Ben-yamin Up Bang Lé Yhûmsîng Myhí Hô Byî É Hkyô
21
Isira-elaq byu pé gi, “Ngá-nhúng ó yùq le, Ben-yamin up bang lé yhûmsing é byìzo byi tso râ a nghut.” ga Mizipa wà má dâkam pyám bekô nghut ri.2 Haû mù, Isira-elaq byu pé gi, Behtela jowò má ê jé mù, Garai Gasâng é hí má myínhtâng jé shoq zung nyì luî, htê lhoqmyhâng mù, gyai yhang wùt ngau akô. 3 Yhángmòq ngaù hkyang sâng kô é gi, “Isira-elaq byu pê é Garai Gasang, haû Yhûmsîng Garai ê, Isira-elaq byu pê chyáng haî mù shî sû é múzó dùt htoq lhê lhú? Hkû-nyí, Isira-elaq a-myû mai haî mù a-myû up ra-up htûm byùq râ lhú?” gâ akô nghut ri.
4 Shiwa byu pé gi, htang nàpsûn noq le, hkungga gyàp saí luî, myi nyhé hkungga pé eq zùmhkaû hkungga pé nhông byî akô nghut ri.
5 Haú hkûn, Isira-elaq byu pé gi, “Isira-elaq a-myû up bànshoq mai, haû Yhûmsîng Garaî é hí má zùp zîng é hpong má a lé bo lom é hká up lhú?” ga myî gôn akô nghut ri. Hkâsu mù gâ le, yhángmòq gi, Mizipa má, haû Yhûmsîng Garaî é hí má zùp zîng é hpong má a lé bo lom é ó yùq nghut kôle, sat pyâm é hui ra râ nghut lhê ga, htân htân dâkam tô akô nghut ri.
6 Haû mù, Isira-elaq byu pé gi, yhángmòq é Isira-elaq byù gu-mang Ben-yamin up é matú bo yón byi kômù, “Hkû-nyí, Isira-elaq a-myû mai ra-up htûm byùq bu-nhung! 7 Ngá-nhúng gi, yhángmòq lé, ngá-nhûng é byìzo hká lé le a byi tso râ nghut lhê nghû, haû Yhûmsîng Garaî é hí má dâkam to bê nghut é yánmai, myìt gyó tô é haú bang lé, ngá-nhúng myiwe hkâsu kut hô byi râ lhú?” ga taî bum akô nghut ri. 8 Haû mù, yhángmòq gi, “Isira-elaq a-myû mai, Mizipa má, haû Yhûmsîng Garaî é hí má zùp zîng é hpong má a lé bo lom é hká up lhú?” ga myî gôn akô. Haú hkûn, yhángmòq gi, Yabesha Gile-at mau mâ é byù rayùq le, zùp zîng é wàp má a lé é hkyô lé wó sê akô nghut ri. 9 Hkâsu mù gâ le, yhángmòq byù nghap kô é hkûn, Yabesha Gile-at mâ é byù rayùq le haú má a bò nghut ri.
10 Haû mù, zùp zing hpong mâ é bang gi, majan kûng é byù ramûn í hkyîng yùq lé, Yabesha Gile-at mau má ê mù, haú má nyi é bang lé, myiwe zoshâng wuì lháng a myhit to loshoq sat pyám râ matú dang sâng luî, nhang kat akô nghut ri. 11 Yhángmòq gi, “Yùqgè wuì bànshoq eq zo-myi gyíng a nghut é myiwe bànshoq lé ê sat pyám râ gi, núngmòq é wò nghut lhê.” ga châng taî kat akô nghut ri. 12 Haû eq rajung za, haú bang gi, Yabesha Gile-at mau má nyi é bang mai yùqgè eq a huî wú shî é zo-myi gyíng myi shô yùq lé myàng mù, Hkanan mau, Shilo jowò mâ é wàp má shuî lo akô nghut ri.
13 Haú hkûn, shiwa hpúng gón gi, lagyo nhâng mù, Rimon lungmó zîng má haq nyi tô é Ben-yamin up bang lé nguì ngón hkyô ê xoq nhang akô nghut ri. 14 Haû mù, haú hkûn Ben-yamin up bang taû lò kô é nghut luî, Isira-elaq byu pé gi, yhángmòq chyungxe lhut tô é Yabesha Gile-at mau mâ é myiwe zô pé lé byi tsô akô; nghut kôlhang, yhángmòq é matú myiwe a ngap shi kó nghut ri.
15 Shiwa byu pé gi, haû Yhûmsîng Garai mai Isira-elaq a-myû mâ é ra-up lé lhoqyom pyám byî é yánmai, Ben-yamin é matú gyai yón bum akô nghut ri. 16 Haû mù, shiwa hpúng mâ é sûwún wuî gi, “Ben-yamin up bâng é myiwe wuì lé lhoqhtûm pyám bê nghut é yánmai, nyi myìt tô é bang lé myiwe hkâsu kut hô byi râ lhú?” ga taî akô. 17 Hau htoq agó, yhángmòq gi, “Isira-elaq a-myû mâ é ra-up a htûm byùq râ matú gi, nyi myìt tô é Ben-yamin up bang awùt ashín wó ra râ nghut lhê. 18 Nghut kôle, ngá-nhúng Isira-elaq byu pé gi, ‘Ben-yamin up mâ é sû lé myiwe byi tsô é sû ó yùq le dingnyé wó sháng gàq.’ nghû dâkam to bê nghut mù, yhángmòq lé, ngá-nhûng é byìzô pé a ge byi tso lo nghut ri. 19 Nghut kôle, wú keq; Behtela é mautsûng hkyam, Behtela mai Shehkem shut ló é hkyô buìhtoq hkyam, Lebona é maupyî hkyam mâ é Shilo jowò má, haû Yhûmsîng Garaî é matú zàn wuì kut byî é poî jòq ri.” ga le taî akô nghut ri.
20 Haû mù, yhángmòq, Ben-yamin up bang lé mhoq kyo kô é gi, “Núngmòq, tsibyiq hkyâm pé má ê haq luî, 21 láng wú nyî keq. Shilo mâ é myiwe zowuî mahkôn lé gó râ ga htoq lé lô kô é hkûn, tsibyiq hkyâm pé mai htîm htoq lô mù, ó le ô é yhûmsîng myhí kut râ matú, rayùq yùq chyup yû luî, Ben-yamin mau shut shuî taû ló keq. 22 Yhángmòq é yhâng wâ pé, a nghut jáng, mùng zô pé mai ngá-mòq lé mara lé hûn kôjáng, ngá-mòq gi, yhángmòq lé, ‘Ngá-mòq gi, majan gyoro má yhángmòq lé myiwe a wó hô byi dùt é yánmai, ngá-mòq é myòqdong lé tê mù, yhángmòq lé ru byi tsô pyám lo keq. Núngmòq gi, yhángmòq lé, núngmòq é byìzô pé shi-ngé ngé byi tso kô é a nghut é yánmai, núngmòq chyáng hai mara bò râ a nghut.’ nghû taí râ nghut lhê.” gâ ri.
23 Haû mù, Ben-yamin up bang gi, haû eq rajung za kut bekô nghut ri. Yhángmòq yùq hkangmó gi, myiwe zo wuî mahkôn gó nyî kô é u lé, rayùq yùq chyup yû mù, yhûmsing yhang myi kut yù bekô nghut ri. Haû mù, yhángmòq gi, yhûmsing é silî wunlî mau má taû ló mù, wà pé dum xuq luî, haú pé má nyi nyì bekô nghut ri.
24 Haú hkûn, Isira-elaq byu pé gi, haú jowò mai htoq ló mù, ó le ô é silî wunlî maumyî, yhûmsing é a-myû up, a-myû koq má taû ló bûm bekô nghut ri.
25 Haú pyàt má, Isira-elaq byu pê chyáng hkóhkâm a nyì shi nghut ri; yùq hkangmó gi, yhûmsîng ô nau é dông kut bum akô nghut ri.