Ruhtaq Eq Bu-aq Htûng Huî Lhûm É Hkyô
2
Na-omiq gi, yhâng é yhûmsîng hpó Elimelek yhûmhtu mâ é, gyai wó gyai ahkyàk é gu-mang rayùq wó ri; haú yùq é myìng gi, Bu-aq gâ ri.2 Ra-nyí lé, Moba myiwe Ruhtaq gi, yhâng mhoí Na-omiq lé, “Ngò yò shut ê mù, ngo lé shogyo bâng é yò má gùqgyó ê châng gùq râ lyhô.” ga taî ri. Na-omiq le, “Ngá dùmó ê, ê àq.” ga tû taî ri. 3 Haû mù, Ruhtaq gi, ê luî, yò rahkyang má mùk-yó gùq yâm nyì bâng é htâng má gùqgyó ê châng gùq nyi ri. Yhang, ê záng wang é yò haú hkyang gi, Elimelek yhûmhtu mâ é Bu-aq é yò nghut ri.
4 Haú hkûn, Bu-aq gi, Betlehem wà mai jé lô mù gùq yâm nyì bang lé, “Yhûmsîng Garai gi, núngmòq eq rahá za nghut nyî sháng gàq ô.” ga taî ri.
Yhángmòq le, “Yhûmsîng Garai gi, nang lé shimân byi sháng gàq ô!” ga tû taî kat akô.
5 Hau htâng, Bu-aq gi, “Myiwe zo shî gi, hká yhûm mâ é nghut ri lhú?” ga gùq yam bâng é ushuq lé myi jáng, 6 yhang gi, “Moba mau mai Na-omiq htâng châng lo é Moba myiwe zo nghut ri. 7 Yhang gi, ‘Ngo lé gùq yam bâng é htâng má gùqgyó châng gùq nhâng laq.’ ga ahkáng lé dung mù, gùqgyó lé gùq shi-kùt nyi é gi, yòzàng má byam nô yu é mai lai luî, hkû-nàp mai ahkuî jé nghut bê nghut ri.” ga tû taî ri.
8 Haû jáng, Bu-aq gi, Ruhtaq lé, “Ngá zo ê, tâm gyô wú aq. Yò góhkyang mâ é gùqgyó pé lé, hkâ-ê gùq lyhô; shî mai a htoq ló é za, ngá é duìnhâng zoshâng myiwe zo wuî eq nyì àq. 9 Yùqgè wuì yâm ló é lòqzó lé wú mù, myiwe zô wui htâng cháng aq. Yùqgè zo wuî nang lé a rhoî râ matú le shit to bê. Nàng wuìshit jáng, yùqgè zo wuî hkam kat tô é yam mâ é ûchyam shuq àq.” ga taî ri.
10 Haû jáng, Ruhtaq gi, yhâng é myòqdong myigùng má záng shoq gòp to luî, “Ngò gi, gótû a-myû shèq ru nghut lhê wá, nàng, ngo lé shî í wú gon byî nyi é gi, ngá chyáng wú nhik hkyik nhô zâ é, haî wá myang ri lhú?” ga tû taî ri.
11 Bu-aq dum taî é gi, “Náng é yhûmsîng hpó shi byùq é htâng má, náng mhoí lé wú gôn lajâng é hkyô lé le, náng nu náng wa eq náng é choq hpyit mau lé tô pyâm to luî, hkâ-nhám lháng a zùm yàp wú é byù myû wui chyáng wó châng nyi é hkyô lé le, jí zo chyap zo ngo lé taî kyo bekô. 12 Nàng zuî laî lò bê lòqmú lòqzó ahtoq má, Yhûmsîng Garai gi, jeju dum tau byi sháng gàq ô! Yhâng é buloq dùnghkaû ô má nghêhkaû râ matú nàng huî wang é Yhûmsîng Garai, haû Isira-elaq a-myû wui é Garai Gasang gi, nang lé agùn agó é jeju byi sháng gàq ô!” gâ ri.
13 Ruhtaq le, “Ngá yhûmsîng ê, náng hí má ngò myòqdong jòq nyì sháng gàq ô! Ngò gi, náng é duìnhâng zoshâng rayùq í lháng a gíngdán kôlhang, nàng yhûmsîng gi, ngo, náng é jùn myhí lé dang ngón dang ngui èq nhiktíng byi bê nghut ri.” ga taî ri.
14 Hau htâng, zang zo yàm jé jáng, Bu-aq gi, myiwe zo haú lé, “Shî má lò àq. Mùk lé yù mù chyînwing má jùm zo aq.” ga taî ri. Haû mù, yhang gi, gùq yam bang eq rahá za ló zung é hkûn, Bu-aq gi, yhang lé gùqshin byi tsô ri. Yhang o é myhó zô yu é htâng má, myìt tô ashî nghut ri. 15 Ruhtaq gi, gùqgyó dum châng gùq râ ga toq ló é hkûn, Bu-aq gi, yhâng é duìnhâng zoshâng yùqgè zo wuî lé, “Myiwe zo haû, gùqding gyoro pé mâ é gùqgyó pé gùq yu le lháng yhang lé hoq hkâ lhoqhpu kó. 16 Yhang gùq yù râ matú gùqding mâ é lháng ra-tsuí she htoq to byi keq; yhang lé hkâ nhik-yo kó.” ga pying kat ri.
17 Haû mù, Ruhtaq gi, yò haú má myínhtâng jé shoq gùqgyó châng gùq nyi ri. Wó gùq yu é gùqgyó lé yhang bàt wú le, mùk-yó gùq rabùnga kô yhang bo ri. 18 Yhang gi, gùq haú lé wà shut wun ló le, yhâng mhoí lhom myang ri; yhang zô gyî é htâng má myìt tô é gùqshin lé le, yhâng mhoí lé ló làp byî ri.
19 Hau htâng, yhâng mhoí gi, yhang lé, “Hkû-nyí hká má ê gùq é lhú? Hkâmá mú ê zuî é lhú? Nang lé lhom hàp yù sû gi, hkungsô wó sháng gàq ô!” ga taî ri.
Haú hkûn, Ruhtaq le, “Hkû-nyí ngò mú ê zuî é yò yhûmsing é myìng gi, Bu-aq gâ é nghut ri” ga yhang ê zuî é yò yhûmsing é hkyô, yhâng mhoí lé taî kyô ri.
20 Yhâng mhoí gi, “Kângsoq dui nyì bang lé le, shi byùq bê bang lé le, jeju byî nyi é Yhûmsîng Garai gi, yhang lé shimân byî nyì sháng gàq ô.” ga yhâng dùmó lé taî ri. Hau htâng, yhang gi, “Haú yùq gi, ngá-nhûng é wàp mâ é nghut mù, ngá-nhúng lé wú gon ang sû yhang nghut lhê.” ga dum taî kyô ri.
21 Haú hkûn, Moba byù Ruhtaq gi, “Haú yùq, ngo lé, ‘Ngá é gùq ban yâm é hkyíng jé shoq, ngá é duìnhâng zoshâng wuì eq rahá nyi nyì àq.’ ga lháng taî ri.” ga yhâng mhoí lé taî kyô ri.
22 Na-omiq le, yhâng dùmó Ruhtaq lé, “Ngá zo ê, nàng, yhâng é duìnhâng zoshâng myiwe zo wuî eq rahá zùm yàp nyi le je gè râ nghut lhê; góbâng é yò má e le gi, nang lé lhom rhoî zo kó âbe.” ga dum taî ri.
23 Haû mù, Ruhtaq gi, mùk-yó gùq eq súngsô ban yâm é hkyíng jé shoq, Bu-aq é duìnhâng zoshâng myiwe zo wuî eq rahá zùm yàp nyì luî, gùqgyó châng gùq mù, yhâng mhoí eq rahá nyi nyi ri.