Jephta eq Ehprim up bang
12
Ehprim up bang gi, gyèwum tsîng yù luî, Yodan làng gû dàp mù, Zahpon jowò má jé luî, Yephta lé, “Nàng gi, haî mù luî, ngá-mòq lé le a wùt chung é za Ammon byu pé lé majan ê zân é lhú? Ngá-mòq gi, nàng eq náng é yhûm lé nyhê hkyô pyám râ nghut lhê.” ga taî akô nghut ri.2 Haú jáng, Yephta gi, “Ngò eq ngá é byu pé, Ammon byu pé eq mú mó htoq lhûm to mù, núngmòq lé hkyang lé shit kôlhang, núngmòq gi, ngo lé yhángmòq é lòq mai a lé hkyi yù kó nghut ri. 3 Núngmòq ngo lé a garúm yû râ nghut é lé ngò wó sé jáng, ngò gi, ngá é chyungxe lé àp nhong pyám mù, maukyo lai luî, Ammon byu pé lé majan ê zân é nghut mù, haû Yhûmsîng Garai gi, ngo lé, yhángmòq lé ûng nhâng bê nghut ri. Haú su nghut le wá, hkû-nyí, núngmòq gi, ngo lé majan zan râ matú haî mù lé akô lhú?” ga tû taî ri.
4 Haû mù, Yephta gi, Gile-at mau bang lé ji tsîng yù mù, Ehprim up bang lé majan zan bekô nghut ri. Gile-at mau bang gi, Ehprim up bang lé sat kyop pyâm akô; hkâsu mù gâ le, Ehprim up bang gi, yhángmòq lé, “Núngmòq Gile-at mau bang gi, Ehprim up bang eq Manase koq bâng é gyoro mai hpang gyó lo é bang ru nghut lhê.” ga taí byi kô é yánmai nghut ri. 5 Gile-at mau bang gi, Ehprim up bang taû ló é hkyô má hí ê luî, Yodan làng guhkan má ê lhôm mù, hpang lùt lo é Ehprim up bang mai, “Ngò gû dàp ló bá.” ga taí kôjáng, Gile-at mau bang gi, haú yùq lé, “Nàng, Ehprim up mâ é byù a nghut hkaî?” ga myî é hkûn, yhang gi, “A nghut.” ga tû taí jáng, 6 yhángmòq gi, “Haû jáng nghut bê; ‘Shibolet.’ nghû taî wú aq.” ga taí é hkûn, yhang gi, “Sibolet.” ga taî é nghut jáng, dang haú hkun lé, yhang hkyâng shoq a dàt taî é yánmai, yhángmòq gi, yhang lé chyup yû mù, Yodan làng guhkan má sat pyâm akô nghut ri. Haú hkûn, Ehprim up bang gi, myî mûn èq í hkyîng yùq yhang sat pyâm é huî akô nghut ri.
7 Yephta gi, Isira-elaq byu pê é târâ agyì hkyuq zân kut ri. Hau htâng, Gile-at mau byù Yephta gi, shi byùq luî, Gile-at wà rawà má yhang lé myhup yhûm pyâm akô nghut ri.
Ibizan, Elon Eq Abidon
8 Yephta é htâng má, Betlehem mâ é Ibizan gi, Isira-elaq byu pê é târâ agyì kut ri. 9 Yhang gi, yùqzo sum xê yùq eq byìzo sum xê yùq wó é nghut luî, byìzô pé lé gi, yhâng é a-myû koq a nghut é bang lé byi tsô pyám luî, yùqzô pé lé gi, yhâng é a-myû koq a nghut é dùmó sum xê yùq yù byî ri. Ibizan gi, Isira-elaq byu pê é târâ agyì nyhit zân kut ri. 10 Hau htâng, Ibizan gi, shi byùq luî, Betlehem má yhang lé myhup yhûm pyâm akô nghut ri.
11 Yhâng htâng má, Zebulun up mâ é Elon gi, Isira-elaq byu pê é târâ agyì raxê zàn kut ri. 12 Hau htâng, Elon gi, shi byùq luî, Zebulun up bâng é mau mâ é Aiyalon jowò má yhang lé myhup yhûm pyâm akô nghut ri.
13 Yhâng htâng má, Pirahton jowò mâ é byù Hilela é yhang zo Apdon gi, Isira-elaq byu pê é târâ agyì kut ri. 14 Yhang gi, yùqzo myi xê yùq eq gashu yùqzo sum xê yùq wó é nghut mù, haú bang gi, loze nyhit xê du jî akô nghut ri. Yhang gi, Isira-elaq byu pê é târâ agyì shit zân kut ri. 15 Hau htâng, Hilela é yhang zo Apdon gi, shi byùq luî, Amalek byu pê é bum mau mâ é, Ehprim maumyî mâ é Pirahton jowò má yhang lé myhup yhûm pyâm akô nghut ri.