Sholuq Lé Samu-elaq Tân Mhoqshit É Hkyô
13
Sholuq gi, chyungxe zànwut sum xê zàna nghut é hkûn, hkóhkâm dùt bê nghut ri. Yhang gi, Isira-elaq byu pé lé myi xê zànb ùp ri.2 Sholuq gic, Isira-elaq byu pé mai sum hkyîng yùq hkyin yù luî, í hkyîng yùq lé gi, Mikmasha wà eq Behtela bùm má, yhang eq rahá shuî nyhi to mù, rahkyîng yùq lé gi, Ben-yamin mau mâ é Gibe-a wà mó má, Yonahtan eq rahá nyhi tô ri. Myìt tô é bang lé gi, ó le ô é yhûm shut taû ló nhâng bê nghut ri.
3 Yonahtan gi, Geba jowò mâ é Hpilisiti gyèwap má ê htîm é nghut mù, Hpilisiti byu pé gi, haú hkyô lé wó gyo bekô nghut ri. Hau htâng, Sholuq gi, ra-mau gón má tut mùt nhâng luî, “Haû Hebre byu pé wó gyo kó sháng gàq!” ga taî ri. 4 Haû mù, Isira-elaq byù bànshoq bang gi, “Sholuq, Hpilisiti gyèwap lé ê htîm hpyoq bê eq, Hpilisiti byu pé, Isira-elaq byu pé lé dôn byùq bekô nghut ri.” gâ é hkyanglù lé wó gyô bum akô. Haû mù, Giligala wà má nyi é Sholuq chyáng, shiwa byu pé lé ji tsîng yu akô nghut ri.
5 Hpilisiti byu pé gi, Isira-elaq byu pé lé majan zan râ matú, gyèlhêng sûm mund, myang ji gyè hkyuq hkyîng eq, wuimau yàm mâ é se-muî su myô é gyèzô pé lé, shuî tsîng yù bekô nghut ri. Hau htâng, yhángmòq gi, dòq e ló mù, Bet Awene buìhtoq hkyam mâ é, Mikmasha wà má gyèwap ê xuq tô akô nghut ri. 6 Isira-elaq byu pé gi, yhángmòq é gye pé mai lûm htîm lò kô é yánmai, so a dû lô é lé myàng kômù, lùq-ú lùqhkyûng pé, yòso mhanpúng pé, lungmó lungzîng gyoro pé, myì dong pé eq wuì tíng dong pé má hpang haq bûm bekô nghut ri. 7 Hebre byu pé ra-am gi, Yodan làng lé laî byìt luî, Gat eq Gile-at mau shut hpang dàp ló bum akô. Sholuq kúm gi, Giligala wà má ru nyi nyi ashî; yhang eq rahá nghut nyi é gyèzô pé bànshoq gi, gyùq nán nyi bum akô nghut ri. 8 Yhang gi, Samu-elaq ding tô é ahkyíng eq rajung za, buìnyì nyhit nyí láng bê nghut ri. Nghut kôlhang, Samu-elaq gi, Giligala wà má a jé lé nhô mù, Sholuq é byu pé le, hpang byo ló nyi bùm bekô. 9 Haû mù, yhang gi, “Ngá chyáng, myi nyhé hkungga eq zùmhkaû hkungga yu lò keq.” ga taî ri; hau htâng, yhang gi, myi nyhé hkungga nhông bê nghut ri. 10 Yhang, myi nyhé hkungga ban nhông eq, Samu-elaq jé lé lô mù, Sholuq gi, yhang lé ê te ri.
11 Samu-elaq gi, “Nàng haî kut bê htà?” ga myi jáng, Sholuq gi, “Byu pé, ngá chyáng mai hpang byo ló nyi bum é lé le, ding tô é ahkyíng má nàng a jé lé é lé le, Hpilisiti byu pé, Mikmasha wà má zùp zîng nyi bum é lé le, byu-myang é hkûn, 12 ngò gi, ‘Hpilisiti byu pé, Giligala wà má, ngo lé, lé htim bekô râ nghut lhê; haû Yhûmsîng Garai lé, jeju a dung shî é wá.’ nghû wó myìt é yánmai, ngá myìt má cháng luî, myi nyhé hkungga lé nhông byî záng bê nghut lhê.” ga tû taî ri.
13 Samu-elaq gi, “Nàng, ngha pyám bê; nàng gi, náng é Garai Gasang, haû Yhûmsîng Garaî é hkunmó lé a cháng kut bu-nhung! Nàng châng é ru nghut le gi, haû Yhûmsîng Garai, náng é mîngdán lé, Isira-elaq byu pê chyáng ayang lhoq gingtîng to byi berâ nghut lhê. 14 Nghut kôlhang, ahkuî, náng é mîngdán gi, wó gîng to lo râ a nghut. Haû Yhûmsîng Garai gi, Yhang nhik dìk é byù rayùq ho yù mù, yhâng é byù myû lé shuî-u râ matú, haú yùq lé wò byî to bê nghut ri. Hkâsu mù gâ le, nàng gi, haû Yhûmsîng Garaî é hkunmó lé a cháng nghut ri.” ga taî ri.
15 Hau htâng, Samu-elaq gi, Giligala wà mai htoq mù, Ben-yamin mau mâ é Gibe-a wà má dòq ló ri. Sholuq gi, yhang eq rahá nghut é byu pé lé nghap wú le, bànshoq hkyuq shô kô bo ri.
Gyèzè A Wó É Isira-elaq Byu Pé
16 Sholuq, yhang zo Yonahtan eq, yhánghpe eq rahá nghut nyi é bang gi, Hpilisiti byu pé, Mikmasha wà má jowò yu nyì kô é u, Ben-yamin mau mâ é Gibe-a wà má nyi tô akô. 17 Hpyoq zo hpyoq shuq é gye pé gi, sum hpûng hkyó luî, Hpilisiti gyèwap mai htoq ló akô. Rahpûng gi, Shu-ala mau mâ é Ohpra wà shut e ló akô. 18 Dum rahpûng gi, Bet Horon shut e ló akô; myìt tô é rahpûng gi, Zeboyim Langhkaû eq yòso lé byu-myang é maukyo shut e ló akô nghut ri.
19 Haú yòq haú bun lé, Hpilisiti byu pé gi, “Hebre byu pé shâm lhâm saî lò kó âbe.” ga taí kô é yánmai, Isira-elaq ra-mau gón má, shâm lhâm bàt sû rayùq lháng a nyì nghut ri. 20 Haû mù, Isira-elaq byù bànshoq bang gi, yhángmòq é najón, shâm hkop, wazung eq zaiyik pé lé lháng, Hpilisiti byu pê chyáng ê byâng ê suî yu bum akô nghut ri. 21 Najón eq hkop byàng hpau gi, ngùn htingchap í mû nghut luî, wazung, gyenghkyêng eq akó mâ é jòqtoq dun pé suî htoq hpau gi, ngùn htingchap ramû nghut ri.
22 Haû mù, majan zân é buìnyì má, Sholuq eq Yonahtan hpe mai lai luî, Isira-elaq gyèzô pé ó yùq chyáng le, shâm lhâm a bò kó nghut ri.
23 Ahkuî, Hpilisiti byu pê é gyè rahpûng gi, htoq ê mù, Mikmasha hkyèt má ê jé tô akô nghut ri.