Ehprim Eq Manase Up Lé Maumyî Gàm Byî É Hkyô
16
Yosep é awùt ashîn pé lé gam hkoq byî é maumyî gi, Yerihko wà mó é Yodan làng yàm mai, Yerihko wà mó é buìhtoq hkyam wuìlàng pé má jé luî, yòso cháng laî byìt dòq ló mù, Behtela bùm mau jé shoq, 2 Behtela wà mó mai Luza wà mó lé laî byìt e ló luî, Atarot wà mó mâ é Arihki byu pê é maumyî má jé ròt mù, 3 buìwàng hkyam shut gyó ló luî, Yaplet byu pê é maumyî má ló je, haû mai, A‑ô Bet Horon mau jé shoq le, Gezera wà mó jé shoq le ròt ló mù, Medihteri-an Wuimau má ló htáng bê nghut ri.4 Haû mù, Yosep é awùt ashín Manase koq eq Ehprim koq pé gi, yhángmòq é silî wunlî maumyî lé wó yû bekô nghut ri.
5 Ehprim koq má cháng luî, wó yu é maumyî maukyo pé gi, buìhtoq hkyam shut Atarot Adara mai Ahtoq Bet Horon jé shoq, 6 haû mai Medihteri-an Wuimau jé shoq nghut ri. Mautsûng shut Mikmehta mai buìhtoq hkyam Tanat Shilo jé shoq goí wang ló mù, wà mó hau lé laî byìt luî, buìhtoq hkyam Yano-a wà mó je ròt mù, 7 haû Yano-a mai Atarot eq Nara má jé gyó ló luî, Yerihko wà mó má ló jé mù, Yodan làng má ló htáng bê nghut ri. 8 Dum Tapu-a maukyo mai buìwàng hkyam shut e ló luî, Kana làng jé mù, Medihteri-an Wuimau má ló htáng bê nghut ri. Haû gi, Ehprim koq má cháng mù, wó yu é silî wunlî maumyî nghut ri. 9 Hau htoq agó, Manase koq pê é silî wunlî maumyî mai le, Ehprim koq pé gi, wà mó pé ra-am eq wà zo pé ra-am lé myang sing yu akô; Haú pé gi, Ehprim é awùt ashîn pé lé gàm byî é maumyî nghut ri.
10 Yhángmòq gi, Gezera má nyi é Hkanan byu pé lé a hkat htoq pyám kô é yánmai, Hkanan byu pé gi, Ehprim byu pê chyáng, jùn dông hkû-nyí jé shoq nyi tô akô nghut ri.