Debora
4
Ehut shi byùq é htâng má, Isira-elaq byu pé gi, haû Yhûmsîng Garaî é myòq hí má agè ashop é hkyô dum kut bekô nghut ri. 2 Haû mù, haû Yhûmsîng Garai gi, yhángmòq lé, Hazora má zung é Hkanan hkóhkâm Yabin é lòq má ung zô pyâm ri; hkóhkâm hau é gyèzau gi, Haroshet Hagoyim má zung é Sisera nghut ri. 3 Haú yùq gi, jòqtoq èq saî é gyèlhêng gau shô cham wó luî, Isira-elaq byu pé lé í xê zàn yhang zìk zô yu é nghut mù, Isira-elaq byu pé gi, haû Yhûmsîng Garai lé wùt dûng ngau akô nghut ri.4 Haú pyàt má, Lapidot é yhang myi, myìqhtoi myhí Debora gi, Isira-elaq byu pê é târâ agyì kut nyi é nghut ri. 5 Yhang gi, Ehprim bum mau mâ é Rama wà eq Behtela wà gyoro mâ é Debora é Byùm gàm ô má zung nyi é nghut mù, haû Isira-elaq byu pé gi, yhángmòq é mû hpyit nhâng râ matú, yhâng chyáng ê ê kut akô nghut ri. 6 Debora gi, Naphtali mau Kedesha wà mâ é Abino-am é yhang zo Barak lé ê jî nhâng mù, yhang lé, “Isira-elaq é Garai Gasang, haû Yhûmsîng Garai gi, nang lé, ‘Naphtali up eq Zebulun up mâ é byù ra-mun shuî chûng mù, Tabora Bùm má dòq ê àq. 7 Ngò gi, Yabin é gyèzau hpó Sisera, yhâng é gyèlhêng pé eq yhâng é gyè hpúng lé, Kishon Wuìlàng má shuî lé mù, yhang lé náng é lòq má àp byî pyám râ nghut lhê.’ ga hkunmó hkyô ri.” ga taî ri.
8 Haú jáng, Barak gi, yhang lé, “Nàng, ngò èq rahá e le gi, ngò ê râ; nghut kôlhang, nàng, ngò èq rahá a e le gi, ngò a ê.” ga taî ri.
9 Debora gi, “Ngò, nàng eq rahá ê râ za nghut lhê; nghut kôlhang, nàng e ló é hkyô má nàng xânghpoq nge wó râ a nghut; hkâsu mù gâ le, haû Yhûmsîng Garai gi, Sisera lé myiwe rayùq é lòq má àp pyám râ nghut lhê.” ga taî ri. Haû mù, Debora gi, Barak eq rahá Kedesha má ê bekô nghut ri. 10 Barak gi, Naphtali byu pé eq Zebulun byu pé lé haú má ji yu é nghut mù, haû mâ é byù ra-mun lé yhang shuî-û é a-ô má dòq e ló akô nghut ri. Debora le, yhang eq rahá bo dòq e ló ri.
11 Haú u, Mosheq é yhânghkaúa Hobap é awùt ashín mâ é, Keni byù Hebera gi, Keni byù góbang eq gang luî, Kedesha nàm mâ é Zananim jowò mâ é wàqmyòq gàm yàm má zúm saí mù nyi nyi ri.
12 Abino-am é yhang zo Barak gi, Tabora Bùm má dòq e ló bê gâ é hkyô, Sisera lé taî kyo kôjáng, 13 Sisera gi, yhâng é jòqtoq èq saî é gyèlhêng gau shô cham eq, Haroshet Hagoyim mai Kishon Wuìlàng jé shoq mâ é yhâng é byù bànshoq lé ji tsîng tô ri.
14 Haú hkûn, Debora gi, Barak lé, “Ê aq! Hkû-nyí gi, haû Yhûmsîng Garai mai náng é lòq má Sisera lé àp byî é buìnyì nghut bê. Haû Yhûmsîng Garai gi, náng é hí má e ló bê a nghut lhí?” ga taî ri. Haû mù, Barak gi, yhâng htâng châng é byù ra-mun eq rahá Tabora Bùm mai gyó ê bekô nghut ri. 15 Barak htîm e ló é hkûn, haû Yhûmsîng Garai gi, Sisera, yhâng é gyèlhêng bànshoq eq gyè hpúng mó lé lhoq nhúngnhâng pyám byi luî, sham èq sat kyop pyám nhang é nghut mù, Sisera gi, yhâng é gyèlhêng mai gyó luî, hkyî hkyô hpâng bê nghut ri.
16 Barak gi, gyèlhêng pé eq gyè hpúng mó lé, Haroshet Hagoyim jé shoq châng hkat mù, Sisera é gyè hpúng bànshoq lé, rayùq lháng a myìt loshoq sham èq sat pyám bê nghut ri. 17 Haú u, Sisera gi, hkyî hkyô hpâng luî, Keni byù Hebera é yhang myi Ya-ela é zúm má hpang wang ló ri. Hkâsu mù gâ le, haú yòq haú bun má, Hazora hkóhkâm Yabin gi, Keni byù Hebera é yhûmbyù wuì eq buìnùm du tô é nghut ri.
18 Ya-ela gi, Sisera lé ê te yù râ ga htoq ê mù, yhang lé, “Ngá é yhûmsîng ê, wang lò àq; shî má wang lò àq. Hkâgyùq.” ga taî ri. Haû mù, Sisera gi, yhâng é zúm má wàng jáng, yhang gi, Sisera lé mè puq hut tô ri.
19 Sisera gi, “Ngò wuìshit dik ri; ngo lé wuì byi huq laq.” ga taí jáng, Ya-ela gi, yhâng é no-naú sho-kuq htûng hpóng mù, yhang lé byi huq luî, mè dum puq hut tô ri.
20 Sisera gi, yhang lé, “Zúm hkum hí má yàp to aq; ‘Ahkaû má ó a nyì luq?’ ga rayùq yùq myi jáng, ‘A nyì.’ nghû tû taí aq.” ga taî ri.
21 Nghut kôlhang, Hebera é yhang myi Ya-ela gi, Sisera ngú byùq luî, yhup ngón to jáng, zúm mâ é sangchyam rahkat eq bàtdù lé yù mù, tsik za yhâng chyáng huî ê luî, sangchyam haú lé myigùng ròt shoq yhâng é bochyam mai bàt tsuq kat ri; haû mù, yhang gi, shi byùq bê nghut ri.
22 Haú u, Barak gi, Sisera lé châng hkat jé lé jáng, Ya-ela gi, yhang lé ê htoq hui mù, “Lé aq; nàng ho é byù lé tûn shit râ.” ga taî ri. Haû mù, Barak gi, yhâng htâng châng wang ló le, Sisera bochyam mai sangchyam ròt mù, shi lèq tô é lé myang ri.