Hkóhkâm Sholuq Lé Yhûmsîng Garai He-ngìk Pyâm É Hkyô
15
Samu-elaq gi, Sholuq lé, “Ngò gi, nàng, Yhâng é byù Isira-elaq a-myû wui é hkóhkâm dùt râ matú, nang lé sô kat namngón xû bùt byi sháng gàq ga, haû Yhûmsîng Garaî èq nhang kat é sû nghut lhê. Haû mù, ahkuî, haû Yhûmsîng Garaî chyáng mâ é dang lé gyo aq. 2 Haû Wum-o a-tsam dìk shoq bò Sû Yhûmsîng Garai taî é gi, ‘Isira-elaq byu pé, Egutuq ming mai htoq lô kô é hkûn, Amalek byu pé lhom htim kô é nghut mù, Ngò gi, haú bang lé dam byi râ nghut lhê. 3 Ahkuî, Amalek byu pé lé ê htim luî, yhángmòq eq sêng é bànshoq lé chyut lhoqhtên pyám keq. Haî le a myhit tô é za, yùqgè, myiwe, zoshâng, nyheqnú, no myang, sau, gola-uk pé eq loze pé lé sat pyám aq.’ gâ ri.” ga taî ri.4 Haû mù, Sholuq gi, shiwa byu pé lé ji tsîng yù mù, Tela-im wà mó má nghap wú le, hkyî so gyèzo í sen eq Yudaq up mâ é sarhê pé ra-mun bo ri. 5 Sholuq gi, Amalek wà mó shut ê mù, langhkaû mai ê haq gyám wú nyi ri. 6 Hau htâng, yhang gi, Keni byu pé lé, “Ngò, núngmòq lé, Amalek byu pé eq rahá a záng sat pyám sháng gàq, yhángmòq chyáng mai htoq ló byùq keq. Hkâsu mù gâ le, núngmòq gi, Isira-elaq byu pé, Egutuq ming mai htoq lô kô é hkûn, yhángmòq lé lhom shogyo nhikmyîn yù kô é nghut lhê.” ga taî ri. Haû mù, Keni byu pé gi, Amalek byu pê chyáng mai htoq ló byùq bekô nghut ri.
7 Sholuq gi, Amalek byu pé lé, Hawila wà mó mai Egutuq ming buìhtoq hkyam mâ é Shura wà mó jé shoq châng hkat sat bê nghut ri. 8 Yhang gi, Amalek byu pê é hkóhkâm Agaq lé duì gù chyup yû mù, yhâng é byù bànshoq lé, sham èq sat htûm pyám bê nghut ri. 9 Nghut kôlhang, Sholuq eq gyèzô pé gi, Agaq é chyungxe lé lhoqlhut tô é htoq agó, je ge é sau, no myang, xu myum é nojûng zô pé eq sau zô pé, ge é haí jung lé le, ha bûn é myìt mai a lhoqhtên pyám nghut ri. Nghut kôlhang, aguí agang nghut é haî lé le, chyut yhang lhoqhtên pyâm akô.
10 Ahkuî, haû Yhûmsîng Garaî é mungdang Samu-elaq chyáng jé é gi, 11 “Ngò, Sholuq lé hkóhkâm kut nhang é yánmai, nùngngham wó mú, myìt no ri; hkâsu mù gâ le, yhang gi, ngá chyáng mai lhik ló byùq mù, Ngò shit kyô é hkyô pé lé a cháng nghut ri.” gâ ri. Samu-elaq gi, myìt a ngón dùt byùq luî, ra-myin mau, haû Yhûmsîng Garai lé wùt dûng ngau ri.
12 Samu-elaq gi, htang nàpkyó noq le toq mù, Sholuq lé hui râ matú e ri. Nghut kôlhang, “Sholuq gi, Hkarimela wà má ê mù, yhûmsing é xânghpoq nge wó hkyo é matú masàt zìng xuq to luî, Giligala wà shut lhing gyó ló bê nghut ri.” gâ é lé, yhang wó gyô ri.
13 Samu-elaq gi, Sholuq nyi é jowò má châng jé é hkûn, Sholuq gi, “Nang lé, Yhûmsîng Garai shimân byi sháng gàq! Ngò gi, Yhûmsîng Garai shit kyô é hkyô pé lé kut bê nghut lhê.” ga lhom taî ri.
14 Nghut kôlhang, Samu-elaq gi, “Haû jáng, ngá é nohkyap má jé é sau myîng htê eq, ngò wó gyô é nojûng bò htê pé gi, haî nghut lhê lhú?” ga taî ri.
15 Sholuq gi, “Haú pé lé, Amalek byu pê chyáng mai, ngá é gyèzô pé kôn lo akô; yhángmòq gi, náng é Garai Gasang nghut é, haû Yhûmsîng Garai lé hkungga nhông byi râ matú, je yúng é sau eq no pé lé myhit tô akô; nghut kôlhang, gótû bànshoq lé gi, chyut yhang lhoqhtên pyám bê nghut lhê.” ga tû taî ri.
16 Hau htâng, Samu-elaq gi, Sholuq lé, “Shî gyô wú shi aq! A-màn, ngo lé, Yhûmsîng Garai taî é dang lé taî kyo shibá.” ga taî ri.
Sholuq le, “Taî kyo aq.” ga tû taî ri.
17 Samu-elaq gi, yhang lé, “Nàng gi, náng gûng nàng myìt tiq laî lo wú é nghut kôlhang, Isira-elaq a-myû up pê é ushuq dùt bê a nghut lhí? Haû Yhûmsîng Garai gi, Isira-elaq byu pê é hkóhkâm kut râ matú, nang lé sô kat namngón xû bùt byi bê nghut lhê mhaî. 18 Dum, Yhang gi, nang lé, ‘Agè ashop é Amalek byu pé lé, chyut yhang ê sat pyám aq; yhángmòq lé wó sat htûm pyám shoq majan zan aq.’ ga pyîng luî, nhang kat é nghut lhê. 19 Nàng gi, haî mù, Yhûmsîng Garaî é jì-no a gyô é lhú? Haî mù, wó ung yu é zè lé má yu é dông, haû Yhûmsîng Garaî é myòq hí má, agè ashop é hkyô kut lhê lhú?” ga taî ri.
20 Haú hkûn, “Ngò gi, Yhûmsîng Garaî é jì-no gyo bê mhaî. Yhûmsîng Garai, ngo lé kut nhang é múzó ê wûn wàq bê nghut lhê mhaî. Amalek byu pé lé, chyut yhang sat pyám mù, yhángmòq é hkóhkâm Agaq lé za shuî lo é nghut lhê. 21 Haû gyèzô pé gi, Giligala wà má, náng é Garai Gasang nghut é, haû Yhûmsîng Garai lé nhông byi râ ga, Garai Gasang lhoqhtên pyám keq gâ é zè nghut é, wó ung yu é zè pé mâ é jé yúng é sau eq no pé lé kôn lo akô nghut ri.” ga, Sholuq taî ri.
22 Nghut kôlhang, Samu-elaq gi,
yhang lé, “Haû Yhûmsîng Garai gi, Yhâng é jì-no gyô é lé myìt nguì ô nau ri;
myi nyhé hkungga eq hkungga pé lé myìt nguì ô nau ri lhú?
Jì-no gyô é hkyô gi, hkungga sho htoq je ge ri;
taî é dông châng kut é gi, sau lô é xû htung htoq jé ge ri.
23 Gumlau toq é hkyô gi, bùt hpyit mara eq wuí ri.
Nghutbûn é hkyô gi, hparà lhô noq é ashop hkyô eq wuí ri.
Hkâsu mù gâ le, nàng gi, haû Yhûmsîng Garaî é dang lé he-ngìk pyám bê nghut mù,
Yhang gi, nang lé, hkóhkâm ayá mai lhoqhkyô pyám bê nghut ri.” ga taî ri.
24 Haú hkûn, Sholuq gi, Samu-elaq lé, “Ngò mara kut shut bê. Shiwa byu pé lé gyùq é yánmai, yhángmòq é dang lé gyô pyám luî, haû Yhûmsîng Garaî é hkunmó lé le, nàng shit kyô é dang pé lé le, ngò lu laî pyám bê nghut lhê. 25 Ahkuî, ngò, nang lé dûng tôngbán lhê; haû Yhûmsîng Garai lé, ngò wó noqkuq râ matú, ngá é mara lé hkyut pyám byi luî, ngò eq rahá dum taû ló gòq.” ga taî ri.
26 Nghut kôlhang, Samu-elaq gi, yhang lé, “Ngò gi, nàng eq rahá bo taû lò râ a nghut. Haû Yhûmsîng Garaî é dang lé, nàng he-ngìk pyám bê nghut mù, Yhûmsîng Garai gi, nang lé, Isira-elaq byu pé lé ùp é hkóhkâm ayá mai lhoqhkyô pyám bê nghut ri!” ga taî ri.
27 Samu-elaq gi, lhîng mù htoq ló râ hen é hkûn, Sholuq gi, yhâng é buhîng htâng má châng lâng zìng jáng, buhîng htâng haû jèq byùq bê nghut ri. 28 Samu-elaq gi, yhang lé, “Haû Yhûmsîng Garai gi, hkû-nyí, Isira-elaq mîngdán lé, náng chyáng mai wùp yù mù, náng htoq je ge é, náng é chyáng nâm mâ é sû rayùq lé byî pyám bê nghut ri. 29 Isira-elaq byu pê é hpungwup a-tsam nghut Sû gi, a mhaú, i-myìt le a htaî é sû nghut lhê. Hkâsu mù gâ le, Yhang gi, xângzo byù a nghut mù, yhâng é i-myìt a htaî é nghut lhê.” ga taî ri.
30 Sholuq gi, “Ngò mara kut shut bê. Nghut kôlhang, ngo lé, ngá é byu pê é sûwún wui é hí má le, Isira-elaq byu pê é hí má le, myòqdong byi shilaq; ngò gi, náng é Garai Gasang nghut é, haû Yhûmsîng Garai lé wó noqkuq râ matú, ngò eq rahá taû ló gòq.” ga tû taî ri. 31 Haû mù, Samu-elaq gi, Sholuq eq rahá bo taû ló é nghut luî, Sholuq gi, haû Yhûmsîng Garai lé noqkuq bê nghut ri.
32 Hau htâng, Samu-elaq gi, “Amalek byu pê é hkóhkâm Agaq lé, ngá chyáng shuî lé lô keq.” ga taî ri.
Agaq gi, “Shî nò gyùq hpo mai teng za wó lùt bê.” ga, hkyak myìt lum tô é èq yhâng chyáng lé jé bê nghut ri.
33 Nghut kôlhang, Samu-elaq gi,
“Náng é shâm gi, înu wuì lé, zo a wó bang dùt nhang é su,
náng nu le, myiwe wuì má zo a wó é înu dùt râ nghut lhê.” ga taî ri.
Hau htâng, yhang gi, haû Yhûmsîng Garaî é hí, Giligala wà má, Agaq lé a-túm túm kut zân sat pyám bê nghut ri.
34 Hau htâng, Samu-elaq gi, Rama wà mó shut ló byùq ri; nghut kôlhang, Sholuq gi, yháng nyi é Gibe-a wà mó mâ é yhâng é yhûm shut taû ló bê nghut ri. 35 Samu-elaq gi, yhang shi é buìnyì jé shoq, Sholuq lé a ê dum kûm wú lo nghut ri. Nghut kôlhang, Samu-elaq gi, Sholuq é matú iyon yôn nyi ri. Haû Yhûmsîng Garai le, Sholuq lé, Isira-elaq byu pé lé ùp é hkóhkâm dùt nhang é yánmai, myìt nò nùngngham wó byùq ri.