Samu-elaq Eq Sholuq Huî Lhûm É Hkyô
9
Ben-yamin up mâ é sarhê wàqngân nghut é, Kisha gâ é byù rayùq nyi ri; yhang gi, Ben-yamin up mâ é Ahpi-a é shuké tsáng, Behkorat é shuké, Zerora é yhang shu, Abi-ela é yhang zo nghut ri. 2 Yhang gi, Sholuq gâ é yùqzo rayùq wó ri. Yùqzo haû gi, ihpyô wunbu yúng yúng é eq zo gè rayùq nghut mù, Isira-elaq byu pé má yhang lé wó whuî é a bò; yhang gi, góbâng htoq má ulhum ló ze myhang to sû nghut ri.3 Ahkuî, Sholuq é yhâng wa Kisha é loze pé byùq byùq é nghut mù, Kisha gi, yhang zo Sholuq lé, “Duìnhâng zoshâng rayùq shuî chûng mù, loze ê châng hô keq.” ga taî ri. 4 Haû mù, yhángnhik gi, Ehprim bummau eq Shalisha awui ayàm pé má châng ho wú kôlhang, a myang hô kó nghut ri. Dum, yhángnhik gi, Shalim mau má ho wang jé kôlhang, loze pé haú má a nyì nghut ri. Hau htâng, Ben-yamin maukyo shut ê ho wú kôlhang, a myang hô kó nghut ri.
5 Yhángnhik, Zuhpi mau má jé kô é hkûn, Sholuq gi, yhang eq rahá nghut nyi é duìnhâng zoshâng lé, “Sâ, taû ló lo gòq. Haû a nghut jáng, âwa gi, loze pé byùq é lé a myìt myo lô é za, ngá-nhik é yánmai myìt myo ûngluq nyî âbe.” ga taî ri.
6 Nghut kôlhang, duìnhâng zoshâng gi, “Wú aq; shí wâ má, Garai Gasâng é byù rayùq nyi ri; yhang gi, hkúngga hpautap gíng dik sû nghut mù, yhang taî é lhúnglháng têng é chyat nghut ri. Ahkuî, yhâng chyáng e wú gòq; ngá-nhik hká shut ê râ hkyô lé, lhom taî kyo âbe.” ga tû taî ri.
7 Sholuq gi, yhâng é duìnhâng zoshâng lé, “Ngá-nhik ê râ nghut jáng, haú yùq é matú, haî yu ê byi râ lhú? Ngá-nhik wun é zoshuq le ban byùq bê. Haû Garai Gasâng é byu chyáng yu ê râ chyûnghuq, ngá-nhik a wó. Ngá-nhik chyáng haî bo ashî lhú?” ga myî ri.
8 Duìnhâng zoshâng haû gi, Sholuq lé, “Wú aq; ngá chyáng ngùn htingchap í che bo lhê. Ngá-nhik lé hkyô lom shit sháng gàq, ngò, haû Garai Gasâng é byù lé ngùn shî byi râ nghut lhê.” ga dum tû taî ri. 9 (Hí hpyang, Isira-elaq byu pé mai, Garai Gasâng chyáng rajung jung ê myi râ nghut le, “Sâ, myòq gyeng su chyáng ê sháng.” ga lhaq taî akô. Hkâsu mù gâ le, ahkui lhê é myìqhtoi lé gi, myòq gyeng sû ga wùt akô nghut ri.)
10 Sholuq le, “Nghut bê; Sâ, ê gòq.” ga yhâng é duìnhâng zoshâng lé taî ri. Haû mù, yhángnhik gi, Garai Gasâng é byù nyi é wà shut e ló bekô nghut ri.
11 Yhángnhik gi, haû wà jé é hké má dòq ló kô é hkûn, wuì hkâm lé lo é myiwe zo wuî eq hui kôluî, haú bang lé, “Shí wâ má myòq gyeng sû a nyì kó lhú?” ga myî akô.
12 Haú bang gi, “Nyi lhê.” ga tû taí kômù, “Myòq gyeng sû gi, hû, núngnhik é hí má nghut nyi ri. Hân cháng keq; shiwa byu pé, myhang é kong má hkungga nhông byi râ nghut mù, yhang, hkû-nyí ngá-mòq é wà má jé tô ri. 13 Núngnhik, wà má jé wâng eq yhang, yhang, myhang é kong má ê zo râ matú a ê shilé, yhang eq hui kôrâ nghut lhê. Shiwa byu pé gi, yhang a jé lô shi-má, zoshuq zo láng kôrâ a nghut; hkâsu mù gâ le, yhang hí, hkungga lé nhông byi râ dùt lhê. Nhông byî é htâng má shèq, ji tô é bang zo kôrâ nghut lhê. Núngnhik, ahkuî dòq ló jáng, yhang lé myang hui kôrâ nghut lhê.” ga tû taî akô.
14 Yhángnhik gi, dòq ló mù, wàhkaû shut wang e ló nyî kô é hkûn, haû myhang é kong shut dòq e ló é Samu-elaq eq htûng huî akô nghut ri.
15 Sholuq jé lé râ hî nyí má za, haû Yhûmsîng Garai gi, Samu-elaq lé, 16 “Ngò gi, nàpmá shí u má, Ben-yamin mau mâ é byù rayùq lé náng chyáng nhang kat râ nghut lhê. Haú yùq lé, Ngá é Isira-elaq byu pê é ushuq kut râ matú, sô kat namngón xû bùt byi aq. Yhang gi, Ngá é byu pé lé, Hpilisiti byu pê é lòq mai hkyi yù râ nghut lhê. Hkâsu mù gâ le, yhángmòq wùt ngau é htê gi, Ngá chyáng jé hkyâng bê nghut mù, Ngò gi, Ngá é byu pé lé wú magûm byî nyi lhê.” ga taî sân kyô ri.
17 Samu-elaq gi, Sholuq lé myang é hkûn, haû Yhûmsîng Garai gi, yhang lé “Ngò, nang lé taî é sû gi, shí yùq yhang nghut bê; yhang gi, Ngá é byu pé lé ùp râ nghut lhê.” ga taî ri.
18 Sholuq gi, wâng hkúmdong yàm má nyi tô é Samu-elaq chyáng ê jé mù, “Myòq gyeng su é yhûm hká má nghut lhê lhú? Jeju mai ngo lé taî kyo laq.” ga myî ri.
19 Samu-elaq gi, “Ngò gi, myòq gyeng sû nghut bê. Myhang é kong shut hí dòq ló láng aq. Hkû-nyí, nàng, ngò eq rahá zo râ nghut mù, nàpkyó shèq, ngò, nang lé nhang kat râ nghut luî, náng é i-myìt hkaû má bo é bànshoq lé taî kyo râ nghut lhê. 20 Laî lò bê sum nyí má byùq é loze pé lé hkâ-myìt chiq nyî lo; haú pé lé myang hô bekô nghut ri. Ó yùq lé shèq, Isira-elaq byù bànshoq bang ô nau nyi lhê lhú? Haû gi, nàng eq náng wâ é yhûm i-kun byu pé nghut lhê a nghut lhí?” ga tû taî ri.
21 Sholuq gi, “Nghut kôlhang, ngò gi, Isira-elaq a-myû wuì mâ é je tiq é, Ben-yamin up mâ é ru nghut lhê a nghut lhí? Ngá é akoq gi, Ben-yamin up akoq bànshoq má je tiq dik é akoq shèq nghut lhê a nghut lhí? Haî mù, nàng, ngo lé haû su nghû taî lhê lhú?” ga tû taî ri.
22 Hau htâng, Samu-elaq gi, Sholuq eq yhâng é duìnhâng zoshâng lé, wàpdòq shut shuî wang ló mù, ji tô é sum xê yùq kô bo é bíng pê hí mâ é umhtúng shut zùng nhang tô ri. 23 Samu-elaq gi, haû zang chyoq sû lé, “Gótû kut shung to aq nghû, ngò, nang lé taí mù byî tô é sho yu lò àq.” ga taî ri.
24 Haû mù, zang chyoq sû haû gi, shosân lé wàq lò mù, Sholuq é hí má lo to byî ri. Samu-elaq gi, “Zo aq, shî gi, náng é matú gótû shung to byî é sho nghut lhê. Hkâsu mù gâ le, haû gi, ngò, bíng pé lé ji é hkûn mai yhang, shí u lhê é náng é matú shung to nhang é nghut lhê.” ga taî ri. Haû mù, Sholuq gi, haú nyí lé Samu-elaq eq rahá zo bê nghut ri.
25 Yhángmòq gi, myhang é kong mai wà má jé gyó lo é htâng, Samu-elaq gi, yhâng é yhûmhkûng htoq má Sholuq eq nyo lhûm akô. 26 Htang nàpkyó maubó lô jáng, Samu-elaq gi, Sholuq lé yhûmhkûng htoq shut ji toq yû mù, “Hên aq; nàng ló râ hkyô shut, ngò lé dé kat râ.” ga taî ri. Haû mù, Sholuq le hên luî, Samu-elaq eq rahá htoq ló bê nghut ri. 27 Yhángmòq gi, shinggan wà yàm shut gyó ló nyî kô é hkûn, Samu-elaq gi, Sholuq lé, “Náng é duìnhâng zoshâng lé, hí ló láng nhâng àq.” ga taí jáng, duìnhâng zoshâng haû lé hí ló láng nhâng bê nghut ri. Dum, Samu-elaq gi, “Nghut kôlhang, nàng gi, shî má razùp yàp shi aq; ngò gi, nang lé, Garai Gasâng chyáng mâ é mungdang taî kyo râ nghut lhê.” ga taî ri.