Dan Up Bang Laishi Wà Má Nyi É Hkyô
18
Haú pyàt má, Isira-elaq byu pê chyáng hkóhkâm a nyì shi nghut ri.Haú pyàt má, Dan up bang gi, yhángmòq nyì râ maumyî ho akô nghut ri; hkâsu mù gâ le, yhángmòq gi, haú hkûn jé shoq gótû Isira-elaq a-myû up pê chyáng silî wunlî maumyî a wó shi kó nghut ri. 2 Haû mù, Dan up bang gi, jó ê wú luî, maumyî ê hô râ matú, yhángmòq é jowò Zora eq Eshita-ola mai, yhángmòq é sarhê ngo yuq lé, “Maumyî ê wú lô keq.” ga taí kômù, nhang kat akô.
Haû mù, haú bang gi, Ehprim bum mau má ê mù, Mihka é yhûm má haú myîn ê bíng akô nghut ri. 3 Yhángmòq gi, Mihka é yhûm má chyâng e ló kô é hkûn, Lewiq zorâm zo hau é htê lé sê gyô kat kôluî, yhâng chyáng wang ê kômù, yhang lé, “Shî má nang lé ó yùq shuî lé é lhú? Nàng shî má haî kut nyi lhê? Nàng haî mù shî má nyi tô lhê?” ga myî akô nghut ri.
4 Haú hkûn, yhang gi, “Mihka èq ngo lé lung yù mù, ngò gi, yhâng é hkyangjong kut nyi lhê.” ga, yhang lé Mihka kut byî é hkyô pé taî kyô ri.
5 Haû mù, yhángmòq gi, yhang lé, “Ngá-mòq é hkyôwuì, hkyô nyàng a nyàng râ lé, Garai Gasang lé bo myî wú aq.” ga taî akô.
6 Hkyangjong hpó haû gi, yhángmòq lé, “Ngón za e ló keq. Núngmòq é hkyôwuì má haû Yhûmsîng Garai bo lom nyi ri.” ga tû taî ri.
7 Haû mù, yhángmòq ngo yuq gi, htoq ló mù, Laishi wà má ê jé akô; haú hkûn, haú mâ é byu pé gi, Sidon byu pé su, nguì ngón yùqyò mù, haî le a gyùq chiq râ é za nyi bum é lé myang akô nghut ri. Haú bang gi, yhángmòq é maumyî má haî le a langhpyùt kó nghut é yánmai, gyai yhang wó sùt bùm kô é htoq agó, Sidon byu pé eq le wê gâng tô é nghut mù, ó eq le a xoq tui kó nghut ri.
8 Yhángmòq, Zora eq Eshita-ola má dum taû jé ló kô é hkûn, yhángmòq é gótû gu-mang Dan up mâ é byu pé gi, yhángmòq lé, “Hká dông nghut akô lhú?” ga lhom myî akô.
9 Haú hkûn, yhángmòq gi, “Sâ, yhángmòq lé ê htim sháng! Maumyî haú lé ngá-mòq wú wú bê; myì gè hkyí yhang nghut ri. Haî le a kut é nyi to kôrâ lhú? Ê râ matú hkâ uq-ô nyì lo kó; haú lé ê sing yù lo sháng. 10 Núngmòq haú má ê jé jáng, abun aso nyi tô é byu pé eq dam ngón é maumyî lé myàng kôrâ nghut lhê; haû haî lháng a langhpyùt é maumyî lé, Garai Gasang, núngmòq é lòq má àp byi râ nghut lhê.” ga tû taî akô nghut ri.
11 Haû mù, Dan up mâ é byù hkyuq shô yùq gi, shâm lhâm chûng mù, Zora eq Eshita-ola mai htoq e ló bekô nghut ri. 12 Yhángmòq gi, dòq e ló kômù, Yudaq mau mâ é Kiri-at Yarim nàm má wàp xuq akô nghut ri. Haû mù, Kiri-at Yarim é buìwàng hkyam lé, hkû-nyí jé shoq Dan Wàp ga myìng myhîng akô nghut ri. 13 Yhángmòq gi, haû mai Ehprim bum mau má ê mù, Mihka é yhûm má jé akô nghut ri.
14 Haú hkûn, Laishi mau lé jó ê wú é byù ngo yuq gi, yhángmòq é gu-mang Dan up byu pé lé, “Shí yhûm má, hkyangjong bu-kó, yhûmwù nàt pé eq ngùn shup hparà zòng pé jòq lhê, a sé kô lhú? Ahkuî hká dông kut râ núngmòq sé lo keq.” ga taî akô. 15 Haû mù, yhángmòq gi, Mihka é jowò mâ é Lewiq zorâm hpô é yhûm má wang ê mù, huî nyo akô nghut ri. 16 Majan zan râ matú shâm lhâm chung é Dan up byù hkyuq shô yùq gi, hkum hí má yàp tô akô nghut ri. 17 Haû hkyangjong hpó eq shâm lhâm chung é byù hkyuq shô yùq hkum hí má yàp to kô é u, maumyî haú lé jó ê wú é byù ngo yuq gi, yhúmhkaû má wang ê mù, hparà zòng, hkyangjong bu-kó eq yhûmwù nàt pé lé yu akô nghut ri.
18 Ngo yùq haú bang, Mihka é yhûm má wàng mù, hparà zòng, hkyangjong bu-kó eq yhûmwù nàt pé lé yù kô é hkûn, hkyangjong hpó haû gi, yhángmòq lé, “Núngmòq haî kut akô lhú?” ga taî ri.
19 Yhángmòq gi, yhang lé, “Zim za nyì àq! Haî le hkâjòp. Ngá-mòq htâng cháng mù, ngá-mòq é îwa eq hkyangjong lé kut àq. Rayùq é yhûm má za dójaú râ htoq má, Isira-elaq mâ é ra-up rakoq má nàng dójaú le je ge lhê, a nghut lhí?” ga taî akô nghut ri. 20 Hkyangjong hpó haû gi, gyai yhang gyô gabú luî, hkyangjong bu-kó, yhûmwù nàt pé eq hparà zòng lé yu chûng mù, haú bâng htâng châng e ló bê nghut ri. 21 Yhángmòq gi, taû lò kômù, yhángmòq é zodù wuì, yhángmòq é shigu gaunyhaû pé eq yhángmòq é sùtzè pé lé hí má so nhâng mù, htoq e ló bekô nghut ri.
22 Yhángmòq gi, Mihka é yhûm eq tsómra wê ló kô é hkûn, Mihka é yhûm nàm má nyi é bang chôm zing mù, Dan up bang lé hkyit shoq châng hkat akô nghut ri. 23 Yhángmòq châng hkyit kô é hkûn, Dan up bang lé wùt garu kôjáng, Dan up bang gi, Mihka lé, “Nàng shî myhô bang lé haî kut wùt chung lhê lhú?” ga taî akô.
24 Yhang gi, “Núngmòq, ngò saî é hparà pé eq ngá é hkyangjong lé yu chûng shuî chûng kôluî nhîng, nàng haî kut lhê lhú nghû, núngmòq ngo lé hkâsu myî akô lhú? Ngá chyáng haî myìt gyó tô ri lhú?” ga tû taî ri.
25 Haû jáng, Dan up bang gi, “Ngá-mòq lé myíng hkâlé myo; shî mâ é byù ra-am nhikjum yô lò mù, nang lé htim jáng, nàng eq náng é yhûmbyù wuì chyungxe sûm byùq kôrâ nghut lhê.” ga tû taî akô nghut ri. 26 Haû mù, Dan up bang gi, xoq e ló bekô nghut ri; Mihka gi, yhâng htoq yhángmòq wum je htân kô é lé myàng mù, yhâng é yhûm shut taû ló bê nghut ri.
27 Haû Dan up bang gi, Mihka saî é zè pé eq yhâng é hkyangjong hpó lé shuî chûng yu chûng mù, nguì ngón yùqyo é htoq agó, haî le a gyùq chiq râ é za nyi bum é Laishi wà byù wui chyáng ê jé kôluî, yhángmòq lé sham èq sat pyám kômù, wà lé myî èq nyhê hkyô pyám bekô nghut ri. 28 Wà haû gi, Sidon eq le wê é htoq agó, ó eq le a xoq tuî lhûm é yánmai, yhángmòq lé lé hkyi yù râ byù a nyì nghut ri. Wà haû gi, Bet Rehop nàm mâ é langhkaû má nghut ri.
Dan up bang gi, wà haú lé dum xuq mù, haú má nyi nyì bekô nghut ri. 29 Wà haú lé Laishi gâ laî lò kôle, Isira-elaq é yhang zo Dan nghut é yhángmòq é îchyí îkê é myìng má cháng mù, wà haú lé Dan ga myhîng akô nghut ri. 30 Dan up bang gi, haú má yhángmòq é matú hparà zòng tsûng kômù, Mosheq é yhang zo Gerishom é yhang zo Yonahtan eq yhâng é awùt ashín pé gi, haú mau mâ é bang shúm zûng huî é hkûn jé shoq, Dan up bâng é hkyangjông pé kut akô nghut ri. 31 Garai Gasâng é yhûm Shilo wà má jòq tô é ahkyíng bànshoq, yhángmòq gi, Mihka saî é hparà zòng lé chung jai akô nghut ri.