3
Sholuq é yhûm bang eq Dawiq é yhûm bâng é gyoro má, myáng myáng majan htoq lhûm nyi akô; Dawiq kúm gi, wum je bo jàt lo nyì mù, Sholuq é yhûm bang gi, wum je yom ló byùq bekô nghut ri.Dawiq É Yùqzô Pé
2 Hebron wà má Dawiq wó é yhang zo yùqzô pé gi, Yezirela wà mâ é Ahino-am eq wó é yùqzo lagám Amnon; 3 Hkarimela wà mâ é Nabala shi chuî tô é Abigela eq wó é yùqzo lanóng Hkilap; Geshuri hkóhkâm Talamai é byìzo Mahka eq wó é yùqzo lalaq Apsalom; 4 Hagit eq wó é yùqzo latû Adoniya; Abitala eq wó é yùqzo latáng Shehpati-a; 5 Dawiq é yhang myi Egila eq wó é yùqzo layóng Ihtire-am nghut ri. Shí bang gi, Dawiq, Hebron wà má nyi é hkûn wó é yhang zo yùqzô pé nghut akô.
Dawiq Chyáng Apna E É Hkyô
6 Sholuq é yhûm bang eq Dawiq é yhûm bâng é gyoro má majan htoq lhûm nyi é u, Apna gi, Sholuq é yhûm bâng chyáng, yhâng é wum-o lhoqkîng yu nyi ri. 7 Sholuq gi, Ai-a é yhang zo byìzo Rizipa gâ é myi-ngê rayùq wó é nghut ri. Haû mù, Ishaboshet gi, Apna lé, “Nàng, haî mù, ngá wâ é myi-ngê myhí eq nyì zô lhûm é lhú?” ga taî ri.
8 Haú hkûn, Apna gi, Ishaboshet taî é dang hau é yánmai, gyai yhang nhikjum gyô yo mù, “Ngò gi, Yudaq a-myû up mâ é hkuî ulhum nghut lhê lhú? Ngò gi, náng wa Sholuq é yhûm bang lé le, yhâng é gu-mang wuì eq buìnùm ji-myi wuì lé le, hkû-nyí jé shoq jujúm nyi é nghut mù, nang lé, Dawiq é lòq má a àp pyâm é nghut lhê mhaî. Nghut kôlhang, nàng gi, ahkuî, myiwe hau é yánmai ngo lé mara hun ri nhung lhî! 9-10 Sholuq é yhûm bâng chyáng mai mîngdán shî lé wùp yù mù, Dawiq é hkóhkâm tángmyhâng lé, Dan wà mai Berasheba wà jé shoq nghut é ra-mau gón mâ é, Isira-elaq mau eq Yudaq mau ahtoq má xuq to râ nghut lhê ga, haû Yhûmsîng Garai mai Dawiq lé dâkam tô é eq rajung za, Dawiq é matú ngò haú hkyô lé a kut byî é nghut jáng, Garai Gasang gi, ngò Apna lé gyaí htan é mara byi sháng gàq.” ga tû taî ri. 11 Ishaboshet gi, Apna lé gyùq é yánmai, dang rahkun lháng a wám tû taî jàt lo nghut ri.
12 Hau htâng, Apna gi, yhâng é gùnglik dông, Dawiq lé, “Mîngdán shî gi, ó yùq é nghut lhê lhú? Ngò eq myìt hui hkyô yù gòq; haû jáng, ngò gi, Isira-elaq byù bànshoq lé náng chyáng wó bo shuî wang lò byî lhê.” ga ê taí râ lagyô pé lé nhang kat ri.
13 Haú hkûn, Dawiq gi, “Ge ri; ngò, nàng eq myìt hui hkyô yù râ nghut lhê. Nghut kôlhang, ngò, nang lé taí râ hkyô rahkat jòq ri; nàng, ngo lé lé hui râ nghut jáng, Sholuq é byìzo Mihkala lé shuî lé lo é za a nghut le gi, ngá é myòq hí má ge wang lé râ a nghut.” ga taî ri. 14 Hau htâng, Dawiq gi, Sholuq é yhang zo Ishaboshet chyáng lagyô pé nhâng mù, “Ngò, Hpilisiti byu pê é ahpyo-kuq rashô hpau kat mù dûng tô é, ngá é yhûmsîng myhí Mihkala lé àp byi aq.” ga taí nhang kat ri.
15 Haû mù, Ishaboshet gi, hkunmó hkyó luî, Mihkala lé, yhâng é yhûmsîng hpó nghut é Laishi é yhang zo Palati-ela chyáng mai ê shuî yu pyám nhâng bê nghut ri. 16 Nghut kôle, yhâng é yhûmsîng hpó gi, ngaù uchyang Bahurim wà jé shoq yhâng htâng châng e ló ri. Haû mù, Apna gi, yhang lé, “Yhûm shut taû ló aq!” ga taí jáng, yhang gi, taû ló byùq bê nghut ri.
17 Apna gi, Isira-elaq sûwún wuî lé hui mù, “Núngmòq gi, laî ló bê hkûn, Dawiq lé núngmòq é hkóhkâm kut nhâng nau é nghut lhê. 18 Ahkuî kut nhâng lo keq! Hkâsu mù gâ le, haû Yhûmsîng Garai gi, ‘Ngò, Ngá é duìnhâng zoshâng Dawiq dông mai, Ngá é Isira-elaq byu pé lé, Hpilisiti byu pê é lòq mai le, yhángmòq é gyè pé bànshoq é lòq mai le, hkyi xe yù râ nghut lhê.’ ga, Dawiq lé danghtum htûm tô é nghut lhê.” ga byìn hpyê ri.
19 Hau htoq agó, Apna gi, Ben-yamin up bang lé le, yhang yhang haú hkyô taî ri. Hau htâng, yhang gi, Dawiq lé, Isira-elaq byu pé eq Ben-yamin up bànshoq bang kut nau é hkyô jung hkangmó taî kyo râ matú, Hebron wà shut e ri. 20 Apna gi, byù í xê yùq eq rahá, Hebron wà má Dawiq chyáng lé jé é hkûn, Dawiq gi, Apna eq yhâng é byu pê é matú, zoshuq poî lhom hên byî ri. 21 Hau htâng, Apna gi, Dawiq lé, “Isira-elaq byù bànshoq bang gi, nàng eq myìt hui dangshikaq wó to mù, nàng gi, náng é myìt má ô nau é eq rajung za, yhángmòq bànshoq bang lé wó ùp sháng gàq, ngo lé radá dâm nhang kat mù, ngá é yhûmsîng hkóhkâm náng é matú, Isira-elaq byù bànshoq bang lé ló shuî zùp zing nhâng àq.” ga taî ri. Haû mù, Dawiq gi, Apna lé ló nhâng bê nghut mù, Apna gi, ngón za ló bê nghut ri.
Apna Lé Yo-ap Sat Pyâm É Hkyô
22 Haú u lé, Yo-ap eq Dawiq é byu pé gi, gyè ê htîm é mai, wó yu lo é azíng zè myo myo eq dum taû lo bum akô nghut ri. Nghut kôlhang, Apna gi, Dawiq eq rahá Hebron wà má a nyi to lo nghut ri; haî mù gâ le, Dawiq èq yhang lé nhang kat bê nghut mù, yhang gi, ngón za htoq ló bê yánmai nghut ri. 23 Yo-ap eq yhâng htâng châng é gyèzô pé bànshoq bang jé lô kô é hkûn, hkóhkam chyáng Nera é yhang zo Apna lé jé é hkyô lé le, hkóhkam èq Apna lé taû nhang kat bê hkyô lé le, yhang ngón za htoq ló bê nghut é hkyô lé le, Yo-ap lé lhom taî kyô akô nghut ri.
24 Haû mù, Yo-ap gi, hkóhkam chyáng ê mù, “Nàng, haû gi, haî kut bê lhú? Wú aq, Apna gi, náng chyáng lé jé bê wá, nàng, haî mù yhang lé nhang pyâm é lhú? Ahkuî, yhang ló byùq bê nghut ri mhaî! 25 Nera é yhang zo Apna gi, nang lé mhaú zo râ matú le, nàng hkâsu kut wún é lé jó wú râ matú le, nàng kut nyi é jung hkangmó lé wó sé râ matú le, náng chyáng lé jé é hkyô lé, nàng sé râ nghut lhê mhaî.” ga taî ri.
26 Hau htâng, Yo-ap gi, Dawiq chyáng mai htoq ló mù, Apna é htâng má lagyô pé châng nhang kat é nghut mù, lagyo haú bang gi, yhang lé Sira wuì tíng dong mai dum shuî taû lò bekô nghut ri. Nghut kôlhang, Dawiq gi, haú hkyô lé a sé nghut ri. 27 Apna gi, Hebron wà má dum taû jé ló hkûn, Yo-ap gi, yhang lé baú dang nyô râ su kut mù, wà hkum shut shuî wang e ri. Hau htâng, yhang gi, yhang gu Asahela lé sat pyám byî é sui lató hpuq é dông, Apna é wamdau má sham èq htaû hâng kat byî é nghut mù, Apna gi, shi byùq bê nghut ri.
28 Htâng má, Dawiq gi, haú hkyô lé wó gyo jáng, “Nera é yhang zo Apna lé sat pyâm é sui mara gi, haû Yhûmsîng Garaî é hí má, ngò eq ngá é mîngdán htoq má mara hûn jang ahtum abyùq a jòq sháng gàq. 29 Yhâng é sui mara haû gi, Yo-ap chyáng le, yhâng é yhûm bang bànshoq é ahtoq má le, gyó jé sháng gàq! Yo-ap é yhûm bâng chyáng, byìng yùq é, yàpjèq nòlì dàp é, dàng goí dumbáng htuq é, sham èq ajum sat huî é eq zò-mut é byù ayang bo nyì sháng gàq.” ga taî ri.
30 (Yo-ap eq yhang gu Abishai nhiktâng gi, Gibe-on majan má, yhángnhik é yhang gu Asahela lé, Apna èq sat pyám byî é yánmai, Apna lé sat pyám kô é nghut ri.)
Apna Lé Myhup Yhûm É Hkyô
31 Hau htâng, Dawiq gi, Yo-ap eq yhâng htâng châng é byù bànshoq bang lé, “Núngmòq é mèbu lâng cheq pyám mù, jimê tu wùt luî, Apna é matú ngaùhkyûng ngaùyang kut keq.” ga taî ri. Hkóhkâm Dawiq yhang le, nùnghtáng má châng sô tô ri. 32 Yhángmòq gi, Apna lé Hebron wà má myhup yhûm pyám kô é nghut mù, hkóhkâm gi, Apna é lùp nàm má htê mó èq wùt ngau ri; shiwa byù bànshoq bang le, bo wùt ngau bum akô nghut ri.
33 Hkóhkâm Dawiq gi, Apna é matú shî su ga ngaùhkyang sang ri;
“Apna gi, haî mù byù ngòk rayùq shi é su, shî râ dùt byùq lhê lhú?
34 Náng é lòq má le a tuî to,
náng é hkyî má le kyum a hut to nghut ri mhaî.
Nàng gi, agè ashop bâng é hí má shi byùq é sû su, shi byùq bu-nhung!” gâ ri.
Haú hkûn, shiwa byù bànshoq bang gi, dum wùt ngau bùm bekô nghut ri.
35 Hau htâng, shiwa byù bànshoq bang gi, Dawiq chyáng lé lô mù, nyí nghut tô ashî hkûn, rajung jung zo râ matú yhang lé wum byî akô nghut ri; nghut kôlhang, Dawiq gi, “Ngò, buì a wâng shi-má, mùk, a nghut jáng, gótû rajung jung zô é ru nghut le gi, ngo lé, Garai Gasang htân htân dam byi sháng gàq!” ga dâkam ri.
36 Shiwa byù bànshoq bang gi, haú lé myàng kômù, myìt gabú bekô nghut ri; gè gè yhang, gè gè yhang, haû hkóhkâm kut é hkyô bànshoq gi, yhángmòq lé gabú nhik dìk nhang é chyat nghut ri. 37 Haû mù, haú nyí má, shiwa byù bànshoq eq Isira-elaq byù bànshoq bang gi, Nera é yhang zo Apna lé sat pyâm é hkyô má, hkóhkâm a bo lom é lé sé bekô nghut ri.
38 Hau htâng, hkóhkâm gi, yhâng é zaugun wuì lé, “Isira-elaq a-myû má, hkû-nyí, zaugun nghut é eq gyai hkìk é sarhê rayùq shi ló byùq bê nghut é lé, núngmòq a sé kó lhú? 39 Ngò gi, sô kat namngón xû but huî é hkóhkâm nghut kôlhang, hkû-nyí, wum nyhôm byùq mù, haû Zerui-a é yhang zo shí bang gi, ngá é matú wum gyaí htan byùq bekô nghut ri. Haû Yhûmsîng Garai gi, agè ashop hkyô kut sû lé, yhang kut é agè ashop hkyô eq rajung za lató hpuq sháng gàq ô!” ga taî ri.