10
Hau htâng, Samu-elaq gi, tsanlun xû bòng lé yù mù, Sholuq é ulhum htoq má hut gyun luî, Sholuq lé bo-puq puq byi mù, “Haû Yhûmsîng Garai gi, Yhâng é silî wunlî a-myû wuì lé shuî-u râ matú, nang lé sô kat namngón xû bùt byi bê a nghut lhí? 2 Hkû-nyí, nàng, ngò eq gâng ló jáng, Ben-yamin maukyo, Zelaza jowò mâ é Rahkela é lùp nàm má, byù í yùq lé, nàng hui râ nghut lhê. Yhángnhik gi, nang lé ‘Nàng ho wún é loze pé lé myang hô bê. Ahkuî, náng wa gi, loze pé lé a myìt myo lô é za, náng é hkyô lé myìt myo ûngluq nyî bê nghut ri. Yhang gi, “Ngá zô é matú, ngò hkâsu kut râ lhú?” ga myî nyi ri.’ ga lhom taí kôrâ nghut lhê.3 Hau htâng, nàng gi, haú jowò mai Tabora mâ é sik mó gâm jé shoq e ló râ nghut lhê. Haú má, Behtela wà má Garai Gasang lé ê noqkuq râ matú dòq e ló nyi é byù sum yuq, nang lé lhom hui kôrâ nghut lhê. Yhángmòq mâ é rayùq gi, bainám zo sûm du, rayùq gi, mùk sûm long, gótû rayùq gi, tsibyiq wing bo é sho-kuq htûng chung bùm kôrâ nghut lhê. 4 Yhángmòq gi, nang lé lhom te yù mù, mùk í long lhom byi kôrâ nghut luî, nàng gi, yhángmòq chyáng mai haú lé hàp yù râ nghut lhê.
5 Hau htâng, nàng gi, Hpilisiti gyèwap jòq é Garai Gasâng é bùm le nghut é Gibe-a shut jé mù, haú mai wà shut jé wang lo é hkûn, ut chyapchéng, tíng pé eq sámpyí bàt luî, myhang é kong mai gyó lo nyi é myìqhtoi rahpúng lé hui râ; haú bang gi, myìqhtoi htoî nyì láng kôrâ nghut lhê. 6 Haú hkûn, Yhûmsîng Garaî é Sô gi, náng é ahtoq má wum-o a-tsam eq gyó jé lé râ nghut mù, nàng gi, yhángmòq eq rahá myìqhtoi htoi râ nghut luî, góyùq su dùt byùq râ nghut lhê. 7 Alhô agàn haú pé nàng má dik jáng, nàng wú le htuk é dông kut nyî àq. Hkâsu mù gâ le, Garai Gasang gi, nàng eq rahá nghut nyi lhê.
8 Nàng gi, ngá hí má Giligala wà má gyó ló láng râ dùt lhê. Ngò gi, myi nyhé hkungga eq zùmhkaû hkungga lé nhông râ matú, teng za náng chyáng gyó lé lô râ nghut lhê. Nghut kôlhang, nàng gi, náng chyáng ngò jé lé luî, nàng haî kut râ lé taî kyô é hkûn jé shoq, nyhit nyí láng nyî ra râ nghut lhê.” ga taî ri.
Sholuq Hkóhkâm Dùt Lo É Hkyô
9 Sholuq gi, Samu-elaq chyáng mai htoq ló râ ga gùng lhik kat é hkûn, Garai Gasang gi, yhâng é i-myìt nhiklhum lé htaî pyám byî ri; alhô agàn haú pé bànshoq gi, haú nyí má yhang dik byùq bê nghut ri. 10 Yhángnhik gi, Gibe-a má jé kôjáng, myìqhtoi rahpúng gi, yhang lé lhom huî ri; haû Garai Gasâng é Sô gi, Sholuq é ahtoq má wum-o a-tsam eq jé gyó lô luî, yhang gi, haú bang eq rahá myìqhtoi bo htoî nyì bê nghut ri. 11 Hí lé, Sholuq lé sê é bang bànshoq gi, myìqhtoî pé eq rahá, yhang myìqhtoi htoî nyi é lé myàng kôjáng, rayùq eq rayùq, “Kisha é yhang zo gi, haî dut nyi lhê lhà? Sholuq le, myìqhtoi hpúng má bo lhê lhú?” ga myî lhûm bum akô nghut ri.
12 Haú má nyi é byù rayùq gi, “Shí bâng é îwa gi, ó yùq nghut lhê lhú?” ga tû taî ri. Haû mù, “Sholuq le, myìqhtoi hpúng má bo lhê lhú?” gâ é dang gi, sânghkyang dùt byùq bê nghut ri. 13 Sholuq gi, myìqhtoi ban htoi jáng, myhang é kong shut dòq é ló byùq ri.
14 Sholuq é yhang wabok gi, yhang eq yhâng é duìnhâng zoshâng lé, “Núngnhik hká má ê jé kô é lhú?” ga myî ri. Haú hkûn, Sholuq gi, “Loze pé lé châng ho wún é nghut lhê. Nghut kôlhang, a myang hô lo mù, Samu-elaq chyáng e é nghut lhê.” ga taî kyô ri.
15 Sholuq é yhang wabok gi, “Samu-elaq, nang lé hkâsu ga lhom taî é hkyô, ngo lé taî kyô wú aq.” ga myî ri. 16 Sholuq gi, “Loze pé hkyak myang hô bê nghut é hkyô lé, yhang, ngá-nhik lé lhom taî kyô ri.” ga tû taî ri. Nghut kôlhang, yhang gi, mîngdán hkyô eq séng luî, Samu-elaq taî é lé kúm, yhang wabok lé a taî kyo nghut ri.
17 Samu-elaq gi, Isira-elaq byu pé lé, Mizipa wà mó má, haû Yhûmsîng Garaî é hí má ji tsîng to mù, 18 yhángmòq lé taî é gi, “Isira-elaq byu pê é Garai Gasang, haû Yhûmsîng Garai îsu ga taî ri; ‘Ngò gi, Isira-elaq byu pé lé, Egutuq ming mai shuî htoq lô luî, Egutuq byu pê é lòq mai le, núngmòq lé zìk zô é hkóhkâm mîngdán bànshoq bâng é lòq mai le, hkyi yù bê.’ 19 Nghut kôlhang, ahkuî, núngmòq gi, núngmòq hpuzô é ihkyùp pé eq myìt myo ung wom hkyô pé bànshoq mai hkyi xe yu é, núngmòq é Garai Gasang lé he-ngìk pyám bekô nghut ri. Hau htoq agó, núngmòq gi, ‘A nghut! Ngá-mòq lé ùp râ hkóhkâm rayùq ô nau ri.’ ga taî akô. Haû mù, núngmòq é a-myû up eq akoq má cháng luî, haû Yhûmsîng Garaî é hí má lé zùp zing keq.” gâ ri.
20 Samu-elaq gi, Isira-elaq a-myû ûp bànshoq lé, hí shut shuî lé lo é hkûn, Ben-yamin a-myû ûp gi, hkyin yu é hui bê nghut ri. 21 Hau htâng, yhang gi, Ben-yamin a-myû up mâ é akoq hkangmó lé, hí shut shuî lé lo é hkûn, Matiri koq gi, hkyin yu é hui bê nghut ri. Ló htáng má, Kisha é yhang zo Sholuq, hkyin yu é hui bê nghut ri. Nghut kôlhang, yhángmòq gi, Sholuq lé châng ho wú kôle, a myang hô kó nghut ri. 22 Haû mù, yhángmòq gi, haû Yhûmsîng Garai lé, “Byù haú yùq shí má a jé shi lhú?” ga xoq myî akô.
Haû Yhûmsîng Garai gi, “Jé bê; yhang gi, azíng zè bùm hkaû má haq lúng tô ri.” ga taî ri.
23 Yhángmòq gi, din ê mù, yhang lé ê shuî htoq lo akô. Sholuq gi, shiwa byu pé eq rahá yàp é hkûn, góbâng htoq má ulhum ló ze myhang tô ri. 24 Samu-elaq gi, shiwa byù bànshoq lé, “Haû Yhûmsîng Garai hkyin yù sû lé, núngmòq myang akô lhú? Shiwa byù bànshoq má yhang su dùt é ó a bò nghut ri.” ga taî ri.
Haú hkûn, “Hkóhkâm gi, chyung hîng xê hing nyì sháng gàq ô!” ga shiwa byu pé taî garû bum akô nghut ri.
25 Samu-elaq gi, shiwa byu pé lé, hkóhkâm rayùq é htûng târâ pé taî san kyo mù, haú pé lé laiká ding má kâ to luî, haû Yhûmsîng Garaî é hí má tô to bê nghut ri. Hau htâng, yhang gi, shiwa byu pé lé, yhûmsing yhûm shut ló nhâng bê nghut ri.
26 Sholuq le, Gibe-a wà mâ é yhâng é yhûm shut ló bê nghut ri; Garai Gasang èq myìt nhaû toq é wàqngân wuì le, yhâng htâng bo châng bum akô nghut ri. 27 Nghut kôlhang, lhoqhpyoq lhoqhten nau é byù ra-am gi, “Shí yùq â-mòq, ngá-nhúng lé wó hkyi yù râ lhú?” ga taî bum akô. Yhángmòq gi, yhang lé wú tiq kôluî, hai chyûnghuq le a chung lé byi kó nghut ri. Nghut kôlhang, Sholuq gi, zim za nyi tô ri.