Haû Yhûmsîng Garaî É Maumang Lagyo Bokim Jowò Má Jé É Hkyô
2
Haû Yhûmsîng Garaî é maumang lagyo gi, Giligala mai Bokim jowò má dòq ê mù, “Ngò gi, núngmòq lé, Egutuq ming mai shuî htoq lô luî, núngmòq é îchyí îwâ pé lé byi râ nghû dâkam tô é mau má shuî jé wang lò bê nghut lhê. Ngò gi, ‘Ngò, núngmòq eq tô tô é Ngá é dangshikaq lé hkâ-nhám le lhoqhpyoq pyám râ a nghut; 2 núngmòq le, shí mau mâ é byu pé eq dangshikaq a tô é za, yhángmòq é kaúgyàp pé lé lhoqhpyoq pyám râ dùt lhê.’ nghû taî é nghut lhê. Nghut kôlhang, núngmòq gi, ngá é jì-no a gyo kut bekô nghut ri. Haî mù núngmòq haû su kut kô é lhú? 3 Hau htoq agó, ngò gi, ‘Shi mau mâ é bang lé, ngò, núngmòq é hí mai hkat htoq pyám byi râ a nghut; yhángmòq gi, núngmòq é matú dumzo dùt mù, yhángmòq é hparà pé gi, núngmòq myí râ lhaí dùt kôrâ nghut lhê.’ nghû le taî é nghut lhê.” ga taî ri.4 Haû Yhûmsîng Garaî é maumang lagyo gi, Isira-elaq byù bànshoq bang lé dang haú pé ban taî é hkûn, shiwa byu pé gi, htê mó èq wùt ngau bum akô nghut ri. 5 Haû mù, yhángmòq gi, jowò haú lé Bokim ga myhíng kôluî, haú má Yhûmsîng Garai lé hkungga pé nhông byî akô nghut ri.
Jì-no A Gyo Luî Sûm Byùq É Hkyô
6 Isira-elaq byu pé lé Yoshuq byo ló nhang é htâng má, yhángmòq gi, haú mau mâ é ó le ô é silî wunlî maumyî lé ê sing yù râ matú, htoq e ló bûm bekô nghut ri. 7 Isira-elaq byu pé gi, Yoshuq chyungxe dui é ra-pyàt gón má le, yhang shi byùq é htâng má, Isira-elaq byu pê é matú haû Yhûmsîng Garai kut é múzó mó pé bànshoq lé myang é sûwún wui é i-pyàt gón má le, haû Yhûmsîng Garai lé dójaú akô nghut ri.
8 Haû Yhûmsîng Garaî é duìnhâng zoshâng, Nun é yhang zo Yoshuq gi, chyungxe zànwut 110 zàn má shi byùq bê nghut ri. 9 Isira-elaq byu pé gi, Gasha Bùm mautsûng shut má jòq é, Ehprim bum mau mâ é Timnat Heresa mâ é yhâng é silî wunlî maumyî má yhang lé myhup yhûm pyâm akô nghut ri.
10 Pyàt bán haú mâ é bang bànshoq, yhángmòq é îchyí îwâ pé ló zùp bum é jang má ló nyi byùq kô é htâng, haû Yhûmsîng Garai lé le a sé, Isira-elaq byu pê é matú Yhang kut byî é hkyô lé le a sê é, htang lhê é i-pyàt byùxik asik nyi lé lo bùm bekô nghut ri. 11 Haú hkûn, Isira-elaq byu pé gi, haû Yhûmsîng Garaî é myòq hí má agè ashop é hkyô kut kômù, Balaq hparà pé lé dójaú akô nghut ri. 12 Yhángmòq gi, yhángmòq lé Egutuq ming mai shuî htoq lo é, yhángmòq é îchyí îkê pê é Garai Gasang, haû Yhûmsîng Garai lé tô pyâm bekô nghut ri. Yhángmòq gi, yhángmòq é awui ayàm mâ é byu pê é hparà myo myô é htâng châng ló kômù, haú pé lé paî noq akô. Yhángmòq gi, haû Yhûmsîng Garai lé nhikjum lhoqyô akô nghut ri; 13 hkâsu mù gâ le, yhángmòq gi, Yhang lé tô pyâm kôluî, Balaq hparà eq Ashatoret hparà pé lé paî noq kô é yánmai nghut ri. 14 Haû Yhûmsîng Garai gi, Isira-elaq byu pé lé nhikjum yo mù, yhángmòq lé myàq zo myàq shuq râ bâng é lòq má àp pyám bê nghut ri. Yhang gi, yhángmòq a wó lhom htuqhtíng loshoq dùt é, yhángmòq é awui ayàm bànshoq mâ é yhángmòq é gye pê é lòq má, yhángmòq lé ung zô pyám bê nghut ri. 15 Haû Yhûmsîng Garai gi, Isira-elaq byu pé lé sidìq byî é eq rajung za le, yhángmòq lé dâkam pyâm é eq rajung za le, majan zan râ matú yhángmòq htoq ê hkangmó, yhángmòq lé Yhâng é lòq èq htuqhtíng htíng kut ri. Haû mù, yhángmòq gi, myìt myo ûng wom hkyô mó hui zô nyì bekô nghut ri.
16 Haú hkûn, haû Yhûmsîng Garai gi, yhángmòq lé myàq zo myàq shuq bâng é lòq mai, yhángmòq lé hkyi htoq yû râ matú, târâ agyì pé nyi htoq lô nhang ri. 17 Nghut kôlhang, yhángmòq gi, yhángmòq é târâ agyì pê é dang lé a gyo kô é za, gótû hparà pé eq yhûmsing gùng yhûmsîng mara shut yû kômù, haú pé lé paî noq akô nghut ri. Yhángmòq gi, yhángmòq é îchyí îkê pé èq jì-no gyô é Yhûmsîng Garaî é hkunmó pé mai hân za lhing ló byùq kômù, îchyí îkê pé châng é dông a cháng kó nghut ri. 18 Haû Yhûmsîng Garai gi, yhángmòq é matú târâ agyì nyi htoq lô nhâng hkangmó, târâ agyì haû eq rahá nghut nyî mù, târâ agyì haû chyungxe rû dui nyì nyì, yhángmòq é gye pê é lòq mai, yhángmòq lé hkyi yu ri. Hkâsu mù gâ le, yhángmòq zìk zo zìk shuq é hui luî, hpu zô nyi bum é mai wùt ngau bùm kô é yánmai, yhángmòq lé haû Yhûmsîng Garai shogyo nhikmyîn yu é nghut ri. 19 Nghut kôlhang, târâ agyì haû shi byùq é htâng má, yhángmòq gi, dum lhing ló byùq kômù, yhángmòq é îchyí îwâ pê htoq je ashop é dông kut kôluî, gótû hparà pê htâng châng ló byùq kômù, haú pé lé sôdun paî noq akô nghut ri. Yhángmòq gi, yhûmsîng kut é agè ashop hkyô pé eq myìt htan é hkyô pé lé a kâm tô pyám kó nghut ri.
20 Haû mù, haû Yhûmsîng Garai gi, Isira-elaq byu pé lé nhikjum yo luî, “A-myû shî gi, Ngá é jì-no a gyo kô é htoq agó, yhángmòq é îchyí îkê pé lé Ngò tô tô é dangshikaq lé lhoqhpyoq pyám kô é yánmai, 21 Ngò gi, Yoshuq shi byùq é hkûn myìt gyó tô é byù myû hkâ lé le, yhángmòq é hí mai hkat htoq pyám byi lo râ a nghut. 22 Ngò gi, yhángmòq é îchyí îkê pé kut kô é su, haû Yhûmsîng Garaî é hkyô lé yhángmòq cháng a châng é lé wú râ matú, byù myû haú bang lé chung jaì mù, yhángmòq lé chyam wú râ nghut lhê.” ga taî ri. 23 Haû eq rajung za, haû Yhûmsîng Garai gi, byù myû haú bang lé, radá dâm le a hkat htoq pyám, Yoshuq é lòq má le a àp pyâm é za, nyi gyó to nhang é nghut ri.