Myìt Tô É Maumyî Lé Gam Hkoq Byî É Hkyô
18
Isira-elaq byu pé lhúnglhâng bang gi, Shilo wà mó má chôm zing kômù, haú má zùphpong zúm saî akô nghut ri. Ra-mau gón gi, yhángmòq ùphkang é a‑ô má dùt byùq bê nghut ri. 2 Nghut kôlhang, Isira-elaq byu pé mâ é nyhit up gi, yhángmòq é silî wunlî maumyî a myang hkam yù shi kó nghut ri.3 Haû mù, Yoshuq gi, Isira-elaq byu pé lé, “Núngmòq é îchyí îwâ pê é Garai Gasang, haû Yhûmsîng Garai gi, núngmòq lé byî to bê maumyî lé wó sing yù râ matú, hkâ-myháng myáng shoq láng nyî shi kôrâ lhú? 4 Núngmòq, up hkangmó mâ é yùqgè sum yuq yuq hkyin to keq. Ngò, yhángmòq lé, maumyî haú lé ê chôm wú tú mù, up hkangmó wó hkam yù râ silî wunlî maumyî má cháng mù, kâ xum lò râ matú, nhang kat râ nghut lhê. Hau htâng, yhángmòq gi, ngá chyáng dum taû lò kó sháng gàq. 5 Núngmòq gi, maumyî haû lé gàmbùm nyhit gàmbùm kut gam hkoq to ra râ nghut lhê. Yudaq up gi, maupyî mâ é yhángmòq é maumyî má yhang nyì kó sháng gàq; Yosep up gi, mautsûng mâ é yhángmòq é maumyî má yhang nyì kó sháng gàq. 6 Núngmòq gi, maumyî hau é nyhit gàmbùm lé bànshoq kâ xûm jáng, haú lé ngá chyáng yu lò keq. Haú hkûn, ngò gi, núngmòq é matú, ngá-nhûng é Garai Gasang, haû Yhûmsîng Garaî é hí má hkyîn shosé shê râ nghut lhê. 7 Lewiq byu pé kúm gi, núngmòq su maumyî gàmbùm myang hkam yû kôrâ a nghut. Haî mù gâ le, haû Yhûmsîng Garaî é hkyangjong mú gi, yhángmòq é silî wunlî nghut bê. Gat up, Rubin up eq Manase koq rahkyam gi, haû Yhûmsîng Garaî é duìnhâng zoshâng Mosheq mai yhángmòq lé byî to bê eq rajung za, Yodan làng buìhtoq hkyam má, yhángmòq é silî wunlî maumyî lé myang hkam yu to gù nghut bê nghut ri.” ga taî ri.
8 Byù haú bang gi, maumyî masàt râ matú, yhángmòq é hkyôwuì shut e ló nyî kô é hkûn, Yoshuq gi, yhángmòq lé, “Ê mù, maumyî lé ê chôm wú tú luî, haú lé kâ xum yù mù, ngá chyáng dum taû lò keq; haú hkûn, ngò gi, shî Shilo wà mó má, núngmòq é matú, Yhûmsîng Garaî é hí má, hkyîn shosé shê râ nghut lhê.” ga châng pying kat ri. 9 Haû mù, byù haú bang gi, e ló luî, ra-mau gón ê chôm wú tú mù, wà mó rawà htâng rawà cháng luî, nyhit gàmbùm gàm mù, haû lé laiká ding má ká luî, Shilo wàp má nyi é Yoshuq chyáng dum taû lò bekô nghut ri. 10 Haú hkûn, Yoshuq gi, Shilo wà mó má, haû Yhûmsîng Garaî é hí má, yhángmòq é matú hkyîn shosé shê mù, Isira-elaq a-myû up má cháng luî, maumyî tsing gàm byi bê nghut ri.
Ben-yamin Up Lé Gàm Byî É Maumyî
11 Ben-yamin up é matú, akoq má cháng mù, hkyîn shosé shê luî, wó é maumyî gi, Yudaq up eq Yosep up é gyoro mâ é maumyî nghut ri.
12 Mautsûng shut, yhángmòq é maukyo gi, Yodan làng mai hî luî, Yerihko é mautsûng hkêshón laî byìt mù, buìwàng hkyam bum mau shut ló luî, Bet Awen yòso má ló htoq ròt ri. 13 Haú mai, Behtela le gâ é Luza wà mó maupyî hkêshón laî byìt mù, A‑ô Bet Horon é maupyî bùm mâ é Atarot Adara wà mó má jé gyó ló ri.
14 Haû mai, buìwàng hkyam shut lhing ló mù, Bet Horon tû-tap mâ é bùm cháng luî, maupyî shut wang ló é nghut mù, Yudaq byu pê é wà nghut é Kiri-at Yarim le gâ é Kiri-at Balaq má ló jé ròt ri. Haû gi, buìwàng hkyam shut mâ é maukyo nghut ri.
15 Maupyî hkyam mâ é maukyo gi, buìwàng hkyam mâ é Kiri-at Yarim mai hî mù, Nehpito-a wuìbúm má lé jé ròt ri. 16 Haû mai, Rehpim Langhkau é mautsûng shut mâ é Hinom Zo gâ é Langhkaû tû-tap é bùm hkyî má gyó jé ló ri. Haû mai, xoq luî, Yebusi byu pê é wà mó é maupyî hkêshón mâ é Hinom langhkaû má gyo ló mù, En Rogela má ló htoq ròt ri. 17 Haû mai mautsûng shut lhing ló mù, En Shemesha má ló jé luî, Adumim Ihkyet tû-tap mâ é Gelilot ló jé ròt luî, Rubin é yhang zo Bohan é masàt Lùq zîng má ló jé ròt ri. 18 Haû mai, Bet Araba wa é mautsûng hkêshón má jé mù, Araba shut gyó jé ló ri. 19 Haû mai, Bet Hogala wà mó é mautsûng hkêshón má ló jé mù, Xo Nhông mautsûng um, haû Yodan làng lo yui htâng é jowò má ló jé ròt ri. Haû gi, maupyî hkyam shut mâ é maukyo nghut ri.
20 Buìhtoq hkyam mâ é maukyo gi, Yodan làng nghut ri. Haú pé gi, Ben-yamin up mâ é akoq má cháng luî, lhînghkyùq má wó yu é silî wunlî maumyî maukyo pé nghut ri.
21 Ben-yamin up mâ é akoq má cháng luî, wó yu é wà mó pé gi, Yerihko, Bet Hogala, Emek Kezi, 22 Bet Araba, Zemarim, Behtela, 23 Awim, Para, Ohpra, 24 Hkehpa Amoni, Ohpini eq Geba pé raxe í wâ eq yhángmòq é wà pé nghut ri.