7
Haû mù, Kiri-at Yarim byu pé gi, lé luî, haû Yhûmsîng Garaî é sàksé dò lé, lé wàq ló bekô nghut ri. Hau htâng, yhángmòq gi, haú lé, wing bú má saî tô é Abinadap é yhûm má tô to luî, haû Yhûmsîng Garaî é sàksé dò lé zúng nhang to râ matú, Aminadap é yhang zo Ele-aza lé lhoqchyoi lhoqyúng byi bekô nghut ri.
Mizipa Má Hpilisiti Byu Pé Lé Ung Pyâm É Hkyô
2 Haû sàksé dò gi, Kiri-at Yarim wà má, zàn wùt í xê zàn kô yhang myáng shoq jòq nyi ri. Haú u lé, Isira-elaq byu pé bànshoq bang gi, haû Yhûmsîng Garai mai lé garúm yû râ matú, yón ngaû, wùt dûng nyi bum akô nghut ri. 3 Haú hkûn, Samu-elaq gi, Isira-elaq a-myû gón lé, “Núngmòq gi, núngmòq é i‑myìt nhiklhum bànshoq èq haû Yhûmsîng Garaî chyáng dum taû lhing lò kô é nghut jáng, núngmòq jaú nyi é tûngbaù hparà pé eq Ashatoret hparà pé lé tô pyâm mù, núngmòq é gùng lé, haû Yhûmsîng Garai chyáng àp nhông luî, Yhang lé za dójaú nyî keq. Haú hkûn, Yhang gi, núngmòq lé, Hpilisiti byu pê é lòq mai hkyi yù râ nghut lhê.” ga taî ri. 4 Haû mù, Isira-elaq byu pé gi, yhángmòq é Balaq hparà pé eq Ashatoret hparà pé lé tô pyám kômù, haû Yhûmsîng Garai lé za, dójaú bekô nghut ri.
5 Hau htâng, Samu-elaq gi, “Mizipa jowò má, Isira-elaq byù bànshoq bang zùp zing keq; núngmòq é matú, ngò, haû Yhûmsîng Garaî chyáng kyûdûng xoq byi râ nghut lhê.” ga taî ri. 6 Yhángmòq gi, Mizipa jowò má zùp zing kô é hkûn, wuì hkam yù kôluî, haû Yhûmsîng Garaî é hí má wuì hut hpyûn akô nghut ri. Haú nyí má, yhángmòq gi, zoshuq túm luî, “Haû Yhûmsîng Garai lé, ngá-mòq mara shut bê ô.” ga, jowò haú má mara yín yu bum akô. Samu-elaq le, Mizipa jowò má, Isira-elaq byu pé lé târâ jéyáng bê nghut ri.
7 Isira-elaq byu pé, Mizipa jowò má zùp zîng nyi bùm kô é hkyô lé, Hpilisiti byu pé wó gyo kôjáng, yhángmòq é zaugun sûwún wuî gi, Isira-elaq byu pé lé majan zan râ matú gyè toq akô. Haú hkyô lé, Isira-elaq byu pé wó gyo kô é hkûn, yhángmòq gi, Hpilisiti byu pê é yánmai, gyai yhang gyùq bùm bekô nghut ri. 8 Haû mù, yhángmòq gi, Samu-elaq lé, “Hpilisiti byu pê é lòq mai ngá-nhúng lé hkyi yù sháng gàq, ngá-nhûng é Garai Gasang, haû Yhûmsîng Garaî chyáng, ngá-nhûng é matú, abyìt alan kyûdung byî nyì àq.” ga taî akô. 9 Hau htâng, Samu-elaq gi, naú a kang shî é sau zo radu lé yù mù, radu gón myi nyhé hkungga kut luî, haû Yhûmsîng Garai lé nhông byi mù, Isira-elaq byu pê é gùnglik dông, haû Yhûmsîng Garai lé wùt dung jáng, Yhûmsîng Garai gi, yhang lé gyo byi bê nghut ri.
10 Samu-elaq gi, myi nyhé hkungga sôdûn nyi é u má, Hpilisiti byu pé gi, Isira-elaq byu pé lé majan zan râ matú, chyâng lé lo nyì bekô nghut ri. Nghut kôlhang, haú nyí má, Yhûmsîng Garai gi, Hpilisiti byu pé lé, lhap hpyat maugum mó èq htim nhâng mù, yhángmòq lé lhoqkyuq pyo pyâm é nghut luî, yhángmòq gi, Isira-elaq byu pê é hí má, sûm byùq bekô nghut ri. 11 Isira-elaq byu pé gi, Mizipa jowò mai htîm htoq mù, Hpilisiti byu pé lé, Bet Hkara wà nàm jé shoq châng hkat sat kyop bekô nghut ri.
12 Hau htâng, Samu-elaq gi, lùqgòk racham lé wàq yù mù, Mizipa eq Shen wà gyoro má xuq tô ri. Yhang gi, lùqgòk haú lé Ebeneza ga myhîng ri; hau é lichyúm gi, “Haû Yhûmsîng Garai gi, hkû-nyí jé shoq, ngá-nhúng lé garúm nyi ri.” gâ é nghut ri.
13 Hpilisiti byu pé gi, sûm byùq bekô nghut mù, Isira-elaq byu pê é mau má a lé wám htîm wàng lo kó nghut ri. Haû Yhûmsîng Garaî é lòq gi, Samu-elaq é i-pyàt gón má, Hpilisiti byu pé lé hkûm tang pyám byî nyi ri. 14 Hpilisiti byu pé gi, Ekron wà mai Gahta jé shoq yhángmòq wó zân yu é maumyî lé, Isira-elaq byu pê é lòq má dum taû àp byi bekô nghut ri. Haû mù, Isira-elaq byu pé gi, maumyî haú pé lé, Hpilisiti byu pê é lòq mai dum wó yù bekô. Isira-elaq byu pé eq Amori byu pê é gyoro má le, nguì ngón byùq bekô nghut ri.
15 Samu-elaq gi, yhâng é chyungxe i-pyàt gón má, Isira-elaq byu pê é târâ agyì dông xoq ùp nyi ri. 16 Yhang gi, zàn wuì zàn làng, Behtela mai Giligala, Giligala mai Mizipa wà jé shoq sô kûm wún luî, jowò haú pé bànshoq má, Isira-elaq byu pé lé târâ jéyáng byî wún ri. 17 Nghut kôlhang, yhang gi, yhâng é yhûm jòq é Rama wà mó má le, ayang taû ló mù, haú mâ é Isira-elaq byu pé lé le târâ jéyáng byî ri. Yhang gi, haú wâ má, haû Yhûmsîng Garaî é matú, hkungga gyàp ralhum tsuq tô ri.