11
Gile-at byù Yephta gi, wum-o a-tsam bo é sarhê hpó nghut ri. Yhâng wa gi, Gile-at nghut mù, yhâng nu gi, shiwa myhí nghut ri. 2 Gile-at é yhûmsîng myhí le yùqzô pé hku ri; yùqzo haú bang gi, kô lò jáng, Yephta lé, “Nàng gi, gó-myhî é yhang zo nghut é yánmai, ngá-mòq yhûm mâ é silî wunlî wó bo hkam yù râ a nghut.” ga taí kôluî, yhang lé hkat htoq pyâm akô nghut ri. 3 Haû mù, Yephta gi, yhang gu yhang mâng pê chyáng mai hpâng luî, Toba mau má ê nyi ri; byù goí byù gang rajùm gi, yhâng chyáng lé zing kôluî, yhâng htâng châng bum akô nghut ri.4 Rayòq rabun zo lai jáng, Isira-elaq byu pé lé Ammon byu pé majan lé zan kô é hkûn, 5 Gile-at mau sûwún wuî gi, Yephta lé Toba mau mai shuî yù râ matú lé kômù, 6 “Ammon byu pé lé ngá-mòq majan wó zan râ matú, ngá-mòq é gyèzau lé kut àq.” ga yhang lé taî akô nghut ri.
7 Yephta gi, yhángmòq lé, “Núngmòq ngo lé a naù a wom luî shèq, ngá wâ é yhûm mai ngo lé hkat htoq kô é nghut lhê, a nghut kó lhí? Ahkuî, núngmòq wuîhke jamjau hui jáng shèq, haî mù ngá chyáng lé akô lhú?” ga lhom taî ri.
8 Haú jáng, Gile-at mau sûwún wuî gi, yhang lé, “Nghut kôle, ahkuî, ngá-mòq náng shut lhing lò bê nghut lhê; Ammon byu pé lé majan zan râ matú ngá-mòq eq rahá bo lò àq; nàng gi, Gile-at mau má nyi é ngá-mòq bànshoq bâng é zau lé kut àq.” ga taî akô nghut ri.
9 Yephta gi, “Ammon byu pé lé majan ló zan râ matú núngmòq ngo lé shuî ló é eq rajung za, haû Yhûmsîng Garai gi, yhángmòq lé ngá é lòq má àp byî é nghut jáng, ngò gi, gè gè yhang, núngmòq é zau dùt râ lhú?” ga tû taî ri.
10 Gile-at mau sûwún wuî gi, “Haû Yhûmsîng Garai gi, ngá-mòq é sàksé nghut lhê; nàng taî é eq rajung za ngá-mòq kut râ nghut lhê.” ga tû taî akô nghut ri. 11 Haû mù, Yephta gi, Gile-at mau sûwún wuî eq rahá bo ló é nghut luî, shiwa byu pé gi, yhang lé, zau eq gyèzau kut nhâng bekô nghut ri. Yephta gi, yhâng é dang bànshoq lé, Mizipa jowò, haû Yhûmsîng Garaî é hí má dum taî ri.
12 Haû mù, Yephta gi, Ammon byu pê é hkóhkâm lé, lagyô pé nhang kat luî, “Ngò, nàng eq haî râ lhum mù, nàng, ngá é mau lé majan lé zân é nghut lhê lhú?” ga myí nhang kat ri.
13 Haû Ammon byu pê é hkóhkâm gi, Yephta é lagyô pé lé, “Isira-elaq byu pé Egutuq ming mai htoq lô kô é hkûn, ngá é maumyî lé Arinon Wuìlàng mai Yabok Wuìlàng jé, haû mai Yodan làng jé shoq lú yu pyám byi kô é nghut lhê mhaî. Ahkuî, maumyî haú lé ngón za dum tau byi aq.” ga lhom tû taî kat ri.
‘Isira-elaq byu pé gi, Moba maumyî eq Ammon maumyî lé a lú yu é nghut lhê. 16 Nghut kôlhang, yhángmòq, Egutuq ming mai htoq lô kô é hkûn, yòso mai laî ló luî, Nhông Nè laî byìt mù, Kadesha má jé kô é nghut lhê. 17 Haû mù, Isira-elaq byu pé gi, Edom hkóhkam chyáng lagyo pé nhâng mù, “Ngá-mòq lé núngmòq é mau mai laî ló râ ahkáng byi aq.” ga taí nhang kat é nghut lhê; nghut kôlhang, Edom hkóhkâm a gyo byi nghut ri. Yhángmòq gi, Moba hkóhkam chyáng le lagyo nhang kat kô é nghut kôle, yhang le lhom he-ngìk pyâm ri. Haû mù, Isira-elaq byu pé gi, Kadesha má nyi to kô é nghut lhê.
18 Hau htâng, yhángmòq gi, yòso mai laî byìt luî, Edom mau eq Moba mau mai koi laî ló mù, Moba mau buìhtoq hkyam mai jáng laî ló luî, Arinon Wuìlàng tû-tap má wàp xuq kô é nghut lhê. Haú hkûn, Arinon Wuìlàng gi, maukyo nghut é yánmai, Moba mau má yhángmòq a wàng kô é nghut lhê.
19 Haú hkûn, Isira-elaq byu pé gi, Heshibon wà má ùp é, Amori byu pê é hkóhkâm Sihon chyáng lagyo pé nhâng mù, “Ngá-mòq lé, náng é mau mai ngá-mòq é mau shut laî ló nhâng àq.” ga yhang lé ê taí nhang akô. 20 Nghut kôle, Sihon gi, Isira-elaq byu pé lé a lùmjíng mù, yhâng é maumyî mai a laî ló nhâng kut é htoq agó, yhâng é gyè hpúng bànshoq lé shuî tsîng yù mù, Yahazi jowò má wàp xuq luî, Isira-elaq byu pé lé majan zân akô nghut ri.
21 Haú hkûn, Isira-elaq byu pê é Garai Gasang, haû Yhûmsîng Garai gi, Sihon eq yhâng é gyè hpúng gón lé Isira-elaq byu pê é lòq má àp byî pyâm é nghut luî, Isira-elaq byu pé gi, yhángmòq lé ûng bê nghut lhê. Haû mù, yhángmòq gi, haú mau má nyi é Amori byu pê é maumyî bànshoq lé, 22 Arinon Wuìlàng mai Yabok Wuìlàng jé shoq le, yòso mai Yodan làng jé shoq le, wó sing yù bekô nghut ri.
23 Isira-elaq é Garai Gasang, haû Yhûmsîng Garai gi, Yhâng é byù Isira-elaq pê é hí mai Amori byu pé lé hkat htoq pyám byi bê nghut le nhîng, ahkuî, hká dông mai nàng haú lé dum sing yù nau ri lhú? 24 Nàng le, náng é hparà Hkemosha byî é haî lé le sing yu lhê, a nghut lhí? Haû eq rajung za, ngá-mòq é Garai Gasang nghut é, haû Yhûmsîng Garai mai ngá-mòq lé byî é haî nghut kôle, ngá-mòq sing yù râ nghut lhê. 25 Nàng gi, Moba hkóhkâm, Zipora é yhang zo Balak htoq je gyaú lhê lhú? Yhang gi, hkâ-nhám wá Isira-elaq byu pé eq dangnyhin nyhîn lhum mù, yhángmòq lé majan zân wú é lhú? 26 Isira-elaq byu pé gi, Heshibon eq hau é wàhtum pé má le, Aro-era eq hau é wàhtum pé má le, Arinon Wuìlàng yàm mâ é wà pé bànshoq má le, sum shô zàn yhang nyi tô é nghut lhê mhaî. Haú u lé, haî mù haú pé lé a dum sing yu é lhú? 27 Ngò gi, nang lé haî a kut shut é nghut lhê; nghut kôlhang, nàng gi, ngo lé majan lé zân é dông, ngo lé shut bê nghut ri. Târâ agyì Yhûmsîng Garai gi, Isira-elaq byu pé eq Ammon byu pê é gyoro má, hkû-nyí dangnyhin nyhîn lhûm é hkyô lé hpyit byi sháng gàq.’ gâ ri.” ga taí nhang kat ri.
28 Nghut kôlhang, Ammon byu pê é hkóhkâm gi, Yephta hun kat é dang lé a lhom gyo byi nghut ri.
29 Haú hkûn, haû Yhûmsîng Garaî é Sô gi, Yephta chyáng lé jé mù, yhang gi, Gile-at mau eq Manase mau laî byìt luî, Gile-at mau mâ é Mizipa jowò má ló jé mù, haû má Ammon byu pé lé gyè toq bê nghut ri. 30 Haú hkûn, Yephta gi, haû Yhûmsîng Garai lé, “Nàng, Ammon byu pé lé ngá é lòq má àp byî é nghut jáng, 31 ngò, Ammon byu pê chyáng mai ûngmyuq hkyô wó é èq dum taû lo é hkûn, ngo lé lé tê râ matú, ngá é yhûm hkum mai htoq lé lo é haî lé nghut kôlhang, haû Yhûmsîng Garaî é dùt râ nghut mù, ngò gi, haú lé myi nyhé hkungga dông nhông byi râ nghut lhê.” ga dâkam ri.
32 Haû mù, Yephta gi, Ammon byu pé lé majan ê zan râ matú toq e ló é nghut mù, haû Yhûmsîng Garai gi, yhángmòq lé yhâng é lòq má àp byi bê nghut ri. 33 Haû mù, yhang gi, Aro-era wà mai Minit wà jé shoq le, Abela Keramim jé shoq le, wà í xê wâ lé châng hkat sat kyop pyám bê nghut ri. Haú dông mai, Isira-elaq byu pé gi, Ammon byu pé lé wó ung yù bê nghut ri.
34 Yephta gi, Mizipa wà mâ é yhâng é yhûm má taû jé ló é hkûn, yhâng é byìzo gi, chapchéng bàt uchyang gó mù, yhang lé te yù râ ga htoq lé lo ri. Yhang gi, zote nghut mù, Yephta gi, gótû yùqzo byìzo a wó nghut ri. 35 Yephta gi, yhang lé myang é hkûn, yhâng é mèbu lâng cheq pyám mù, “Goì ê, ngá é byìzô ê! Nàng gi, ngo lé myìt myo ûng wom nhâng mù, ngò gi, myìt wuîhkê byùq bê nghut ri. Ngò gi, haû Yhûmsîng Garai lé dâkam to bê nghut luî, a ge taû wùp yù lo nghut rô.” ga ngaù hkyang sang ri.
36 Haû jáng, yhang zo byìzo gi, “Ngá wa ê, haû Yhûmsîng Garai lé nàng dâkam to bê nghut jáng gi, nàng danghtum htûm tô é eq rajung za ngo lé kut àq; hkâsu mù gâ le, ahkuî, haû Yhûmsîng Garai gi, náng é gyè nghut é Ammon byu pé lé lató hpuq byi bê nghut ri. 37 Nghut kôlhang, ngo lé rahkat gyo byi shilaq; ngò gi, hkâ-nhám le zo-myi ló râ a nghut lô é yánmai, ngá é luzúm wuî eq bùm má ê lám kún mù, ngá é zo-myi gyíng é matú, lha-mó í hkyap ê ngau pyám nhang shilaq.” ga tû taî ri.
38 Yhang gi, “Nàng ê àq.” ga taî ri. Haû mù, yhang gi, yhâng é byìzo lé lha-mó í hkyap ê nhâng bê nghut mù, byìzo haû gi, yhâng é luzúm wuî eq bùm pé má ê kômù, yhang hkâ-nhám le zo-myi a ló lo râ nghut é yánmai, chôm ngaù bekô nghut ri. 39 Yhang gi, lha-mó í hkyap byíng jáng yhâng wâ chyáng dum taû lo é nghut mù, yhâng wa gi, yhang dâkam tô é eq rajung za yhâng é byìzo lé kut bê nghut ri. Yhang gi, zo-myi gyíng nghut ri.