Sàksé Dò, Isira-elaq Byù Pê Chyáng Dum Taû Jé Lo É Hkyô
6
Haû Yhûmsîng Garaî é sàksé dò gi, Hpilisiti mau má, lha-mó nyhit hkyap jòq tô é htâng má, 2 Hpilisiti byu pé gi, hkyangjông pé eq bùt hpyit sé bang lé ji yù luî, “Haû Yhûmsîng Garaî é sàksé dò shî lé, hkâsu kut râ lhú? Sàksé dò haú lé, yhâng é jowò má yhang, hkâsu kut dum taû dé râ hkyô, ngá-mòq lé taî kyô wú keq.” ga taî akô.3 Haú bang gi, “Núngmòq, haû Isira-elaq byu pê é Garaî é sàksé dò lé, dum taû dé kôrâ nghut jáng, lòq kôm za hkâ-é dé kó. Mara hpyî hkungga bò ra râ nghut lhê. Haû jáng shèq, núngmòq gi, lhoqgê byî é huî râ nghut é htoq agó, haî mù Yhâng é lòq a she taû yu é hkyô lé sé kôrâ nghut lhê.” ga tû taî akô nghut ri.
4 Hpilisiti byu pé gi, “Ngá-mòq, hkâsû é mara hpyî hkungga bo dé lhóm ra râ lhú?” ga myî akô.
Haû jáng, haú bang gi, “Hpilisiti zaugun sûwún wui e byù du hkâ-myhó yùq nghut é má cháng mù, hing èq saî é maubyîng ngo cham, hing èq saî é ngo-nòq ngo du bo dé lhóm keq. Hkâsu mù gâ le, núngmòq eq núngmòq é zaugun sûwún wui chyáng, rajung zâ é wúm gyó é yánmai nghut lhê. 5 Núngmòq mau má lhoqhtên nyi é maubyîng lhô pé eq ngo-nòq lhô pé saí mù, Isira-elaq byu pê é Garai lé hkúngga wàq toq keq. Haú hkûn, Yhang gi, núngmòq eq núngmòq é hparà pê chyáng mai le, núngmòq é maumyî mai lé, Yhâng é lòq lé she taû yu pyám byi âbe. 6 Núngmòq gi, Egutuq byu pé eq Hpara-uq hkóhkam kut é su, núngmòq é i‑myìt lé, haî mù lhoqhtan tô akô lhú? Yhángmòq lé, Garai Gasâng èq htân htân jéyáng é hkûn, yhángmòq gi, Isira-elaq byu pé wó htoq ló kôrâ matú, nhang kat kô é a nghut kó lhí?
7 Ahkuî nghut kôlhang, lhêng asik tsuq mù, hkâ-nhám le nogyá a hun wú shî é eq no zo shuî é nozîng í du lé, nogyá hûn keq; no zo í du lé gi, nohkup má lhûng to keq. 8 Yhûmsîng Garaî é sàksé dò lé wàq yù mù, lhêng htoq má ke keq. Sàksé dò nàm mâ é, gótû sidèk zo ralhum má gi, mara hpyî hkungga dông, núngmòq hun kat é hîng lhô pé lé kat keq; hau htâng, nolhêng lé baú nhang kat keq. 9 Nghut kôlhang, lhêng hká shut ló é lé châng wú nyî keq. Sàksé dò haû gi, yhûmsing é mau Bet Shemesha wà shut hîhu ló é nghut jáng, ngá-nhúng hui zô nyi é ihkyùp mó shî gi, haû Yhûmsîng Garaî èq huí nhang é nghut bê. Nghut kôlhang, sàksé dò haû, wà haú shut hí a hu ló nyi é nghut jáng, Yhâng lòq èq ngá-nhúng lé dam byî é a nghut é za, yhang baú baú dùt lo é hkyô nghut é lé, ngá-nhúng wó sê râ nghut lhê.” ga tû taî akô nghut ri.
10 Haû mù, shiwa byu pé gi, yhángmòq taî é eq rajung za, jùngzìng í du lé nogyá hûn byî akô; no zo í du lé kúm gi, nohkup má lhûng to bekô nghut ri. 11 Yhángmòq gi, haû Yhûmsîng Garaî é sàksé dò lé nolhêng htoq má ke mù, hîng ngo-nòq pé eq maubyîng lhô pé bo é sidèk zo lé, hau é nàm má kê tô akô nghut ri. 12 Hau htâng, nozîng haû í du gi, Bet Shemesha wà hkyô shut, lòqpai lòqyò a jau é za, bo ngaù uchyang nyàng nyàng e ló akô nghut ri. Hpilisiti byu pê é zaugun sûwún wuî gi, Bet Shemesha maukyo jé shoq châng akô nghut ri.
13 Haú u lé, Bet Shemesha wà byu pé gi, langhkaû má, yhángmòq é súngsô yâm nyi bum akô. Yhángmòq tu wú kat kô é hkûn, haû sàksé dò lé myàng kôjáng, gyai yhang gabú byam chyû bùm bekô nghut ri. 14 Lhêng haû gi, Bet Shemesha byù Yoshuq é yò má wang ló mù, lungmó zìng yàm má lo yàp tô ri. Shiwa byu pé gi, lhêng lé zân hkyop pyám kômù, nozîng í du lé gi, myi nyhé hkungga dông, haû Yhûmsîng Garai lé nhông byî akô nghut ri. 15 Lewiq byu pé gi, haû Yhûmsîng Garaî é sàksé dò eq hîng lhô pé bo é sidèk zo lé yù mù, haû lungmó zîng htoq má kê tô akô. Haú nyí má yhang, Bet Shemesha wà byu pé gi, haû Yhûmsîng Garai lé, myi nyhé hkungga eq gótû hkungga pé lé, nhông byî akô nghut ri. 16 Hpilisiti byu pê é zaugun sûwún wuî ngo yuq le, haú hkyô pé bànshoq lé myàng to hkó mù, haú nyí má yhang, Ekron wà shut dum taû ló bekô nghut ri.
17 Hpilisiti byu pé mai mara hpyî hkungga dông, haû Yhûmsîng Garai lé hûn byî kat é, hing èq saî é maubyîng lhô pé lé gi, Ashidot wà matú ralhum, Gaza wà matú ralhum, Ashikelon wà matú ralhum, Gahta wà matú ralhum eq Ekron wà matú ralhum nghut ri. 18 Hîng ngo-nòq lhô pé gi, Hpilisiti byu pê é bùm wà pé eq yhángmòq é gingtíng wà mó lé ùp é zau ngo yuq eq sêng é Hpilisiti wà mó ngo wâ eq rajung za nghut ri. Bet Shemesha wà mâ é Yoshuq é yò má jòq é, yhángmòq mai haû Yhûmsîng Garaî é sàksé dò kê é lungmó zîng gi, hkû-nyí jé shoq sàksé dùt nyi ri.
19 Nghut kôlhang, Bet Shemesha byu pé gi, haû Yhûmsîng Garaî é sàksé dò hkaû shut wú kô é yánmai, Garai Gasang gi, yhángmòq mâ é byù ngo mûn eq nyhit xê yuqa lé sat pyâm ri. Haû mù, yhángmòq gi, Yhûmsîng Garaî èq yhángmòq lé ihkyùp mó huí nhang é yánmai, ngaùbyi ngaùnhap èq iyon yôn nyi bum akô nghut ri. 20 Bet Shemesha byu pé gi, “Chyoiyúng é Garai Gasang, haû Yhûmsîng Garaî é hí má, ó yùq wá wó yàp râ lhú? Sàksé dò shi lé, ngá-nhûng chyáng mai, ô chyáng ê dé pyám râ lhú?” ga taî bum akô.
21 Hau htâng, yhángmòq gi, “Haû Yhûmsîng Garaî é sàksé dò lé, Hpilisiti byu pé mai, lé taû dé byi bekô nghut ri. Gyó lò mù, haú lé, núngmòq chyáng lé wàq yù keq.” ga, Kiri-at Yarim byu pê chyáng ê taí nhâng râ matú, byù nhang kat akô nghut ri.