Tola
10
Abimelek é htâng má, Isira-elaq a-myû lé hkyi yù râ matú, Dodo é yhang shu, Pu-a é yhang zo Tola gâ é Yisahka up mâ é byù rayùq nyi htoq lo ri. Yhang gi, Ehprim bum mau mâ é Shamira jowò má nyi ri. 2 Yhang gi, Isira-elaq a-myu é târâ agyì í xe sum zân kut luî, shi ló byùq bê nghut ri; yhang lé Shamira jowò má myhup yhûm akô nghut ri.Ya-ira
3 Yhâng é htâng má, Gile-at byù Ya-ira ga sû nyi htoq lô mù, Isira-elaq a-myû wuì lé í xe í zân shuî-û ri. 4 Yhang gi, yùqzo sum xê yùq wó é nghut luî, haú bang gi, loze sum xê du ji kômù, wà sum xê wà lé up akô; wà haú pé gi, Gile-at mau má chyat jòq é nghut mù, hkû-nyí jé shoq, Hawot Ya-ira ga myhîng akô nghut ri. 5 Ya-ira shi byùq jáng, yhang lé Kamon jowò má myhup yhûm akô nghut ri.
Yephta
6 Haû Isira-elaq byu pé gi, Yhûmsîng Garaî é myòq hí má agè ashop é hkyô dum kut bekô nghut ri. Yhángmòq gi, Balaq hparà pé eq Ashatoret hparà pé, Aram mau mâ é hparà pé, Sidon wà mâ é hparà pé, Moba mau mâ é hparà pé, Ammon byu pê é hparà pé eq Hpilisiti byu pê é hparà pé lé dójaú kômù, haû Yhûmsîng Garai lé tô pyám kôluî, Yhang lé a dójaú lo kó nghut ri. 7 Haû mù, Yhang gi, yhángmòq lé nhikjum yo luî, Hpilisiti byu pé eq Ammon byu pê é lòq má ûng pyâm é nghut mù, 8 haú bang gi, haú zân mai yhángmòq lé zing-ri luî zìk zo bekô nghut ri. Haú bang gi, Amori byu pê é maumyî mâ é Gile-at mau, Yodan làng buìhtoq hkyam má nyi é Isira-elaq byù bànshoq bang lé raxe shit zân yhang zìk zô akô nghut ri. 9 Ammon byu pé le, Yodan làng gû dàp luî, Yudaq up, Ben-yamin up eq Ehprim up lé majan ê zân é nghut mù, Isira-elaq a-myû wuì gi, ihkyùp mó huî nyì bekô nghut ri. 10 Haú hkûn, Isira-elaq byu pé gi, haû Yhûmsîng Garai lé, “Ngá-mòq gi, ngá-mòq é Garai Gasang lé tô pyám mù, Balaq hparà pé lé dójaú é yánmai, Nang lé mara shut bê ô!” ga wùt dûng ngau akô nghut ri.
11 Haû Yhûmsîng Garai gi, “Haû Egutuq byu pé, Amori byu pé, Ammon byu pé, Hpilisiti byu pé, 12 Sidon byu pé, Amalek byu pé eq Ma-on byu pê èq núngmòq lé zìk zo mù, núngmòq Ngo lé wùt dûng ngaù kô é hkûn, Ngò, núngmòq lé, yhángmòq é lòq mai a hkyi yu é nghut lhê lhú? 13 Nghut kôlhang, núngmòq gi, Ngo lé tô pyâm to kômù, gótû hparà pé lé dójaú bekô nghut luî, Ngò gi, núngmòq lé hkyi yù râ a nghut lo. 14 Núngmòq hkyin yù bê hparà pê chyáng ê wùt dûng ngaù keq. Núngmòq wuîhke jamjau huî nyi é hkûn, núngmòq lé yhángmòq hkyi yù kó sháng gàq!” ga tû taî ri.
15 Nghut kôlhang, Isira-elaq byu pé gi, haû Yhûmsîng Garai lé, “Ngá-mòq mara kut shut bê nghut lhê ô. Ngá-mòq lé Nàng wó myìt é dông kut àq; nghut kôlhang, ahkuî, ngá-mòq lé hkyi yù laq ô.” ga taî akô nghut ri. 16 Haû mù, yhángmòq gi, maigan hparà pé lé tô pyám luî, haû Yhûmsîng Garai lé dójaú bekô nghut ri. Haû mù, haû Yhûmsîng Garai gi, Isira-elaq byu pé hpu hkê nyi é hkyô lé wú shogyo bê nghut ri.
17 Haû Ammon byu pé gi, chôm zùp mù, Gile-at mau má wàp xuq nyî kô é hkûn, Isira-elaq byu pé le, chôm zing mù, Mizipa jowò má wàp xuq nyi tô akô nghut ri. 18 Haú hkûn, Gile-at mau mâ é byu pê é ushuq pé gi, “Ammon byu pé lé htîm é má shuî-û é sû ó yùq nghut kôle, Gile-at mau má nyi é bànshoq bâng é zau dùt râ nghut lhê.” ga rayùq eq rayùq taî lhûm bum akô nghut ri.