Samson Hku Lé Lo É Hkyô
13
Haû Isira-elaq byu pé gi, Yhûmsîng Garaî é myòq hí má agè ashop é hkyô dum kut bekô nghut ri. Haû mù, haû Yhûmsîng Garai gi, yhángmòq lé Hpilisiti byu pê é lòq má myi xê zàn àp pyám bê nghut ri.2 Haú hkûn, Zora wà má, Dan up mâ é byù Mano-a ga sû rayùq nyi ri; yhâng é yhûmsîng myhí gi, baùdung nghut luî, zo a hkû nghut ri. 3 Haû Yhûmsîng Garaî é maumang lagyo gi, myiwe myhí haú yùq lé htoq shit mù, “Nàng gi, baùdung myhí nghut luî, zo a wó é nghut lhê; nghut kôlhang, nàng gi, zogûng wùn mù, yùqzo rayùq hkû râ nghut lhê. 4 Haû mù, sidìq àq; tsibyiq wing hkâshuq; gótû nyhûn tô é î le hkâshuq; a sansêng é haí jung le hkâzo. 5 Nàng gi, zogûng wùn mù, yùqzo rayùq hkû râ nghut lhê; zoshâng haû gi, ûnghkaû mai yhang Garai Gasâng é Naziri byùa dùt râ nghut é yánmai, yhâng é uxâm lé hkâ-nhám le uwuq shâm ge záng râ a nghut. Yhang gi, Isira-elaq byu pé lé, Hpilisiti byu pê é lòq mai hkyi yu hî râ nghut lhê.” ga taî ri.
6 Haû mù, myiwe haû gi, yhâng é yhûmsîng hpô chyáng ló mù, “Garai Gasâng é byù rayùq ngá chyáng lé ri. Yhang gi, Garai Gasâng é maumang lagyo rayùq su dùt mù, wú gyùq nhô za yhang dùt ri. Yhang hká mai lé é le ngò a myi, yhang le, ngo lé, yhâng é myìng a taî kyo nghut ri. 7 Nghut kôlhang, yhang gi, ngo lé, ‘Nàng gi, zogûng wùn mù, yùqzo rayùq hkû râ nghut lhê. Haû mù, ahkuî, tsibyiq wing le, gótû nyhûn tô é î le hkâshuq; a sansêng é haí jung le hkâzo; zoshâng haû gi, ûnghkaû mai, yhang shi é hkûn jé shoq Garai Gasâng é Naziri byù dùt râ nghut lhê.’ ga taî ri.” ga taî kyô ri.
8 Haû mù, Mano-a gi, haû Yhûmsîng Garai lé, “Yhûmsîng ê, Náng é duìnhâng zoshâng ngò dûng tôngbán nau rô; ngá-nhik chyáng Nàng nhang kat é Garai Gasâng é byù lé, ngá-nhik chyáng dum nhang kat mù, ahkuî hku lé lô râ nghut é zoshâng lé hkâsu kut hku ko râ hkyô lé mhoq byi nhâng shilaq.” ga kyûdung ri.
9 Garai Gasang gi, Mano-a é dang lé gyo byî é nghut luî, Garai Gasâng é maumang lagyo gi, myiwe myhí haû yò má nyi nyi é u lé htoq shit ri; nghut kôlhang, yhâng é yhûmsîng hpó Mano-a gi, yhang eq rahá a nyi âng to nghut ri. 10 Haû mù, myiwe myhí haû gi, hân ló mù, yhâng é yhûmsîng hpó lé, “Ra-nyí ngo lé htoq shit é sû, shî má dum jé nyi tô rô!” ga ló taî kyô ri.
11 Mano-a gi, toq luî, yhâng é yhûmsîng myhî htâng châng ê mù, byù haú yùq chyáng jé é hkûn, “Nàng gi, ngá é yhûmsîng myhí lé dáng nyo é sû a nghut lhú?” ga myi jáng, yhang gi, “Ngò nghut lhê.” ga taî ri.
12 Haû mù, Mano-a gi, yhang lé, “Nàng taî é dang pé dik byùq é hkûn, zoshâng haû hkâsû é byù dùt râ lhú? Yhang lé ngá-nhik hkâsu kut byi râ lhú?” ga myî ri.
13 Haû Yhûmsîng Garaî é maumang lagyo gi, “Náng é yhûmsîng myhí, ngò taî é bànshoq châng kut ra râ nghut lhê. 14 Yhang gi, tsibyiq nuî mai htoq é haî lé le, tsibyiq wing lé le, gótû nyhûn tô é î lé le, ge zo ge shuq râ a nghut é htoq agó, a sansêng é haî lé le ge zo râ a nghut. Yhang gi, yhang lé ngò hkunmó hkyô é lhúnglháng lé châng kut ra râ nghut lhê.” ga tû taî ri.
15 Haú hkûn, Mano-a gi, haû Yhûmsîng Garaî é maumang lagyo lé, “Náng é matú bainám zo radu wó sat hên byi shoq nyi to byi shilaq.” ga taî ri.
16 Haû jáng, haû Yhûmsîng Garaî é maumang lagyo gi, “Nàng ngo lé hkúm kôlhang, ngò gi, náng é zoshuq haî le zo râ a nghut. Nghut kôlhang, nàng, myi nyhé hkungga hen é nghut jáng, haû Yhûmsîng Garai lé nhông byi aq.” ga tû taî ri. (Mano-a gi, haû Yhûmsîng Garaî é maumang lagyo nghut é lé a sé nghut ri.)
17 Haú hkûn, Mano-a gi, haû Yhûmsîng Garaî é maumang lagyo lé, “Náng é dang dik é hkûn, ngá-nhik gi, nang lé wó hkúngga sháng gàq, náng é myìng haî gâ lhê lhú?” ga myî choq ri.
18 Yhang gi, “Nàng, haî mù ngá é myìng lé myî lhê lhú? Haû gi, maúhpo mó ru nghut lhê.” ga tû taî ri. 19 Haû mù, Mano-a gi, bainám zo radu eq gùqzò hkungga lé yù mù, haû Yhûmsîng Garaî é matú lunghtân htoq má nhông byî ri. Haû mù, haû Yhûmsîng Garai gi, Mano-a eq yhâng é yhûmsîng myhí myang tô é má maúhpo múzó kut shit ri. 20 Hkâsu mù gâ le, hkungga gyàp haû mai myishâm mauhkûng shut nyâng dòq ló nyi é u, haû Yhûmsîng Garaî é maumang lagyo le myishâm haû mai dòq ló bê nghut ri. Mano-a eq yhâng é yhûmsîng myhí gi, haú lé myàng kômù, myigùng má myòqdong ngóm gòp akô nghut ri. 21 Haû Yhûmsîng Garaî é maumang lagyo gi, Mano-a eq yhâng é yhûmsîng myhí lé a dum htoq shit lo nghut ri. Haú hkûn shèq, Mano-a gi, haû Yhûmsîng Garaî é maumang lagyo nghut é lé sê ri.
22 Haú hkûn, yhang gi, yhâng é yhûmsîng myhí lé, “Ngá-nhik gi, Garai Gasang lé myàng bê nghut é yánmai, hkyak shî berâ nghut lhê.” ga taî ri.
23 Nghut kôlhang, yhâng é yhûmsîng myhí gi, “Haû Yhûmsîng Garai, ngá-nhik lé sat pyám nau é ru nghut le gi, ngá-nhik é lòq mâ é myi nyhé hkungga eq zoshuq hkungga lé hàp yù râ a nghut; shî sû é hkyô bànshoq ngá-nhik lé tûn shit râ le a nghut; shî su ga le ahkuî taî kyo râ a nghut.” ga tû taî ri.
24 Myiwe myhí haû gi, yùqzo rayùq hkû mù, yhang lé Samson ga myìng myhíng byî ri. Yhang gi, kô lò luî, haû Yhûmsîng Garai gi, yhang lé shimân byî é nghut mù, 25 haû Yhûmsîng Garaî é Sô gi, yhang, Zora wà eq Eshita-ola wà gyoro mâ é Dan wàp má nyi tô é u, yhang lé myìt lhoqnhau byî hi ló bê nghut ri.