Ishaboshet Sat Huî É Hkyô
4
Sholuq é yhang zo Ishaboshet gi, Hebron wà má Apna shi byùq bê hkyô lé wó gyo jáng, myìt wum gyuî byùq bê nghut ri; Isira-elaq byù bànshoq bang le, gyùq dan bùm bekô nghut ri. 2 Sholuq é yhang zo Ishaboshet gi, gyè hpúng pê é zau í yùq wó ashî nghut ri. Rayùq é myìng gi, Bana gâ ri; rayùq é myìng gi, Re-kap gâ ri; yhángnhik gi, Ben-yamin up, Berot jowò mâ é Rimon é yhang zô nhiktâng nghut akô. Berot jowò lé gi, Ben-yamin maumyî eq sêng é dông sôn yu akô nghut ri; 3 haî mù gâ le, Berot jowò mâ é byu pé gi, Gitim wà má hpang ê luî, hkû-nyí jé shoq haû má byù bíng dông nyi nyi akô nghut ri.4 (Sholuq é yhang zo Yonahtan gi, hkyî yun é yùqzo rayùq wó ri. Yhang gi, Yezirela wà mai Sholuq eq Yonahtan hpe eq sêng é danglù jé lo é hkûn, chyungxe zànwut ngo zân ru bo ashî nghut ri. Yhang lé gi, hpang é hkûn zo shui su èq bún hpang é nghut ri; nghut kôle, lûm han hpang hkyut luî, yhang lé lhoqhpyit hkyô é nghut mù, yhang hkyî yun byùq é nghut ri. Yhâng é myìng gi, Mehpiboshet gâ ri.)
5 Ahkuî, Berotiq jowò mâ é Rimon é yhang zô nhik Re-kap eq Bana gi, nyí-káng lé, Ishaboshet é yhûm má ê jé akô; yhang gi, nyí-káng lé nô yu nyi ri. 6 Yháng nhiktâng gi, súngsô ê lìk râ su kut mhaú kôluî, yhúmhkaû shut wang ló kômù, Ishaboshet lé, wamdau mai htaû ròt sat pyâm akô nghut ri. Hau htâng, Re-kap eq yhang gu Bana nhik gi, hpang lùt ló bekô nghut ri.
7 Yháng nhiktâng gi, Ishaboshet, yhâng é yhupgòk mâ é yhupgyàp htoq má yhup tô é u lé, wàp hkaû má wang ê kômù, yhang lé htaû ròt sat pyâm é htâng má, yhâng é ulhum lé hpyit chûng kômù, Araba pá mâ é hkyô dông ra-myin mau so bekô nghut ri. 8 Yháng nhiktâng gi, Ishaboshet é ulhum lé, Hebron wà má nyi é Dawiq chyáng yu lò kômù, yhang hkóhkâm lé, “Shî gi, náng é chyungxe lé gyám sû, náng é gyè hpó Sholuq é yhang zo Ishaboshet é ulhum nghut lhê. Haû Yhûmsîng Garai gi, hkû-nyí, nàng ngá yhûmsîng hkóhkam é matú, Sholuq eq yhâng é awùt ashín lé lató hpuq byi bê nghut ri.” ga taî akô nghut ri.
9 Dawiq gi, Berotiq jowò mâ é Rimon é yhang zo Re-kap eq yhang gu Bana nhiktâng lé, “Wuîhke jamjau hkyô bànshoq mai ngo lé hkyi yù Sû, haû Yhûmsîng Garai rû dui nyi é eq rajung za, 10 byù rayùq gi, gabú lùdang ga myìt yù mù, ‘Sholuq shî bê.’ ga ngo lé taí jáng, ngò gi, yhang lé kyaq zuî yù luî, Ziklak wà má sat pyâm é nghut lhê. Haû gi, yhâng é lùdang yánmai, ngò, yhang lé byî é chyûnghuq nghut lhê! 11 Haû jáng, agè ashop su nhik gi, mara a bo é byù rayùq lé, yhâng é yhúmhkaû mâ é yhûmsing é yhupgyàp htoq má sat pyâm é nghut jáng, jé riyhang haú nhik lé sat pyám gíng lhê, a nghut lhí? Ahkuî, ngò gi, yhâng é sui yuichyîn lé núngnhik chyáng bùt mù, núngnhik lé myìdàm htoq mai ge sat pyâm lhê, a nghut lhú?” ga taî ri.
12 Haû mù, Dawiq gi, yhâng é byu pé lé hkunmó hkyô kat é nghut luî, yhángmòq gi, haú nhiktâng lé sat pyám bekô nghut ri. Yhángmòq gi, haú nhiktang é hkyî lòq pé lé hpyit yû luî, gùngdu lé Hebron wà mâ é wuìhtum yàm má tuî lhâng tô akô. Nghut kôlhang, yhángmòq gi, Ishaboshet é ulhum lé gi, yù mù, Hebron wà mâ é Apna é lùp má myhup yhûm pyâm akô nghut ri.