Yhûmsîng Garaî É Htê, Samu-elaq Chyáng Jé É Hkyô
3
Yùqzo Samu-elaq gi, Eli é lòqhkaû má nyì mù, haû Yhûmsîng Garaî é mû lé wùn wàq nyi ri. Buìnyì haú pé má, haû Yhûmsîng Garaî chyáng mâ é mungdang gi, rán ló byùq bê nghut ri; shing-rán le a dê htoq shit lo nghut ri.2 Myòq wum gyai yôm mù, myòq mhám mhám za ru myang alô é Eli gi, ra-myìn lé, yhâng é jowò má yhup tô ri. 3 Samu-elaq gi, Garai Gasâng é myibung a shi byùq shi-má, Garai Gasâng é sàksé dò jòq é, haû Yhûmsîng Garaî é noqkuq yhûm má yhup tô ri. 4 Haú hkûn, haû Yhûmsîng Garai gi, Samu-elaq lé wùt kat ri.
Haû jáng, Samu-elaq gi, “Oî! Ngò, shî má nyi nyi lhê.” ga tû taî ri. 5 Haû mù, yhang gi, Eli chyáng din ê luî, “Nàng wùt luî, ngò jé lé bê.” ga ê taî ri.
Nghut kôlhang, Eli gi, “Ngò, nang lé a wùt, ló dum lèq to aq.” ga taî ri. Haû mù, Samu-elaq gi, ló dum lèq to bê nghut ri.
6 Haû Yhûmsîng Garai gi, “Samu-elaq!” ga dum wùt kat ri. Haû mù, Samu-elaq le toq luî, Eli chyáng ê mù, “Nàng wùt luî, ngò jé lé bê.” ga taî ri.
Eli gi, “Ngá zo ê, ngò, nang lé a wùt, ló dum yhup to aq.” ga taî ri.
7 Ahkuî jé shoq, Samu-elaq gi, haû Yhûmsîng Garai lé a sé shi nghut ri. Haû Yhûmsîng Garaî é mungdang le, yhâng chyáng a jé wú shi nghut ri.
8 Haû Yhûmsîng Garai gi, Samu-elaq lé sum dâm nghû râ dàm dum wùt kat jáng, Samu-elaq gi, toq luî, Eli chyáng ê mù, “Nàng wùt luî, ngò jé lé bê.” ga taî ri.
Haú hkûn, Eli gi, zoshâng haú lé, haû Yhûmsîng Garai wùt nyì bê nghut é hkyô lé, bûn sê kat bê nghut ri. 9 Haû mù, Eli gi, Samu-elaq lé, “Ló yhup to shi aq. Yhang, nang lé dum wùt lò jáng, ‘Yhûmsîng Garai ê, taí aq, Náng é duìnhâng zoshâng ngò gyô nyi lhê.’ nghû tû taí aq.” ga taî ri. Haû mù, Samu-elaq le, yhâng é jowò má ló yhup to bê nghut ri.
10 Haû Yhûmsîng Garai gi, haú jowò má lé yàp to luî, “Samu-elaq! Samu-elaq!” ga, hí lhê su dum wùt ri.
Samu-elaq le, “Taí aq, Náng é duìnhâng zoshâng ngò gyô nyi lhê.” ga tû taî kat ri.
11 Haú hkûn, Yhûmsîng Garai gi, Samu-elaq lé, “Wú aq, Ngò gi, Isira-elaq byu pê chyáng, rajung jung kut berâ nghut lhê. Haú hkyô lé wó gyô é bang yùq hkangmó gi, nosíng gyó shoq dùt byùq kôrâ nghut lhê. 12 Eli é yhûmbyù wuì lé lhoq-ang luî, taî tô é dangwang mai danghpyo hpyot lé, haú buìnyì má, Ngò lhoqdìk râ nghut lhê. 13 Hkâsu mù gâ le, yhang zô nhik gi, yhûmsing gùng yhûmsîng achaq achyut kut yû mù, ashop hkyô kut nyî kô é lé, yhang sé kôlhang, yhángnhik lé a tân hkúm, a mhoqshit é yánmai, yhâng é yhûmbyù wuì lé, pyàt dedu jéyáng râ nghû, Ngò, yhang lé taí to gù nghut bê. 14 Haû mù luî, ‘Eli é yhûmbyù wui é yubàk mara lé gi, shigu hkungga eq sôdun hkungga zè eq za, hkâ-nhám le wó lhoqpyaî pyám râ a nghut.’ nghû, Ngò, Eli é yhûmbyù wuì lé dâkam to bê nghut lhê.” ga taî ri.
15 Samu-elaq gi, nàpsûn jé shoq yhup to mù, haû Yhûmsîng Garaî é yhûm hkum pé lé toq hpông ri. Yhang gi, shing-rán haû eq séng luî, Eli lé a wám taî kyo dùt nyi ri. 16 Nghut kôlhang, Eli gi, “Ngá zo Samu-elaq ê.” ga wùt kat ri.
Haú hkûn, Samu-elaq gi, “Ngò shî má nyi lhê.” ga tû taî ri.
17 Eli gi, “Yhang, nang lé haî taî ri lhú? Nàng hkâzaú to. Yhang, nang lé taî é dang rajung jung lé zaú tô é nghut jáng, Garai Gasang, nang lé gyaí htan é dàm byi sháng gàq.” ga taî ri. 18 Haû mù, Samu-elaq gi, haî le a zaú to lô é za, bànshoq yhang lé taî kyo bê nghut ri. Haú hkûn, Eli gi, “Yhang gi, Yhûmsîng Garai nghut lhê; Yhang o é su kut sháng gàq.” ga taî ri.
19 Samu-elaq kô lo nyi é u má, haû Yhûmsîng Garai gi, yhang eq rahá nghut nyi ri. Samu-elaq lhai byî é dang pé a lhoqdìk é rahkun lháng a bò nghut ri. 20 Haû mù, Samu-elaq gi, haû Yhûmsîng Garaî é myìqhtoi yhang nghut é lé, Dan wà mó mai Berasheba wà mó jé shoq mâ é Isira-elaq byù lhúnglhâng bang sé bekô nghut ri. 21 Haû Yhûmsîng Garai gi, Shilo wà mó má xoq luî htoq shit nyi é nghut mù, Yhâng é mungdang dông, Samu-elaq lé, yhânggùng yhang shit nyi ri.
Samu-elaq é dang pé gi, Isira-elaq byu pé bànshoq bâng chyáng jàm bê nghut ri.