Gidon
6
Isira-elaq byu pé gi, haû Yhûmsîng Garaî é myòq hí má agè ashop é hkyô dum kut bekô nghut ri. Haû mù, Yhang gi, yhángmòq lé, Midi-an byu pê é lòq má nyhit zân yhang àp byî pyám bê nghut ri. 2 Midi-an byu pé gi, wum-o a-tsam mó èq Isira-elaq byu pé lé lûm zìk zo kô é yánmai, Isira-elaq byu pé gi, bùm mâ é lùqpyoq pé, lùqhkyûng pé eq gingtíng jowò pé má, yhángmòq é matú nghêhkaû jowò saî akô nghut ri. 3 Isira-elaq byu pé kyô hkyô to hkangmó, Midi-an byu pé, Amalek byu pé eq buìhtoq hkyam mâ é gótû byu pé gi, yhángmòq lé lé htim htim kut akô nghut ri. 4 Haú bang gi, wàp lé xuq to kômù, Gaza jé shoq hôwa nùqhpyí bànshoq lé lhoqhtên pyám byi luî, Isira-elaq byu pê é matú, sau bainám, no eq loze pé haî lháng a myhit to byi kó nghut ri. 5 Yhángmòq gi, dinggám jûm su, yhángmòq é shigu gaunyhaú pé, yhángmòq é zúm pé eq dòq ló kômù, yhángmòq lé le, yhángmòq é gola-uk pé lé le, a ung nghap nghut ri; yhángmòq gi, haú mau lé lhoqhtên pyám râ matú dòq lé lô kô é nghut ri. 6 Isira-elaq byu pé gi, Midi-an byu pê é yánmai, lûm yhang myung kyuq byùq mù, haû Yhûmsîng Garai lé wùt dûng ngau akô nghut ri.7 Midi-an byu pê é yánmai, haû Yhûmsîng Garai lé Isira-elaq byu pé wùt dûng ngaù hkangmó, 8 Yhang gi, Isira-elaq byu pê chyáng myìqhtoi nhâng byî é nghut mù, myìqhtoi haú yùq gi, “Isira-elaq byu pê é Garai Gasang, haû Yhûmsîng Garai taî le, ‘Ngò gi, núngmòq lé, núngmòq jùn dut nyi é mau nghut é Egutuq ming mai shuî htoq lo é nghut lhê. 9 Egutuq byu pê é lòq mai le, Ngò, núngmòq lé hkyi htoq yu é nghut lhê. Ngò gi, núngmòq lé zìk zo bang bànshoq é lòq mai le, núngmòq lé hkyi xe yu é htoq agó, núngmòq é hí mai yhángmòq lé hkat htoq pyám mù, núngmòq lé yhángmòq é maumyî byi bê nghut lhê. 10 Ngò gi, núngmòq lé, “Ngò gi, núngmòq é Garai Gasang nghut é, haû Yhûmsîng Garai nghut lhê; núngmòq nyi é mau mâ é bang nghut é Amori byu pê é hparà pé lé hkâ-noq kó.” nghû taî é nghut lhê. Nghut kôlhang, núngmòq gi, Ngá é dang lé a gyo kó nghut ri.’ gâ ri.” ga taî ri.
11 Haû Yhûmsîng Garaî é maumang lagyo gi, lé mù, Ohpra jowò mâ é, Abi-ezara koq mâ é Yo-ashi gá su é wàqmyòq gàm wang má zung tô ri; Yo-ashi é yhang zo Gidon gi, Midi-an byu pé a myàng shoq, tsibyiq wing pyik jang má súngsô bàt nyi ri. 12 Haú hkûn, haû Yhûmsîng Garaî é maumang lagyo gi, Gidon chyáng lé htoq shit mù, “Wum-o a-tsam mó bo é sarhê mó ê, haû Yhûmsîng Garai gi, nàng eq rahá nghut nyi ri.” ga taî ri.
13 Haû jáng, Gidon gi, “Ngá yhûmsîng ê, hkyâmsa byi laq; haû Yhûmsîng Garai, ngá-mòq eq rahá nyi nyi é ru nghut le nhîng, haî mù ngá-mòq chyáng shí pé bànshoq dùt htoq é lhú? ‘Haû Yhûmsîng Garai ngá-nhúng lé Egutuq ming mai shuî htoq lo é a nghut lhî?’ ga ngá-mòq é îchyí îwâ pé shap kyô é Yhâng é maúhpo múzó pé bànshoq gi, ahkuî, hká shut nghut byùq bê lhú? Ahkuî, haû Yhûmsîng Garai gi, ngá-mòq lé tô pyám mù, Midi-an byu pê é lòq má ngá-mòq lé àp pyám bê nghut ri nhung.” ga tû taî ri.
14 Haú hkûn, haû Yhûmsîng Garai gi, yhâng shut lhing wú mù, “Náng chyáng bo é wum-o a-tsam eq ê mù, Isira-elaq byu pé lé Midi-an byu pê é lòq mai hkyi yù àq. Ngò, nang lé nhang kat é a nghut lhí?” ga taî ri.
15 Haû jáng, Gidon gi, “Ngá yhûmsîng ê, hkyâmsa byi laq; ngò gi, Isira-elaq byu pé lé hkâsu ge wó hkyî râ lhú? Ngá é yhûmhtu gi, Manase koq má myung dik é yhûmhtu nghut mù, ngò gi, ngá é yhûmbyù wuì má byùchun nghut lhê mhaî.” ga tû taî ri.
16 Haû Yhûmsîng Garai gi, “Ngò, nàng eq rahá nghut nyî râ nghut mù, nàng gi, Midi-an byu pé bànshoq lé, rayùq lháng a myhit to loshoq sat kyop pyám râ nghut lhê.” ga taî ri.
17 Gidon gi, “Ahkuî, ngò, Náng é hí má myòqdong wó é nghut jáng, ngo lé dáng nyo é sû gi, Nàng yhang nghut é hkyô lé, sàksé tûn shit wú aq. 18 Ngò dum taû lé mù, Náng é hí má ngá é hkungga lé a to byi byi gi, shî má za nyi to byi shilaq.” ga tû taî ri.
Haû jáng, haû Yhûmsîng Garai gi, “Nàng dum taû lé shoq Ngò láng to râ.” ga taî ri.
19 Gidon gi, ahkaû shut wang ló mù, bainám zo radu eq múnchi a bo é za mún ngo joí èq saî é mùk long lé hên luî, sho lé kyáng má kat mù, showing lé au má kat luî, wàqmyòq gàm wang má Yhâng chyáng haú pé lé ê nhông byî ri.
20 Haû Garai Gasâng é maumang lagyo gi, yhang lé, “Haû sho eq múnchi a bo é mùk lé yù mù, shî lungzîng htoq má ke luî, showing lé hau é ahtoq má hut gyun aq.” ga taî ri. Gidon le haú dông kut bê nghut ri. 21 Haú hkûn, haû Yhûmsîng Garaî é maumang lagyo gi, Yhâng é lòq má chung tô é dumbáng nyùq èq, sho eq múnchi a bo é mùk lé záng kat é nghut luî, lungzîng mai myi htoq lô mù, sho eq mùk nyé gyó pyám bê nghut ri. Haú hkûn, haû Yhûmsîng Garaî é maumang lagyo gi, byùq byùq bê nghut ri. 22 Gidon gi, haû Yhûmsîng Garaî é maumang lagyo nghut é lé sé jáng, “Goì ê, Ahko Ahkáng lhúnglháng wó é Sû Yhûmsîng Garai ê, ngò gi, Yhûmsîng Garaî é maumang lagyo lé myòqdong hkyúm myàng bu-nhung mhaî ô!” ga taî ri.
23 Nghut kôlhang, haû Yhûmsîng Garai gi, yhang lé, “Myìt ngón aq! Hkâgyùq. Nàng shî râ a nghut.” ga taî ri.
24 Haû mù, Gidon gi, haú má Yhûmsîng Garaî é matú hkungga gyàp saí luî, haú lé, “Haû Yhûmsîng Garai gi, Nguì ngón hkyô.” ga myìng myhîng ri. Haû gi, hkû-nyí jé shoq, Abi-ezara byu pê é Ohpra jowò má jòq tô ashî nghut ri.
25 Haú myîn, haû Yhûmsîng Garai gi, yhang lé, “Náng wâ é no hpúng mâ é nohtó eq í du nghû râ nyhit zàn bò bê nohtó lé yù mù, náng wa nhong é Balaq é kaúgyàp lé hpyoq pyám luî, hau é nàm mâ é Ashera hparà zìng lé htuq pyám aq. 26 Haû mù, náng é Garai Gasang nghut é, haû Yhûmsîng Garaî é matú, lungzîng mó shi é ahtoq má réng zâ é hkungga gyàp saí luî, nàng zân hpyit pyâm é Ashera hparà zìng sik lé chûng mù, myi nyhé hkungga dông í du nghû râ nohtó lé nhông byi aq.” ga taî ri.
27 Haû mù, Gidon gi, yhâng é duìnhâng zoshâng raxê yùq lé ji yù mù, haû Yhûmsîng Garai mai yhang lé taî é eq rajung za kut bekô nghut ri. Nghut kôlhang, yhang gi, yhâng é yhûmbyù wuì eq wà byù wuì lé gyùq é yánmai, nyí lé saí râ malaî, myín lé saî ri.
28 Htang nàpkyó wà byù wuì toq lô kô é hkûn, Balaq é kaúgyàp gyòp byùq láng é eq hau é ayàm mâ é Ashera hparà zìng zân lhêng pyâm to láng luî, asik saî é hkungga gyàp má í du nghû râ nohtó nhông byi láng é lé myang akô nghut ri.
29 Yhángmòq gi, rayùq eq rayùq, “Shî ó kut é lhú?” ga myî lhûm akô nghut ri.
Yhángmòq rago myî gôn wú kô é hkûn, “Yo-ashi é yhang zo Gidon haú lé kut é nghut ri.” ga yhángmòq lé taî kyô akô nghut ri.
30 Haú hkûn, wà byù wuì gi, Yo-ashi lé, “Nungzo lé shuî htoq byi aq. Yhang gi, Balaq é kaúgyàp lé hpyoq pyám mù, hau é ayàm mâ é Ashera hparà zìng lé zân pyâm é yánmai, shî ra râ nghut lhê.” ga dangmó hkyô akô nghut ri.
31 Nghut kôlhang, Yo-ashi gi, yhang lé gyè kut nyi é yhâng é lhînghkyùq mâ é bang lé, “Núngmòq gi, Balaq é hkyô lé taî hung lhum kôrâ lhú? Yhang lé hkyi yù kôrâ lhú? Yhâng é matú bo garúm é sû ó yùq le, hkû-nàp yhang shî râ nghut lhê! Balaq wá gè gè yhang garai ru nghut le gi, yhâng é kaúgyàp lé rayùq hpyoq pyâm é hkûn, yhânggùng yhang hung yù sháng gàq.” ga tû taî ri. 32 Haû mù, Balaq kaúgyàp lé Gidon hpyoq pyâm é yánmai, yhángmòq gi, “Yhang lé Balaq shèq htuqhtîng yù sháng gàq.” ga taî kó luî, haú nyí, yhang lé Yerup Balaq ga myhîng akô nghut ri.
33 Haú hkûn, Midi-an byu pé, Amalek byu pé eq buìhtoq hkyam mâ é byu pé bànshoq gi, chôm zùp mù, Yodan làng gû dàp luî, Yezirela Langhkaû má wàp xuq akô nghut ri. 34 Haû jáng, haû Yhûmsîng Garaî é Sô gi, Gidon chyáng lé jé é nghut mù, yhang gi, tut mùt kat jáng, Abi-ezara byu pé yhâng htâng cháng bekô nghut ri. 35 Yhang gi, Manase mau gón má lagyô pé nhang kat é nghut mù, yhángmòq le yhâng htâng châng akô; hau htoq agó, Asheri up, Zebulun up eq Naphtali up má le lagyô pé nhang kat é nghut luî, yhángmòq le yhâng chyáng lé zùp akô nghut ri.
36 Haú hkûn, Gidon gi, Garai Gasang lé, “Nàng danghtum htûm tô é eq rajung za, ngá é lòq mai Isira-elaq byu pé lé hkyi yù râ nghut jáng, 37 wú aq, ngò gi, chyârâng má saumaú ralong tô to râ nghut lhê. Nghân gi, saumaú má za teq luî, myigùng bànshoq huî tô é nghut jáng, Nàng taî é eq rajung za, Nàng, ngá é lòq mai Isira-elaq byu pé lé hkyi yù râ nghut é lé, ngò sé râ nghut lhê.” ga taî ri. 38 Haû eq rajung za dùt bê nghut ri. Gidon gi, htang nàpkyó noq le toq luî, saumaú lé chyup wú é hkûn, nghân rahkoq byíng shoq wó chyup yu ri.
39 Hau htâng, Gidon gi, Garai Gasang lé, “Ngo lé nhikjum hkâyo. Ngò radàm za taí lo bá. Saumaú èq ngo lé radàm dum chyâm nhâng shi aq; shí dá gi, saumaú kyuq huí luî, myigùng bànshoq má nghân teq sháng gàq.” ga taî ri. 40 Haû eq rajung za, haú myîn Garai Gasang kut byi bê nghut mù, saumaú za kyuq huî to luî, myigùng bànshoq nghân teq byùq bê nghut ri.