Ben-yamin Up Bang Lé Mara Dam Byî É Hkyô
20
Haû mù, Isira-elaq byù lhúnglhâng bang gi, Dan mai Berasheba jé shoq mai le, Gile-at mau mai le, rading ralhum za kut luî, Mizipa wà, haû Yhûmsîng Garaî é hí má lé zùp zîng akô nghut ri. 2 Isira-elaq é a-myû up pé mâ é shiwa byu pé bànshoq bâng é zaugun wuì gi, Garai Gasâng é shiwa hpúng má yhángmòq é jowò yu bùm kô é nghut mù, shâm lhâm chung é byù myî sen bo ri. 3 Isira-elaq byu pé Mizipa wà má e bùm bekô nghut é hkyô lé, Ben-yamin up bang wó gyo bekô nghut ri. Isira-elaq byu pé gi, “Agè ashop hkyô shî hkâsu dùt é lé, ngá-mòq lé taî kyo keq.” ga taî akô nghut ri.4 Haû mù, sat huî é myiwe myhî é yhâng yhûmsîng hpó Lewiq byù gi, “Ngò, ngá é myi-ngê myhí eq lò mù, Ben-yamin maumyî mâ é Gibe-a wà má lo yhup é nghut lhê. 5 Haú myîn, Gibe-a wà byù wuì gi, lé mù, ngò yhup tô é yhûm lhînghkyùq má lóm to luî, ngo lé sat pyám râ haq htung akô; yhángmòq gi, ngá é myi-ngê lé shî shoq rhoi sat pyâm akô nghut ri. 6 Haû mù, ngò gi, ngá é myî-nge é màng lé yù mù, ajàp jàp yam luî, Isira-elaq é silî wunlî mau mâ é jowò hkangmó má munjú hun kat é nghut lhê; hkâsu mù gâ le, yhángmòq gi, Isira-elaq a-myû má shî sû é agè ashop hkyô eq nhik a gyîng é hkyô kut bekô nghut ri. 7 Ahkuî, Isira-elaq byù bànshoq bang ê, núngmòq hkâsu wó myìt hpyit é hkyô ngo lé taî kyô wú keq.” ga taî ri.
8 Haú mâ é byù bànshoq bang gi, rading ralhum za kut toq kômù, “Ngá-nhúng gi, rayùq lháng yhûmsing é zúm, yhûmsing é yhûm má a taû ló lo sháng. 9 Nghut kôlhang, Gibe-a lé ngá-nhúng shî dông kut sháng; ngá-nhúng hkyîn shosé she é má cháng luî shèq, wà haú lé ê dòq htim sháng. 10 Ngá-nhúng gi, gyèzô pé lé zoshuq dé byi râ matú, Isira-elaq a-myû up bànshoq mai, byù rashô mâ é raxê yùq hkyin htoq, rahkyîng mâ é rashô yùq hkyin htoq, ra-mun mâ é rahkyîng yùq hkyin htoq kut sháng. Haú jáng, gyèzô pé gi, Ben-yamin mau mâ é Gibe-a wà má jé kô é hkûn, Isira-elaq a-myû má yhángmòq haû sû é agè ashop hkyô kut é eq rajung za lató wó hpuq kôrâ nghut lhê.” ga rayùq eq rayùq taî lhûm akô nghut ri. 11 Haû mù, Isira-elaq byu pé bànshoq bang gi, wà haú lé chôm htim râ matú, rading ralhum za kut luî, chôm zing bekô nghut ri.
12 Isira-elaq a-myû up pé mai, Ben-yamin a-myû up bànshoq má lagyo nhang kat luî, “Núngmòq chyáng kut shut é agè ashop é múzó shî gi, haí jung kó htâ? 13 Ahkuî, Gibe-a mâ é agè ashop é byù haú bang lé ngá-mòq wó sat pyám mù, Isira-elaq a-myû mai agè ashop hkyô haû wó huî sêng pyám râ matú, yhángmòq lé, ngá-mòq é lòq má àp byi keq.” ga taí nhang kat akô nghut ri.
Nghut kôlhang, Ben-yamin up bang gi, yhángmòq é gu-mang Isira-elaq byu pê é dang lé a lhom gyo byi kut akô nghut ri. 14 Yhángmòq gi, Isira-elaq byu pé lé lhom taû htim râ ga, yhángmòq é wà pé mai Gibe-a wà má lé chôm zîng akô nghut ri. 15 Ben-yamin a-myû up bang gi, radá dâm, Gibe-a wà má nyi é sarhê nyhit shô yùq lé wó shuî tsîng é htoq agó, yhángmòq é wà pé mai shâm lhâm chung é byù í mûn hkyuq hkyîng yùq wó shuî tsîng akô nghut ri. 16 Gyèzo haú bang má, lòqpai luî, xâm rahkat lháng a shaî shoq, lùqgòk cham lhuî é laidán chung é byù nyhit shô yùq le bo ri.
17 Ben-yamin a-myû up bang a lom é za, shâm lhâm chung é Isira-elaq byù bànshoq bang gi, myî sen bo ri; haú bang bànshoq gi, majan wó zân é bang chyat nghut ri.
18 Isira-elaq byu pé gi, Behtela wà má dòq ê mù, Garai Gasang lé, “Ngá-mòq mâ é hká up hí, Ben-yamin up bang lé ê dòq htim râ lhú?” ga myî akô.
Haû Yhûmsîng Garai gi, “Yudaq up hí ê râ nghut lhê.” ga tû taî ri.
19 Isira-elaq byu pé gi, htang nàpkyó toq mù, Gibe-a wà eq chyâng é má wàp xuq bekô nghut ri. 20 Isira-elaq byu pé gi, Ben-yamin up bang lé htim râ matú htoq ê kômù, Gibe-a wà yàm má jowò yù bekô. 21 Ben-yamin up bang gi, Gibe-a wà mai htoq lô kômù, haú nyí, Isira-elaq byù í mûn í hkyîng yùq lé sat pyám bekô nghut ri. 22 Nghut kôlhang, Isira-elaq byu pé gi, rayùq eq rayùq wum-o lhoqkîng lhum mù, hî nyí yhángmòq jowò yu é jang má jowò dum yù bekô nghut ri. 23 Isira-elaq byu pé gi, dòq ê mù, haû Yhûmsîng Garaî é hí má myínhtâng jé shoq ngaù kôluî, “Ngá-mòq gi, ngá-mòq é gu-mang Isira-elaq byù, Ben-yamin up bang lé ê htim râ matú dum dòq ê râ lhú?” ga haû Yhûmsîng Garai lé myî akô nghut ri.
Haû Yhûmsîng Garai gi, “Yhángmòq lé ê dòq htim keq.” ga tû taî ri.
24 Haû mù, Isira-elaq byu pé gi, htang nyí Ben-yamin up bâng chyáng dum huî chyâng e akô. 25 Ben-yamin up bang gi, Gibe-a wà mai htoq lô kômù, haú nyí, shâm lhâm chung é Isira-elaq byù ramûn shit hkyîng yùq lé wó sat pyâm akô nghut ri.
26 Haû mù, Isira-elaq gyè hpúng gón gi, Behtela wà má dòq ê kômù, haû Yhûmsîng Garaî é hí má wùt ngau zung tô akô. Yhángmòq gi, haú nyí, myínhtâng jé shoq zoshuq túm kôluî, haû Yhûmsîng Garai lé myi nyhé hkungga eq zùmhkaû hkungga nhông byî akô nghut ri. 27 Haû mù, Isira-elaq byu pé gi, haû Yhûmsîng Garai lé myî akô nghut ri. (Haú buìnyì pé má, Garai Gasâng é dangshikaq sàksé dò gi, haú má jòq tô é nghut mù, 28 Arun é yhang shu, Ele-aza é yhang zo Hpinehasa gi, hau é hí má múzó wùn wàq ri.) Yhángmòq gi, “Ngá-mòq gi, ngá-mòq é gu-mang Ben-yamin up bang lé ê htim râ matú dum dòq ê râ lhú, a nghut jáng, tô pyám lo râ lhú?” ga myi kôjáng, haû Yhûmsîng Garai gi, “Dòq ê keq; hkâsu mù gâ le, Ngò gi, nàpmá, yhángmòq lé núngmòq é lòq má àp byi râ nghut lhê.” ga tû taî ri.
29 Haû mù, Isira-elaq byu pé gi, Gibe-a wà lhînghkyùq má ê haq lóm tô akô nghut ri. 30 Yhángmòq gi, sum nyí nghû râ nyí má, Ben-yamin up bang lé htim râ matú dòq ê mù, yhángmòq hí lé kut é su, Gibe-a wà hí má jowò ê yu tô akô nghut ri. 31 Ben-yamin up bang gi, yhángmòq lé lhom htim râ ga htoq lé lô kô é nghut mù, wà eq wê ló shoq mhuî yu é huî ló bekô nghut ri. Haû mù, yhángmòq gi, pá má le, Behtela ló é hkyô eq Gibe-a wà ló hkyô má le, hí lhê su, Isira-elaq byu pé lé châng hkat sat é nghut mù, byù sum xê yùq kô wó sat pyâm akô nghut ri. 32 “Ngá-nhúng gi, hí lhê su yhángmòq lé ûng bê.” ga Ben-yamin up bang taî nyì kô é u, Isira-elaq byu pé gi, “Ngá-nhúng ru hpâng sháng, wà eq we shoq hkyô mó pé shut shuî mhuî e ló sháng.” ga taî bum akô nghut ri.
33 Isira-elaq byu pé bànshoq bang gi, hpâng luî, Balaq Tamari má jowò yu bum akô; haq lhom tô é Isira-elaq byu pé gi, Gibe-a wà buìwàng hkyam, yhûmsing é jowò mai htoq yán lo bum akô nghut ri. 34 Haû mù, Isira-elaq byù sarhê pé ra-mun gi, Gibe-a wà lé wang htim kô é nghut mù, majan gyaí htan byùq bê nghut ri; Ben-yamin up bang gi, byò dàn byò sho mó yhángmòq chyáng jé lô bê hkyô lé a sé kó nghut ri. 35 Haû Yhûmsîng Garai gi, Ben-yamin up bang lé Isira-elaq byu pê é hí má lhoqsûm pyâm é nghut mù, haú nyí, Isira-elaq byu pé gi, Ben-yamin up mâ é shâm lhâm chung é bang í mûn ngó hkying rashô yùq lé sat kyop pyám bekô nghut ri. 36 Haû mù, Ben-yamin up bang gi, yhángmòq sûm byùq bê nghut é lé sé bekô nghut ri.
Hkâsu mù gâ le, Isira-elaq byu pé gi, Gibe-a wà nàm má haq lóm tô é bang lé lum to kômù, Ben-yamin up bâng é hí mai hpang taû ló kô é yánmai nghut ri. 37 Haû haq lhom tô é bang gi, radá dâm Gibe-a wà má chôm htîm wàng mù, rawà gón mâ é bang lé sham èq sat kyop pyám bê nghut ri. 38 Isira-elaq byu pé gi, haq lhom tô é bang mai wà má myihkau dùm lhoqhtoq kat é dông alhô agàn shit jáng, 39 yhángmòq dum lhing taû htim râ matú, yhángmòq eq hpyê lhûm tô akô nghut ri.
Ben-yamin up bang gi, yhángmòq lé châng hkat mù, Isira-elaq byù sum xê yùq kô lé wó sat pyám jáng, “Ngá-nhúng gi, hî lhê é majan má su, yhángmòq lé dum ung nyì bê nghut ri.” ga taî bum akô. 40 Nghut kôlhang, wà hkaû mai myihkau dùm mó htoq lo nyi é hkûn, Ben-yamin up bang gi, lhing wú kat le, rawà gón myihkau baú dùt tô é lé myang kat akô nghut ri. 41 Haû mù, Isira-elaq byu pé gi, dum lhing taû htim kôjáng, Ben-yamin up bang gi, yhángmòq chyáng byò dàn byò sho mó jé bê nghut é hkyô lé wó sé kô é yánmai, gyùq chiq gyùq ngha bùm bekô nghut ri. 42 Haû mù, yhángmòq gi, Isira-elaq byu pê é hí mai yòso shut hpang akô; nghut kôlhang, yhángmòq gi, majan mai a wó hpang lùt kó. Haû wà pé mai htoq lo é Isira-elaq byu pé gi, yhángmòq lé lhom sat pyâm akô nghut ri. 43 Yhángmòq gi, Ben-yamin up é lhînghkyùq má chôm lóm mù, châng hkat luî, buìhtoq hkyam mâ é Gibe-a maumyî má yhángmòq lé nâng pyeq pyám bekô nghut ri. 44 Haú hkûn, Ben-yamin up mâ é sarhê mó pé ramûn shit hkyîng yùq shi byùq ri. 45 Myìt gyó tô é bang gi, yòso mâ é Rimon lungmó zîng shut hpang e ló akô; nghut kôlhang, Isira-elaq byu pé gi, châng hkat luî, hkyô pé má ngo hkyîng yùq lé sat pyám bekô nghut ri. Yhángmòq gi, Ben-yamin up bang lé Gidom jé shoq châng hkat kômù, í hkyîng yùq lé wó châng hkat sat pyâm ashi kô nghut ri.
46 Haú nyí má, shâm lhâm chung é Ben-yamin up bang í mûn ngo hkyîng yùq shi byùq bê nghut ri; haú bang bànshoq gi, sarhê mó pé chyat nghut akô. 47 Nghut kôlhang, hkyuq shô yùq gi, yòso mâ é Rimon lungmó zîng jé shoq lhing hpang ló kô é nghut mù, haú má lha-mó myi hkyap nyi nyi akô nghut ri. 48 Isira-elaq byu pé gi, Ben-yamin maumyî shut taû lò mù, wà pé bànshoq mâ é byu pé lé le, shigu gaunyhaû pé lé le, yhángmòq myang é haî lé le, lhúnglháng sat pyám kômù, yhángmòq jé é wà hkangmó lé nyhê hkyô pyâm akô nghut ri.