bo ri.
Haû gi, Sime-on up mâ é akoq má cháng luî, wó yu é silî wunlî maumyî nghut ri. 9 Sime-on up mâ é silî wunlî maumyî gi, Yudaq byu pê é gàmbùm mai gam htoq yu é nghut ri. Haî mù gâ le, Yudaq byu pê é maumyî gi, yhángmòq râ é htoq je lam tô é yánmai nghut ri. Haû mù, Sime-on up byu pé gi, yhángmòq é silî wunlî maumyî lé, Yudaq pê é mau hkaû mâ é wó yû kô é nghut ri.
Zebulun Up Lé Gàm Byî É Maumyî
10 Sum dâm nghû râ hkyîn shosé gi, Zebulun up mâ é rakoq htâng rakoq é matú âng ri. Yhángmòq é silî wunlî maukyo gi, Sarit wà mó jé shoq nghut ri. 11 Buìwàng hkyam shut gi, Marala jé luî, Dabeshet má ló htoq ròt mù, Yoknam wà nàm mâ é wuìlàng má ló jé ri. 12 Sarit wà mó mai buìhtoq shut taû lhing e ló mù, Kisilot Tabora mau má ló jé luî, Daberat má ló htoq mù, Yahpi-a má ló htoq ròt ri. 13 Haú mai, xoq mù, buìhtoq hkyam mâ é Gahta Hehpera eq Et Kazin má ló jé luî, Rimon má ló htoq ròt mù, Ne-a shut lhing wang ló ri. 14 Mautsûng maukyo gi, Hanahton mai laî ló mù, Ihpata Ela langhkaû má ló htûm ri. 15 Maumyî haú pé má, Kata, Nahala, Shimron, Idala eq Betlehem pé le nghap lhôm é wà mó raxe í wâ eq yhángmòq é wà pé nghut ri. 16 Wà mó haú pé eq yhángmòq é wà haú pé gi, Zebulun up mâ é akoq pé má cháng luî, wó yu é silî wunlî maumyî nghut ri.
Yisahka Up Lé Gàm Byî É Maumyî
17 Myi dâm nghû râ hkyîn shosé gi, Yisahka up mâ é rakoq htâng rakoq é matú âng ri. 18 Yhángmòq é maukyo gi, Yezirela, Hkesulot, Shunem, 19 Hahparim, Shi-on, Anaharat, 20 Rabit, Kishi-on, Ebeza, 21 Remet, En Gannim, En Hada, Bet Paze wà mó pé nghut ri. 22 Hau htoq agó, Tabora, Shahazuma eq Bet Shemesha jé shoq nghut mù, Yodan làng má ló htûm ri. Wà mó pé raxe hkyuq wâ eq yhángmòq é wà pé nghut ri. 23 Wà mó haú pé eq yhángmòq é wà pé gi, Yisahka up akoq má cháng mù, wó yu é silî wunlî maumyî nghut ri.
Asheri Up Lé Gàm Byî É Maumyî
24 Ngo dâm nghû râ hkyîn shosé gi, Asheri up mâ é rakoq htâng rakoq é matú âng ri. 25 Yhángmòq é maukyo gi, Helakat, Hali, Beten, Ahkashap, 26 Alammelek, Amat eq Mishala pé nghut akô. Hau htoq agó, buìwàng hkyam maukyo gi, Hkarimela eq Shihora Lipnat jé shoq nghut ri. 27 Buìhtoq shut dum lhîng jáng gi, Bet Dagon má jé luî, Zebulun eq Ihpata Ela langhkaû laî byìt mù, mautsûng shut goí dòq ló luî, Bet Emek eq Ni-ela má jé ròt mù, lòqpai shut mâ é Kabula mai laî ló luî, 28 Ebron, Rehoba, Hamon eq Kana má jé ló mù, Sidon Mó lháng jé shoq nghut ri. 29 Haû mai, Rama wà mó shut dum taû lhîng mù, gingtîng é Turuq wà mó má ló jé luî, Hosa wà mó shut dum lhîng mù, Akzip, 30 Uma, Ahpek eq Rehoba mau mâ é Medihteri-an Wuimau má ló jé ròt ri. Wà mó pé í xe í wâ eq yhángmòq é wà pé nghut ri. 31 Wà mó haú pé eq yhángmòq é wà pé gi, Asheri up akoq má cháng mù, wó yu é silî wunlî maumyî nghut ri.
Naphtali Lé Gàm Byî É Maumyî
32 Hkyuq dâm nghû râ hkyîn shosé gi, Naphtali up mâ é rakoq htâng rakoq é matú âng ri. 33 Yhángmòq é maukyo gi, Helep eq Zananim jowò mâ é sik mó gâm mai hî luî, Adami Nekep eq Yepnela má jé luî, Lakkum mai laî byìt mù, Yodan làng má ló htûm ri. 34 Buìwàng hkyam shut lhing ló mù, Azanot Tabora dông gyó ló luî, Hukok má ló jé ròt ri. Maupyî hkyam shut gi, Zebulun, buìwàng hkyam shut gi, Asheri, buìhtoq hkyam shut gi, Yodan làng jé shoq nghut ri. 35 Gingtîng é wà mó pé gi, Zidim, Zera, Rakat, Hkineret, 36 Adama, Rama, Hazora, 37 Kedesha, Ediri, En Hazora, 38 Iron, Migadalela, Horem, Bet Anat eq Bet Shemesha pé raxe gau wâ eq yhángmòq é wà pé nghut ri. 39 Wà mó haú pé eq yhángmòq é wà pé gi, Naphtali up akoq má cháng mù, wó yu é silî wunlî maumyî nghut ri.
Dan Up Lé Gàm Byî É Maumyî
40 Nyhit dâm nghû râ hkyîn shosé gi, Dan up mâ é rakoq htâng rakoq é matú âng ri. 41 Yhángmòq é silî wunlî maumyî pé gi, Zora, Eshita-ola, Ira Shemesha, 42 Shalabin, Aiyalon, Itala, 43 Elon, Timna, Ekron, 44 Elateke, Gibehton, Balat, 45 Yehuda, Bene Berak, Gahta Rimon, 46 Me Jakon, Rakon eq Yopa wà mó tû-tap mâ é maumyî pé nghut ri. 47 (Nghut kôlhang, Dan up mâ é bang gi, maumyî pé lé sing yù râ matú wuîhkê nyì kô é nghut mù, haû mai htoq luî, Leshem wà mó shut dòq ê mù, ê htim luî, sham èq sat htûm pyám mù, wà mó hau lé sing yù luî, nyi to bekô nghut ri. Yhángmòq gi, wà mó haú lé, yhángmòq é îchyí îwa chung é myìng má cháng mù, Dan ga htaî myhîng akô nghut ri.) 48 Wà mó haú pé eq yhángmòq é wà pé gi, Dan up akoq má cháng mù, wó yu é silî wunlî maumyî nghut ri.
Yoshuq Lé Gàm Byî É Maumyî
49 Isira-elaq byu pé gi, ra-mau gón lé, silî wunlî gàmbùm dông ban gàm kô é htâng, Nun é yhang zo Yoshuq lé le, silî wunlî maumyî ratóng masàt byî akô nghut ri. 50 Haû Yhûmsîng Garaî hkyô tô é hkunmó eq rajung za, yhángmòq gi, Yoshuq dûng é Ehprim bum mau mâ é Timnat Seraa wà lé byi bekô nghut ri. Hau mù, Yoshuq gi, haú má wà mó xuq luî, nyì bê nghut ri.
51 Haú pé gi, hkyangjong Ele-aza, Nun é yhang zo Yoshuq eq Isira-elaq a-myû up pé mâ é zaugun sûwún wuî mai, Shilo wà mó mâ é, zùphpong zúm hkúmdong, haû Yhûmsîng Garaî é hí má, hkyîn shosé shê luî, gam é silî wunlî maumyî nghut ri. Hau mù, yhángmòq gi, maumyî gàm byî é hkyô ban bekô nghut ri.