3
Hkanan mau má majan a bo lom wú shî é Isira-elaq byù bànshoq bang lé chyam wú râ matú, haû Yhûmsîng Garai nyhi hkyô tô é byù myû wuì gi, a-ô mâ é eq rajung za nghut ri. 2 (Yhang haû su kut é gi, majan a bo lom wú shî é Isira-elaq byu pê é awùt ashîn pé lé majan hkyô mhoq sê yù nhâng râ matú nghut ri.) 3 Hpilisiti zau ngo yuq, Hkanan byù bànshoq, Sidon byu pé, Balaq Herimon Bùm mai Lebo Hamat jé shoq nghut é Lebanon bùm pé má nyi é Hiwi byu pé nghut akô. 4 Haú bang lé nyhi hkyô tô é gi, Mosheq dông mai Isira-elaq byu pê é îchyí îwâ pé lé byî tô é, haû Yhûmsîng Garaî é hkunmó pé lé jì-no gyo a gyô é lé wó sé râ dông, Isira-elaq byu pé lé chyam wú râ matú nghut ri.5 Isira-elaq byu pé gi, Hkanan byù, Hiti byù, Amori byù, Perizi byù, Hiwi byù eq Yebusi byu pê é gyoro má nyi nyi akô nghut ri. 6 Yhángmòq gi, haú bâng é byìzô pé lé hâng yù kô é htoq agó, yhûmsing é byìzô pé lé le, haú bâng é yhang zo yùqzô pé lé byi tso kômù, haú bâng é hparà pé lé noqkuq dójaú akô nghut ri.
Otni-ela
7 Haû Isira-elaq byu pé gi, Yhûmsîng Garaî é myòq hí má agè ashop é hkyô kut akô nghut ri; yhángmòq gi, yhángmòq é Garai Gasang nghut é, haû Yhûmsîng Garai lé tô-myhî pyám kômù, Balaq hparà pé eq Ashera hparà pé lé noqkuq dójaú akô nghut ri. 8 Haû mù, Yhûmsîng Garai gi, Isira-elaq byu pé lé nhikmó-yo mù, Aram Naharim hkóhkâm Hkushan Rishahtim é lòq má yhángmòq lé ûng pyám bê nghut mù, Isira-elaq byu pé gi, shit zân yhang Hkushan Rishahtim lé dójaú akô nghut ri. 9 Nghut kôlhang, haû Yhûmsîng Garai lé yhángmòq wùt dûng ngaù kôjáng, Yhûmsîng Garai gi, yhángmòq é matú, yhángmòq lé hkyi yu é sû, Hkalep é yhang gu Kenaza é yhang zo Otni-ela lé nyi htoq lô nhang ri. 10 Haû Yhûmsîng Garaî é Sô gi, Otni-ela chyáng lé jé nyi tô é nghut mù, yhang gi, Isira-elaq byu pê é târâ agyì dùt é htoq agó, majan lé shuî zân ri. Haû Yhûmsîng Garai gi, Aram hkóhkâm Hkushan Reshahtim lé yhâng é lòq má àp byî é nghut luî, yhang gi, hkóhkâm haú lé wó ung pyám bê nghut ri. 11 Haû mù, mîngdán haû gi, Kenaza é yhang zo Otni-ela shi byùq é hkûn jé shoq, myi xê zàn yhang majan zîm byùq ri.
Ehut
12 Haû Isira-elaq byu pé gi, Yhûmsîng Garaî é myòq hí má agè ashop é hkyô dum kut akô nghut ri; yhángmòq gi, agè ashop hkyô haû kut é yánmai, haû Yhûmsîng Garai gi, yhángmòq lé dàm byi râ matú Moba hkóhkâm Egilon lé wum lhoqhtân nhang ri. 13 Egilon gi, Ammon byu pé eq Amalek byu pé lé lung yù mù, Isira-elaq byu pé lé lé htim luî, yhángmòq gi, Byùm gàm Wà lé sing yù bekô nghut ri. 14 Haû Isira-elaq byu pé gi, raxe shit zân yhang, Moba hkóhkâm Egilon lé dójaú akô nghut ri.
15 Haû Isira-elaq byu pé gi, Yhûmsîng Garai lé dum wùt dûng ngaù kôjáng, Yhang gi, yhángmòq é matú, yhángmòq lé hkyi yù sû nghut é, Ben-yamin up mâ é Gera é yhang zo, lòqpai Ehut lé nyi htoq lô nhang ri. Haû Isira-elaq byu pé gi, yhang lé, Moba hkóhkâm Egilon chyáng chyûnghuq jahkôn ê dé nhang akô nghut ri. 16 Ehut gi, radúng kô hing é, í shut htoq é shâm rahkyam saî yù mù, yhâng é lòqyò tangbaú lho hkaû má chyap tô ri. 17 Yhang gi, gyaí xu é Moba hkóhkâm Egilon lé chyûnghuq jahkôn byî ri. 18 Ehut gi, chyûnghuq jahkôn byî é htâng má, chyûnghuq jahkôn wàq bang lé ló nhang pyám bê nghut ri. 19 Nghut kôlhang, yhang gi, Giligala nàm mâ é lùqgòk zòng zìng pé má jé jáng, yhang baú Egilon chyáng dum taû ê mù, “Hkóhkâm hpó ê, ngò gi, náng é matú dang hkau rahkun wó lhê.” ga taî ri.
Haû jáng, hkóhkâm hpó gi, yhâng chyáng nyi tô é bang lé, “Htoq ló keq.” ga taí jáng, yhángmòq bànshoq bang htoq ló bekô nghut ri.
20 Haú hkûn, Ehut gi, hkóhkâm hpó yhang baú ahtoq pyâm wàp má zung tô é u, yhâng chyáng huî htèp ê mù, “Garai Gasâng chyáng mâ é danglù lé, ngò náng é matú wun lé byî lhê.” ga taî ri. Haú hkûn, hkóhkâm hpó toq yàp lo é u, 21 Ehut gi, yhâng é lòqpaî lòq èq yhâng é lòqyo tangbaú mâ é shâm lé she yù mù, hkóhkâm hpô é wamdau má htaû hâng kat ri. 22 Dùnghkuq lháng wàng shoq nghut mù, yhâng é wamdau mai a she htoq yû lô é yánmai, shâm haú lé xu èq nghop pyám luî, hkyi wing lháng yui htoq lo ri. 23 Haú hkûn, Ehut gi, shinggan gyamzân shut htoq mù, ahtoq wàp mâ é hkum pé lé tsing myhi luî, zòq myhî to hkô ri.
24 Yhang ló byùq é htâng má, haû duìnhâng zoshâng wuì lé mù, ahtoq wàp mâ é hkum pé zòq tsing myhî tô é myàng kôjáng, “Yhang, ahkaû má nghê e é ru nghut râ nghut lhê.” ga taî akô. 25 Yhángmòq gi, láng dê kôlhang, ahtoq wàp mâ é hkum pé a hpóng byî é yánmai, zòqshi yù luî, hpông wú kô é hkûn, yhángmòq é yhûmsîng hpó hpyang má shi lèq tô é lé myang akô nghut ri.
26 Yhángmòq láng tô é u, Ehut gi, wó hpang lùt mù, lùqgòk zòng zìng pé jòq é mai laî ló mù, Se-ira jowò má jé bê nghut ri. 27 Yhang gi, haú má jé é hkûn, Ehprim bum mau má tut mùt kat é nghut luî, Isira-elaq byu pé gi, bum pé mai yhâng htâng châng gyó ê bekô nghut ri.
28 Yhang gi, “Ngá htâng cháng keq; haû Yhûmsîng Garai gi, núngmòq é gyè Moba byu pé lé núngmòq é lòq má àp byi bê nghut ri.” ga taî ri. Yhángmòq le, yhâng htâng châng gyó ê mù, Moba shut dàp e ló é Yodan làng guhkan má lhôm luî, rayùq lé lháng a laî dàp nhâng kó nghut ri. 29 Haú hkûn, yhángmòq gi, wum-o a-tsam bo é Moba sarhê ra-mun lé, rayùq lháng a lùt byùq loshoq sat pyám bekô nghut ri. 30 Haú nyí, Isira-elaq byu pé gi, Moba byu pé lé ung pyám bekô nghut mù, ra-mau gón shit xê zàn yhang majan zîm byùq bê nghut ri.
Shamga
31 Ehut é htâng má, Anat é yhang zo Shamga nyi htoq lô luî, no kon gángsê èq Hpilisiti byù hkyuq shô yùq lé sat pyám luî, Isira-elaq byu pé lé hkyi yu ri.