Hpilisiti Byu Pé Lé Samson Lató Hpuq É Hkyô
15
Htâng má, súngsô yâm yù nám lé, Samson gi, bainám zo radu she chûng mù, yhâng é yhûmsîng myhí lé hui râ matú ê luî, “Ngò, ngá é yhûmsîng myhî é wàp má wang ê râ.” ga taî ri; nghut kôlhang, yhâng tsa gi, yhang lé a wàng nhang é za, 2 “Ngo gi, nàng, yhang lé hkyak a nguì lo nghut ri nghû, yhang lé náng é luzúm chyáng byi tsô pyám bê nghut lhê. Yhang gu gi, yhâng htoq je yúng lhê, a nghut lhí? Yhâng é malaî yhang gu lé yù àq.” ga taî ri.3 Haû mù, Samson gi, yhángmòq lé, “Shí dá ngò Hpilisiti byu pé lé je nò nhâng râ, nghut kôle, ngá chyáng mara bò râ a nghut.” ga taî ri. 4 Haû mù, yhang gi, htoq ê mù, wàmhkui sum shô du ê chyup yû luî, razúm zúm kut sho-myi eq sho-myi tuî pûng to byi mù, zúm hkangmó é sho-myi gyoro má myihu yu tuî tap byi luî, 5 myihu má myi ban tuq byi jáng, Hpilisiti byu pê é yò má nhang hâng kat ri. Haû mù, yhang gi, yâm tô é kyô ding eq yùq tô é kyô zo lé le, tsibyiq hkyâm eq tsanlun yò pé lé le, nyhê hkyô pyám byi bê nghut ri.
6 Hpilisiti byu pé gi, “Shî ó kut é lhú?” ga myi kôjáng, “Timna hpô é yhâng za-aû Samson nghut ri; yhâng é luzúm hpó lé, yhâng é yhûmsîng myhí byi tsô pyâm é yánmai nghut ri.” ga taî kyô akô.
Haû mù, Hpilisiti byu pé gi, dòq ê mù, myiwe myhí haû eq yhâng wa lé nyhê sat pyâm akô nghut ri. 7 Haû mù, Samson gi, yhángmòq lé, “Núngmòq haû su kut bê nghut mù, ngò le, núngmòq lé lató wó hpuq jáng shèq nhik shî râ nghut lhê.” ga taî ri. 8 Yhang gi, yhángmòq myo myo lé aiza sat kyop pyám mù, e ló luî, Etam mâ é lùqhkyûng mó hkaû má ê nyi tô ri.
9 Haú hkûn, Hpilisiti byu pé gi, dòq ê mù, Yudaq mau má wàp ê xuq luî, Lehi wà jé shoq nyi byíng bum akô nghut ri. 10 Haû mù, Yudaq byu pé gi, “Núngmòq, haî mù ngá-mòq lé lé htîm akô lhú?” ga myi kôjáng, yhángmòq gi, “Samson ngá-mòq lé kut é su, yhang lé le ngá-mòq taû kut râ matú, yhang lé chyup tuî yù râ nghû dòq lé é nghut lhê.” ga tû taî akô nghut ri.
11 Haû jáng, Yudaq mau mâ é byù sum hkyîng yùq gi, Etam mâ é lùqhkyûng mó má gyó ê mù, Samson lé, “Hpilisiti byu pé gi, ngá-nhûng é zau nghut é lé, nàng a sé lhú? Nàng, ngá-mòq lé haû su kut é gi, haí jung htà?” ga taî akô.
Yhang gi, “Ngò gi, yhángmòq ngo lé kut é su taû kut é za ru nghut lhê.” ga tû taî ri.
12 Haû jáng, yhángmòq gi, yhang lé, “Ngá-mòq gi, nang lé tuî shûng yù mù, Hpilisiti byu pê é lòq má àp pyám râ matú lé lo é nghut lhê.” ga taî akô.
Samson gi, “Núngmòq é lòq èq yhang, ngo lé a sat pyám râ nghû dakâm keq.” ga taî ri.
13 Haû jáng, yhángmòq gi, “Ngá-mòq nang lé a sat râ nghut lhê; nang lé tuî shûng yù mù, yhángmòq é lòq má àp byî pyám râ za nghut lhê. Gè gè yhang, ngá-mòq nang lé a sat.” ga tû taí kômù, yhang lé tui sik í hkat èq tuî shûng yù mù, lùqhkyûng mó haû mai shuî dòq ló bê nghut ri. 14 Lehi jowò má jé ló jáng, Hpilisiti byu pé gi, garu mù, yhâng shut lé lo akô nghut ri. Haú hkûn, haû Yhûmsîng Garaî é Sô gi, wum-o a-tsam mó èq yhâng chyáng jé é nghut mù, yhâng é lòqbú eq lòqyìn mâ é tui pé gi, myi nyé kun é jihkyîng su kun lò luî, yhâng é lòq mai gyùt gyó byùq bùm bê nghut ri. 15 Yhang gi, jûm ashî nghut é lozê é shi-kàp ralhum lé myàng mù, haú lé kyaq zuî yù luî, byù rahkyîng yùq lé sat pyám bê nghut ri.
16 Haû mù, Samson gi,
“Lozê é shi-kàp èq
byù rabùm razàng sat;
lozê é shi-kàp èq
byù rahkyîng yùq lé ngò sat pyám!” ga jihkyang sang ri.
17 Yhang gi, haû su ga ban taî é htâng má, shi-kàp haú lé dú pyám bê nghut ri; jowò haú lé Ramata Lehi ga myhîng akô nghut ri.
18 Hau htâng, yhang gi, gyai yhang wuìshit luî, haû Yhûmsîng Garai lé, “Nàng gi, Náng é duìnhâng zoshâng lé shî í kô é ûngmyuq hkyô byi bê nghut ri; ahkuî, ngò gi, wuìshit é èq shi byùq mù, ahpyo-kuq a hpyit é byu pê é lòq má wang byùq râ lhú?” ga wùt ngau ri. 19 Haû mù, Garai Gasang gi, Lehi jowò mâ é donghkong lé hpông kat luî, haû mai wuì htoq lo ri. Haú hkûn, Samson gi, wuì shuq jáng, wum-o dum byíng luî, byán byùq bê nghut ri. Haû mù, wuìbúm haú lé En Hakoreb ga myhîng akô nghut ri. Haû gi, hkû-nyí jé shoq Lehi jowò má jòq tô ashî nghut ri.
20 Samson gi, Hpilisiti byu pé ùp é pyàt má, Isira-elaq byu pé lé í xê zàn shuî-û ri.