Samson Myiwe Hâng Yu É Hkyô
14
Samson gi, Timna wà mó má gyó ê mù, Hpilisiti myiwe zo rayùq lé haú má ê myang ri. 2 Yhang gi, taû ló mù, yhâng nu eq yhâng wa lé, “Ngò, Timna wà mó má Hpilisiti myiwe zo rayùq myang to bê nghut lhê; yhang lé ngá é matú ê dung byi kó laq.” ga taî ri.3 Yhâng nu eq yhâng wa gi, “Náng é buìnùm wui chyáng le, ngá-nhûng é a-myû bànshoq má le, náng é matú myiwe zo a nyì lo luî, ahpyo-kuq a hpyit é Hpilisiti byu pê chyáng myiwe ê yû râ dùt byùq ri lhú?” ga tû taî akô.
Nghut kôlhang, Samson gi, yhâng wa lé, “Yhang lé shèq ê dung byi keq. Ngò gi, yhang lé gyai ô nau ri.” ga taî ri. 4 (Yhâng nu eq yhâng wâ nhik gi, haú hkyô lé Yhûmsîng Garai kut htoq é eq, yhang Hpilisiti byu pé lé jèq hô râ sû nghut é hkyô lé, a sé kó nghut ri; hkâsu mù gâ le, haú u, Hpilisiti byu pé gi, Isira-elaq byu pé lé ùp nyi é nghut ri.)
5 Samson gi, yhâng nu yhâng wa eq rahá Timna shut gyó e ló mù, Timna mâ é tsibyiq hkyâm pé má jé gyó e ló é hkûn, hkanghkyi râm zo radu yhâng shut nying garû htîm lo ri. 6 Haú hkûn, haû Yhûmsîng Garaî é Sô gi, wum-o a-tsam mó èq yhâng chyáng jé é nghut mù, yhang gi, bainám zo radu lé lâng hkyâm pyâm é su, yhâng é lòq èq za hkanghkyi haú lé lâng hkyâm pyám bê nghut ri. Nghut kôlhang, yhang gi, yhâng nu eq yhâng wa lé, yhang kut é hkyô a taî kyo nghut ri. 7 Hau htâng, Samson gi, gyó ê mù, myiwe zo haú lé dang ê nyô luî, yhang lé gyai chyitdàp byùq bê nghut ri.
8 Hau htâng a myáng má, yhang gi, myiwe zo haú lé hâng yù râ ga taû gyó e ló é hkûn, hkyô yàm jaù mù, hkanghkyi hau é hkyong lé ê wú jáng, hkyong hkaû má byo ra-ûm ûm mù, byo-î bo tô é lé myang ri. 9 Haû mù, yhang gi, yhâng é lòq èq byo-î haú lé nhop yû mù, so uchyang zo luî, yhâng nu eq yhâng wa lé châng hkyit jáng, yhángnhik lé le byî é nghut luî, yhángnhik le zô bekô nghut ri. Nghut kôlhang, yhang gi, yhángnhik lé, byo-î haû hkanghkyî é hkyong mai nhop yu é hkyô lé a taî kyo nghut ri.
10 Yhâng wa gi, myiwe zo haû lé ê huî ri; Samson le, zorâm wui é htûngli eq rajung za haú má poî kut ri. 11 Hpilisiti byu pé gi, yhang lé myàng jáng, yhâng é poî má bo lòm râ zorâm sum xê yùq hkyîn byî akô nghut ri.
12 Haú hkûn, Samson gi, yhángmòq lé, “Ngò, núngmòq lé danglhîng rahkat taî kyo kó bá; poî shî nyhit nyí gyoro má núngmòq lichyúm wó hpyî byi kô é nghut jáng, ngo, núngmòq lé nú nhâm é buhîng sum xê dung eq bu sik sum xê dung byi râ nghut lhê. 13 Hau é lichyúm lé núngmòq a wó hpyî byî é nghut jáng, núngmòq, ngo lé nú nhâm é buhîng sum xê dung eq bu sik sum xê dung byi ra râ nghut lhê.” ga taî ri.
Yhángmòq gi, “Ngá-mòq gyô wú bá; ngá-mòq lé náng é danglhîng taî kyo aq.” ga taî akô nghut ri.
14 Yhang gi,
“Zó su chyáng mai zô jung htoq;
wum bô su chyáng mai chuî jung htoq.” ga tû taî ri.
Yhángmòq gi, danglhîng hau é lichyúm lé sum nyí jé kôlhang a ge hpyî kó nghut ri.
15 Myi nyí nghû râ nyí má, yhángmòq gi, Samson é yhûmsîng myhí lé, “Náng é yhûmsîng hpó lé danglhîng lichyúm chyuq myî yù mù, ngá-mòq lé taî kyo aq; haû a nghut jáng, ngá-mòq gi, nàng eq náng wâ é yhûmbyù wuì lé nyhê sat pyám râ nghut lhê. Ngá-mòq é sùtzè lú yû râ matú, ngá-mòq lé ji yu é nghut lhê lhú?” ga taî akô nghut ri.
16 Haû mù, Samson é yhûmsîng myhí gi, yhâng é hí má, “Nàng gi, ngo lé a nguì nghut ri! Nàng gi, ngo lé gè gè yhang a chyit. Nàng gi, ngá é byu pé lé danglhîng byi kôlhang, ngo lé hau é lichyúm a hpyi kyo shi nghut ri.” ga ngau ûm ri.
Haû jáng, yhang gi, “Ngò, ngá nu eq ngá wa lé lháng hau é lichyúm a hpyi kyô le, nang lé haî mù hpyi kyo râ lhú?” ga tû taî ri. 17 Yhâng é yhûmsîng myhí gi, poî buìnyì haû nyhit nyí yhang ngau ûm nyi é nghut mù, nyhit nyí nyí nghû râ nyí má, yhang lûm ngau ûm nyi é yánmai taî kyo bê nghut ri. Yhâng é yhûmsîng myhí le, yhâng é byu pé lé danglhîng hau é lichyúm ê taî kyo bê nghut ri.
18 Haû wà byù wuì gi, nyhit nyí nyí, buì a wàng shi-má, yhâng chyáng lé kômù,
“Byô-i htoq haî chuî lhê lhú?
Hkanghkyî htoq wum haî bo lhê lhú?” ga taî akô.
Haû mù, Samson gi, yhángmòq lé,
“Núngmòq, ngá é no-pyâ èq a hpuq lhau le gi,
ngá é danglhîng lichyúm lé ge hpyî kôrâ a nghut.” ga taî ri.
19 Haú hkûn, haû Yhûmsîng Garaî é Sô gi, wum-o a-tsam mó èq yhâng chyáng jé é nghut mù, yhang gi, Ashikelon má gyó ê mù, yhángmòq é byù sum xê yùq lé sat pyám luî, haú bâng chyáng mâ é zè bànshoq hkyut shang yù mù, danglhîng lichyúm hpyî bang lé haú bâng é mèbu byî pyám bê nghut ri. Yhang gi, nhikjum mó yô é èq yhâng wâ é yhûm má taû ló bê nghut ri. 20 Samson é yhûmsîng myhí lé gi, poî haú má lé bo lom é luzúm rayùq lé byi tsô pyâm akô nghut ri.