Hpilisiti Byu Pé Lé Yonahtan Ê Htîm É Hkyô
14
Ra-nyí lé, Sholuq é yhang zo Yonahtan gi, yhâng é shâm lhâm bo wàq é zorâm zo lé, “Sâ, tû-tap mâ é Hpilisiti gyèwap má dàp ê gòq.” ga taî ri. Nghut kôlhang, yhang gi, yhâng wa lé, haú hkyô a taî kyo nghut ri.2 Haú hkûn, Sholuq gi, Gibe-a wà yàm mâ é Migron jowò má yùq é lungshi gàm ô má nyi tô ri. Byù hkyuq shô yùq kô le yhang eq rahá nghut nyi ri. 3 Haú bang má, hkyangjong bu-kó wùt tô é Ahiya le bo ri. Yhang gi, Shilo wà má haû Yhûmsîng Garaî é hkyangjong nghut é Eli é yhâng shuké, Hpinehasa é yhang shu, Ihkabot é yhang mang Ahitup é yhang zo nghut ri. Yonahtan htoq ló byùq é hkyô lé, ó lháng a châng sê kat kó nghut ri.
4 Hpilisiti gyèwap má, Yonahtan laî byìt ê râ hkyô í tap shut yhang gi, lùqpyoq jòq tô ri. Ra-tap lé gi, Boze ga, ra-tap lé gi, Sene ga myhîng tô akô nghut ri. 5 Lùqpyoq ra-tap gi, mautsûng mâ é Mikmasha shut hîhu tô ri; ra-tap gi, maupyî mâ é Geba shut hîhu tô ri.
6 Yonahtan gi, yhâng é shâm lhâm wàq é zorâm zo lé, “Sâ, ahpyo kuq a hpyit é byù jum é gyèwap shut ê gòq. Ngá-nhik lé, haû Yhûmsîng Garai garúm yû âbe. Byù myo kôlhang, shau kôlhang, haû Yhûmsîng Garai hkyi yu é lé, ó yùq wó hkûm zing é a nghut.” ga taî ri.
7 Yhâng é shâm lhâm bo wàq sû gi, “Náng myìt má bo é eq rajung za kut àq. Ngò gi, nàng myìt é dông cháng râ nghut lhê.” ga tû taî ri.
8 Yonahtan gi, “Haû jáng, sâ, ngá-nhik gi, byù hé bâng chyáng laî byìt ê mù, yhángmòq lé ê htoq shit gòq. 9 Yhángmòq mai ngá-nhik lé, ‘Ngá-mòq, núngnhik chyáng jé lé shoq haú má láng nyì keq.’ ga lhom taí kôjáng, yhángmòq chyáng a dòq e é za, ngá-nhik nyi tô é jang má lhom to gòq. 10 Nghut kôlhang, yhángmòq mai, ‘Ngá-mòq chyáng dòq lò keq.’ ga lhom taí kôjáng gi, ngá-nhik dòq ê gòq. Hkâsu mù gâ le, haû gi, Yhûmsîng Garai mai yhángmòq lé ngá-nhik é lòq má àp byî to bê nghut é alhô agàn dùt râ nghut lhê.” ga taî ri.
11 Haû mù, yhángnhik gi, yhûmsing gùng yhûmsîng, Hpilisiti gyèwap lé ê htoq shit bekô nghut ri. Haû Hpilisiti byu pé gi, “Wú keq, Hebre byu pé, yhángmòq haq lúng tô é dong mai dô htoq lô bekô nghut ri.” ga taî akô. 12 Haû gyèwap mâ é byu pé gi, Yonahtan eq yhâng é shâm lhâm wàq sû lé, “Ngá-mòq chyáng dòq lò keq; lhom mhoqshit kó lé.” ga taî garu kat akô. Haû mù, Yonahtan gi, yhâng é shâm lhâm wàq sû lé, “Ngá htâng cháng aq. Haû Yhûmsîng Garai gi, yhángmòq lé, Isira-elaq byu pê é lòq má àp byi bê nghut ri.” ga taî ri.
13 Yonahtan gi, yhâng é hkyî lòq èq dô yê dòq ló ri; yhâng é shâm lhâm bo wàq sû le, yhâng é htâng má tsuq tsuq châng tô ri. Yonahtan gi, Hpilisiti byu pé lé sat lheq dòq ló mù, yhâng é shâm lhâm bo wàq sû le, yhâng htâng má bo châng sat kyop ló bê nghut ri. 14 Haû sânghî dàm htîm é hkûn, Yonahtan eq yhâng é shâm lhâm wàq sû gi, lhînghkyùq rashô dúng kô lam é maumyîa má, gyè í xê kô lé wó sat kyop pyám bekô nghut ri.
Hpilisiti Byu Pé Lé Ung Pyâm É Hkyô
15 Haû mù, gyèwap hkaû eq yò pé má nyi é bang le, gyèwap zúng é bang eq majan zan gyèzô pé le, lhúnglhâng bang gi, gyùq nán byùq bùm bekô; maumyî le nún lô mù, je yhang gyùq nán bûm bekô nghut ri. Gyùq nán hpo mó haú lé gi, Garai Gasang kut htoq é nghut ri.
16 Ben-yamin mau mâ é Gibe-a wà má nyi tô é, Sholuq é wà zúng gyèzô pé gi, Hpilisiti gyèzô pé myhîn so san gyùq hpang myín bum é lé myang akô nghut ri. 17 Hau htâng, Sholuq gi, yhang eq rahá nghut é bang lé, “Ngá-nhûng chyáng mai, ó yùq htoq ló byùq é lé wó sé râ matú, byù nghap wú keq.” ga taî ri. Yhángmòq nghap wú le, Yonahtan eq yhâng é shâm lhâm wàq su nhik a bo to nghut ri.
18 Sholuq gi, Ahiya lé, “Haû Garai Gasâng é sàksé dò lé yu lò àq.”b ga taî ri. (Haú u má, sàksé dò haû gi, Isira-elaq byu pê chyáng jòq tô ri.) 19 Haû hkyangjong hpó lé Sholuq dang taî nyi é u, Hpilisiti gyèwap má garu garín gâ é htê je riyhang kô lò mù, Sholuq gi, hkyangjong hpó haú lé, “Hkâbyam hân shi.” ga taî ri.
20 Hau htâng, Sholuq eq yhâng é byù bànshoq bang gi, chôm zùp zing kômù, majan pá shut yán e ló akô. Yhángmòq gi, Hpilisiti byu pé, hai hûháng le a sé lo kômù, rayùq eq rayùq sham èq zân sat lhûm nyì kô é lé, ê myang akô nghut ri. 21 Hí lé, Hpilisiti byu pé eq rahá nyì mù, yhángmòq é gyèwap shut bo châng ló byùq é Hebre byu pé gi, Sholuq eq Yonahtan htâng châng é Isira-elaq byu pê chyáng lhing wang lo akô nghut ri. 22 Ehprim bum má haq nyi tô é Isira-elaq byù bànshoq bang gi, Hpilisiti byu pé hpang é hkyô lé wó gyo kôjáng, yhángmòq le, majan pá má bo châng hkat zan bekô nghut ri. 23 Haû mù, Yhûmsîng Garai gi, Isira-elaq byu pé lé, haú nyí hkyi yù bê nghut ri; majan haû gi, Bet Awen wà mó lai shoq nghut byùq ri.
Yonahtan Byo-î Htaû Yòq Zô É Hkyô
24 Sholuq gi, shiwa byu pé lé, “Ngò, ngá é gyè pé lé, myínhtâng lató a ban hpuq shi-má, zoshuq zô é sû gi, nhinghkun zùq sháng gàq!” ga dâkam tô é yánmai, gyè hpúng mâ é gyèzô pé rayùq lháng zoshuq a zo kó nghut ri. Haû mù, haú nyí, Isira-elaq byu pé gi, zò-mut luî, wum nyhôm byùq bekô nghut ri.
25 Byù lhúnglhâng bang gi, sikmó yô shut wang e ló kô é hkûn, myigùng htoq má byo-î jòq tô ri. 26 Yhángmòq gi, sikmó yô má jé ê kô é hkûn, byo-î yui gyó nyi é lé ê myâng kôle, dâkam tô é dang lé gyùq kô é yánmai, ó lháng, yhûmsing é lòq èq a wám htaû yòq zo kó nghut ri. 27 Nghut kôlhang, Yonahtan gi, shiwa byu pé lé, yhâng wa hkûm tô é dakâm dang lé a wó gyô é nghut mù, byo-ûm má, yháng chung tô é lham èq htaû tap yû mù, lòq èq htaû yòq zô ri; haú hkûn, yhâng é myòq gyêng byùq bê nghut ri. 28 Haú hkûn, gyèzô pé mâ é rayùq gi, yhang lé, “Náng wa gi, gyèzô pé lé, ‘Hkû-nyí, zoshuq zô é sû gi, nhinghkun zùq sháng gàq!’ ga, dakâm dang htân htân hkyô to bê nghut lhê. Hau é yánmai, shiwa byu pé gi, zò-mut wum nyhôm byùq bùm bekô nghut ri.” ga taî ri.
29 Haú hkûn, Yonahtan gi, “Ngá wa, núngmòq lé wuîhke jamjau byi bê nghut ri. Wú keq, ngò, byo-î ra-tsuí zô chyam wú le, ngá myòq gyai gyêng byùq bê nghut lhê. 30 Byu pé gi, yhángmòq é gyè pê chyáng mai wó sing yu é azíng zê mâ é zoshuq ra-am lé, hkû-nyí ge zo kô é ru nghut le gi, hkâ-í yhang gè râ wá. Hpilisiti byu pé lé le, je riyhang wó sat kyop pyám kôrâ a nghut lhí?” ga taî ri.
31 Haú nyí, Isira-elaq byu pé gi, Hpilisiti byu pé lé, Mikmasha mai Aiyalon jé shoq châng sat kyop pyám kô é htâng, gyai myûng pa byùq bùm bekô nghut ri. 32 Yhángmòq gi, ê wó lú sing lo é, sau, nojûng, nojûng zo pé lé, myigùng htoq má sat to mù, shojum lé sui eq yhang zô akô nghut ri. 33 Haú hkûn, Sholuq lé, “Wú aq, byu pé gi, shojum lé sui eq zo bekô nghut é yánmai, haû Yhûmsîng Garai lé mara shut nyî bekô nghut ri.” ga rayùq yùq taî kyô ri.
Sholuq gi, “Núngmòq, dangshikaq lé lhoqhtên pyám bekô. Ahkuî yhang, shî má, lùqmó racham lhêng lò keq.” ga taî ri. 34 Hau htâng, Sholuq gi, “Byu pé chyáng htoq ê mù, yhángmòq lé, ‘Núngmòq yùq hkangmó gi, yhûmsing é sau eq nojûng lé, ngá chyáng she lé mù, lé sat zo keq. Shojum lé sui eq zô é dông, haû Yhûmsîng Garai lé mara hkâdum shut lo kó.’ nghû ê taî kyo keq.” ga taî ri. Haû mù, yùq hkangmó gi, haú myîn yhang, yhûmsing é no lé she lé lô mù, haú jowò má sat akô nghut ri. 35 Hau htâng, Sholuq gi, haû Yhûmsîng Garaî é matú hkungga gyàp ralhum saî ri. Haû gi, yhang, sânghî dàm saî é hkungga gyàp nghut ri.
36 Sholuq gi, yhâng é byu pé lé, “Sâ, ngá-nhúng, hkû-myîn, Hpilisiti byu pé lé châng hkat gyó ê mù, rayùq lháng a myhit to loshoq, maubó hpyot châng lú châng sat pyám sháng.” ga taî ri.
Yhángmòq le, “Nàng myìt yó é dông kut le ge ri.” ga tû taî akô.
Nghut kôlhang, hkyangjong hpó gi, “Garai Gasang lé hí hkyang shit wú sháng.” ga taî ri.
37 Haû mù, Sholuq gi, Garai Gasang lé, “Ngò, Hpilisiti byu pé lé châng hkat gyó ê râ lhú? Nàng gi, yhángmòq lé, Isira-elaq byu pê é lòq má àp byi râ lhú?” ga myî ri. Nghut kôlhang, Garai Gasang gi, haú nyí, Sholuq lé haî a tû taí nghut ri.
38 Haû mù, Sholuq gi, “Shiwa byu pê é ushuq núngmòq bànshoq bang, lé lo wú keq; hkû-nyí hai mara záng kut shut bê làq, ngá-nhúng ho pau htoq wú sháng. 39 Isira-elaq byu pé lé hkyi yu é haû Yhûmsîng Garai rû dui nyi é eq rajung za, ngá zo Yonahtan záng kut shut kôle, yhang, gè gè shî ra râ nghut lhê.” ga taî ri. Nghut kôlhang, haû mâ é ó yùq le, dang rahkun lháng a taí kó nghut ri.
40 Sholuq gi, Isira-elaq byù bànshoq bang lé, “Núngmòq gi, hé hkyam shut é yàp keq; ngò eq ngá zo Yonahtan gi, shi hkyam shut yàp râ nghut lhê.” ga taî ri.
Haú hkûn, shiwa byu pé gi, “Nàng myìt yó é dông kut le ge ri.” ga tû taî akô.
41 Haû mù, Sholuq gi, Isira-elaq byu pê é Garai Gasang, haû Yhûmsîng Garai lé, “Ngo lé, têng é hkyô shit byi laq.” ga kyûdûng ri. Hau htâng, hkyîn shosé gi, Yonahtan eq Sholuq hpê chyáng âng ri; shiwa byu pé kúm gi, lùt bekô nghut ri. 42 Sholuq gi, “Ngò eq ngá zo Yonahtan é matú hkyîn shosé she wú keq.” ga taî ri; haû mù, hkyîn shosé she wú kô le, Yonahtan chyáng âng ri.
43 Hau htâng, Sholuq gi, Yonahtan lé, “Nàng haî kut shut é, ngo lé taî kyô wú aq.” ga taî ri.
Haû mù, Yonahtan gi, yhang lé, “Ngá é lhâm hpyô èq byo-î ra-tsuí htaû yù mù, chyam é nghut lhê. Hau é yánmai, ahkuî, ngò shî ra bê lhí?” ga taî ri.
44 Sholuq gi, “Yonahtan ê, nàng a shi é nghut jáng, haû Garai Gasang gi, ngo lé, je hpu je shô é dam byi sháng gàq.” ga taî ri.
45 Nghut kôlhang, shiwa byu pé gi, Sholuq lé, “Isira-elaq byu pé lé, kô dik é hkyi xe é jeju lé wó shuî hkam yu é sû, Yonahtan gi, shî ra râ lhú? Haû gi, a ge dùt! Haû Yhûmsîng Garai rû dui nyi é eq rajung za, yhâng é uxâm rahkat lháng, myigùng má wó gyó râ a nghut; hkâsu mù gâ le, hkû-nyí, yhang kut é múzó gi, Garai Gasang garúm é múzó nghut ri.” ga taî akô. Haû mù, shiwa byu pé gi, Yonahtan lé, shî râ mai wó lhoqlhut yû bekô nghut ri.
46 Hau htâng, Sholuq gi, Hpilisiti byu pé lé a châng hkat lo kut bê nghut mù, Hpilisiti byu pé gi, yhûmsing é mau shut ló byùq bekô nghut ri.
47 Sholuq gi, Isira-elaq byu pé lé ùp nyi é htâng, yhâng é lhînghkyùq mâ é gyè pé nghut é, Moba byù, Ammon byù, Edom byù, Zoba hkóhkâm pé eq Hpilisiti byu pé lé majan zân ri; yhang, majan toq é jowò hkangmó má, ûngmyuq hkyô wó ri. 48 Yhang gi, agyùq a-kyûm majan zân é nghut mù, Amalek byu pé lé wó zân ung pyâm é htoq agó, Isira-elaq byu pé lé, lé lú lé htim bâng é lòq mai hkyi yù bê nghut ri.
Sholuq É I-kun Byù
49 Sholuq é yhang zo yùqzô pé gi, Yonahtan, Ishiwi eq Malihkishu-a pé nghut akô. Yhâng é byìzo ko sû yùq é myìng gi, Merap gâ ri; tiq sû yùq é myìng gi, Mihkala gâ ri. 50 Yhâng é yhûmsîng myhî é myìng gi, Ahimazi é byìzo Ahino-am gâ ri. Yhâng é gyè hpúng lé ùp é zaû é myìng gi, Nera é yhang zo Apna gâ ri. Nera gi, Sholuq é yhâng wabok nghut ri. 51 Sholuq é yhâng wa Kisha eq Apna é yhâng wa Nera gi, Abi-ela é yhang zô nhik nghut akô.
52 Sholuq é i-pyàt gón gi, Hpilisiti byu pé eq majan mó chyat htoq nyi é nghut mù, yhang gi, wúm bo dik mù, gyùq kyûm myìt a bò sû lé myàng hkangmó, yhâng é gyè hpúng má hkyui hâng yu ri.