RUHTAQ
Laiká
(Ruth)
Na-omiq Eq Ruhtaq
1
Târâ agyì pé ùp é ayòq abun má, Yudaq mau má mùtmó radàm gyó ri. Haû mù, Betlehem wà mâ é sûwún rayùq gi, yhâng yhûmsîng myhí eq yhang zo yùqzo í yùq lé shuî chûng luî, Moba mau má ê byam nyi lai râ matú, htoq e ló bê nghut ri. 2 Sûwún haú yùq é myìng gi, Elimelek, yhâng yhûmsîng myhî é myìng gi, Na-omiq, yhang zô nhiktang é myìng gi, Malon eq Hkili-on gâ akô nghut ri. Yhángmòq gi, Yudaq mau Betlehem wà mâ é Ehprat byùhú nghut akô. Yhángmòq gi, Moba mau má ê jé mù, nyi to bekô nghut ri.3 Ahkuî, Na-omiq é yhûmsîng hpó Elimelek shi byùq luî, Na-omiq gi, yhang zô nhiktâng eq nyi myìt to bê nghut ri. 4 Haû yùqzô nhik gi, Moba a-myû nghut é Orapa eq Ruhtaq gâ é myiwe nhik lé yu akô nghut ri. Yhángmòq Moba mau má raxê zàn kô nyi laî é htâng, 5 Malon eq Hkili-on nhiktâng le shi byùq kômù luî, Na-omiq gi, yhang zô nhik le shî, yhâng yhûmsîng hpó le shî mù luî, yhang baú za nyi ding to bê nghut ri.
6 Haû Yhûmsîng Garai gi, Yhâng é byù myû lé lé kum mù, zoshuq byi é hkyô lé, Moba mau mai Na-omiq wó gyo jáng, yhang gi, yhâng é dùmó nhik eq rahá haú mau mai yhum mau shut taû ló râ matú byìn sôn nyi akô. 7 Na-omiq gi, yhang, ê bíng nyi é jowò mai yhâng é dùmó nhik eq rahá htoq luî, Yudaq mau shut hkyô toq ló bekô nghut ri.
8 Na-omiq kúm gi, yhâng é dùmó nhik lé, “Núngnhik gi, înu îwâ é yhûm shut taû ló keq hkoi. Shi byùq bê su nhik lé le, ngo lé le núngnhik mai shogyo nhikmyin hkyô shit é eq rajung za, Yhûmsîng Garai gi, núngnhik ahtoq má le shogyo nhikmyîn nyì sháng gàq. 9 Núngnhik dum ló râ yùqge é yhûm má le haû Yhûmsîng Garai gi, núngnhik lé nguì ngón yùqyò hkyô byî nyì sháng gàq ô!” ga taí mù, í yùq é lé bo-puq puq byî ri. Haú hkûn, yhâng é dùmó nhik le wùt ngaù kômù luî, yhángnhik é yhâng mhoí lé, 10 “Ngá-nhik le nàng eq rahá za, náng é a-myû wui chyáng bo châng lò râ.” ga taî akô.
11 Nghut kôlhang, Na-omiq gi, “Ngá dùmó nhik ê, ru taû ló keq. Haî mù ngá htâng cháng kôrâ lhú? Núngnhik é yhûmsîng hpó kut râ yùqzo dum wó byi nhô ngam akô lhú? 12 Ngá dùmó nhik ê, yhûm shut ru taû ló keq. Ngò gi, chyungxe gyai kô bê nghut mù, yùqgè dum wó jung a nghut lo. Haû a nghut é za, ngò gi, myòqbyù jang jòq mù hkû-myîn yhang yùqgè yù luî, yùqzo dum wó kôlhang, 13 núngnhik gi, zoshâng haú nhik ko shoq wó láng yû kôrâ lhú? Gótû i-kun a wang é za haú nhik lé wó láng yû kôrâ lhú? Ngá dùmó nhik ê, haû su a nghut sháng gàq. Haû Yhûmsîng Garaî é lòq gi, ngo lé hpuzo nhang nyi é yánmai, ngò, núngnhik htoq je yhang myìt nò ri.” ga taî ri.
14 Haû su ga jáng, yhángnhik gi, dum wùt ngaù bekô nghut ri. Hau htâng, Orapa gi, yhâng mhoí lé bo-puq puq shi-kyâm to hkó ri. Ruhtaq kúm gi, yhâng mhoí lé a wó gang mù zuî zing tô ri.
15 Haû mù, Na-omiq taî é gi, “Wú aq, náng nhá lháng yhûmsing é a-myû, yhûmsing é hparà shut taû ló bê; nàng le châng ló àq hkoi.” gâ ri.
16 Nghut kôlhang, Ruhtaq tû taî é gi, “Nàng eq gang râ lé le, náng chyáng mai ló byùq râ lé le, hkâtaî shi-kùt nyi lo. Nàng hká e le ngò châng lé râ, nàng hká nyi le, ngò châng nyî râ; náng é a-myû gi, ngá a-myû, náng é Garai gi, ngá é Garai dùt râ nghut lhê. 17 Nàng shi é jowò má, ngò shî râ, haú jowò má, ngò myhup hkâm râ. Shi gâng lhûm é a nghut é za gang jáng gi, Yhûmsîng Garaî chyáng mâ é kô dik é ihkyùp mó gi, ngá chyáng jé sháng gàq.” ga taî ri. 18 Ruhtaq cháng nau é i‑myìt tíng tíng nghut nyi é lé Na-omiq myang byi jáng, haî le a xoq taî lo nghut ri.
19 Haû mù, yháng myîdù gi, Betlehem wà jé shoq sô htoq ló akô. Betlehem wà má jé wang ló kô é hkûn, rawa bang chôm wú maú kôluî, “Shí yùq gi, Na-omiq nghut lhê lhú?” ga myiwe wuì taî bum akô.
20 Na-omiq kúm gi, “Ngo lé Na-omiqa nghû hkâwut lo kó, Maraqb nghû shèq ru wut lo keq; haî mù gâ le, Wum-o a-tsam dìk shoq bo é Garai gi, ngá é i-pyàt lé, kyî kyî hko shoq kut bê nghut ri. 21 Ngo gi, gúm gúm jùp jùp é èq htoq ló kôlhang, haû Yhûmsîng Garai gi, ngo lé lòq kôm shuî taû lò bê nghut ri. Yhûmsîng Garai gi, ngo lé dûn zìk pyám luî, Wum-o a-tsam dìk shoq bo é Garai gi, ngo lé zo-ngê lhoqhpyik to bê le nhîng, haî mù, ngò lé Na-omiq nghû taî nyi ashi kó lhú?” ga taî ri.
22 Na-omiq eq yhâng dùmó Moba myiwe Ruhtaq gi, Moba ming mai Betlehem wà má, mùk-yó gùq yâm hî nám lé jé wang ló akô nghut ri.