Buìwàng Hkyam Manase Koq Pé Lé Maumyî Gàm Byî É Hkyô
17
Yosep é yhang zo zo-mún Manase é awùt ashîn pé lé silî wunlî maumyî gàm byî ri. Manase é yhang zo zo-mún Mahkira gi, Gile-at byu pê é îwa nghut ri. Mahkira byu pé gi, sarhê pé nghut kô é yánmai, Mahkira gi, Yodan làng buìhtoq hkyam mâ é Gile-at eq Bashan mau lé myang hkam yu é nghut ri. 2 Haû mù, myìt tô é Manase é awùt ashîn pé lé gi, Yodan lang é buìwàng hkyam shut, yhángmòq é yhûmhtu má cháng luî, silî wunlî maumyî gàm byî ri; yhûmhtu haú pé gi, Abi-ezara, Helek, Asiri-ela, Shehkem, Hehpera eq Shemida yhûmhtu pé nghut ri. Haú bang gi, Yosep é yhang zo Manase akoq mâ é yùqzo awùt ashín pé nghut akô.3 Ahkuî, Manase é yhang zo Mahkira, Mahkira é yhang zo Gile-at, Gile-at é yhang zo Hehpera, Hehpera é yhang zo Zelohpehat gi, yùqzo a bo é za byìzô pé baú wó ri. Byìzo haú bâng é myìng gi, Mala, No-aq, Hogala, Milihka, Tiriza gâ ri. 4 Haú nhik wuî gi, myìqhtoi Ele-aza, Nun é yhang zo Yoshuq eq zaugun sûwún wui chyáng ê jé kômù, “Ngá-nhik wuì lé le, agu a-mâng pé eq rajung za silî wunlî maumyî byi râ matú, haû Yhûmsîng Garai mai Mosheq lé hkunmó hkyô to bê nghut lhê.” ga ê taî akô. Haû mù, Yoshuq gi, haû Yhûmsîng Garaî é hkunmó eq rajung za, yhángnhik wuî lé, yhángnhik wui é yhâng wâ é gu-mang wui pé lé su silî wunlî gàm byi bê nghut ri. 5-6 Manase é awùt ashín byìzô pé le, yùqzô pé eq rajung za silî wunlî maumyî bo myang hkam yù kô é yánmai, Manase é awùt ashín pé gi, Yodan làng buìhtoq hkyam mâ é Gile-at eq Bashan mau lé myang yu é htoq agó, gótû gàmbùm raxê lé le myang yu ashî kô nghut ri. Gile-at mau lé gi, Manase é awùt ashín pé góbang sing akô nghut ri.
7 Manase maukyo pé gi, Asheri mai Shehkem wà mó buìhtoq hkyam mâ é Mikmehta jé mù, maupyî shut laî gyó ló luî, En Tapu-a wà mó má nyi é byu pê é jowò má ló jé ròt ri. 8 Tapu-a maumyî gi, Manase pé sing akô nghut ri; nghut kôlhang, Manase maukyo mâ é Tapu-a wà mó gi, Ehprim byu pé sing akô nghut ri. 9 Haû mai, Kana wuìlàng maupyî shut gyó lo ri. Ehprim eq sêng é wà mó pé gi, Manase eq sêng é wà mó pé má bo nyó to kôlhang, Manase é maukyo gi, wuìlang é mautsûng shut jé dòq ló mù, Medihteri-an Wuimau má ló htûm ri. 10 Maupyî shut gi, Ehprim é maumyî nghut mù, mautsûng shut gi, Manase é maumyî nghut luî, Medihteri-an Wuimau gi, buìwàng hkyam maukyo nghut ri. Mautsûng maukyo gi, Asheri é maumyî nghut mù, buìhtoq hkyam maukyo gi, Yisahka é maumyî nghut ri.
11 Manase up gi, Yisahka eq Asheri mau má bo é, Bet Shan, Ibalam, Nahpot le gâ é Dora wà mó má nyi é byu pé, Endora, Tanak, Megido wà mó má nyi é byu pé eq wà mó haú pê é awui ayàm mâ é wà pé lé wó hkam yù akô nghut ri.
12 Nghut kôlhang, Manase byu pé gi, wà mó haú pé lé a wó sing yu kô é nghut mù, Hkanan byu pé gi, haú mau má xoq nyi nyi akô nghut ri. 13 Isira-elaq byu pé gi, wum-o bo lò kôlhang, Hkanan byu pé lé bànshoq a hkat htoq pyâm é za, jùn dông nyì nhang tô akô nghut ri.
14 Yosep é awùt ashín pé gi, Yoshuq lé, “Haû Yhûmsîng Garai gi, ngá-mòq lé agùn agó jeju byi mù, byù gyai myo nhâng bê nghut lhê wá, nàng gi, haî mù, ngá-mòq lé silî wunlî maumyî ratóng za gàm byî lhê lhú?” ga taî akô.
15 Yoshuq gi, yhángmòq lé, “Núngmòq byù lûm myo mù, núngmòq é matú, Ehprim bùm mau lûm chyap byùq é nghut le gi, Perizi eq Rehpim byu pê é mau mâ é yòso shut dòq ê mù, núngmòq é matú ê byin yù keq.” ga tû taî ri.
16 Yosep é awùt ashín pé gi, “Bum mau haû gi, ngá-mòq é matú chyap é htoq agó, Bet Shan eq hau é awui ayàm janggyú wà pé eq, Yezirela langhkaû pá má nyi é Hkanan byù bànshoq bang gi, jòqtoq myanglhêng pé wó rá akô.” ga tû taî akô.
17 Nghut kôlhang, Yoshuq gi, Yosep é yhûmbyù wuì nghut é, Ehprim eq Manase koq lé, “Núngmòq gi, byù gyai myo mù, wum-o a-tsam gyai yhang bo é bang nghut kô é yánmai, maumyî gàmbùm ralhum za sîng ra kôrâ a nghut, 18 yòso htu é bum mau le wó sîng shi kôrâ nghut lhê. Haú lé byin yù keq; haû ló htâng é jang jé shoq núngmòq é nghut râ nghut lhê. Hkanan byu pé wum-o bò luî, jòqtoq myanglhêng wó kôlhang, núngmòq gi, yhángmòq lé wó hkat htoq pyám kôrâ nghut lhê.” ga taî ri.