Midi-an Byu Pé Lé Gidon Zân Ung Pyâm É Hkyô
7
Yerup Balaq ga myhîng é Gidon gi, yhâng htâng châng é byù bànshoq eq rahá nàpsûn noq le toq mù, Harot wuìbúm yâm má wàp xuq akô nghut ri. Midi-an byu pê é wàp gi, yhángmòq é mautsûng hkyam, More kong nàm mâ é langhkaû má nghut ri. 2 Haú hkûn, haû Yhûmsîng Garai gi, Gidon lé, “Náng htâng châng é byù lûm myô ri. Ngò gi, Midi-an byu pé lé yhángmòq é lòq má a ge àp byi; àp byî é nghut jáng, Isira-elaq byu pé gi, ‘Ngá é wum-o a-tsâm èq ngá gûng ngò hkyi yu é nghut lhê.’ ga Ngá é hí má taî nghutbun kôrâ nghut lhê. 3 Ahkuî, haû gyè jùm lé, ‘Gyùq nán nyi é ó yùq nghut kôle, Gile-at Bùm mai taû ló keq.’ nghû garû taí aq.” ga taî ri. Haû mù, byù í mûn èq í hkyîng yùq taû ló byùq é nghut luî, byù ra-mun za myìt gyó to bê nghut ri.4 Nghut kôlhang, haû Yhûmsîng Garai gi, Gidon lé, “Byù ru myô nyi ashî nghut ri. Yhángmòq lé wuì yàm má shuî gyó ê àq; haú má Ngò yhángmòq lé náng é matú chyâm byi râ nghut lhê. ‘Shí yùq gi, náng htâng ge châng ri.’ nghû Ngò taí jáng, haú yùq ge cháng râ nghut lhê; nghut kôlhang, ‘Shí yùq gi, náng htâng ge cháng râ a nghut.’ nghû Ngò taí jáng, haú yùq gi, ge cháng râ a nghut.” ga taî ri.
5 Haû mù, Gidon gi, byù haú bang lé wuì yàm má shuî gyó e ri. Haú má, haû Yhûmsîng Garai gi, yhang lé, “Hkyîhput htuq mù wuì shuq é bang mai, hkui wuì yòq shuq é su, yhûmsing é sho èq wuì yòq shuq é bang lé gótû kut gam hkoq to aq.” ga taî ri. 6 Haú hkûn, byù sum shô yùq gi, yhûmsing é lòqwâ èq wuì gyón yû mù, hkui su kut yòq shuq akô. Góbang bànshoq gi, hkyîhput htuq mù, ngóm shuq akô nghut ri.
7 Haú hkûn, haû Yhûmsîng Garai gi, Gidon lé, “Ngò gi, haû wuì yòq shuq é byù sum shô yùq èq nang lé hkyi yù râ nghut mù, Midi-an byu pé lé náng é lòq má àp byi râ nghut lhê. Góbang bànshoq lé yhûm taû ló nhâng àq.” ga taî ri. 8 Haû mù, Gidon gi, byù sum shô yùq haú bang lé, góbâng é zoshuq pé eq tut pé lé yù byî to nhâng mù, yhángmòq lé nyhi to luî, gótû Isira-elaq byù bànshoq lé yhûm taû ló nhâng bê nghut ri.
Midi-an byu pê é wàp gi, yhâng é a-ô mâ é langhkaû má nghut ri. 9 Haú myîn, haû Yhûmsîng Garai gi, Gidon lé, “Toq aq; gyèwap lé ê htim râ matú gyó ê keq; hkâsu mù gâ le, Ngò gi, haú lé náng é lòq má àp byî to bê nghut lhê. 10 Nàng a wám ê htîm é nghut jáng, náng é duìnhâng zoshâng Pura eq wàp haú má gyó ê mù, 11 yhángmòq haî taî nyi é lé ê gyo keq. Haû jáng shèq, wàp haú lé ê htim râ matú myìt wum bò râ nghut lhê.” ga taî ri. Haû mù, Gidon gi, yhâng é duìnhâng zoshâng Pura eq wàp hau é ayàm má gyó e akô nghut ri. 12 Haû Midi-an byu pé, Amalek byu pé eq gótû buìhtoq hkyam mâ é byù bànshoq bang gi, langhkaû haú má wàp xuq nyî kô é nghut mù, dinggám jûm su yhang myô akô nghut ri. Yhángmòq é gola-uk le, wuìshuq lung-aû yàm mâ é se-muî myhó a ung nghap loshoq myô ri.
13 Gidon jé é hkûn, byù rayùq mai yhâng é luzúm lé, “Ngò yhupmòq ralhum myang ri; yhupmòq haú má, mùk-yó mùk long mó ralong Midi-an wàp shut lêng gyó lô mù, wàp má lo htûng kat jáng, wàp haû gyòp htên pyet byùq bê nghut ri.” ga yhupmòq hkaî kyô nyì láng é lé wó gyô ri.
14 Haú yùq é luzúm hpó gi, “Mùk long haû gi, gótû a nghut, Isira-elaq byù Yo-ashi é yhang zo Gidon é shâm nghut ri. Garai Gasang gi, Midi-an byu pé eq wàp gón lé yhâng é lòq má àp byi bê nghut ri.” ga tû taî ri.
15 Gidon gi, yhupmòq haû eq hau é lichyúm lé wó gyo jáng, ngóm gòp noqkuq mù, Isira-elaq wàp má taû ló luî, “Toq keq! Yhûmsîng Garai gi, Midi-an wàp lé núngmòq é lòq má àp byî to bê nghut ri.” ga wùt garû taî ri. 16 Haû mù, yhang gi, byù haû sum shô yùq lé sum hpúng gàm mù, yùq hkangmó lé tut eq myihu kat tô é tsoyam chûng nhang ri.
17 Hau htâng, yhang gi, yhángmòq lé, “Ngò shuî-û é má cháng keq. Ngò wàp ayàm má jé é hkûn, ngò kut é su roq châng kut keq. 18 Ngò eq ngá htâng châng é bang bànshoq tut mùt kat jáng, núngmòq le wàp lhînghkyùq má tut mùt kat luî, ‘Haû Yhûmsîng Garai eq Gidon é matú ô.’ nghû taî garû kat keq.” ga taî ri.
19 Gidon eq yhâng htâng châng é byù rashô yùq gi, gùnggàm yòq í dâm nghû râ zúng bang asik htaî é hkûn, wàp ayàm má jé kôluî, yhángmòq é tut pé lé mùt kat mù, yhángmòq é lòq má chung tô é tsoyam pé lé bàt hkyop kat akô nghut ri. 20 Haû eq rajung za, sum hpûng é bang gi, tut mùt myhíng luî, tsoyam bàt hkoq kat mù, yhángmòq é lòqpaî lòq má myihu chung to luî, lòqyo lòq má mùt râ tut tsing chung to kômù, “Haû Yhûmsîng Garai eq Gidon é shâm ô!” ga garû taî akô nghut ri. 21 Yùq hkangmó gi, wàp lhînghkyùq má ó le ô é jowò yu tô bum é hkûn, Midi-an byù bànshoq bang dan din gó kômù, hpâng uchyang wùt ngau bum akô nghut ri.
22 Tut sum shô haû mùt kat jáng, haû Yhûmsîng Garai gi, wàp gón mâ é byù bànshoq lé rayùq eq rayùq sat lhum nhang é nghut luî, yhángmòq gi, Zerera shut ló é Bet Shita wà má hpang jé mù, Tabat nàm mâ é Abela Mehola maukyo jé shoq hpang ló bum akô nghut ri. 23 Isira-elaq byu pé le, Naphtali up, Asheri up eq Manase koq pé mai lé chôm zing mù, Midi-an byu pé lé châng hkat bum akô nghut ri. 24 Gidon gi, Ehprim bum mau bànshoq má lagyô pé nhang kat luî, “Midi-an byu pé lé lé gyó htim keq; Yodan làng guhkan mai Bet Bara jé shoq yhángmòq é hí má lé lhôm keq.” ga taí nhang kat ri.
Haû mù, Ehprim byù bànshoq bang gi, chôm zing kômù, Yodan làng guhkan mai Bet Bara jé shoq lhom to bekô nghut ri. 25 Yhángmòq gi, Orep eq Ze-ep gâ é Midi-an byu pê é zau í yùq lé chyup yû kômù, Orep lé Orep lungzîng htoq má sat pyám luî, Ze-ep lé Ze-ep tsibyiq wing pyik jang má sat pyâm akô nghut ri. Yhángmòq gi, Midi-an byu pé lé châng hkat kômù, Orep eq Ze-ep é ulhum lé, Yodan làng hé hpoq má nyi tô é Gidon chyáng yu ló byî akô nghut ri.