Yabesha Wà Lé Sholuq Hkyi Yu É Hkyô
11
Hau htâng, Ammon byù Nahashi gi, Gile-at mau Yabesha wà nàm má dòq ló mù, gyèwap xuq luî, lhom hkyuq to bê nghut ri. Haú hkûn, Yabesha byu bànshoq bang gi, yhang lé “Ngá-mòq eq nguì ngón dangshikaq tô é nghut jáng, ngá-mòq gi, náng é a-ô má nyì râ nghut lhê.” ga taî akô nghut ri.2 Nghut kôlhang, Ammon byù Nahashi gi, “Núngmòq yùq du jùp é lòqyo myòqjí lé choq pyám byi mù, Isira-elaq byù bànshoq bang lé hoq wó lhoqhpu nhâng jáng za shèq, núngmòq eq nguì ngón dangshikaq to râ nghut lhê.” ga tû taî ri.
3 Yabesha wà sûwún wuî gi, yhang lé, “Ngá-mòq gi, Isira-elaq ra-mau gón má hkyang wó shit jâm nhâng râ matú, nyhit nyí ahkáng byi shilaq; ngá-mòq lé, lé hkyi yù râ byù a htoq lo é nghut jáng gi, náng chyáng ngá-mòq htoq lé byi berâ nghut lhê.” ga taî akô nghut ri.
4 Hkyang shit bang gi, Sholuq nyi é Gibe-a wà má jé ê kômù, shiwa byu pé lé hkyanglù haû shit kyo kôjáng, shiwa byù bànshoq bang gi, htê mó o mó èq ngau garû bum akô. 5 Haú u lé yhang, Sholuq gi, no kon luî yò mai jé lô mù, “Shiwa byu pé haî dùt nyi bum akô lhú? Yhángmòq, haî mù ngau nyi bum akô lhú?” ga myî ri. Haú hkûn, yhángmòq gi, Yabesha byu pé shit é hkyanglù lé, yhang lé shit kyô akô nghut ri.
6 Sholuq gi, yhángmòq shit é hkyanglù haú lé wó gyo jáng, Garai Gasâng é Sô gi, wum-o a-tsam eq yhâng chyáng jé mù, yhang gi, gyai yhang nhikmó-yô nyì bê nghut ri. 7 Yhang gi, nohtó razúm lé yu sat mù, yâm jàp luî, hkyanglù shit bang lé, Isira-elaq ra-mau gón má munjú pyô nhâng mù, “Sholuq eq Samu-elaq é htâng a cháng bâng é no lé gi, shi su kut pyám râ nghut lhê.” ga taí nhang kat ri. Haú hkûn, shiwa byu pé gi, haû Yhûmsîng Garai lé gyùq kyûm kômù, myìt hui máng hui htoq lé lo bum akô nghut ri. 8 Sholuq gi, Bezek wà má yhángmòq lé jihpán gùq wú le, Isira-elaq byu pé sûm sen, Yudaq byu pé sûm mun bo ri.
9 Yhángmòq gi, hkyanglù shit bang lé, “Gile-at mau mâ é Yabesha byu pê chyáng, ‘Nàpmá shí nám buì htan é ahkyíng má, núngmòq wó lùt berâ nghut lhê.’ nghû ló taî kyo keq.” ga taî akô. Hkyanglù lé shit bang le, ló mù, Yabesha byu pé lé hkyanglù haû ló shit kyô akô; haú hkûn, haú bang gi, gabú bûm bekô nghut ri. 10 Haû mù, Yabesha byu pé gi, Ammon byu pé lé, “Nàpmá, ngá-mòq, núngmòq chyáng htoq lé byi râ nghut lhê; núngmòq kâm é dông, ngá-mòq lé kut keq.” ga taî akô nghut ri.
11 Hau htang nyí, Sholuq gi, yhâng é byu pé lé sum hpûng hkyô ri; haú bang gi, nàpsûn noq le, Ammon byu pê é gyèwap lé ê wang hpyoq kômù, buì nyé é hkûn jé shoq yhángmòq lé sat hkyop bekô nghut ri. Myìt gyó tô é bang lé le, rayùq eq rayùq lháng a wó huî zîng lhum loshoq, lhoqpyo pyám bekô nghut ri.
Sholuq Hkóhkâm Dáng Yu É Hkyô
12 Shiwa byu pé gi, Samu-elaq lé, “‘Sholuq â-mòq, ngá-nhúng lé ùp râ lhú?’ ga taî é bang ó pé nghut akô lhú? Haú bang lé, ngá-mòq chyáng shuî lé lô keq; yhángmòq lé, ngá-mòq sat pyám râ nghut lhê.” ga taî akô nghut ri.
13 Nghut kôlhang, Sholuq gi, “Hkû-nyí, byù rayùq lé lháng ge sat râ a nghut; hkâsu mù gâ le, hkû-nyí gi, Isira-elaq byu pé lé, haû Yhûmsîng Garai hkyi yu e buìnyì nghut ri.” ga taî ri.
14 Hau htâng, Samu-elaq gi, shiwa byu pé lé, “Sâ, ngá-nhúng, Giligala wà má ló mù, mîngdán hkóhkâm ló saî lhoq gingtíng sháng.” ga taî ri. 15 Haû mù, shiwa byù bànshoq bang gi, Giligala wà má ló kômù, haû Yhûmsîng Garaî é hí má, Sholuq lé, mîngdán hkóhkâm saî dáng byi bekô nghut ri. Haú má, yhángmòq gi, haû Yhûmsîng Garaî é hí má, zùmhkaû hkungga nhông byi kô é nghut mù, Sholuq eq Isira-elaq byù bànshoq bang gi, poî mó kut bekô nghut ri.