Hpilisiti Byù Pê É Lòq Má Dangshikaq Sàksé Dò Wang Byùq É Hkyô
4
Ahkuî, Isira-elaq byu pé gi, Hpilisiti byu pé lé majan zan râ matú htoq e akô.Yhángmòq gi, Ebeneza má gyèwap xuq, Hpilisiti byu pé gi, Ahpek má gyèwap xuq, kut tô akô. 2 Hpilisiti byu pé gi, Isira-elaq byu pé lé majan hpóng mù, majan mó dùt lo é hkûn, Isira-elaq byu pé gi, majan má byù myi hkyîng kô gyó byùq é nghut luî, majan sûm byùq bê nghut ri. 3 Haû gyèzô pé gyèwap má dum taû jé lô kô é hkûn, Isira-elaq zaugun sûwún wuî gi, “Haû Yhûmsîng Garai gi, hkû-nyí, ngá-nhúng lé, haî mù, Hpilisiti byu pê é lòq má súm nhang lhê lhú? Ngá-nhúng gi, Shilo wà mó mâ é haû Yhûmsîng Garaî é dangshikaq sàksé dò lé wàq chûng sháng. Haû jáng, haû gi, ngá-nhúng eq rahá nghut nyî mù, ngá-nhúng lé, ngá-nhûng é gye pê é lòq mai hkyi yù sháng gàq.” ga taî akô. 4 Haû mù, yhángmòq gi, Shilo wà mó shut byù nhang kat akô. Haú bang gi, hkerubim gyoro má zung é, Wum-o a-tsam dìk shoq bò Sû Yhûmsîng Garaî é dangshikaq sàksé dò lé wàq lo akô. Eli é yùqzô nhik Hohpini eq Hpinehasa le, haû Garai Gasâng é dangshikaq sàksé dò eq rahá bo châng lo akô nghut ri.
5 Haû Yhûmsîng Garaî é dangshikaq sàksé dò gi, gyèwap hkaû má jé wang lò jáng, Isira-elaq byu pé bànshoq bang gi, mau nún myì nún lô shoq, htê mó o mó garû bum akô nghut ri. 6 Hpilisiti byu pé gi, garu htê haú lé, wó gyo kôjáng, “Hebre gyèwap má garû myhîng é htê gi, haî nghut lhê lhú?” ga myî bum akô.
Yhángmòq gi, haû Yhûmsîng Garaî é sàksé dò gyèwap má jé wang lò bê hkyô lé sé kôjáng, 7 gyùq byùq bùm bekô nghut ri. Yhángmòq gi, “Gyèwap má hparà jé wang lò bu‑nhung. Ngá-nhúng lòm zo berâ! Hí lé, îsû é radàm le a dùt wú shi. 8 Ngá-nhúng, ihkyùp hui zo berâ nghut ri myhî-nhung! Haû a-tsam mó bo é hparà pê é lòq mai, ngá-nhúng lé ó yùq wó hkyi yù râ lhú? Hparà haú pé gi, yòso má, Egutuq byu pé lé wúm ajà ja èq sat pyâm é hparà pé nghut ri. 9 Hpilisiti byu pé ê, wum-o lhoqkíng keq! Wàqngân wum htíng keq. Haû a nghut jáng, Hebre byu pé gi, ngá-nhûng é jùn kut wú é su, ngá-nhúng le, yhángmòq é jùn dut byùq râ nghut lhê. Wàqngân wum htíng mù, zan keq!” ga taî akô nghut ri.
10 Haû mù, Hpilisiti byu pé gi, majan zan luî, Isira-elaq byu pé gi, sûm byùq mù, yùq hkangmó ó le ô é zúm shut hpang taû ló bûm bekô. Majan haû gi, byù sat majan poî mó dùt byùq mù, Isira-elaq gyèzô pé sûm mun yhang shi byùq bê nghut ri. 11 Haû Garai Gasâng é sàksé dò gi, gyè pê lòq má lom ló byùq; Eli é yùqzô nhik Hohpini eq Hpinehasa gi, shi byùq bekô nghut ri.
Eli Shi Byùq É Hkyô
12 Ben-yamin up mâ é byù rayùq gi, haú nyí má yhang, majan pá mai hpang din ló mù, yhang wùt tô é bu lé lâng cheq pyám luî, yhâng é ulhum má hpuílhup kyaq gyun mù, Shilo wà mó má ló jé ri. 13 Yhang jé ló é u, Eli gi, Garai Gasâng é sàksé dò é matú myìt myô é yánmai, hkyô yàm má, yhâng é tánghkuq má zùng luî, láng wú nyi ri. Hpang din ló é sû gi, wà hkaû má wàng luî, dùt é hkyô lé ló taî kyo jáng, rawà gón é gyùq ngau garû bum akô nghut ri.
14 Eli gi, ngau garû myhîng é htê haú lé wó gyo jáng, “Haî mù ngau garû myhîng nyi akô lhâ?” ga myî ri.
Haú yùq gi, Eli chyáng hân din ê mù, dùt é hkyô lé taî kyô ri. 15 Haú u, Eli gi, chyungxe zànwut gaú xe shit zân bò bê nghut mù, myòqlhumjí shi byùq luî, myòq a myàng lo nghut ri. 16 Haú yùq gi, Eli lé, “Ngò gi, majan pá mai ahkuî za jé é nghut lhê. Hkû-nyí, ngò, majan pá mai wó hpang lùt lo é nghut lhê.” ga taî kyô ri.
Eli le, “Ngá zo ê, majan gi, hkâsu nghut bê lhú?” ga myî ri.
17 Majan hkyáng lo shit é sû gi, “Isira-elaq byu pé gi, Hpilisiti byu pê é hí mai hpang byo myín byùq kômù, haû gyè hpúng gi, sum mó gyó byùq bê nghut ri. Nungzo Hohpini eq Hpinehasa nhik le, shi byùq bekô. Garai Gasâng é sàksé dò le, gyè pê é lòq má lom ló byùq bê nghut ri.” ga tû taî ri.
18 Garai Gasâng é sàksé dò hkyô lé taî htoq kat jáng, Eli gi, hkum yàm mâ é yhâng é zùng tánghkuq mai nùnghtáng shut nùngngànglàng dùt ló byùq ri. Yhang gi, mang luî, gùng le mò, la-myhen le a bò lô é sû nghut é yánmai, lìngzing gyui luî, shi byùq bê nghut ri. Yhang gi, Isira-elaq byu pé lé, myi xê zàn yhang hkyô-u shê sû nghut ri.
Hpinehasa É Chuimó Myhí Shi Byùq É Hkyô
19 Eli é yhâng dùmó, Hpinehasa é yhûmsîng myhí gi, zogûng nghut mù, zo hkû râ ahkyíng chyáng bê nghut ri. Yhang gi, Garai Gasâng é sàksé dò, gyè pê lòq má lom ló byùq é hkyô lé le, yhâng îgu eq yhâng yhûmsîng hpó shi byùq é hkyô lé le, wó gyo jáng, zohkû nò nò mù, zo wó hkû kôlhang, no é hkyô lé a ung jan lo nghut ri. 20 Yhang shi ló nyi é u má, yhâng a-nàm má nyi é myiwe wuì gi, “Myìt hkâhtum ô! Nàng gi, yùqzo rayùq hkû bê nghut ri.” ga chôm taî akô. Nghut kôlhang, yhang gi, gyo le a wó gyo lo, hpuq le a hpuq tu lo nghut ri.
21 Yhang gi, zoshâng haú lé Ihkabot ga myhîng to hkô ri. Hkâsu mù gâ le, Garai Gasâng é sàksé dò, gyè pê lòq má lom ló byùq é yánmai le, yhâng îgu eq yhâng yhûmsîng hpó shi byùq é yánmai le, “Haû hpungwup shingkang gi, Isira-elaq byu pê chyáng mai shum byùq bê.” gâ é nghut ri. 22 Yhang gi, “Garai Gasâng é sàksé dò, gyè pê lòq má lom ló byùq bê nghut é yánmai, haû hpungwup shingkang gi, Isira-elaq byu pê chyáng mai shum byùq bê.” ga le taî ri.