Hpilisiti Byù Pê Chyáng Sàksé Dò Ló Jòq U Lhê É Hkyô
5
Hpilisiti byu pé gi, Garai Gasâng é sàksé dò lé wó sing yù kô é htâng, haú lé, Ebeneza mai Ashidot wà mó má wàq jé ló bekô nghut ri. 2 Yhángmòq gi, sàksé dò haú lé, Dagon hparà yhúmhkaû shut wàq wang ló kômù, Dagon hpara é nàm má tô tô akô nghut ri. 3 Ashidot byu pé gi, htang nàpkyó noq le toq kô é hkûn, Dagon hparà gi, haû Yhûmsîng Garaî é sàksé dò hí mâ é myigùng htoq má lèq ngòp tô ri! Haû mù, yhángmòq gi, Dagon hparà lé, yhâng é jowò má dum wàq tsung tô akô nghut ri. 4 Nghut kôlhang, htang nàpkyó yhángmòq dum toq lô kô é hkûn, Dagon hparà gi, haû Yhûmsîng Garaî é sàksé dò hí mâ é myigùng htoq má dum lèq ngòp to lháng ri! Hau é ulhum eq lòq í lòq gi, gyuî byìt luî, hkumtáng má lèq tô ri. Hau é gùngdu gi, pyutlutsut jòq tô ri. 5 Haû mù, Dagon hpara é hkyangjông pé le, Dagon hparà yhûm má htoq wâng kut é bang yùq hkangmó le, Ashidot wà mó má jòq é Dagon hparà yhûm hkumtáng má, hkû-nyí jé shoq a nang lo kó nghut ri.6 Ashidot wà mó eq haú mau mâ é byu pé lé, haû Yhûmsîng Garaî é lòq èq dam mó byi mù, yhángmòq chyáng maubyîng yùq nhâng luî, hpu hke nhang nyì bê nghut ri. 7 Ashidot byu pé gi, dùt nyi é hkyô lé myàng kôjáng, “Isira-elaq byu pê é Garaî é sàksé dò gi, ngá-nhúng eq rahá a ge jòq to. Hkâsu mù gâ le, Yhâng é lòq gi, ngá-nhúng lé le, ngá-nhûng é hparà Dagon lé le, dam mó byî nyi ri.” ga taî akô. 8 Haû mù, yhángmòq gi, Hpilisiti zaugun sûwún wuî bànshoq lé ji tsîng yù mù, “Haû Isira-elaq byu pê é Garaî é sàksé dò lé, hkâsu kut le gè râ lhú?” ga myî bum akô.
Haú bang gi, “Haû Isira-elaq byu pê é Garaî é sàksé dò lé, Gat wà mó shut htòt pyám keq.” ga tû taî akô. Haû mù, yhángmòq gi, Isira-elaq byu pê é Garaî é sàksé dò lé htòt pyám bekô nghut ri.
9 Nghut kôlhang, sàksé dò haú lé htòt jé htâng má, haû Yhûmsîng Garaî é lòq gi, Gat wà mó haú lé le dam mó byî é nghut luî, hai hû háng le a sé gyùq dan bùm bekô nghut ri. Yhang gi, wà haú mâ é tiq zo ko zo lé le, maubyîng yùq nhâng luî, hpu hke nhang nyì bê nghut ri. 10 Haû mù, yhángmòq gi, Garai Gasâng é sàksé dò lé, Ekron wà má dum dé pyám bekô nghut ri.
Garai Gasâng é sàksé dò, Ekron wà má jé é hkûn, haû Ekron wà byù wuì gi, “Ngá-nhúng eq ngá-nhûng é byu pé lé sat pyám râ matú, yhángmòq gi, haû Isira-elaq byu pê é Garaî é sàksé dò lé, ngá-nhûng chyáng wàq lé lo akô nhung!” ga ngau garû bum akô nghut ri. 11 Haû mù, yhángmòq gi, Hpilisiti zaugun sûwún wuî bànshoq bang lé ji tsîng yù mù, haú bang lé, “Isira-elaq byu pê é Garaî é sàksé dò lé, yhâng é jowò má yhang, dum dé pyám keq. Haû a nghut jáng, haû gi, ngá-nhúng eq ngá-nhûng é byu pé lé sat lò râ nghut lhê.” ga chôm taî akô. Hkâsu mù gâ le, Garai Gasâng é lòq gi, wà haú má dam mó byî nyì bê nghut luî, rawà gón, gyùq chiq hkyô nghut é shî‑nò hkyô byíng jam tô é yánmai nghut ri. 12 A shi é bang, maubyîng yùq mù, hpu hkê nyì luî, no ngau myhíng kô é htê gi, mauhkûng htung bê nghut ri.