Samu-elaq Pying Tô É Dang
12
Samu-elaq gi, Isira-elaq byù bànshoq bang lé, “Núngmòq taî é dang bànshoq lé, ngò gyo byi mù, núngmòq lé ùp râ hkóhkâm dáng byi bê nghut lhê. 2 Ahkuî, núngmòq gi, núngmòq lé shuî-u râ hkóhkâm wó bekô nghut ri. Ngò kúm gi, mang luî uhpyû daúdam nghut bê. Ngá zô pé gi, núngmòq eq rahá nghut nyi akô. Ngò gi, i-pyàt tiq é hkûn mai hkû-nyí jé shoq, núngmòq é ushuq kut laî lò bê nghut lhê. 3 Ahkuî, ngò shi-má nyi tô lhê. Ngò gi, ô é no, ô é loze lú yu wú é lhú? Ngò gi, ó yùq lé, mhaú zo zìk zô wú é lhú? Ngò gi, ngá é nhut nghop myòq nghop râ matú, ó yùq é jishem baushem zô wú é lhú? Haû Yhûmsîng Garai eq Yhâng é namngón xû but huí su é hí má, ngo lé mara hûn sàksé tûn shit wú keq. Ngò gi, haú pé rajung jung lé kut shut é nghut jáng, haú lé dum xap byi râ nghut lhê.” ga taî ri.4 Haû jáng, “Nàng gi, ngá-mòq lé a mhaú zo, a zìk zô wú nghut ri. Ó yùq é lòq mai le, haî a yu wú nghut ri.” ga, yhángmòq tû taî akô nghut ri.
5 Samu-elaq gi, yhángmòq lé, “Núngmòq, ngá é lòq má ô é zè jòq é le a myàng kô é gi, hkû-nyí, haû Yhûmsîng Garai le, Yhâng é namngón xû bùt hui sû le, núngmòq le sàksé shit nyi ri.” ga taî ri.
Yhángmòq le, “Yhang gi, sàksé nghut ri.” ga tû taî akô.
6 Hau htâng, Samu-elaq gi, shiwa byu pé lé, “Mosheq eq Arun lé ushuq kut râ matú hkyin masàt yù mù, núngmòq é îchyí îwâ pé lé Egutuq ming mai shuî htoq lo é sû gi, haû Yhûmsîng Garai yhang nghut ri. 7 Ahkuî, núngmòq shi-má yàp to shi keq; hkâsu mù gâ le, haû Yhûmsîng Garai mai, núngmòq eq núngmòq é îchyí îwâ pê é matú kut é díngmán é lòqmú lòqzó bànshoq eq séng luî, haû Yhûmsîng Garaî hí má, ngò, núngmòq lé taî san taî hput kyo râ nghut lhê.
8 Yakup, Egutuq ming má jé é htâng, núngmòq é îchyí îwâ pé gi, haû Yhûmsîng Garai lé garúm wùt dûng ngaù kô é hkûn, Yhûmsîng Garai gi, Mosheq eq Arun lé nhang kat mù, núngmòq é îchyí îwâ pé lé, Egutuq ming mai shuî htoq lô luî, shí mau má nyhi to bê nghut ri.
9 Nghut kôlhang, yhángmòq gi, yhángmòq é Garai Gasang, haû Yhûmsîng Garai lé tô myhî pyâm akô; haû mù, Yhang gi, yhángmòq lé, Hazora wà gyèzau mó Sisera é lòq má le, Hpilisiti byu pê é lòq má le, Moba hkóhkam é lòq má le, ung byî pyâm é nghut mù, yhángmòq gi, haú bâng èq, lé hpyoq ùp é hui zo bekô nghut ri. 10 Dum, yhángmòq gi, haû Yhûmsîng Garai lé, ‘Ngá-mòq gi, Nàng Yhûmsîng Garai lé tô pyám luî, Balaq hparà pé eq Ashatoret hparà pé lé noq é yánmai, mara kut shut bê ô. Nghut kôlhang, ahkuî, ngá-mòq lé, gye pê é lòq mai hkyi yù laq. Ngá-mòq gi, Nang lé za dójaú râ nghut lhê.’ ga wùt ngau garû bum akô nghut ri. 11 Haû mù, haû Yhûmsîng Garai gi, Yerup Balaqa, Barakb, Yephta eq Samu-elaqc pé lé nhang kat luî, awui ayàm mâ é núngmòq é gye pê é lòq mai, núngmòq lé hkyi yù bê nghut mù, núngmòq gi, gau shoq myang nyì bekô nghut ri.
12 Nghut kôlhang, Ammon byu pê é hkóhkâm Nahashi èq núngmòq lé majan lé zân é lé, núngmòq myàng kôjáng, núngmòq é Garai Gasang nghut é, haû Yhûmsîng Garai gi, núngmòq é hkóhkâm nghut nyi to kôlhang, núngmòq gi, ngo lé, ‘A nghut, ngá-mòq lé ùp râ hkóhkâm yhang ô nau ri.’ ga taî akô. 13 Ahkuî kúm, núngmòq ô naù mù, hkyin yu é hkóhkâm lé wú keq. Haû Yhûmsîng Garai gi, núngmòq lé ûp râ hkóhkâm tsûng byi bê nghut ri. 14 Núngmòq gi, haû Yhûmsîng Garai lé gyùq hkúngga mù, dójaú nyî luî, Yhâng é hkunmó pé lé a tu hpuq é za, Yhâng é jì-no gyô nyi é nghut jáng le, núngmòq eq núngmòq lé ùp é hkóhkâm hpó gi, núngmòq é Garai Gasang, haû Yhûmsîng Garaî é htâng châng nyì kô é nghut jáng le, gè kôrâ nghut lhê! 15 Nghut kôlhang, núngmòq gi, haû Yhûmsîng Garaî é jì-no a gyô é htoq agó, Yhâng é hkunmó pé lé tu hpuq kô é nghut jáng, Yhâng é lòq gi, núngmòq é îchyí îwâ pé lé kungkyik wuîhke nhang é su, núngmòq lé le kungkyik wuîhke nhâng râ nghut lhê.
16 Haû mù, ahkuî, zim za yàp to luî, núngmòq é myòq hí tê má, haû Yhûmsîng Garai kut shit berâ nghut é múzó mó lé wú keq. 17 Ahkuî gi, súngsô yam nám nghut lhê a nghut kô lhú? Nghut kôlhang, ngò, haû Yhûmsîng Garai lé kyûdung jáng, maugum gum mù, maú wo lò râ nghut lhê. Haú hkûn, núngmòq gi, haû Yhûmsîng Garaî é myòq hí má, núngmòq hkóhkâm dûng é hkyô, mara hkâ-í kut shut kô é lé wó sé kôrâ nghut lhê.” ga taî ri.
18 Hau htâng, Samu-elaq gi, Yhûmsîng Garai lé wùt dung jáng, haú nyí má yhang, haû Yhûmsîng Garai gi, maugum gúm nhang lhê, mau wô nhang lhê kut bê nghut ri. Haû mù, shiwa byù bànshoq bang gi, haû Yhûmsîng Garai eq Samu-elaq lé, gyai yhang gyùq nán bûm bekô nghut ri.
19 Shiwa byù bànshoq bang gi, Samu-elaq lé “Náng é duìnhâng zoshâng wuì ngá-mòq a shi byùq sháng gàq, náng é Garai Gasang nghut é, haû Yhûmsîng Garai lé kyû bo dung byi laq. Hkâsu mù gâ le, ngá-mòq gi, hí lé shut é mara bànshoq má, hkóhkâm dûng é yánmai mara dum jàt bê nghut ri.” ga taî akô.
20 Samu-elaq gi, “Hkâgyùq kó. Núngmòq gi, agè ashop hkyô shí pé kut shut bekô nghut kôle, haû Yhûmsîng Garaî chyáng mai a lhing ló byùq é za, i-myìt nhiklhum bànshoq èq haû Yhûmsîng Garai lé dójaú nyì keq. 21 Asôm nghut é hparà hpôlhô htâng hkâlhing wang ló kó. Haú pé gi, asôm za nghut é yánmai, núngmòq lé, jeju a wó byî é htoq agó, a wó hkyi yù nghut ri. 22 Haû Yhûmsîng Garai gi, Yhâng é myìng mó é yánmai, Yhâng é byu pé lé he-ngìk pyám râ a nghut; hkâsu mù gâ le, haû Yhûmsîng Garai gi, núngmòq lé, Yhâng é byù kut yû râ matú, myìt nguì ô nau nyi ri. 23 Ngò eq séng luî ga jáng, núngmòq é matú ngò kyû a dung byî é dông, haû Yhûmsîng Garai lé shut é mara gi, ngò eq wê gâng nyì sháng gàq ô. Ngò gi, núngmòq lé, ge é eq jô é hkyô lé mhoq byi râ nghut lhê. 24 Nghut kôlhang, haû Yhûmsîng Garai lé gyùq hkúngga mù, núngmòq é i-myìt nhiklhum bànshoq èq, lhumzui myìt mai Yhang lé dójaú nyî keq. Yhang, núngmòq é matú, hkâsû é maúhpo múzó pé kut byi bê hkyô lé, myìtbûn nyì keq. 25 Haû a nghut mù, núngmòq, agè ashop hkyô lé ru kut nyi ashi kô nghut le gi, núngmòq le, núngmòq é hkóhkâm le, htên byòq byùq é hui zo kôrâ nghut lhê.” ga tû taî ri.