Abimelek
9
Yerup Balaq é yhang zo Abimelek gi, Shehkem wà má ló mù, yhâng tsa yhâng aûmó pé lé ê hui luî, yhángmòq eq yhángmòq é a-myû koq bànshoq é hí má, 2 “Shehkem mâ é mingbyû wuì bànshoq bang lé, ‘Yerup Balaq é yhang zô pé nyhit xê yùq èq núngmòq lé ùp é eq, rayùq èq za núngmòq lé ùp é gi, núngmòq é matú hkâ je ge akô lhú?’ nghû myi keq. Ngò gi, núngmòq é suisho nghut é lé le bun keq.” ga taî ri.3 Yhâng tsâ pé, Shehkem mingbyû wuì lé dang haú pé bànshoq htòt taî kyo kô é hkûn, yhángmòq gi, “Yhang gi, ngá-mòq é gu-mang nghut lhê.” ga taí kômù, Abimelek lé myìt dàp bekô nghut ri. 4 Yhángmòq gi, yhang lé, Balaq Berit hparà yhûm mâ é ngùnhtung raxê rùng byi kôjáng, Abimelek gi, yhâng htâng cháng râ matú, byù goí byù gâng pé lé hau èq lung yu ri. 5 Haû mù, yhang gi, Ohpra wà mâ é yhâng wâ é yhûm má ló mù, Yerup Balaq é yhang zô pé nghut é, yhang gu yhang mâng pé nyhit xê yùq lé, lùqgòk mó racham htoq má za sat pyâm ri. Nghut kôlhang, Yerup Balaq é yhang zo zohtáng Yohtam gi, wó haq lùt bê nghut ri. 6 Shehkem wà mâ é mingbyû wuì eq Bet Milo wà má nyi é bang bànshoq gi, chôm zùp zing mù, Shehkem wà mâ é wàqmyòq gàm nàm mâ é masàt zìng wang má, Abimelek lé hkóhkâm ayá byi bekô nghut ri.
7 Yohtam lé haú hkyô taî kyo kôjáng, yhang gi, Gerizim Bùm nyuq má ló dòq yàp to mù, htê mó lhoqmyhâng luî, “Shehkem mingbyû wuì ê, núngmòq lé Garai Gasang gyo byi sháng gàq, ngá é dang lé gyo keq. 8 Radàm lé, sikgâm pé gi, yhángmòq é matú hkóhkâm dáng yû râ ga htoq ê kômù, tsanlun gàm lé, ‘Ngá-mòq é hkóhkâm kut àq.’ ga ê taî akô.
9 Nghut kôlhang, tsanlun gàm haû gi, ‘Sikgâm pé núngmòq lé ùp râ matú, hparà pé eq waxâng zo wuì lé hkúngga hpautap nyi é ngá é xû lé tô pyám râ lhú?’ ga lhom tû taî ri.
10 Haû jáng, sikgâm pé gi, hkohúm gâm lé, ‘Ngá-mòq é hkóhkâm lé kut àq.’ ga taî akô.
11 Nghut kôlhang, hkohúm gâm haû gi, ‘Sikgâm pé núngmòq lé ùp râ matú, já é eq chuî nghâm é ngá é ashi lé tô pyám râ lhú?’ ga tû taî ri.
12 Haû jáng, sikgâm pé gi, tsibyiq nuî lé, ‘Ngá-mòq é hkóhkâm lé kut àq.’ ga taî akô.
13 Nghut kôlhang, tsibyiq nuî gi, ‘Sikgâm pé núngmòq lé ùp râ matú, hparà pé eq waxâng zo wuî lé lhoqngón byî é ngá é tsibyiq wing lé tô pyám râ lhú?’ ga tû taî ri.
14 Ló htáng má, sikgâm bànshoq gi, zu púng lé, ‘Ngá-mòq é hkóhkâm lé kut àq.’ ga chôm taî akô.
15 Zu púng haû gi, sikgâm pé lé, ‘Gè gè yhang, núngmòq lé ùp râ matú ngo lé hkóhkâm dáng byi kôrâ nghut jáng, ngá é wùpzo ô má lé nghêhkaû keq; haû a nghut jáng, zu púng mai myi htoq lô mù, Lebanon mâ é kyám gâm pé nyé gyó pyám sháng gàq!’ ga taî ri.
16 Núngmòq, Abimelek lé hkóhkâm kut yû kô é hkyô gi, hkúngga hpautap é eq ge é jujúm myìt dông kut bekô nghut lhê lhú? Núngmòq gi, Yerup Balaq eq yhâng é yhûmbyù wuì lé ge é dông kut é nghut bekô lhú? Yhang kut é eq gíngdán é dông kut bekô nghut lhê lhú? 17 Ngá wa, núngmòq é matú majan bo zan byi luî, yhâng é chyungxe lé lháng a ha bun loshoq, núngmòq lé Midi-an byu pê é lòq mai hkyi yù bê nghut é hkyô lé, myìtbun keq. 18 Nghut kôlhang, hkû-nyí, núngmòq gi, ngá wâ é yhûmhtu lé gumlau toq kômù, yhang zo nyhit xê yùq lé, lùqgòk mó racham htoq má za sat pyám kôluî, yhâng é jùn myhî é yhang zo Abimelek lé, yhang, núngmòq é suisho nghut é yánmai, Shehkem wà mâ é mingbyû wuì lé ùp râ matú hkóhkâm dông dáng yû bu-nhung! 19 Haû mù, núngmòq gi, hkû-nyí, Yerup Balaq eq yhâng é yhûmbyù wuì lé hkúngga hpautap é eq ge é jujúm myìt mai kut bekô nghut lhê lhú? Kut bekô nghut jáng, Abimelek chyáng gabú byam chyû nyì keq; yhang le núngmòq chyáng gabú byam chyu sháng gàq! 20 Nghut kôlhang, núngmòq haû su kut é a nghut jáng, Abimelek chyáng mai myi htoq lô mù, Shehkem wà eq Bet Milo wà má nyi é mingbyû wuì núngmòq nyé gyó pyám mù, Shehkem wà eq Bet Milo wà má nyi é mingbyû wuì núngmòq chyáng mai myi htoq lô luî, Abimelek nyé gyó sháng gàq!” ga taî garû ri.
21 Hau htâng, Yohtam gi, hpâng luî, Beri wà má ló jé mù, yhang mang Abimelek lé gyùq é yánmai haû má nyi nyi ri.
22 Abimelek, Isira-elaq byu pé lé sum zân ùp é htâng má, 23 Garai Gasang gi, Abimelek eq Shehkem wà mâ é mingbyû wui é gyoro má gyè kut lhum râ myìt kat byî é nghut mù, Shehkem wà mâ é mingbyû wuì gi, Abimelek lé a ge é hpàqchyî haq htûng bekô nghut ri. 24 Garai Gasang haû su kut é gi, Yerup Balaq é yhang zo nyhit xê yùq lé sat é yhángmòq é sui yui chyin é matú, yhángmòq é gu-mang Abimelek lé le, yhang gu yhang mâng pé lé bo sat garúm é Shehkem wà mâ é mingbyû wuì lé le, lató hpuq râ matú nghut ri. 25 Shehkem wà mâ é mingbyû wuì gi, Abimelek lé gyám râ matú bùm nyuq má byù haq lhom to nhâng kô é nghut mù, haú bang gi, haú mai laî lo é yùq hkangmó lé da-myàq lhom myàq akô. Haû mù, Abimelek lé haú hkyô taî kyô akô nghut ri.
26 Haú hkûn, Ebet é yhang zo Gala gi, yhâng é a-myû koq pé eq rahá Shehkem wà má htòt lé kô é nghut mù, Shehkem wà mâ é mingbyû wuì gi, yhang lé lhom lùmhkau akô nghut ri. 27 Shehkem wà mâ é mingbyû wuì gi, yò pé má ê luî, tsibyiq shi shû yù mù, tsibyiq wing pyik htoq yû luî, yhángmòq é hparà yhûm má poî ê kut mù, zo uchyang, shuq uchyang, Abimelek lé nhîng bum akô nghut ri. 28 Haú hkûn, Ebet é yhang zo Gala gi, “Abimelek gi, ó wá nghut luî, ngá-nhúng Shehkem byu pé yhang lé dójaú râ dùt ri lhú? Yhang gi, Yerup Balaq é yhang zo nghut lhê, a nghut lhí? Yhâng é lagyo gi, Zebula za nghut lhê, a nghut lhí? Shehkem é yhâng wa, Hamora é yhûmhtu lé kúm dójaú keq! Haî mù, Abimelek lé dójaú râ lhú? 29 Byù shí bang ngá é lòqhkaû má za wang byùq le gè râ wá! Haú hkûn, ngò gi, Abimelek lé huî sêng pyám râ nghut lhê. ‘Náng é gyè hpúng gón lé wùt htoq lé aq.’ nghû le Abimelek lé ngò taí râ nghut lhê.” ga taî ri.
30 Haû wà zau Zebula gi, Ebet é yhang zo Gala taî é dang lé wó gyo mù, nhikjum gyai yô byùq bê nghut ri. 31 Haû mù, yhang gi, Abimelek chyáng byù haq nhang kat mù, “Ebet é yhang zo Gala eq yhâng é a-myû koq bang gi, Shehkem má htòt lé kômù, nang lé gumlau toq râ matú, wà byù wuì lé myìt lhoqnhaû nyi akô nghut ri. 32 Haû mù, ahkuî, nàng eq náng é byu pé gi, myín lé lé luî, yò pé má lé haq to mù, 33 nàpkyó buì htoq é hkûn, wà haú lé wang htim keq. Gala eq yhâng é byu pé, nang lé htim râ ga htoq lé lô kôjáng, ahkyo wú mù yhángmòq lé lhom htim keq.” ga taí nhang kat ri.
34 Haû mù, Abimelek eq yhâng é gyè hpúng pé bànshoq gi, myín lé toq mù, gyèzô pé lé myi hpúng gàm luî, Shehkem wà nàm má jowò haq yu to bekô nghut ri. 35 Ebet é yhang zo Gala gi, htoq ê mù, wà hkum má yàp tô é hkûn, Abimelek eq yhâng é gyè hpúng pé gi, yhángmòq haq tô é jang mai htoq lo bum akô nghut ri.
36 Gala gi, yhángmòq lé myàng luî, Zebula lé, “Wú aq, bùm nyuq mai byu pé yán gyó lo ri.” ga taí jáng, Zebula gi, “Bùm pê é wùpzo lé byù wú htoq kat é nghut ri.” ga tû taî ri.
37 Nghut kôlhang, Gala gi, “Wú aq, bùm gùng mai byù ra-am gyó lé lô mù, rahpúng gi, gumhpân wàqmyòq gàm dông lé lo akô nghut ri.” ga dum taî ri.
38 Haú hkûn, Zebula gi, yhang lé, “Nàng, ‘Abimelek gi, ó wá nghut luî, ngá-nhúng yhang lé dójaú râ dùt ri lhú?’ ga taî é nghutbun dang hká shut nghut byùq bê lhú? Nàng rhoî jihkoî taî é bang gi, hé bang nghut lhê, a nghut lhú? Htoq ê mù, yhángmòq lé ê htim aq mhaî!” ga taî ri.
39 Haû mù, Gala gi, Shehkem wà mâ é mingbyû wui lé shuî-û htoq ê mù, Abimelek lé lhom htim bekô nghut ri. 40 Abimelek gi, ûng luî, Gala hpang é nghut mù, byù myo myo le, yhángmòq hpang é má wà hkum jé shoq dàm tap byî é hui bekô nghut ri. 41 Hau htâng, Abimelek gi, Aruma jowò má nyi tô ri; Zebula gi, Gala eq yhâng é a-myû koq lé Shehkem wà mai hkat htoq pyám bê nghut ri.
42 Htang nyí, Shehkem wà byù wuì yò pé má htoq e bum akô; haû mù, Abimelek lé haú hkyô taî kyô akô nghut ri. 43 Haû mù, yhang gi, yhâng é byu pé lé sum hpúng gàm mù, yò pé má haq tô bum akô; yhang gi, wà byù wuì, wà mai htoq lo bùm kô é lé myàng jáng, yhángmòq lé lhom htîm sat pyâm ri. 44 Abimelek eq yhâng htâng châng é gyè hpúng gi, hí shut htîm ê kômù, wà hkum má jowò ê yu akô nghut ri; gótû í hpúng gi, yò pé má nyi tô é bang lé ê htim kômù, sat pyám bekô nghut ri. 45 Abimelek gi, haú nyí buì wà haú lé htim mù, wó ung yù luî, haú mâ é byu pé lé sat pyám mù, wà lé lhoqhten lhoqhpyoq pyám luî, xo hpyûn tô bê nghut ri.
46 Shehkem mâchya mâ é bang gi, haú hkyô lé wó gyo kôjáng, Eli-Berit hparà yhûm mâ é gingtíng jowò má ê haq nyi tô akô nghut ri. 47 Abimelek gi, yhángmòq haú má haq zîng tô bum é lé wó gyo jáng, 48 yhang eq yhâng é byù bànshoq bang Zalamon Bùm má dòq ê mù, wazûng èq sikkoq pé zân yù luî, gòqsân má wàq to mù, “Ngò kut é su núngmòq hân châng kut keq.” ga yhâng é byu pé lé hkunmó hkyô ri. 49 Haû mù, yhâng é byù bànshoq bang gi, sikkoq zân yù mù, Abimelek htâng cháng bekô; yhángmòq gi, gingtíng jowò hau é lhînghkyùq má sikkoq haú pé lé bùm mù, byù haú bang ahkaû má lhúng tô bum ashî u, myi tap kat bekô nghut ri. Haû mù, Shehkem mâchya hkaû má nyi tô é myiwe yùqgè rahkyîng yùq kô bànshoq shi byùq bekô nghut ri.
50 Hau htâng, Abimelek gi, Htebeza wà má ê lhôm mù, haû lé zân ung yù bê nghut ri. 51 Nghut kôle, wà haú má gingtîng é mâchya ralhum jòq é nghut mù, wà mâ é myiwe yùqgè bànshoq bang gi, haú má hpang wàng kôluî, hkum myhî pyám kômù, mâchya htoq má dòq ló akô nghut ri. 52 Abimelek gi, mâchya haú má ê mù, haú lé ê htim ri; nghut kôlhang, yhang gi, mâchya haú lé myi nyé râ ga mâchya hkum má chyâng htèp e ló é hkûn, 53 myiwe rayùq gi, Abimelek é ulhum htoq má luí nghop long dú hkyô kat luî, yhâng é ugyap lé dú hkyop kat ri.
54 Haú hkûn, yhang gi, yhâng é shâm lhâm bo wàq sû lé hân wùt yù mù, “Náng é shâm shê mù, ngo lé sat pyám aq; haú hkûn, yhángmòq gi, ‘Abimelek lé myiwe rayùq èq sat pyâm ri.’ ga a wó taí kôrâ nghut lhê.” ga taî ri. Haû mù, yhâng é duìnhâng zoshâng gi, yhang lé htaû ròt kat é nghut mù, yhang gi, shi byùq bê nghut ri. 55 Haû Isira-elaq byu pé gi, Abimelek shi byùq bê nghut é lé myàng kôjáng, yhángmòq é yhûm shut taû ló bekô nghut ri.
56 Haú dông, Garai Gasang gi, Abimelek mai yhang gu yhang mâng pé nyhit xê yùq lé sat pyâm é dông yhâng wa lé shut pyâm é, yhâng é yubàk mara lé lató hpuq bê nghut ri. 57 Garai Gasang gi, Shehkem wà mâ é byu pé lé le, yhángmòq é agè ashop hkyô bànshoq é matú lató hpuq bê nghut ri. Haú dông mai, Yerup Balaq é yhang zo Yohtam é nhinghkun gi, yhángmòq chyáng zùq bê nghut ri.