Debora É Mahkôn Dang
5
Haú nyí má, Debora eq Abino-am é yhang zo Barak gi, shî su ga mahkôn hkon akô;2 “Isira-elaq má zaugun wuì shuî-u mù,
mingbyû wuì yhûmsing gùng lé kâm àp nhông kô é yánmai,
haû Yhûmsîng Garai lé hkya-on keq!
3 Hkóhkâm pé ê, gyô yù keq! Zaugun wuì ê, gyo keq!
Ngò yhang, haû Yhûmsîng Garai lé mahkôn hkya-on râ nghut lhê;
Ngò gi, Isira-elaq é Garai Gasang, haû Yhûmsîng Garai lé mahkôn mai hkya-on kúngtôn râ nghut lhê.
4 Yhûmsîng Garai ê, Nàng, Se-ira bùm mai htoq ló mù,
Edom mau mai sô ló é hkûn,
myìdàm htoq nún luî, mauhkûng mai maú wo hkyó mù,
mhut pé mai wuì hut hkyô ri.
5 Haû bùm pé gi, Sinaq Bùm má nyì Sû haû Yhûmsîng Garaî é hí,
Isira-elaq é Garai Gasang, haû Yhûmsîng Garaî é hí má dui nún ri.
6 Anat é yhang zo Shamga é i-pyàt eq
Ya-ela é i-pyàt pé má, hkyô mó pé chamchyuîyuì dùt byùq mù,
gyung so bang hkyô zo za châng bum akô nghut ri.
7 Isira-elaq mau mâ é wàhtum pé gi, chamchyuîyuì dùt byùq ri;
Ngò, Debora htoq lo é hkûn jé shoq,
Isira-elaq é înu kut râ ngò a htoq lô shi-má, chamchyuîyuì dùt tô é nghut ri.
8 Yhángmòq, hparà sik pé lé hkyin yù kô é hkûn,
wà hkum pé má majan htoq ri;
nghut kôlhang, Isira-elaq byù myî mun má,
gòlong eq lhâm rahkat lháng a myàng nghut ri.
9 Ngá é i-myìt nhiklhum gi, Isira-elaq é zaugun wuì eq le,
shiwa byu pê chyáng mâ é yhûmsing chyungxe lé kâm àp nhông bang eq le, rahá nghut nyi ri.
Haû Yhûmsîng Garai lé hkya-on kúngtôn keq!
10 Loze hpyû ji bang,
nú nhâm é mè htû má zùng bang,
gyung hkyô sô nyì bang ê,
taî kyô wú keq.
11 Mahkôn hkôn bâng é htê gi, wuì hkam é wuìbúm pé má htoq nyi ri.
Yhángmòq gi, Isira-elaq mâ é Yhûmsîng Garaî é wà pé mâ é ûngmyuq hkyô nghut é,
Yhâng é ûngmyuq hkyô lé taî pyo akô nghut ri.
Haú hkûn, haû Yhûmsîng Garaî é byu pé gi,
wà hkum pé shut gyó e akô nghut ri.
12 Debora ê, bun aq, bun aq!
Bun aq, bun aq, mahkôn hkôn àq!
Barak ê, toq àq!
Abino-am é yhang zo ê, wó chyup yu é bang lé náng é shúm byû kut yû àq.
13 Haú hkûn, xânghpoq nge wó bang mâ é nyi myìt to bang gyó lé lo akô;
haû Yhûmsîng Garaî é byu pé gi, wum-o a-tsam mó bò bang lé htim râ matú ngá chyáng gyó lé akô nghut ri.
14 Ehprim mai lé bang ra-am gi, Amalek byu pê é mau má awang xuq akô;
Ben-yamin gi, náng htâng châng é bang má bo tô ri.
Mahkira koq mâ é zaugun wuì gyó lô mù,
Zebulun mâ é zau dumbáng chûng bang gyó lo akô nghut ri.
15 Yisahka up é zaugun wuì gi, Debora chyáng bo lom ri;
Yisahka gi, Barak eq rahá nghut luî,
langhkaû shut yhâng htâng châng wang ló akô nghut ri.
Rubin é mau túm pé má gi,
myìt wú jang myo myo jòq nyi ri.
16 Nàng gi, haî mù, sau hpúng pé lé ji é sámpyí htê gyo râ matú,
sau hpúng hkaû má nyi nân tô lhê lhú?
Rubin é mau túm pé má gi,
myìt wú jang myo myo jòq nyi ri.
17 Gile-at gi, Yodan làng hé hpoq má jòq nyi ri.
Dan gi, haî mù wuìsanghpo pé má nyi nân tô lhê lhú?
Asheri gi, wuimau yàm guhkan má xoq nyî mù,
yhâng é guhkan yàm pé má nyi nân tô ri.
18 Zebulun up bang gi, yhûmsing chyungxe lé a ha bûn é za htîm akô;
Naphtali up bang le, myhang é yòso pé má haû su kut akô nghut ri.
19 Hkóhkâm pé majan lé zân akô;
Hkanan mâ é hkóhkam pé majan lé zân akô.
Yhángmòq gi, Tanak jowò, Megido wuì yàm pé má majan zan kôlhang,
ngùnhtung lé a lú yû kó nghut ri.
20 Kyî pé le mauhkûng mai majan bo zan luî,
yhángmòq é ahkyo dông Sisera lé htîm akô nghut ri.
21 Kishon Wuìlàng, góhkun lhê é wuìlàng haû gi,
yhángmòq lé bàt myhû ló bê nghut ri.
Ngá é i-myìt nhiklhum ê, xoq sô ê àq; wum-o lhoqkíng aq!
22 Haú hkûn, myang jî é sarhê pé myang lé kon shèq kon luî,
myang pê é byam gó hkôdòq htê mó mying nyi ri.
23 Haû Yhûmsîng Garaî é maumang lagyo gi,
‘Meroza wà lé nhing keq; hau é wà byù wuì lé nhing mó hkyó keq;
hkâsu mù gâ le, yhángmòq gi, haû Yhûmsîng Garai lé a garúm kó;
haû sarhê pé lé htim râ matú Yhûmsîng Garai lé a garúm kó nghut ri.’ ga taî ri.
24 Keni byù Hebera é yhûmsîng myhí Ya-ela gi,
myiwe wuì bànshoq htoq má hkungsô wó ri;
zúm má nyi é myiwe wuì htoq hkungsô je wó ri.
25 Sisera gi, wuì shèq dung jáng, yhang no-naú byi huq ri;
xânghpoq nge wó bâng é hkoq mai, yhang no-naú xû wàq byî ri.
26 Yhâng é lòqpaî lòq gi, zúm mâ é sangchyam pé lé yù mù,
yhâng é lòqyo lòq gi, lòqmú zui bâng é bàtdù lé yu ri.
Yhang gi, Sisera lé bàt luî, yhâng é ulhum lé bàt hkyop byi mù,
yhâng é bochyam ròt shoq bàt tsuq byî ri.
27 Ya-ela é hkyî wang má yhang lêng ngòp luî,
haú má lêng lèq to bê nghut ri.
Yhâng é hkyî wang má yhang lêng ngòp luî,
haû lêng ngòp jang má shi to bê nghut ri.
28 Sisera é yhâng nu gi, hkohot mai wú luî,
pán-gyang hkaû mai juí wú mù,
‘Yhâng é gyèlhêng haî mù a jé lô shî é làq?
Yhâng é lhêngchap haî mù nyhâm nyi lhê laq?’ ga wùt ngau garû ri.
29 Hpàqchyî bo dik é myiwe wuì tû taî é htoq agó,
yhânggùng yhang tû taî é gi,
30 ‘Yhángmòq gi, wó lú yu é zè pé lé gam nyi akô, a nghut lhí?
Gyèzô pé lé myiwe rayùq yùq, a nghut jáng, í yùq yùq gâm byî nyi akô lhú?
Sisera é matú wó lú yu é zè dông, isâm xaû tô é mèbu pé,
zá htaû é isâm xaû tô é mèbu pé,
ngá é lìngzing má yùp râ matú gyai yhang zá htaû yúng tô é pán pé,
gàm byî nyi akô lhú?’ gâ ri.
31 Haû mù, Yhûmsîng Garai ê, Náng é gye pé bànshoq bang htûm byùq kó sháng gàq!
Nghut kôlhang, Nang lé chyitdàp é bànshoq bang gi,
hpungwup a-tsam eq htoq lo é buì su nghut nyî kó sháng gàq.” gâ akô nghut ri.
Haú hkûn mai, haú mau gi, myi xê zàn yhang majan zîm byùq bê nghut ri.