Samson Eq Delila
16
Ra-nyí lé, Samson gi, Gaza wà má ê jé le, shiwa myhí rayùq lé myàng mù, myín lé yhang eq ê yhup ri. 2 Haú hkûn, “Samson shî má nyi tô ri!” ga Gaza wà byu wuì lé taî kyo kôjáng, yhángmòq gi, jowò hau é lhînghkyùq má ê lóm to kômù, “Myòq myàng jáng ngá-nhúng yhang lé sat pyám râ nghut lhê.” ga taí kôluî, ra-myin mau wà hkum má zim za haq zúng tô akô nghut ri.3 Nghut kôlhang, Samson gi, gùnggàm jé za yhup yû mù, toq luî, wà hkum lé, hkum zîng í zîng eq roq, hkumkyáng pé lé lâng hpûn yù mù, gòqsân mai wàq chûng luî, Hebron wà shut hu tô é bùm nyuq má ló tô pyâm ri.
4 Hau htâng má, Samson gi, Sorek Langhkaû má nyi é Delila gâ é myiwe rayùq lé chyitdàp bê nghut ri. 5 Haú hkûn, Hpilisiti byu pê é zau wuî gi, myiwe myhí haú yùq chyáng ê mù, “Nàng, yhang lé wó chyuq mù, yhang haî mù haû í kô é wum-o mó wó é hkyô eq, ngá-mòq, yhang lé hkâsu kut wó tuî zing ung pyám râ hkyô lé wó myî choq yu é nghut jáng, ngá-mòq yùq hkangmó nang lé ngùnhkyí myi joí joí byi râ nghut lhê.” ga taî akô nghut ri.
6 Haû mù, Delila gi, Samson lé, “Nàng haî mù haû í kô é wum-o mó wó é hkyô eq nang lé hká dông wó tuî zing ung pyám râ hkyô, ngo lé taî kyo aq.” ga taî ri.
7 Samson gi, yhang lé, “A kyuq huí shî é, jûm é gîng é tui nyhit hkat èq ngo lé tui jáng, ngá chyáng wum-o yom byùq mù, mâyû byù su dùt byùq râ nghut lhê.” ga taî ri.
8 Haû mù, Hpilisiti byu pê é zau wuî gi, myiwe myhí haú yùq chyáng a-kyuq huí shî é, jûm é gîng é tui nyhit hkat yu lé byi kôjáng, yhang gi, haú pê èq Samson lé tui bê nghut ri. 9 Haû mù, yhang gi, wàp má byù haq to nhâng luî, yhang lé, “Samson ê, Hpilisiti byu pé náng chyáng htîm wang lo akô ô!” ga taî ri. Nghut kôlhang, Samson gi, myi dap é jihkyîng lé làng hpyit é su, tui haú lé lû hpyit pyám bê nghut ri. Haû mù, yhang wúm bo é awang lé a sé byi kó nghut ri.
10 Haû mù, Delila gi, Samson lé, “Nàng gi, ngo lé byù gò tsuq mù, ngo lé mhaû ri. Nang lé hkâsu kut wó tuî kîng pyám râ hkyô ahkuî taî kyo aq.” ga taî ri.
11 Haû jáng, yhang gi, “A chung wú shî é tui sik èq ngo lé rago tuî pyám jáng, ngá chyáng wum-o yom byùq mù, mâyû byù su dùt byùq râ nghut lhê.” ga taî ri.
12 Haû mù, Delila gi, Samson lé tui sik haú pê èq tui mù, wàp má byù haq to nhâng luî, yhang lé, “Samson ê, Hpilisiti byu pé náng chyáng htîm wang lo akô ô!” ga taî ri. Nghut kôlhang, yhang gi, hkyîng lé lâng hpyit pyâm é su, yhâng é lòq mâ é tui lé lhoqhpyit pyâm ri.
13 Haû mù, Delila gi, Samson lé, “Nàng gi, shî myhó dâm ngo lé byù gò tsuq mù, mhaû nyi ri. Nang lé hkâsu kut wó tuî kîng pyám râ hkyô, ngo lé taî kyo aq.” ga taî ri.
Yhang gi, “Nàng, ngá é ulhum mâ é xâmban nyhit koq lé wòqgan long má ging ging wòq tap lhóm jáng, ngá chyáng wum-o yom byùq mù, mâyû byù su dùt byùq râ nghut lhê.” ga tû taî ri. Haû mù, Delila gi, yhang yhup myhî tô é hkûn, yhâng é ulhum mâ é xâmban nyhit koq lé yû mù, wòqgan long má wòq lhom luî, 14 ging ging wòq tap to mù, “Samson ê, Hpilisiti byu pé náng chyáng htîm wang lo akô ô!” ga yhang lé dum taî ri. Samson gi, yhup bûn lò mù, wòqgan eq roq wòqgan long mai xâm lâng hput kat bê nghut ri.
15 Haú hkûn, Delila gi, yhang lé, “Nàng, ngo lé lháng a lum é wá, ‘Nang lé ngò chyit ri.’ nghû hkâsu taî lhê lhú? Nàng, ngo lé byù gò tsuq mù, ngo lé náng é wum-o mó é awang a taî kyô é sum dá yhang nghut bê.” ga taî ri. 16 Yhang haû su ga nyí nyí buì buì taî pùt gunjâng nyi é nghut mù, Samson gi, shî râ í yhang myìt hpu zô nyi ri.
17 Haû mù, yhang gi, “Ngá é ulhum má gi, hkâ-nhám le uwuq shâm a záng wú shî é nghut lhê; hkâsu mù gâ le, ngò gi, ngá nû é ûnghkaû mai yhang, Garai Gasâng é matú Naziri rayùq dông àp nhong to bê sû nghut lhê. Ngá é xâm wùq pyâm é nghut jáng, ngá é wum-o ngá chyáng mai htoq byùq luî, ngò gi, mâyû byù su wum-o a bò dùt byùq râ nghut lhê.” ga Delila lé lhúnglháng taî kyô pyâm ri.
18 Delila gi, yhang lé lhúnglháng taî kyo bê lé myàng jáng, “Radàm dum lé keq; yhang, ngo lé lhúnglháng taî kyo bê nghut ri.” ga Hpilisiti zau wuî lé dang hun kat ri. Haû mù, Hpilisiti byu pé gi, yhángmòq é lòq má ngùnhtung kat chûng mù, dum taû ê bekô nghut ri. 19 Haû mù, Delila gi, yhâng é tanghkoí má Samson lé yhup nhang to mù, yhâng é ulhum mâ é xâmban nyhit koq lé wùq pyám nhâng luî, yhang lé dûn zìk jáng, yhâng chyáng mai yhâng é wum htoq byùq bê nghut ri.
20 Hau htâng, Delila gi, “Samson ê, Hpilisiti byu pé náng chyáng htîm wang lo akô ô!” ga taî ri.
Haú hkûn, yhang gi, bûn lò luî, “Ngò hí lhê su htoq ê mù, wum kat kat bá.” ga myìt yu ri. Nghut kôlhang, yhang gi, yhâng chyáng mai haû Yhûmsîng Garai htoq ló byùq bê nghut é lé a sé shi nghut ri.
21 Haû mù, Hpilisiti byu pé gi, yhang lé chyup yû mù, yhâng é myòqjí lé choq pyám byi luî, Gaza wà má shuî ló kômù, gyi tuíjang èq tui luî, htóng má luí láng nhang akô nghut ri. 22 Nghut kôlhang, yhâng é xâm gi, wùq pyâm é htâng má dum yùq hi lò bê nghut ri.
Samson Shi Byùq É Hkyô
23 Haú hkûn, Hpilisiti zau wuî gi, “Ngá-nhûng é hparà mai, ngá-nhûng é gyè hpó Samson lé ngá-nhûng é lòq má àp byi bê nghut ri.” ga taí kômù, yhángmòq é hparà Dagon lé hkungga nhông byi râ eq ûngmyuq poî kut kôrâ matú, chôm zùp zîng akô nghut ri.
24 Shiwa byu pé gi, yhang lé myàng kôjáng,
“Ngá-nhûng é hparà gi, ngá-nhûng é mau lé lhoqhtên é eq
ngá-nhûng é byù myo myo lé sat pyâm é, ngá-nhûng é gyè hpó lé,
ngá-nhûng é lòq má àp byi bê nghut ri.”
ga, yhángmòq é hparà lé hkya-on wàq toq akô nghut ri.
25 Yhángmòq gi, gyai yhang myìt ngón tô bum é hkûn, “Ngá-nhúng lé lhoqngón nhâng râ matú Samson lé shuî htoq lé keq.” ga taî akô; haû mù, yhángmòq gi, Samson lé htóng mai shuî htoq yu é nghut mù, yhang gi, yhángmòq é matú sùp lû shit ri.
Yhángmòq gi, yhang lé pyîlàt zìng gyoro má yàp nhang to kô é hkûn, 26 Samson gi, yhâng é lòq má zuî tô é duìnhâng zoshâng lé, “Ngò zìng má wó nghe to sháng gàq, ngá é lòq lé hparà yhûm hkúngzîng má sop zui nhâng àq.” ga taî ri. 27 Hparà yhûm haú má myiwe yùqgè byíng tô é htoq agó, Hpilisiti zau wuî bànshoq le nyi tô ri; ahtoq pyâm má le, myiwe yùqgè sum hkyîng yùq kô, Samson sùp lû shit é lé wú nyi bum akô nghut ri. 28 Haú hkûn, Samson gi, haû Yhûmsîng Garai lé, “Ahko Ahkáng lhúnglháng wó Sû Yhûmsîng Garai ê, ngo lé myìtbun aq. Garai Gasang ê, ngá é myòqjí é matú Hpilisiti byù shí bang lé lató wó hpuq sháng gàq, shí dá za ngo lé wum-o byi shilaq ô!” ga kyûdûng ri. 29 Hau htâng, yhang gi, hparà yhûm mâ é hkúngmó-zîng lé, lòqyo èq razìng lé pô, lòqpaî èq razìng lé pô kut luî, 30 “Ngò, Hpilisiti byu pé eq rahá shî bá.” ga taî mù, yhang wó é wum bànshoq kat kat jáng, yhûm haû gyòp gyó luî, yhûm haú má lúng tô é zau wuî eq shiwa byù bànshoq bang lé nhê pyet sat pyám bê nghut ri. Haû mù, yhang gi, yhang chyungxe dui nyi u sat pyâm é htoq má, yhang shi é hkûn sat pyâm é jé yhang myô ri.
31 Yhang gu yhang mâng pé eq yhâng wâ é yhûmbyù wuì bànshoq bang gyó ê mù, yhâng é màng lé ê wàq yù luî, Zora eq Eshita-ola gyoro mâ é yhâng wa Mano-a é lùp má myhup yhûm pyám bekô nghut ri. Yhang gi, Isira-elaq byu pé lé í xê zân târâ jéyáng ri.