Dawiq Isira-elaq Hkóhkâm Dùt Lo É Hkyô
5
Isira-elaq a-myû up bànshoq bang gi, Hebron wà má, Dawiq chyáng lé jé kômù, “Ngá-mòq gi, náng é suishô pé nghut lhê. 2 Laî ló bê hkûn, Sholuq, ngá-nhûng é hkóhkâm kut nyi é u, Isira-elaq byu pé lé majan pé shuî u sû gi, nàng yhang nghut lhê. Haû mù, Yhûmsîng Garai gi, nang lé, ‘Nàng gi, Ngá é Isira-elaq byu pé lé zúng mù, yhángmòq lé ùp é sû dùt râ nghut lhê.’ ga taî ri.” ga taî akô nghut ri.3 Haû Isira-elaq zaugun sûwún wuî bànshoq bang gi, Hebron wà má Hkóhkâm Dawiq chyáng lé jé kô é hkûn, hkóhkâm gi, haû Yhûmsîng Garaî é hí, Hebron wà má yhángmòq eq dangshikaq tô tô ri; haû mù, yhángmòq gi, Isira-elaq byu pé lé ùp râ hkóhkâm dùt râ matú, Dawiq lé sô kat namngón xû bùt byi bekô nghut ri.
4 Dawiq gi, hkóhkâm dùt é hkûn, chyungxe zànwut sum xê zàn bò bê nghut ri; yhang gi, zànwut myi xê zàn ùp é nghut ri. 5 Yhang gi, Hebron wà má nyì mù, Yudaq mau lé nyhit zan èq lha-mó hkyuq hkyap ùp luî, Yerusalem wà mó má nyì mù, Isira-elaq mau eq Yudaq mau bànshoq lé, súm xe sum zân ùp ri.
Yerusalem Wà Mó Lé Dawiq Sing Yu É Hkyô
6 Hkóhkâm Dawiq eq yhâng é byu pé gi, Yebusi byu pé lé htim râ ga, yhángmòq nyi é Yerusalem wà mó shut yán dòq e ló akô. Haú hkûn, Yebusi byu pé gi, “Shî má Dawiq wó wâng râ a nghut.” ga myìt yu bùm kômù, Dawiq lé, “Nàng gi, shî má ge wàng râ a nghut; myòqjìt bang eq hkyî hten bang lháng, nàng lé lhom wó hkat taû pyám râ nghut lhê.” ga taî akô nghut ri. 7 Nghut kôlhang, Dawiq gi, Zi-un é gingtíng jowò lé wó zân ung yu ri. Haû lé gi, Dawiq é Wà ga myhîng ri.
8 Haú nyí má, Dawiq gi, “Yebusi byu pé lé zân ung yù râ myìt bò sû ó yùq nghut kôle, Dawiq é gyè nghut é, hkyî hten myòqjìt bang lé wó sat pyám shoq, wuì shê dong mai htîm dòq ló ra râ nghut lhê.” ga taî ri. Hau é yánmai, “Myòqjìt bang eq hkyî hten bang gi, hkóhkâm wânghkaû má wó wâng kôrâ a nghut.” ga yhángmòq taî gyó lo akô nghut ri.
9 Dawiq gi, gingtíng jowò haú má nyì mù, jowò haú lé, Dawiq é Wà ga myhîng yu ri. Yhang gi, Miloa jowò mai lhînghkyùq mâ é ahkaû shut má yhûm tsing saí bê nghut ri. 10 Wum-o a-tsam dìk shoq bò Sû, haû Yhûmsîng Garai Gasang gi, Dawiq eq rahá nghut nyi é yánmai, Dawiq gi, wum-o a-tsam je bo lo nyì bê nghut ri.
11 Haú hkûn, Turuq hkóhkâm Hiram gi, lagyô pé lé, kyám gâm sikhtung pé, làksima pé eq lùqgòk lòqmú zui bang le mù, Dawiq chyáng nhang kat é nghut luî, haú bang gi, Dawiq é matú hkóhkâm wâng saí byî akô nghut ri. 12 Haû mù, Dawiq gi, yhang lé, haû Yhûmsîng Garaî èq, Isira-elaq byu pê é hkóhkâm dông lhoq gingtîng to mù, yhâng é Isira-elaq byu pê é matú, yhâng é mîngdán lé wàq toq to bê nghut é lé sê ri.
13 Dawiq gi, Hebron wà mai htòt é htâng má, Yerusalem wà mó má nyì mù, myi-ngê pé eq myi-mó pé dum yu jàt luî, yùqzo byìzô pé dum hku jàt bê nghut ri. 14 Yerusalem wà mó má yhang wó é zoshâng wui é myìng gi, Shamu-a, Shobap, Nahtan, Sholumon, 15 Ibara, Elishu-a, Nehpek, Yahpi-a, 16 Elishama, Eli-ada eq Elihpelet pé nghut akô nghut ri.
Hpilisiti Byu Pé Lé Dawiq Ung É Hkyô
17 Dawiq gi, Isira-elaq byù bànshoq bâng é hkóhkâm kut râ matú, sô kat namngón xû bùt hui bê nghut é hkyô lé, Hpilisiti byu pé wó gyo kôjáng, yhángmòq bànshoq bang gi, Dawiq lé hô râ matú chôm dòq e ló bum akô; nghut kôlhang, Dawiq gi, haú hkyô lé wó gyo luî, gingtíng jowò má gyó ê bê nghut ri. 18 Hpilisiti byu pé kúm gi, lé lô mù, Rehpim Langhkaû má lé byíng tô bum akô nghut ri. 19 Haû mù, Dawiq gi, haû Yhûmsîng Garai lé, “Ngò, Hpilisiti byu pé lé ê htim râ lhú? Nàng gi, yhángmòq lé, ngá é lòq má àp byi râ lhú?” ga myî ri.
Haû Yhûmsîng Garai gi, yhang lé, “Ê àq; Ngò, Hpilisiti byu pé lé, náng é lòq má teng za àp byi râ nghut lhê.” ga tû taî ri.
20 Haû mù, Dawiq gi, Balaq Perazimb jowò má ê mù, yhángmòq lé haû má ê zân ûng bê nghut ri. Haû mù, yhang gi, “Haû wuìwúm wúm lo é su, Yhûmsîng Garai gi, ngá é gye pé lé, ngá é myòq hí má htîm sat kyop pyám byi bê nghut ri.” ga taî ri. Hau é yánmai, jowò haú lé, Balaq Perazim ga myhîng ri. 21 Hpilisiti byu pé gi, yhángmòq é hparà lhô pé lé, jowò haú má tô pyâm to kô é nghut mù, Dawiq eq yhâng é byu pé gi, haú pé lé tsing yu pyám byî akô nghut ri.
22 Haû Hpilisiti byu pé gi, Rehpim Langhkaû má radàm dum dòq lé kômù, hau má lé nyi byíng tô bum akô nghut ri. 23 Haû mù, Dawiq gi, Yhûmsîng Garai lé myî wú jáng, Yhûmsîng Garai gi, yhang lé, “Díng díng a dòq e é za, nùnghtáng dông yhángmòq lé koî luî dòq ê mù, htángmó sikgâm yò tû-tap mai ê dòq htim keq. 24 Htangmó gâm ahpyo pé má gyè jùm yán lé lo é htê lé wó gyo kôjáng, htim râ matú htoq ê lo keq; hkâsu mù gâ le, Yhûmsîng Garai gi, Hpilisiti gyè jùm lé sat kyop pyám râ ga, náng é hí má htoq e ló é nghut ri.” ga tû taî ri. 25 Haû mù, Dawiq gi, Yhûmsîng Garai mai yhang lé hkunmó hkyô é eq rajung za kut luî, yhang gi, Hpilisiti gyè jùm lé, Gibe-on mai Gezera jé shoq châng sat kyop pyám bê nghut ri.