Mihka É Hparà Lhô Pé
17
Ahkuî, Ehprim bum mau mâ é byù Mihka ga sû rayùq nyi ri. 2 Yhang gi, yhâng nu lé, “Ânu ê, náng é ngùnhtung myi joí èq sum xê rùng kô byùq luî, nàng nhîng dâkam pyâm é lé ngò wó gyô é ngùnhtung haû gi, ngá chyáng nghut lhê; haû lé ngò yu é nghut lhê.” ga taí jáng, yhâng nu gi, “Ngá zo ê, haû Yhûmsîng Garai, nang lé shimân byi sháng gàq!” ga taî ri.3 Yhang gi, haû myi joí èq sum xê rùng kô nghut é ngùnhtung haú lé tau byi jáng, yhâng nu gi, “Ngùn shup é hparà zòng saí sháng gàq nghû, ngá é ngùn haú lé ngá zô é matú haû Yhûmsîng Garaî chyáng teng za nhông byî é nghut lhê; haû mù, ngá nu gi, ngùn haû nang lé dum tau byi bá.” ga taî ri.
4 Haû mù, yhang, yhâng nu lé ngùnhtung haû dum tau byi jáng, yhâng nu gi, ngùnhkyí í xe shit rûng kô yù mù, ngùn bàt zo sû lé byi jáng, haú yùq gi, hparà lhô saî bàt htoq byî ri. Hparà lhô haú lé Mihka é yhûm má tô tô ri.
5 Mihka nghû sû haú yùq gi, hparà yhûm ralhum wó é nghut mù, hkyangjong bu-kó eq yhûmwù hparà pé saî yù luî, yhang zo rayùq lé hkyangjong ayá dáng to byî ri. 6 Haú pyàt má, Isira-elaq byu pê chyáng hkóhkâm a nyì shi nghut ri; yùq hkangmó gi, yhûmsîng ô nau é dông kut bum akô nghut ri.
7 Haú u, Yudaq mau, Betlehem wà má nyi é, Yudaq up má bo nyi é Lewiq zorâm rayùq nyi ri. 8 Yhang gi, Betlehem wà haû mai htoq mù, gótû nyì jowò hô râ matú e ló le, Ehprim bum mau mâ é Mihka é yhûm má ló jé ri.
9 Haú hkûn, Mihka gi, yhang lé, “Nàng hká mai lé jé é nghut lhê lhú?” ga myi jáng, yhang gi, “Ngò, Yudaq mau, Betlehem wà mai lé lo é Lewiq byù nghut lhê; ngò gi, nyì râ jowò ho wún lhê.” ga taî ri.
10 Haû jáng, Mihka gi, yhang lé, “Ngò eq rahá nyì mù, ngá wa eq ngá é hkyangjong kut àq; ngò gi, nang lé, razàn má ngùnhkyí rarung èq ngo che kô byi râ nghut é htoq agó, mèbu pé eq zoshuq pé le byi râ nghut lhê.” ga taî ri. 11 Haû mù, Lewiq hpó haû gi, yhang eq rahá nyì râ matú myìt hui bê nghut ri; zorâm haû gi, yhang zo rayùq dông dùt byùq bê nghut ri. 12 Haú hkûn, Mihka gi, Lewiq zorâm haú lé hkyangjong ayá dáng byî é nghut luî, yhang gi, yhâng é hkyangjong dùt é htoq agó, yhâng é yhûm má nyi nyì bê nghut ri. 13 Haû mù, Mihka gi, “Lewiq shí yùq gi, ngá é hkyangjong dùt bê nghut é yánmai, haû Yhûmsîng Garai, ngo lé shimân byi berâ nghut é lé, ngò sê lhê.” ga taî ri.