Lewiq Hpó Eq Yhâng É Myi-ngê Hkyô
19
Haú pyàt má, Isira-elaq byu pê chyáng hkóhkâm a nyì shi nghut ri.Ahkuî, Ehprim bum mau wê é jowò má nyi é Lewiq hpó rayùq gi, Yudaq mau Betlehem wà mai myi-ngê rayùq yu ri. 2 Nghut kôlhang, myi-ngê haû gi, myìt i-kyí a zùng mù, yhang lé shut pyám luî, Yudaq mau Betlehem wà mâ é yhâng wâ é yhûm má taû ló bê nghut ri. Myi-ngê haû lha-mó myi hkyap nyi é htâng má, 3 yhâng é yhûmsîng hpó gi, yhang taû lò râ matú ê taí râ ga, yhâng é duìnhâng zoshâng eq loze í du kon mù, e ló ri. Myi-ngê haû gi, yhang lé yhâng wâ é yhûm má lhom shuî yu é nghut mù, yhâng wa gi, yhang lé lhom myàng jáng, gabú tung lhom te yu ri. 4 Yhâng tsa gi, yhang lé hkûm é nghut mù, yhang gi, haú má sum nyí yhang, zo mù shuq mù, yhup kún luî, nyi nyi ri.
5 Myi nyí nyí má, yhángmòq gi, noq le toq luî, ló lo râ hen é hkûn, yhâng tsa gi, “Zoshuq zo luî, wum-o lhoqkîng yù mù shèq toq sô ló keq.” ga yhâng za-aû lé taî ri. 6 Haû mù, yháng aûzo gi, rahá zùng luî, chôm zo chôm shuq bekô nghut ri. Haú hkûn, myiwe myhí hau é yhâng wa gi, “Hkû-myîn no luî, ngón ngón nyi yù shi keq.” ga taî ri. 7 Haú yùq gi, ló lo râ ga toq kôlhang, yhâng tsa lûm hkûm é yánmai, haú myîn haú má dum yhup bê nghut ri. 8 Ngo nyí nyí nàpkyó, yhang ló lo râ ga toq jáng, myiwe myhí hau é yhâng wa gi, “Wum-o lhoqkîng yù mù, nyí hkyuí jé shoq nyì shi keq!” ga taî ri. Haû mù, yháng aûzo gi, rahá chôm zo chôm shuq bekô nghut ri.
9 Haú yùq gi, yhâng é myi-ngê eq yhâng é duìnhâng zoshâng le mù, htoq ló lo râ ga toq jáng, yhâng tsa gi, “Wú aq; myínhtâng jé bê nghut ri. Hkû-myîn shî má no shi keq; buìgyum ló bê nghut ri. Shî má no mù, ngón za nyi yù keq. Nàpkyó noq le toq mù, náng yhûm shut taû ló keq.” ga taî ri. 10 Nghut kôlhang, haú yùq gi, ra-myìn dum a kâm nô yù naù lo mù, yhâng é zè htô é loze í du eq yhâng é myi-ngê le mù, Yerusalem gâ é Yebusi wà shut e ló bekô nghut ri.
11 Yhángmòq Yebusi wà má jé ló kôjáng, buìgyum ló bê nghut mù, yhâng é duìnhâng zoshâng gi, “Sâ, Yebusi byu pê é wà mó shî má hkû-myîn nô yù sháng.” ga yhâng é yhûmsîng lé taî ri.
12 Yhâng é yhûmsîng hpó gi, “A gè; ngá-nhúng gi, Isira-elaq a-myû a nghut é byu pê é wà hká má le a ê râ nghut lhê. Gibe-a wà shut ru laî ló sháng.” ga tû taî ri. 13 Hau htoq agó, yhang gi, “Sâ, Gibe-a wà eq Rama wà rawà wà má ló wó yhup shoq ló sháng.” ga xoq taî ri. 14 Haû mù, yhángmòq gi, xoq e ló le, Ben-yamin mau mâ é Gibe-a wà shut chyâng ló é hkûn, buì wang byùq bê nghut ri. 15 Yhángmòq gi, haú myîn haú má nô yù râ ga, wà má wang ê mù, wà hkyô mó má ê zung tô akô; nghut kôle, yhángmòq lé ó yùq le a lhom hàp yù kó nghut ri.
16 Nghut kôlhang, Ehprim bum mau mai Gibe-a wà má lé nyi nyi é yùqgè mangzo rayùq gi, haú myínhtâng yò mai taû lo ri. Gibe-a wà byù wuì gi, Ben-yamin byu pé nghut akô. 17 Yhang gi, wà hkyô mó má byù bíng rayùq nyi tô é lé myàng jáng, “Nàng hká ló lhê lhú? Nàng hká mai lé lo é lhú?” ga myî ri.
18 Haú hkûn, yhang gi, “Ngá-mòq, Yudaq mau Betlehem wà mai ngò nyi é jang Ehprim bum mau wê é jowò shut taû ló é hkyô má nghut lhê. Ngò gi, Yudaq mau Betlehem wà má ê jé mù, ahkuî, haû Yhûmsîng Garaî é yhûm má taû ló nyi é nghut lhê. Hkû-myîn nô yù râ matú ngo lé ó le a hàp yù nghut ri. 19 Ngá-mòq gi, lozê é matú hkôwá eq zoshuq bo é htoq agó, ngò eq ngá é myi-ngê, ngá é duìnhâng zôshang é matú le, mùk eq tsibyiq wing bo lhê. Ngá-mòq haî le a râ é nghut lhê.” ga tû taî ri.
20 Mangzo haû gi, “Núngmòq lé ngá yhûm má te yu lhê; núngmòq râ é bànshoq ngò byi bá. Hkyô má za hkâyhup kó.” ga taî ri. 21 Haû mù, yhang gi, yhâng é yhûm má shuî ló mù, loze pé lé mhan tsô ri. Yhángmòq gi, hkyî chî yu é htâng má zo shuq bekô nghut ri.
22 Yhángmòq ngón za nyi tô bum é u lé, wà haû mâ é agè ashop é byu pé ra-am gi, yhûm hau é lhînghkyùq má lé lóm to kômù, hkum lé bàt kôluî, “Náng é yhûm má lé é yùqgè haú lé shuî htoq lé byi aq; ngá-mòq, yhang eq gùngsho zùp yàp kún râ nghut lhê.” ga yhûmsîng hpó mangzo lé wùt garû akô nghut ri.
23 Haû yhûmsîng hpó gi, htoq ê mù, yhángmòq lé, “Gu-mang wuì ê, haû gi, a gè râ nghut lhê; haû su ashop é múzó hkâkut kó. Yhang gi, ngá é bíng nghut é yánmai, shî sû é nhik a gying hkyô hkâkut kó. 24 Wú keq, shî má ngá é byìzo zo-myi gyíng eq yhâng é myi-ngê nyi lhê. Yhángnhik lé ahkuî ngò shuî htoq lé byi kó lé, yhángnhik lé kut keq; núngmòq kâm é su yhángnhik lé kut keq. Nghut kôlhang, yùqgè shí yùq lé gi, shî sû é nhik a gying hkyô hkâkut kó.” ga taî ri.
25 Nghut kôlhang, byù haú bang gi, yhang lé a gyo byi kó nghut ri. Haû mù, yùqgè haú yùq gi, yhâng é myi-ngê lé, yhángmòq é matú shinggan shut nhâng byî é nghut mù, byù haú bang gi, ra-myin mau, yhang lé lhom rhoî kômù, myòq myang lò jáng shèq yhang lé nhang kat akô nghut ri. 26 Myòq myang lò jáng, myiwe myhí haû gi, yhâng é yhûmsîng nyi tô é yhûm má taû ló mù, hkum hí má lèqbàt luî, myòq san za myàng shoq haú má lèq tô ri.
27 Yhâng é yhûmsîng gi, nàpsûn lé toq mù, yhûm hkum hpóng luî, yhâng é hkyô shut e xoq râ matú htoq e ló le, yhâng é myi-ngê hkum hí má lêng lèq to mù, yhâng é lòq hkumtáng má kê tô é lé myang ri. 28 Haú hkûn, yhang gi, “Toq aq; ló lo sháng.” ga taî ri. Nghut kôlhang, yhang jit le a ga lo nghut ri. Haû mù, yhang gi, myiwe haú lé yhâng é loze má kê chûng mù, yhûm shut ló bê nghut ri.
29 Yhang gi, yhûm jé ló é hkûn, shâm yù mù, yhâng é myî-nge é màng lé raxe í jàp yâm hkoq yû mù, Isira-elaq mau gón mâ é raxe í up má munjú hun kat ri. 30 Haú lé myang é yùq hkangmó gi, rayùq eq rayùq, “Isira-elaq byu pé Egutuq ming mai htoq lo é hkûn mai ahkuî jé shoq, shî sû é hkyô gi, hkâ-nhám le a kut wú, hkâ-nhám le a myang wú é nghut lhê. Myìt wú keq! Ngá-nhúng rajung jung kut ra bê! Taî wú keq!” ga taî lhûm bum akô nghut ri.