Sàksé Dò Lé Yerusalem Wà Mó Má Wàq Yu É Hkyô
6
Dawiq gi, Isira-elaq byu pé mai hkyin htoq yu é byù bànshoq sûm mun lé radàm dum shuî tsîng yu ri. 2 Yhang gi, yhâng é byu pé bànshoq bang eq rahá, sàksé dò mâ é hkerubima gyoro má zung é, Wum-o a-tsam dìk shoq bò Sû Yhûmsîng Garaî é Myìng ga wùt é, Garai Gasâng é sàksé dò lé, Balaq Yudaqb wà mai htòt yù râ matú, htoq e ló akô nghut ri. 3-4 Yhángmòq gi, haû Garai Gasâng é sàksé dò lé lhêng sik má ke luî, kong htoq mâ é Abinadap é yhûm mai htô htoq yu akô; Abinadap é yhang zo Uza eq Ahi-o nhiktâng gi, Garai Gasâng é sàksé dò htô tô é lhêng sik haú lé kôn akô nghut ri. Yhángmòq gi, haû Garai Gasâng é sàksé dò htô é lhêng sik lé, kong htoq mâ é Abinadap é yhûm mai htô htoq yû kô é hkûn, Ahi-o gi, sàksé dò hau é hí má sô tô ri. 5 Dawiq eq Isira-elaq a-myû wuî lhúnglhâng bang gi, tíng pé, tíng góng pé, chapchéng pé, zìngtaú pé, he myhîng jung pé eq ut zo pé lé, htân htân bàt myhíng luî, haû Yhûmsîng Garaî é hí má wum kat ngón poî kut akô nghut ri.6 Yhángmòq gi, Nahkon é chyârâng má jé kô é hkûn, nohtô nhik nâng chot nhûn kat é yánmai, Uza gi, haû Garai Gasâng é sàksé dò lé ê zuî kat ri. 7 Haû mù, Yhûmsîng Garai gi, Uza kut shut é marâ é yánmai, yhang lé nhikjum yo bê nghut ri; haû mù, Garai Gasang gi, yhang lé shî dam byi luî, yhang gi, Garai Gasâng é sàksé dò nàm má shi byùq bê nghut ri.
8 Haú hkûn, Dawiq gi, Yhûmsîng Garai nhikmó-yô é èq Uza lé sat pyâm é yánmai, myìt a ngón dùt nyi ri; haû mù, jowò haú lé, hkû-nyí jé shoq Perezi Uza ga myhîng akô nghut ri.
9 Haú nyí, Dawiq gi, haû Yhûmsîng Garai lé gyùq luî, “Haû Yhûmsîng Garaî é sàksé dò gi, ngá chyáng hkâsu kut wó jé lô râ lhú?” gâ taî ri. 10 Haû mù, yhang gi, haû Yhûmsîng Garaî é sàksé dò lé, Dawiq é Wà má a yu ló naû luî, Giti byù Obet Edom é yhûm má shèq wàq ló ri. 11 Haû Yhûmsîng Garaî é sàksé dò gi, Giti byù Obet Edom é yhûm má lha-mó sum hkyap jòq tô é nghut mù, Yhûmsîng Garai gi, Obet-Edom eq yhâng é yhûmbyù wuì bànshoq bang lé shimân byî ri.
12 Ahkuî, Hkóhkâm Dawiq lé, “Garai Gasâng é sàksé dò é yánmai, haû Yhûmsîng Garai gi, Obet Edom é yhûmbyù wuì eq yhang wó é bànshoq lé shimân byi bê nghut ri.” ga taî kyô akô. Haû mù, yhang gi, ê luî, haû Garai Gasâng é sàksé dò lé, gabú myìt èq Obet-Edom é yhûm mai Dawiq é Wà shut wàq dòq ló bê nghut ri. 13 Haû Yhûmsîng Garaî é sàksé dò wàq bang gi, hkyîbyè hkyuq byê che jáng, Dawiq gi, nohtó radu eq xu myum é no zo radu lé hkungga nhông byî ri. 14 Dawiq gi, nú nhâm é hkyangjong bu-kó wùt chûng luî, yhâng é wum-o bànshoq èq haû Yhûmsîng Garaî é hí má gó nyi ri. 15 Haú dông, Dawiq eq Isira-elaq byu pé bànshoq bang gi, gabú garu htê eq tut htê pé le mù, haû Yhûmsîng Garaî é sàksé dò lé wàq dòq lo akô nghut ri.
16 Dawiq é Wà má, haû Yhûmsîng Garaî é sàksé dò wang lo nyi é u lé, Sholuq é yhang zo byìzo Mihkala gi, hkohot mai wú kat le, Yhûmsîng Garaî é hí má, Hkóhkâm Dawiq, byam chyû lhê, gó nhûn lhê kut nyi é lé myàng mù, yhâng i-myìt hkaû má, yhang lé ihkyet wú rung bê nghut ri.
17 Yhángmòq gi, haû Yhûmsîng Garaî é sàksé dò lé yu lò kômù, hau é matú Dawiq saî to byî é zúm ahkaû mâ é jowò má tô tô akô; hau htâng, Dawiq gi, haû Yhûmsîng Garaî é hí má, myi nyhé hkungga pé eq zùmhkaû hkungga pé lé nhông byî ri. 18 Yhang gi, myi nyhé hkungga pé eq zùmhkaû hkungga haú pé lé ban nhông byî é htâng, Wum-o a-tsam dìk shoq bò Sû Yhûmsîng Garaî é myìng lang luî, shiwa byu pé lé shimân byî ri. 19 Hau htâng, yhang gi, zîng tô é Isira-elaq byù myiwe yùqgè yùq hkangmó lé, mùk ralong long, sho rahkyí hkyí eq tsibyiq shi kyuq ralong long tsing gàm byî ri. Hau htâng, shiwa byù bànshoq gi, ó le ô é yhûm shut ló bùm bekô nghut ri.
20 Dawiq gi, yhâng é yhûmbyù wuì lé shimân byi râ matú, yhûm shut taû lo é hkûn, Sholuq é yhang zo byìzo Mihkala gi, Dawiq lé lé htoq hui mù, “Hkû-nyí, Isira-elaq hkóhkâm gi, myìt a bò, me hoq a sê é byù su, yhûmsing é mèbu lé le a gôn é za, yhâng é duìnhâng zoshâng wui é jùn myhí pê é hí má mèbu hkyut shang pyám luî, hkâ-í yhang xânghpoq nge wó pyám bê hkaî ô!” ga yhang lé taî ri.
21 Haú hkûn, Dawiq gi, Mihkala lé, “Haû gi, Yhûmsîng Garaî é hí má gó é ru nghut lhê; Yhang gi, náng wa eq yhâng é i-kun byù bànshoq bang mâ é hkyîn râ malaî, ngo lé hkyin yù luî, Yhûmsîng Garaî é Isira-elaq byu pé lé ùp râ zau ayá byî tô é nghut ri. Haû mù, ngò gi, Yhûmsîng Garaî é hí má gó râ nghut lhê. 22 Ngò gi, shi htoq lháng mun lhoqyôm shirâ nghut mù, ngá é myòq hí má, ngá gûng ngò gùng-yui é je hui nhâng shirâ nghut lhê. Nghut kôlhang, nàng taî é jùn myhí haú bang gi, ngo lé hkya-on wàq toq bûm shi kôrâ nghut lhê.” ga taî ri.
23 Sholuq é yhang zo byìzo Mihkala gi, yhang shi é buìnyì jé shoq zo a wó nghut ri.