Isira-elaq Byu Pé Hkóhkâm Dûng É Hkyô
8
Samu-elaq gi, mang jáng, yhang zô nhiktâng lé, Isira-elaq byu pê é târâ agyì kut râ matú wò hun tô ri. 2 Zo-mún yùq é myìng gi, Yo-ela gâ ri; zolat yùq é myìng gi, Abiya gâ ri. Yháng nhiktâng gi, Berasheba wà má târâ agyì kut akô nghut ri. 3 Nghut kôlhang, yhang zô nhik gi, yhâng wâ é hkyô a cháng kó. Yhángnhik gi, a târa é sùtzè lé myòqnòq kômù, lòqhkaû lang zê yù kôluî, târâ ràp-rá hkyô lé lhoqhtên pyâm akô nghut ri.4 Haû mù, Isira-elaq byu pê é nhik bô sûwún wuî bànshoq gi, rahá zùp zing kômù, Rama wà má nyi tô é Samu-elaq chyáng lé jé akô nghut ri. 5 Yhángmòq gi, yhang lé “Wú aq, nàng gi, mang bê; nungzô nhik le, náng hkyô a cháng kó nghut ri. Ahkuî, gótû a-myû bànshoq bang hkóhkâm wó kô é su, ngá-mòq lé hkyô-u shuî shê râ hkóhkâm rayùq dáng byi laq.” ga taî akô nghut ri.
6 Nghut kôlhang, Samu-elaq gi, “Ngá-mòq lé hkyô-u shuî shê râ hkóhkâm rayùq byi laq.” ga yhángmòq taí kôjáng, myìt a gyô ngón mù, haû Yhûmsîng Garai lé kyûdûng ri. 7 Haú hkûn, haû Yhûmsîng Garai gi, yhang lé, “A-myû haú bang, nang lé taî é dang bànshoq lé gyo byi aq; yhángmòq gi, nang lé he-ngìk pyâm é a nghut; yhángmòq é hkóhkâm Ngo lé he-ngìk pyám kô é shèq ru nghut lhê. 8 Yhángmòq gi, Ngò, yhángmòq lé Egutuq ming mai shuî htoq lo é hkûn mai hkû-nyí jé shoq, Ngo lé tô pyám kômù, gótû hparà pé lé dójaú nyî kô é su, nang lé le, kut nyi bùm bekô nghut ri. 9 Ahkuî, yhángmòq é dang gyo byi aq. Nghut kôlhang, htân htân sidìq byi luî, yhángmòq lé ùp râ nghut é hkóhkam é htûng târâ pé lé, yhángmòq lé sé nhâng àq.” ga taî ri.
10 Samu-elaq gi, hkóhkâm dûng nyi é byù haú bang lé, haû Yhûmsîng Garaî é dang bànshoq shit kyo bê nghut ri. 11 Dang haú pé gi, “Haû núngmòq lé ùp râ nghut é hkóhkam é htûng târâ gi, a‑ô mâ é eq rajung za nghut lhê: Yhang gi, núngmòq é yhang zo yùqzô pé lé shuî yù mù, yhâng é gyè myanglhêng eq myang pé lé ji râ wò byi luî, yhángmòq gi, yhâng é gyè myanglhêng pê hí má, dìn kôrâ nghut lhê. 12 Ra-am lé gi, byù rahkyîng hkyîng ùp é zau pé, ngo xê xê ùp é zau pé kut nhâng râ nghut lhê; ra-am lé gi, yhâng é yò hpuq kyô shu mú byi luî, dum ra-am lé gi, majan gyè zè gyè hkoq eq yhâng é gyè myanglhêng tsuq zê pé saí râ wò tsing byî to râ nghut lhê. 13 Yhang gi, núngmòq é byìzô pé lé, namngón jung saí bang, zang chyoq bang eq mùk saí bang kut râ matú shuî yù râ nghut lhê. 14 Yhang gi, núngmòq é je ge é yohtung pá pé, tsibyiq hkyâm pé eq tsanlun hkyâm pé lé sing yù mù, yhâng é mú wùn bang lé tsing byî pyám râ nghut lhê. 15 Yhang gi, núngmòq é kyôshi myuishi eq tsibyiq shi mâ é xê gàmbùm ragàmbùm lé hkyui yù mù, yhâng é zaugun wuì eq mú wùn bang lé byi râ nghut lhê. 16 Yhang gi, núngmòq é duìnhâng zoshâng myiwe yùqgè wuì lé le, núngmòq é je réng é no myanga eq loze pé lé le, yhâng é múzó matú yu chung pyám râ nghut lhê. 17 Yhang gi, núngmòq é sau bainám hpúng mâ é xê gàmbùm ragàmbùm lé yù râ nghut é htoq agó, núngmòq yhang le, yhâng é jùn dut kôrâ nghut lhê. 18 Buìnyì haû jé jáng, núngmòq yhang hkyin yu é hkóhkâm chyáng mai wó lùt râ matú, núngmòq wùt ngau garu kôlhang, haû Yhûmsîng Garai gi, haú nyí má, núngmòq lé gyo byi râ a nghut.” gâ é nghut ri.
19 Nghut kôlhang, a-myû haú bang gi, Samu-elaq é dang lé a gyô é za, “A nghut! Ngá-mòq lé ùp râ hkóhkâm rayùq ô nau ri. 20 Haú hkûn shèq, ngá-mòq gi, gótû a-myû bànshoq bang su, ngá-mòq lé hkyô-u shuî shê luî, ngá-mòq hí má htoq ê mù, majan wó shuî zan râ hkóhkâm rayùq wó râ nghut lhê.” ga taî akô nghut ri.
21 Samu-elaq gi, a-myû haú bang taî é dang bànshoq lé wó gyo jáng, haû Yhûmsîng Garai lé, haú hkyô dum shit kyo bê nghut ri. 22 Haû Yhûmsîng Garai gi, “Yhángmòq é dang lé gyo byi mù, yhángmòq é matú hkóhkâm rayùq dáng byi aq.” ga tû taî ri.
Hau htâng, Samu-elaq gi, Isira-elaq byu pé lé, “Núngmòq, ó le ô é wà shut dum taû ló keq.” ga taî ri.