Hanaq É Kyûdung Dang
2
Hau htâng, Hanaq kyûdûng é dang gi,“Ngá é i‑myìt nhiklhum gi, haû Yhûmsîng Garai má gabú nyi lhê.
Ngá é wum-o nghut é hkyuî gi, haû Yhûmsîng Garaî é yánmai, lhoqmyhâng lhoqtoq é huî nyi ri.
Náng é hkyi yu é jeju má, ngò gabú myìt ngui nyi é nghut mù,
ngá é gye pê é hí má, ngò, gyáng myíng gyáng htê wó mû bê nghut lhê.
2 Haû Yhûmsîng Garai su, chyoiyúng é ó a nyì.
Nàng mai lai luî, garai gótû a nyì lo.
Ngá-nhûng é Garai Gasang sû é, Lungmó zìng a jòq lo.
3 Nghutbun dang hkâtaí;
náng é nhut mai gyáng myíng gyáng htê hkâmû;
hkâsu mù gâ le, haû Yhûmsîng Garai gi, sê é dàt é Garai Gasang nghut mù,
kut é lòqmú lòqzó pé lé chîn wú nyi é Sû nghut ri.
4 Sarhê pê é lai gi, gyuî byùq bê nghut kôlhang,
lèq bàt é byu pé gi, wum-o a-tsam byíng bum akô nghut ri.
5 Gyi shoq myàng zo bang gi, zoshuq wó râ matú, langchyáng chyáng kôrâ nghut lhê;
nghut kôlhang, zò-mut huî é bang kúm gi, mùt shit a hui lo kôrâ nghut lhê.
Baùdung myhí gi, zoshâng nyhit yùq hkû bê;
nghut kôlhang, zo myo sû gi, wum nyhôm byùq bê nghut ri.
6 Haû Yhûmsîng Garai gi, shî nhâng râ, chyungxe duì nhâng râ,
mosumhkung shut hkyô pyám râ eq lhoqtoq yù râ ahkáng wó Sû nghut ri.
7 Haû Yhûmsîng Garai gi, myùng nhâng wó nhâng Sû nghut lhê;
Yhang gi, byù lé lhoqhkyó lhoqtoq Sû nghut lhê.
8 Yhang gi, asho awui myùng bang lé, hpuílup yò mai lhoqtoq yû mù,
mùt shit hui bang lé, myiwap bûm mai xe toq yû luî,
hkóhkâm zô pé eq rahá zùng nhâng mù,
hpaudap tángmyhâng silî wunlî lé sîng nhâng bê nghut ri.
Hkâsu mù gâ le, myìdam é a-pûn awang pé gi, haû Yhûmsîng Garaî é nghut mù,
Yhang gi, haú pê é ahtoq má mingkan lé xuq to bê nghut ri.
9 Yhang gi, Yhâng é sân-yúng bâng é hkyî-u lé, hkyô shit byi râ nghut lhê;
nghut kôlhang, agè ashop é bang gi, mauchut hkaû má lhoqzîm pyâm é hui kôrâ nghut lhê.
Yhûmsing é wum-o a-tsâm èq wó ung lùt é ó a nyì.
10 Haû Yhûmsîng Garai lé htuqhtîng é bang gi, lhoqhtên pyâm é hui kôrâ nghut lhê;
Yhang gi, mauhkûng mai maugum gúm nhang é dông, haú bang lé tân kyuq râ nghut lhê.
Haû Yhûmsîng Garai gi, myìdàm htoq htáng shoq târâ jéyáng râ nghut lhê.
Yhang gi, Yhâng hkóhkam lé wum-o a-tsam byi râ nghut mù,
Yhâng é xû but huí su é wum-o a-tsam nghut é hkyuî lé hkya-on wàq toq râ nghut lhê.” gâ ri.
11 Hau htâng, Elakana gi, Rama wà mó mâ é yhâng é yhûm shut taû ló byùq bê; nghut kôlhang, zoshâng haû gi, hkyangjong Eli é lòqhkaû má nyì luî, haû Yhûmsîng Garaî é múzó lé zui saî nyì bê nghut ri.
Eli É Agè Ashop É Zoshâng Tâng
12 Eli é yhang zô nhik gi, agè ashop su nhik nghut kômù, haû Yhûmsîng Garai lé ahpau ayùm kut akô nghut ri. 13 Shiwa byu pê hí má, hkyangjông pé lhaq kut é htûngli gi, rayùq yùq hkungga nhông byi luî, sho chyoq nyi é u lé, hkyangjông é duìnhâng zoshâng rayùq, yhâng é lòq má sum kó sho htau dun chûng mù, lé lô luî, 14 sum kó sho htau dun hau èq sho-au hkaû má htaû zàp kat ri; haú má dàp lo é sho bànshoq lé gi, hkyangjong hpó, yhâng é matú yù yù kut é htûng jòq ri. Shilo wà mó má lé é Isira-elaq byù bànshoq bang lé, haú dông chyat lhom kut akô nghut ri. 15 Nghut kôlhang, xû htung lháng a nyhé shi-má, hkyangjong hpô é duìnhâng zoshâng lé lô mù, hkungga lé nhong é sû lé, “Hkyangjong hpô é matú hput byi râ sho byi aq; yhang gi, sho-nyoq lé lhom yù râ a nghut, shojum shèq rû o ri.” ga taî ri.
16 Haú hkûn, hkungga nhông byi sû gi, “Xû htung lé hí nyhé bá. Hau htâng má shèq, nàng o é yu aq.” ga taí kôlhang, duìnhâng zoshâng haû gi, “A nghut, ahkuî yhang byi laq; haû a nghut jáng, ngò lú yû râ.” ga tû taí taí kut ri.
17 Haû hkyangjong zorâm nhik gi, Yhûmsîng Garai lé nhông byî é hkungga lé hpau a tap kô é yánmai, haû Yhûmsîng Garaî é hí má, gyai kô é yubàk mara wó bekô nghut ri.
Shilo Wà Mó Má Samu-elaq Nyi Kô Lo É Hkyô
18 Nghut kôlhang, zoshâng Samu-elaq gi, nú nhâm é hkyangjong bu-kó lé wùt mù, haû Yhûmsîng Garaî é hí má amû zui saî nyi ri. 19 Yhâng nu gi, zàn wuì lhê é hkungga nhông byi râ matú, yhâng wa eq dòq ê hkangmó, buhîng zo hkyup chûng mù, yhang lé ê byi byi kut ri. 20 Haú hkûn, Eli gi, Elakana eq yhâng yhûmsîng myhí lé, “Haû Yhûmsîng Garai gi, núngnhik lé, myiwe myhí shi yùq mai kyûdung luî wó mù, haû Yhûmsîng Garai lé àp byî pyám é huí su é gùnglik dông, gótû zoshâng shimân byi sháng gàq ô.” ga shimân byî ri. Hau htâng, yhángnhik gi, yhûm shut dum taû ló bekô nghut ri. 21 Haû Yhûmsîng Garai gi, Hanaq lé shimân byi bê nghut luî, Hanaq gi, zogûng dùt mù, yùqzo sum yuq eq byìzo í yùq lé dum xoq hkû bê nghut ri. Haú u lé, yùqzo Samu-elaq le, haû Yhûmsîng Garaî é hí má kô lo nyì bê nghut ri.
Eli Eq Yhâng É Yùqzô Nhik
22 Ahkuî, Eli gi, gyai mang bê nghut ri. Yhang gi, Isira-elaq byù bànshoq bang lé, yhang zô nhik hkâsu kut é hkyô pé lhúnglháng lé le, zùphpong zúm hkúmdong má mú zuî nyi é myiwe wuì eq hkâsu kut shut kô é hkyô lé le, wó gyo bê nghut ri. 23 Haû mù, Eli gi, “Núngnhik gi, haî mù, haú sû é mû pé kut akô lhú? Núngnhik kut é agè ashop hkyô pé lé, shiwa byu pé taî myhîn lo é mai, ngò wó gyo bê nghut lhê. 24 Ngá zô nhik ê, haû gi, ge é hkyô a nghut. Haû Yhûmsîng Garaî é byu pê é ahkaû má taî myhîn é hkyô lé ngò wó gyô é gi, ge é lùhkyang a nghut. 25 Byù rayùq mai góyùq lé shut é nghut jáng, haú yùq lé, Garai Gasang jéyáng byi shirâ nghut lhê. Nghut kôlhang, byù rayùq mai haû Yhûmsîng Garai lé shut é nghut jáng, ó yùq wá wó bo dûng tôngbán byi râ lhú?” ga yhángnhik lé mhoqshit ri. Nghut kôlhang, yhang zô nhik gi, yhángnhik yhâng wâ é zo mhoq htê lé a gyo kó nghut ri. Hkâsu mù gâ le, haû Yhûmsîng Garai gi, yhángnhik lé sat pyám naû bê nghut é yánmai nghut ri.
26 Zoshâng Samu-elaq kúm gi, kô myhang lò luî, haû Yhûmsîng Garaî é hí má le, byu pê é hí má le, myòqnhô ngelang wó nyi ri.
Eli É I-kun Eq Sêng É Myìqhtoi Dang
27 Garai Gasâng é byù rayùq gi, Eli chyáng jé lé mù, yhang lé, “Haû Yhûmsîng Garai îsu ga taî ri, ‘Egutuq ming, Hpara-uq hkóhkam é a‑ô má náng é îchyí îwâ pé nyi nyi ashî hkûn, yhángmòq é yhûm má, ngá gûng ngò san za htoq shit bê a nghut lhí? 28 Ngò gi, náng é îchyí îwâ léa, Ngá é hkyangjong dùt râ matú Isira-elaq a-myû up bànshoq mai wùt htoq yû râ matú le, Ngá é hkungga gyàp má dójaú râ matú le, namngón jung nyhê nhám râ matú le, Ngá é hí má, hkyangjong bu-kó hîng wùt râ matú le, hkyin yù bê. Hau htoq agó, Ngò gi, Isira-elaq byu pé nhông byî é myi nyhé hkungga bànshoq lé le, náng îchyí îwâ yhûm lé byi bê nghut lhê. 29 Núngmòq gi, ngá é yhûm má, Ngò nhông byi nhang tô é shigu hkungga eq hkungga zè pé lé, haî mù pik pyâm akô lhú? Ngá é Isira-elaq byu pé nhông byî é chyûnghuq hkangmó mâ é, je ge é pê èq, núngmòq é gùng lé tsô xû nhang nyi é dông, haî mù, Ngò lé hkúngga râ htoq má, nungzô pé lé hkunggâ lhê lhú?’ gâ ri.
30 Haû mù luî, Isira-elaq byu pê é Garai Gasang, haû Yhûmsîng Garai taî pyo é gi, ‘Náng yhûm eq náng é îchyí îwâ pê é yhûmbyù wuì, ngá hí má, hkâ-nhám le wó dójaú nyì kôrâ nghut lhê nghû, Ngò, danghtum htûm to bê nghut lhê.’ gâ ri. Nghut kôlhang, ahkuî, haû Yhûmsîng Garai dum taî pyo é gi, ‘Danghtum htûm tô é haû gi, Ngò eq wê gâng nyì sháng gàq! Ngo lé shigyaú é bang lé gi, Ngò le shigyaú râ nghut lhê; nghut kôlhang, Ngo lé wú shôm é bang lé gi, Ngò le shôm pyám râ nghut lhê. 31 Náng é yhûmhtu byù má, mangzo mang-aû rayùq lháng a htoq loshoq, náng é wum-o eq náng é îchyí îwâ pê é yhûmbyù wui é wum-o lé, Ngò lhoqhkyuî pyám byî é ahkyíng jé râ nghut lhê. 32 Nàng gi, Ngá yhûm má, wuîhke jamjau hkyô htoq é lé myàng râ nghut lhê. Isira-elaq byu pé lé, ge é hkyô kut byi kôlhang, náng é yhûmhtu byu pé má, hkâ-nhám le, mangzo mang-aû nyì lo râ a nghut. 33 Náng é a-myû mâ é rayùq yùq lé, a lhoqhtûm pyâm é za, Ngá é hkungga gyàp má dójaú nhang nyi é gi, nàng ngaùbyi ngaùnhap htoq mù, myòqjí jìt byùq râ matú le, náng é i‑myìt nhiklhum yón kuq nyî râ matú le nghut lhê. Náng é awùt ashín pé bànshoq le, chyungxe zànwut rám ashî hkûn shi byùq kôrâ nghut lhê.
34 Nungzô nhik Hohpini eq Hpinehasa ra-nyí za má shi byùq kô é gi, náng é matú alhô agàn dùt râ nghut lhê. 35 Ngò gi, Ngá é i‑myìt nhiklhum ô nau é eq Ngò myìt é hkyô lé kut râ nghut é, jujúm é hkyangjong rayùq lé, Ngá é matú lhoqhtoq râ nghut lhê. Ngò gi, yhâng é yhûm lé, gingtíng sô zùng nhang to râ nghut mù, yhang gi, Ngá é xû but huí su é hí má, hkâ-nhám le dójaú nyî râ nghut lhê. 36 Haú hkûn, náng é yhûmhtu byù mâ é myìt gyó tô é yùq hkangmó gi, yhâng é hí má lé ngóm gòp mù, “Ngò zoshuq myàng zo râ matú, hkyangjong mú eq séng mù, rawò wò má mû byi laq.” ga ngùn chap ngùn htâng eq mùk jàp mùk htang é matú dûng tôngbán râ nghut lhê.’ gâ ri.” ga taî ri.