Zeba Eq Zalamuna
8
Haú hkûn, Ehprim byu pé gi, Gidon lé, “Nàng, haî mù ngá-mòq lé shî kut lhê lhú? Nàng, Midi-an byu pé lé majan ê zan râ matú e ló é hkûn, haî mù ngá-mòq lé a kyô é lhú?” ga gyai yhang mara chôm hun akô nghut ri.2 Nghut kôlhang, yhang gi, yhángmòq lé, “Núngmòq htoq chyân luî ngò haî wó kut râ lhú? Ehprim byu pê é tsibyiq agyó ahtâng gi, Abi-ezara pé shû yu é tsibyiq shi htoq je ge lhê a nghut kó lhí? 3 Garai Gasang gi, Midi-an pê é zau Orep eq Ze-ep lé núngmòq é lòq má àp byi bê mhaî. Núngmòq kut é su ngò haî wó kut é lhú?” ga tû taî ri. Dang haú lé wó gyo kôjáng, yhángmòq gi, nhikjum yô é bui ló byùq bekô nghut ri.
4 Gidon eq yhâng htâng châng é byù sum shô yùq gi, Yodan làng gû dàp kômù, ngú myûng byùq kôlhang ru châng hkat nyi akô nghut ri. 5 Haú hkûn, Gidon gi, Suhkut byu pé lé, “Ngá htâng châng é byu pé lé mùk byi tso keq; yhángmòq lûm ngú byùq bekô nghut ri. Ngò gi, Midi-an hkóhkâm Zeba eq Zalamuna nhik lé châng hkat nyi é nghut lhê.” ga taî ri.
6 Nghut kôlhang, Suhkut zaugun wuì gi, “Zeba eq Zalamuna nhik náng é lòqhkaû má nghut to bê nghû luî, náng htâng châng é bang lé ngá-mòq mùk byi tso râ lhú?” ga taî akô nghut ri.
7 Haú hkûn, Gidon gi, “Haû jáng nghut bê; haû Yhûmsîng Garai mai Zeba eq Zalamuna nhik lé ngá é lòq má àp byî é hkûn, ngò, núngmòq lé yòsô zu ajà ja èq bàt râ nghut lhê.” ga tû taî ri.
8 Yhang gi, haú mai Penu-ela má dòq ló luî, hí lhê é eq rajung za ló dung jáng, yhángmòq lé, Suhkut byu pé su ga lhom tû taî akô nghut ri. 9 Haû mù, yhang gi, Penu-ela byu pé lé, “Ngò ûngmyuq hkyô wó mù dum taû lo é hkûn, mâchya shî lé hpyoq hpyi pyám râ nghut lhê.” ga taî ri.
10 Haú u lé, Zeba eq Zalamuna gi, yhángnhik é gyè hpúng ramûn ngo hkyîng yùq eq rahá Karikora jowò má nyi tô akô; haú gû gi, buìhtoq hkyam byu pê é gyèzô pé mai myìt gyó tô é bang nghut bê; hkâsu mù gâ le, shâm chung é gyè rasên í mun gi, shi byùq bekô nghut ri. 11 Gidon gi, Noba eq Yokbeha wa é buìhtoq hkyam má ê htòt nyi lhing wún é byu pê é hkyô dông dòq ê mù, abun aso nyi tô é gyèwap lé ê hpyoq akô nghut ri. 12 Midi-an hkóhkâm Zeba eq Zalamuna nhik hpang akô; nghut kôlhang, Gidon gi, yhángnhik lé châng hkat luî, wó chyup yu é htoq agó, yhángnhik é gyèzô pé bànshoq lé le lhoqpyo pyám bê nghut ri.
13 Yo-ashi é yhang zo Gidon gi, majan haú mai taû lò mù, Heresa wà ló hkyô má htoq lo ri. 14 Yhang gi, Suhkut wà mâ é zorâm rayùq lé chyup yû mù myi jáng, zorâm haû gi, Suhkut wà mâ é zaugun wuì eq sûwún wuî nyhit xe nyhit yùq é myìng lé ká byî ri. 15 Haú hkûn, Gidon gi, Suhkut wà byu pê chyáng lé mù, “Núngmòq, ngo lé, ‘Zeba eq Zalamuna nhik náng é lòqhkaû má nghut to bê nghû luî, náng htâng châng é bang lé ngá-mòq mùk byi tso râ lhú?’ ga rhoî dang taî é su nhik Zeba eq Zalamuna gi, shí nhik nghut bê.” ga taî ri. 16 Haû mù, yhang gi, wà sûwún wuî lé wùt yù mù, yòso mâ é zu ajà ja èq Suhkut byu pé lé dam byî é dông mhoq shit ri. 17 Hau htoq agó, yhang gi, Penu-ela wà mâ é mâchya lé le hpyoq hpyi pyám mù, wà mâ é yùqgè wuì lé sat pyâm ri.
18 Hau htâng, yhang gi, Zeba eq Zalamuna nhik lé, “Tabora bùm má núngnhik sat é byu pé gi, hkâsû é bang nghut akô?” ga myi jáng, yhángnhik gi, “Nàng sû é bang chyat nghut akô; yùq hkangmó gi, hkóhkâm zo pé su chyat dùt akô nghut ri.” ga tû taî akô.
19 Haú hkûn, Gidon gi, “Haú bang gi, ngá nû é yhang zô pé, ngá é gu-mang wuì yhang nghut lhê. Haû Yhûmsîng Garai rû dui nyi é eq rajung za, yhángmòq lé núngnhik chyungxe lhut to kô é ru nghut le gi, ngò, núngnhik lé sat râ a nghut.” ga tû taî ri. 20 Hau htâng, yhang gi, yhang zo lagám Yehtera shut lhîng mù, “Yhángnhik lé sat pyám aq.” ga taî ri. Nghut kôlhang, Yehtera gi, zoshâng zo ru nghut ashî mù, gyùq luî, yhâng é shâm lé a shê nghut ri.
21 Haú hkûn, Zeba eq Zalamuna gi, “Nàng yhang ngá-nhik lé sat aq; wàqngân lé gi, wàqngân yhang sat râ tô ri.” ga taî akô. Haû mù, Gidon gi, hí shut huî ê luî, yhángnhik lé sat pyám mù, yhángnhik é gola-uk é lìngzing má mhôn tô é zè lé shang yu pyám byî ri.
Gidon É Hkyangjong Bu-kó
22 Isira-elaq byu pé gi, Gidon lé, “Nàng, ngá-mòq lé Midi-an byu pê é lòq mai hkyi yù bê nghut é yánmai, náng é shubyi shukê pyàt jé shoq ngá-mòq lé ùp nyì keq.” ga taî akô nghut ri.
23 Nghut kôlhang, Gidon gi, yhángmòq lé, “Ngò gi, núngmòq lé ùp râ a nghut; ngá zo le núngmòq lé ùp râ a nghut. Haû Yhûmsîng Garai shèq núngmòq lé ùp sháng gàq.” ga taî ri. 24 Hau htoq agó, yhang gi, “Ngò, núngmòq lé taí nau é hkyô rahkat jòq ri; ngo lé, núngmòq wó lú lo é zè mâ é núngmòq yùq hkangmó é gàmbùm nogóng ragóng góng byi keq.” ga xoq taî ri. (Gyè pé gi, Ishima-elaq byu pé nghut é yánmai, hîng nogóng lhâng chung akô nghut ri.)
25 Yhángmòq gi, “Ngá-mòq gabú myìt mai byi râ nghut lhê.” ga taí kômù, buhîng radung lé hkang luî, yùq hkangmó wó lú lo é nogóng ragóng góng lé haú má dú kat akô nghut ri. 26 Haû mù, yhang dûng yu é hîng nogóng gi, nyhit joí kô bo ri; haû htoq agó, Midi-an hkóhkam pé mhôn é zè pé, wuizo pé eq wùt é bu nê pé le, yhángmòq é gola-uk pê é lìngzing má hut tô é toqjâng tui pé le bo ashî nghut ri. 27 Gidon gi, hîng zè haú pé lé hkyangjong bu-kó saî yù mù, yháng nyi é Ohpra wà má tô tô ri. Hkyangjong bu-kó hau é yánmai, Isira-elaq byù bànshoq bang gi, hkyô nghoq byùq bekô nghut luî, haû gi, Gidon eq yhâng é yhûmhtu bâng é lhaí dùt byùq bê nghut ri.
Gidon Shi Byùq É Hkyô
28 Haú dông, Midi-an byu pé gi, Isira-elaq byu pê èq ùp sing yu é hui kômù, a wó dum toq lô lo kó nghut ri. Gidon é i-pyàt má, myi xê zàn majan zîm byùq é nghut ri.
29 Yo-ashi é yhang zo Yerup Balaq gi, yhûm taû ló mù, nyi nyì bê nghut ri. 30 Gidon gi, myiwe myô é yánmai, yháng hku é yhang zo yùqzô pé nyhit xê yùq nghut ri. 31 Shehkem wà má nyi é yhâng é myi-ngê le, yùqzo rayùq hkû mù, yhang gi, haú yùq lé Abimelek ga myìng myhíng byî ri. 32 Yo-ashi é yhang zo Gidon gi, uhpyû zui nè shoq nyì mù, shí ló byùq bê nghut ri. Abi-ezara byu pê é wà Ohpra mâ é yhâng wa Yo-ashi é lùp má yhang lé myhup yhûm pyâm akô nghut ri.
33 Gidon shi byùq é htâng a myáng má, Isira-elaq byu pé gi, hkyô nghoq byùq luî, Balaq hparà pê chyáng mara kut shut kôluî, Balaq Berit lé, ó le ô é garai kut yû bekô nghut ri. 34 Isira-elaq byu pé gi, yhángmòq é lhînghkyùq mâ é yhángmòq é gyè bànshoq é lòq mai yhángmòq lé hkyi htoq yu é Sû, yhángmòq é Garai Gasang nghut é, haû Yhûmsîng Garai lé a bûn byùq lo kó nghut ri. 35 Hau htoq agó, yhángmòq gi, Gidon gâ é Yerup Balaq mai yhángmòq lé jeju bànshoq kut byî to kôle, yhâng é yhûmbyù wuì lé jeju a bun kó nghut ri.