Ruhtaq 3

Ruhtaq Eq Bu-aq É Gùq Chyârâng Mâ É Hkyô

Ra-nyí lé, Ruhtaq é yhâng mhoí Na-omiq gi, yhang lé, “Ngá dùmó é, nàng nyì ngón yùqyò râ matú, nang lé yhûmhtu a mù byî é ngò wó nyi to râ lhû? 2 Wú aq, nàng eq zùm yàp nyi é duìnhâng zoshâng myiwe zô pê é yhûmsîng Bu-aq gi, ngá-nhûng é buìnùm sîng nghut lhê, a nghut lhí? Yhang gi, hkû-myîn chyârâng má gùq hkyô nyì râ nghut lhê. 3 Haû mù luî, nàng gi, gùng chi chi, namngón xû but mù, je yúng je réng é mèbu lé mhôn chûng luî, chyârâng má ê àq. Nghut kôlhang, yhang a bàn zo a bàn shuq shi-má, nàng haû má jé nyi é hkyô yhang lé hkâsé nhâng. 4 Yhang yhup jáng, yhang hká má yhup é lé xûm yu to mù, wang ê luî, yhâng é hkyî má wùt tô é mè lé tu hí mù, haú má ê bo lèq to aq. Nàng hkâsu kut râ gi, yhang, nang lé taî râ nghut lhê.” ga taî ri.

5 Ruhtaq gi, “Nàng taî é dông bànshoq ngò kut râ.” ga tû taî ri. 6 Hau htâng, yhang gi, chyârâng shut ê mù, yhâng mhoí taî é eq rajung za ê kut bê nghut ri.

7 Bu-aq gi, bàn zo bàn shuq jáng, myìt ngón luî, gùq bùm yàm má yhup to bê nghut ri. Ruhtaq kúm gi, tsik za ê mù, yhâng é hkyî má wùt tô é mè lé tu hí luî, bo lèq tô ri. 8 Myín gùnggàm lé, Bu-aq gi, dan toq lô mù, lhing wú kat le, myiwe rayùq yhâng é hkyîhtâng má lèq tô é lé myang ri.

9 Yhang gi, “Nàng ó yùq nghut lhê?” ga myi jáng, “Ngò gi, náng é jùn myhí Ruhtaq nghut lhê. Nàng gi, ngo lé wú gon ang sû nghut é yánmai, náng é jùn myhí lé náng é mè htâng puq hut byi laq.” ga taî ri.

10 Bu-aq gi, “Ngá zo ê, Yhûmsîng Garai nang lé shimân byi sháng gàq ô! Wó é myung é irâm pé ó yùq htâng le nàng a châng é za, ahkuî, nàng i-kun má jujúm é hkyô lé shit é gi, hí lé nàng shit é jujúm é hkyo htoq má je gyaú ri. 11 Haû mù luî, ngá zo ê, hkâ-myìt chiq. Nàng dûng é hkyô bànshoq ngò kut byi râ. Nàng gi, siri bo é myiwe nghut é hkyô lé, ngá é wà byù wuì bànshoq bang sê lhê. 12 Ngò gi, nàng lé wú gon ang sû nghut é hkyô, têng lhê. Nghut kôlhang, ngá htoq je chyâng é, nang lé wú gon ang sû rayùq nyi ashî. 13 Hkû-myîn gi, shî má nyi nyi shi aq. Nàpkyó maubó jáng, haú yùq nang lé gón nau ri ga jáng gi, ge lhê; yhang gon sháng gàq. Nghut kôlhang, yhang a gon nau é nghut jáng gi, Yhûmsîng Garai rû dui nyi é eq rajung za, ngò, nang lé gon râ nghut lhê. Myòq myàng shoq yhup to shi aq.” ga yhang lé taî ri.

14 Haû mù, Ruhtaq gi, htang nàpkyó jé shoq Bu-aq é hkyîhtâng má bo yhup to ri; nghut kôlhang, rayùq eq rayùq lháng a wú sê lhum shî é u lé toq bê nghut ri. Bu-aq gi, “Chyârâng shî má myiwe rayùq lé é hkyô lé, ó lé le hkâsé nhâng.” ga taî ri.

15 Hau htâng, Bu-aq gi, “Náng é wùtmè lé, lé hpyi hkâng to aq.” ga taí jáng, yhang hpyi hkâng ri. Haú hkûn, Bu-aq gi, mùk-yó gùq hkyuq shin lik yù mù, hut kat byi luî, gòqsân má wàq ke byî é nghut mù, Ruhtaq gi, wà shut taû ló bê nghut ri.

16 Ruhtaq gi, yhâng mhoî chyáng jé ló é hkûn, yhâng mhoí gi, “Ngá dùmó ê, hkâsu nghut bê lhú?” ga lhom myi jáng, yhang gi, yhâng lé Bu-aq kut byî é hkyô bànshoq taî kyô ri. 17 Hau htâng, “‘Náng mhoî chyáng lòqkôm hkâtaû ló.’ ga yhang ngo lé taí mù, mùk-yó gùq shî hkyuq shin byî kat ri.” ga le yhang xoq taî ri.

18 Haú hkûn, yhâng mhoí Na-omiq gi, “Dumó ê, shí hkyô hkâsu xoq dùt é sé shoq láng wú shi aq. Hkâsu mù gâ le, Bu-aq gi, múzó shî lé hkû-nyí a lhoqpân é za nyi to râ a nghut.” ga taî ri.